Nuntaak Na Thu Siangtho.

PASIAN TEEL DING LIM KI LAHNA.

1. Ka kum (17) ka phak laitak, Tediim khua ah Nuam Dim kici numei khat a om hi.

2. Tua Nuam Dim in, "Khamtung mite nuntaak na ding lim ki lahna, Pasian in thu hong pia hi," cin-in a hun a hun in thu a ngah hi.

3. Ka pu Khua Cin in, Tediim khua ah ukpi sem in a maan laitak ahi aa, Tediim khua in Khamtung gam ah khuapi lian khat ahi hi.

4. Nuam Dim in, "Tedim khua sungah mipil tampi om ahih hangin Pasian in, Pau Cin Hau deih hi," cin-in thu hong ki langhsak hi.

5. Tua hun laitak in, ka pu Khua Cin in langvaa inn a deih hi.

6. Tua langvaa inn a deih na hangin, Pasian in Nuam Dim tungah thu ki langh khia sak aa, "Khua Cin in langvaa inn deih kei hen.

7. Langvaa inn a deih leh a ta Hau Za Kham ka la ding hi.

8. A nu Ciin Ngul ka lading aa, Khua Cin ka inn gamh sak dinghi.

9. Tua khit ciangin Tediim khua ka mang sak dinghi," cin-in thu a pia hi.

10. Nuam Dim thu gen te Pu Khua Cin in a zaak ciangin heh aa, Nuam Dim a theih a heek tam hi. 

11. That unla, Tuipi biakna an lawh khat ih sunna, dim ciat gataam a pa Hau Zui pia un," a ci hi.

12. Pu Khua Cin in Pasian thu piak te mang nuamlo in, langvaa lei na ding saiha tampi Meitei gam ah a puak hi.

13. Saiha tampi Meitei gah ah a puak hangin, langvaa dal khat bek Tediim khua ah hong tung hi.

14. Tua bang in Khua Cin a pau siatna leh a gamtatna te Pasian heh aa, Nuam Dim tung ah, "Kei-in, Khua Cin aa ki pan a zawng a hau nutaak na ding ka hong bawl hi.

15. Tua a hih ciangin Khua Cin in ka thu hong manglo a hih leh, a ta Hau Za Kham leh a nu Ciin Ngul kala dinghi.

16. Tua khit ciangin Khua Cin ka inn gamh sak ding aa, Tediim khua ka mang sak dinghi," ci-in thu a pia hi.

17. Pasian kamciam sa mah bangin, a sawtlo-in Pu Khua Cin tapa Hau Za Kham hong si takpi hi.

18. Hau Za Kham ki vui hun maa in, Pasian in Nuam Dim tungah thu a pia hi.

19. "Khua Cin tuangdung, dawhsuk dawh phei ka kuaitan ding hi.

20. Ka kuaihtan leh Tediim khua a mang ding aa, ka kuaihtan kei leh Tediim khua a mang kei dinghi," ci-in thu a pia hi.

21. Tua ciangin Nuam Dim in,"Pau Cin Hau aw, Pasian in Hau Za Kham ki vui ni ciangin, Khua Cin tuangdung dawhsuk dawhphei ka kuai tan ding hi, ci a hih manin tuangdung tungah kuamah tuang kei un, ci-in a laangkhet ni ciangin hilh in," ci-in hong sawl hi.

22. Hong sawlna mah bangin, kua mah zahtaak lo-in ka hilh hi.

23. Tua bangin Pasian thu piakna te ka gen hangin kua mah in hong umlo thamlo in, "Khua Cin tuangdung zabo aa sah, Pasian a hi zongin kuaitan zo ngal ken teh," cin-in hong nial uhhi.

24. Pasian hong thu piakna ka um aa, misi ki vui ni ciangin a khaamna tuangdung tungah ka tuang ngam kei hi.

25. Innka tauta tungah ka om laitak in misi hong ki pu suah aa, bikhala'ap hong tung hi.

26. Uksung aa thau om khempeuh ki lawn in a gin ziazua latak, keekkia vanpi mau bangin hong ging aa, dawhsuk ki tan in zu beel te leh mi tampi innnuai sial buanciim lak ah a kia suk uhhi.

27. Hih thu teng khit ciangin, mikang te in khamtung gam hong sim uh aa, Tedim khua mei tawh hong hal uhhi.

28. Khua mite khuakiim khuapaam ah gal taai in ki lal khia aa, Pasian gensa mah bangin Tedim khua tawl khat a mang takpi hi.

29. Pu Khua Cin te innkuan zong Tedim khua pan in Vanglai khua ah a teen hunsung in, Pu Khua Cin nu Pi Ciin Ngul a si hi.

30. Vanglai khuapan in Tualzang khua ah hong lal aa, Pi Ciin Ngul luang Tualzang khua ah ki vuui hi.

31. Pu Khua Cin in Tualzang khua pan in Ngennung khua ah hong lal leuleu aa, Ngennung khua ah Pu Khua Cin a si hi.

32. Pu Khua Cin a sih ciangin Pu Hau Cin Khup in Tonzang khua ah pua in a vuui hi.

33. Pu Khua Cin in tapa dang neilo a hih manin a sanggam pa Hau Pum tapa Pu Hau Cin Khup in a gamhluah aa, Pasian ciamsa bangin Pu Khua Cin a inn gamh hi.

NUNTAAKNA THU SIANGTHO (1)

Khamtung Mite Nuntaakna.

1. Pasian in Tediim khua ah ka teen laitak in, keimah Pau Cin Hau tungah thu hong pia hi. Pasian kammal hong thu piakna in, "Pau Cin Hau aw, Khamtung mite na nuntaakna uh lung nuntaakna zong ban zolo hi. Tua a hih ciangin leitung mite lak ah, kong sawl bangin thu na hilh ding hi," ci-in Pasian in thu hong pia hi.

2. Pasian hong thu piakna in, "Khamtung mite in na khua-ul uh leisung tongh khat tum dong aa, lo na khawh uh hangin na kham kei uhhi.

3. Tua ahih ciangin ka thu saingtho leh ka thupha zong zu-un, " cin-in thu hong pia hi.

NUNTAAKNA THU SIANGTHO (2)

Thu Paikkik

1. Hong thu piak kikna ah, "Mivom mikang khedap aa kipan ka hilh manin, tu in a leeng thei zo hi. Tua a hih ciangin vantung thusiangtho phatakpi in zui un. Tua hi leh Khamtung na leeng thei ding uhhi, hong ci hi.

2. Tu aa kong thu piak teng nong zuih kei uh leh vanpi luumnih luum thum in hong luum ding aa, leipi luumnih luum thum in hong luum dinghi. Mualpi hong cim ding aa, min pi hong cim dinghi, Tuuk hong taam ding aa, maau hong taam ding hi.

3. Tua teng thu hong pian khit ciangin nong zuih kei teitei uh leh a tawpna ciangin kial hong tung ding aa, na tuinaak uh gu hong suak dinghi," a ci hi.

4. Pasian hong thupiakna te mi khempeuh thu ka hilh hi. Mite in Pasian thu ka hilhna hong mang ding thamlo, Pasian a thei kua mah a om nai kei hi.

5. Tua bangin Pasian thu hilh dingin ka ki pat laitak in, ka ki'im ka ve'el, ka beh ka phung te in, "Nang, Pau Cin Hau mi hai, nang bang mah thei kei ni teh," ci-in hong simmawh in hong kawk uhhi. Hong ki simmawh bek thamlo in, thah ding dong in hong ki sawm hi.

6. Hih ka thu hilhna kua mah in hong umlo aa, a om laitak inkiapi leh natpi hong tung aa, a khua a khua pan in, "Pau Cin Hau thu gen maan hi dinghi," ci-in ka thu hong dongh uh hi.

NUNTAAKNA THU SIANGTHO (3)

Hong Hopih Kik

1. Keimah Pau Cin Hau in, Pasian hong thu piak khit kum sawm leh nga ka nat laitak in, ka lungkham mahmah ahih manin gam sungah a ki kap lum ding in ka pai khia hi.

2. Tua ka ki kap lup na ding mun ka tun ciangin awging khat ka za hi. Tua awging in, "Pau Cin Hau aw, na ki kap lum kei in. Na pumpi na bawlsiat uh leh mawh na hi," hong ci hi.

3. Tua awging ka za'ak khit phet in ka mai-ah sakhi tal khat hong om aa, keimah leh keimah ka ki kap lup nading aa, ka thau puak tawh kap loh theihloh dingin ka lungsim ka ngaih sutna ka pumpi tungah hong piang aa, tua sakhi kap in ka man hi.

4. Ka ki kap na ding aa ka puak thauvuui kap khat bek tawh sakhi kap zo ka hih manin ka ki kap lup na ding, thau vuui leh thautang a bei aa inn ah ka ciah hi.

5. Inn ka tun ciangin ka nu Cing Zam in, "Kata aw, nang si ding aa om kim lai sa na hong puak," ci-in lungdamna tawh kha sia mahmah in a hong dawn hi.

6. Tua ka ki kaplup theihloh na leh awging inn ka tun ciangin ka ngaih sun aa, "Pasian in na pumpi uh na bawlsiat uh leh mawhna hi," ci-in hong genna thu ka phawk kik hi.

NUNTAAKNA THU SIANGTHO (4)

Vantung Thu Hilhna

1. Pasian in hong thu piak khit ciangin, leizang laaipi khat ah mivom mikang mi namcin, ki khawm ka mu hi. Tua laitak in mi lian khat ka mu aa, Pasian hi, ci-in ka thei hi.

2. Tua Pasian in, ni sakol in a nei aa, kei kaingah hong pai hi. A sakol van ka et ciangin a sakol van khempeuh lamdang mahmah in a taang hi.

3. Tua mi hon te kaingah, "En un," ci-in ka kiko aa, "Hih Pasian gen khempeuh ih zui dinghi," ka ci hi. Kua mah in tua Pasian a en ngam kei aa, lei lam en in a ku'un ciat uh hi.

4. Tua Pasian in kei hong sam aa, "Pau Cin Hau aw, en in, ka thu hong mang lo te leh mawhna tawh a ki ciam te hi bangin ka bawl hi," ci-in a khut veilam in pasal khat a luzang humsip pan in a khai hi.

5. Tua Pasian in a khut veilam nga, a taklam nga a ki gawm in sawm a nei hi. Tua khut sawmnei pa in, kei hong sam aa, "Pau Cin Hau aw, kei tungah thu hong ngen in," hong ci hi.

6. "Hong koi ci nget ding ka hi hiam,?" ci aa ka dot ciang in, "Van leh lei a bawl, ni leh kha aksi te a bawl, mihing ganhing a bawl Pasian, cinatna a damsak thei Pasian aw, ci-in hong ngen in," hong ci hi.

7. Kua mah in, tua Pasian a en ngam kei hi. Tua laitak in, kei-in thu ka hilh hi. Ka thu hilhna in, "Leitung mihing te aw, hih Pasian in si hen a cih te si aa, hing hen a cih te hing a hih ciangin, hih Pasian gen bangbang ih zui dinghi," ci-in thu ka hilh hi.

8. Tua pan kipan in ei khamtung mite aa dingin, Pasian tungah thu ngetna hong piangkhia ahi hi.

NUNTAAKNA THU SIANGTHO (5)

Siangsawn Gamnuam

1. Pasian in a maa tungah thu nget na ding thu hong piak khit ciangin a nuai aa bang in ka mu hi.

2. A nuam mahmah munzang laaipi khat ah mivom mikang minam khempeuh a om ka mu hi. Tua mi hon ki khopna ah kei zong ka pai hi.

3. Tua mi hon te tung van pan in vantung vangliatna vangtaang khauhual hong ki khung suk hi Tua vangliatna vangtaang khauhual in, vantung Pasian siangsawn gamnuam Pasian innpi tawh ki zom hi.

4. Tua vangtaang khauhual in, vantung pai na vangliat na keenlei tawh hong ki khungsuk in taanna lamdang a nei hi.

5. Tua vangliatna vangtaang khau hual zui-in, vantung Pasian kiangah a pai ding mi tampi tak a ki dem uhhi. A hih hangin mi khat beek a kah zo a om kei hi.

6. Mi tampi khat beek a kah zawh loh ciangin, kei kah dingin ka ki thawi hi. Ka kah ding ciangin, Pasian kiangah thu ka ngen hi.

7. Tua ka thu ngetna in, "Vantung aa om ka Pa Pasian aw, leitung aa om na sawltaak keimah na Tapa Pau Cin Hau in, leitung mihing te aa ding ka sepzawh na ding leh na vang limpi ka lah zawh na dingin, na vantung siangsawn gamnuam ah kong kah to dinghi," ci-in ka ngen hi. Ka nget khit ciangin ka kah leh ka kah zo hi.

8. Ka kah tohna vantung a thuap Pasian saingsawn gam dong, thuap sawmthum a pha hi. Tua a thuap tuamtuam te ah minam tampi a om ka mu hi.

9. Tua bangin ka kahto aa, Pasian omna siangsawn gamnuam ka tun ciangin vanmisiangtho kua mah a om nai kei hi. Tua Pasian siawngsawn gamnuam vangtaang in a nopci mahmah hi.

10. Tua khit ciangin lei-ah ka kumkik aa, ka ki pat cilna munzaang ka tung kik hi.

11. Tua mihon te kiangah, "Lung hi mawh kei un, note aa ding Pasian siangsawn gamnuam ka mu zo hi," ci-in thu ka hilh aa, a mau te zong a nuam mahmah uhhi.

12. Tua mun pan in lei sungah, khauhual khat a tumsuk ka mu leuleu hi. Tua khau hual zui-in ka kum suk leh leinuai a thuap sawmli ciang ka tung hi.

13. Leinuai thuap sawmli ka tun caingin, tua khauhual zui-in ka kahto kik aa, ka ki pat na munzaang  ka tung kik hi. Tua ciangin leisung aa tum suk khauhual ka dokto aa, ka kaingah ka cian leh ka dintan nih sa'ngin a saangzaw hi.

14. Tua teng khit ciangin, vantung thuap sawmthum pha hi, leinuai thuap sawmli pha hi, ci-in ka thei hi.

15. Tua ciangin mi honte kaingah, "Ei leitung mihing te aa dingin, Pasian in a siangsawn gamnuam hong lak zo hi. Lung hi mawh kei un, dahmai tawh om nawn kei un. Dawi mangpa hong zolna khauhual, ka dok khia khinzo hi.

16. Kua mah peuh in na hahkat peuh le uh teh, dawi mangpa tawh ki peel-in, Pasian siangsawn gamnuam na ngah ding uhhi," ci-in thu ka hilh hi.

17. Tua bang thu, mite kiangah ka gen hi. Tua bang aa ka gen thu mite in a za'ak ciangin, hong up lohna a gol semsem hi.

NUNTAAKNA THU SIANGTHO (6)

Vantung Minam Lai

1. Pasian in vangtung gam pan hong kumsuk aa, "Pau Cin Hau aw, lai sin in," ci-in hong sawl hi.

2. Tua ciangin a mah in laibu khat a tawi hi. Tua laibu tungah suangtang neu pawlkhat koih aa, gawmzel in a khen zel hi.

3. "Hih ka suangtang bawl bangin na bawl thei ding hiam,?" ci-in hong dongh hi. Kei-in, "Ka bawl thei mah dinghi," ci-in a maa bawl bangin ka bawl leh ka bawl thei hi.

4. Tua bangin ka bawl theih khit ciangin laibu khat hong pia hi. Tua laibu hong piak khit aa ki pan in, ka lungsim sungah Pasian hong hilh mah bangin hong piangkhia aa, sun leh zan in ka ih mu thei kei hi.

5. Tua bangin lai vive bek ngaihsun in om ka hih manin, a aw ding leh a mal ding ka lungsim sungah hong piangkhia aa, kum nih khit ciangin tua lai ka bawl thei hi.

NUNTAAKNA THU SIANGTHO (7)

Kum (8) Dawi Demna.

1. Ka pa Pasian in, "Pau Cin Hau aw, kum giat sungah leitung aa, a nungta ganhing khempeuh a zu a va, miksi thovaai na that thei kei dinghi," ci-in thu hong pia hi.

2. Tua Pasian hong thu piakna bangin kum giat tawntung a zu a va, miksi thovaai ka that ngam kei hi. Pasian hong thu piakna bangin kum giat khit a kum kua na ah Pasian in, "Pau Cin Hau aw, tu-in kum giat sungah ka tu ka ta leitung mihing, dawi te in tampi hong that hi.

3. Tu in ei vantungmi te in mihing genloh in a zu a va, miksi thovaai aa ki pan ganhing kheumpeuh kumgiat sungah ih that kei hi.

4. Tua a hih ciangin tu aa dawi te tawh ih ciamna, dawi te in ciampeel aa, mihing tampi hong that ahih ciangin, tu in dawi te zu leh sa na piakna uh na pia nawnkei ding uh aa, na hawlkhia ding uhhi," ci-in Pasian in dawi hawlkhiat na ding thu hong pia hi. Tua thu hong piak aa kipan in, dawi a gol pen pusa pan ki pan a neu pen dong ki phiat hi.

NUNTAAKNA THU SIANGTHO (8)

Pasian Ni Zuihding Thupha

1. Pasian in dawi biak loh na ding thu hong piak khit ciangin, a maa nipi ni zuih ding thupha hong pia hi.

2. Ka nipi ni-in ka na sepna te na siasak kei un. Na siatsak uh leh no te zong, na sia kha ding uhhi. Kei maa nipi ni aa ding, thupha kong pia hi.

3. Banghang hiam na cih uh leh dawi te in, nipi ni in leitung mihing te mawhna a zong hi.

4. Tua a hih ciangin keimaa nipi ni in, na khua-ul uh na suaksak kei un. Nahteh pan kipan, singkung lopa na sisak kei un. Ganhing, na sisak kei un. Na neihsa , na paaikhia kei un. Mi tawh ki nialna kam, na zangh kei ding uhhi.

5. Hih kong thu piak teng na siatsak uh leh dawi te in, Pasian thu khaam mang lo  hi, ci-in na sin na lung uh hong ne aa, mihing kong suaksak kik nuam a hi zongin, bawl na ding haksa mahmah hi.

6. Tua a hih ciangin kei maa nipi ni-in, ka min hong phat ta un," hong ci hi.

NUNTAAKNA THU SIANGTHO (9)

Tapa 7 Leh Mihing 11

1. Laipian khit kum guk ciangin, Pasian in thu hong pia hi. 

2. "Pau Cin Hau aw, lai phel nih na keem in.

3. Tua khit ciang in ka min nong phat na dingin, Zum na lam dinghi. Tua Zum, dei thum in na dei-in. Na Zum phaitam ah, sikkhau mung na phut in. Tua sikkhau Sanginn Zum sungah, na tumsak dinghi.

4. Vantung gamnuam hangin, na hiang ah vasa note hong tuang dinghi.

5. Khatna thu pan in, Tapa sagih na nei dinghi. A nihna thu pan in, mi hing sawm leh khat na ciamteh ding hi.

6. Leitung kata kong piansak zawh, kum 9006 a pha zo hi.

7. Tu-in ka ta aw, khamtung gam a vekpi-in mittaw leh khelbaai in om a hih ciangin, tuate honkhia dingin leitung ah ka thu hilh in kong sawl hi.

8. Mite in Topa hong ci a hih hangin, nang in Pa nong ci dinghi" hongci hi.

9. Tua teng thu hong piak khit ciangin, meeingo tawh ki bang in vantung ah a kahto hi.

NUNTAAKNA THU SIANGTHO (10)

Pian Leh Khan Ki Khek Ding.

1. Pasian hong hilhna bangin leitung mihing te in, a theih zawh loh ciangin Pasian in thu hong pia hi.

2. "Pau Cin Hau aw, leitung mihing te a pian leh a khan ki khekna dingin, ka Ngun inn leh ka Kham inn en in," ci-in hong sawl hi.

3. Tua te ka etna ah ka mai ah khat hong lak zel aa, khat hong lak zel hi. Tua bangin khat hong lah khit ciangin, a sengh pahpah hi.

4. Tua khit ciangin, meileeng tambaw hong lak hi. Tua laitak in meileng tembaw ka muh ngeiloh a hih hangin, tu hun ciangin meileng tembaw hi, ci-in ka thei hi.

5. Tua na lamdang tampi te, ni khat tawntung hong lak hi.

6. Tua na lamdang te hong lah khit ciangin, mi pawl khat in kei thah dingin hong sawm uhhi. Tua mihing te in Pasian mai khak dawi mangpa sawltaak hi, ci-in ka thei hi.

7. Tua mite lak ah, mikang mi pawl khat a om hi. Tua mi te in kei thah dingin hong sawm laitak in, leizang munkhat ah ka om hi. Tua thah ding hong sawm te, nihnih thumthum in hong pai hi.

8. Tua bangin hong pai ciangin, "Puk in," ci-in ka sawl leh a puk pahpah hi. Tua laitak in ka ngaihsutna ah, "Pasian in a maa ta'ang in vangliatna hong pia hi," ci-in ka ngaihsun hi.

9. Tua bangin ni khat tawntung, hong mu sak leuleu hi. Kei that dingin hong pai te a bei khit ciangin, suang sakol a ki siam zolo hong pai aa, ka kiang hong tun ciangin tai kik in, ka muh khopna a tun ciangin, leivuui suak in a mang hi. Tua suang sakol te, a hong pai ding a om nawn kei hi.

10. Tua khit ciangin, suang milim te hong pai hi. Tua suang milim te suang sakol mah bangin, ka kiang hong tun ciangin tai kik aa, leivuui suak in a mang hi.

11. Tua suang milim te leh suang sakol te kei that dingin hong pai ahi kei hi. Kei zong amau te sihna ding leh pukna ding Pasian hong piak vangliat na tawh thah dingin ka ngaihsun kei aa, ka en mawk hi.

12. Tua khit ciangin Khamtung mi khempeuh hong pai-in a bei khin pah hi.

13. Tua teng hong lah khit ciangin, a dang hong lah te ka en nuam nawn kei hi.

14. Vantungmi khat in mai ah a le'ng thei na khat tawh hong lak aa, ka mai ka hum hangin hong mu sak teitei hi. Sawt veipi ka muh khit ciangin ka mit kham aa, ka muh nop nawnloh manin inn sung leh inn pua ah ka pai kawikawi hi.

15. Ka mai ka phiat hangin sun thum leh zan thum tawntung hong musak hi.

16. A dang mi pawl te khempeuh khatvei puk in a bei khin pah aa, a nung ciangin ka muhsa mi pawl, khat beek a om nawn kei hi.

17. Tua khit ciangin mikang te nga vei puk in a bei hi. Mivom te sawmvei puk in a bei hi.

18. Tua teng khit ciangin kei aa ki pan a omlai teng, keen leh keen ki kal nuai ah ka om uhhi. Tua ciangin mihing bangzah om lai hiam, ci aa ka et leh kei lam ah mihing li ka mu hi. A lang lam ah mihing sagih ka mu hi.

19. Tua laitak in puan ka silhei uh aa, leivuui baang tawh ki bangin ka ci tung uh a puang hi. Kei leh tua mi pawl te kikal ah mualneu khat in hong hal aa, tua khit ciangin ka ngeina bangin ka om kik aa, bangmah ka mu nawn kei hi.

NUNTAAKNA THU SIANGTHO (11)

Lungsim Khua Zaakna.

1. Kei in Pasian kiangah, "Vantung vaihawmna bang ci bangin na vaihawm uh hiam," ci-in ka dongh hi.

2. Pasian in, "Pau Cin Hau aw, ko vantung gam ah leitung mihing te bangin, thu tawh vaihawm ka hi kei uh hi. Mitphiat tawh na sem vaihawm ka hi uhhi," ci-in hong gen hi.

NUNTAAKNA THU SIANGTHO (12)

Vantung Siangsawn gamnuam.

1. Pasian in thu hong pia hi.

2. "Pau Cin Hau aw, vantung Pasian gam en kawi kawi-in," ci-in hong sawl hi. Tua hong sawlna bangin, ka nungzui ka sawltaak te tawh ka pai uh hi.

3. Vantung Pasian gamnuam ka tun uh ciangin, Pasian siangsawn gamnuam leh dawi gamgi hi, ci-in luipi khat in a dei hi.

4. Tua a ki deina mun ka tun uh ciangin, Pasian gamnuam lam a kici in ni suak lah hilo in vangtaang aa, taanna lamdang tawh taang in a nopci mahmah hi. Dawi gam lam a ki ci pen khuamial bangin ka mu hi.

5. Tua ciangin ka nungzui te kiangah, "En un, Pasian gamnuam leh dawi gam hi bang ahi hi," ci-in thu tampi ka hilh hi.

6. Ka thu hilhna ah, "Pasian thu na zuih kei uh leh dawi gam khua mialna sung, na tun khak ding uh lau huai ka sa hi," ci-in ka nungzui te lak ah ka gen hi.

7. "Leitung ah na om lai teng un, mi heh na dingin na gamta kei un. Zuau thu tawh, mi na zo nuam kei un. Mi neihsa, na guksak kei ding uhhi.

8. Bang hang hiam na cih uh leh mite na heh sak uh mah bangin, mite in no te hong heh sak dinghi.

9. Zuau thu tawh mi na zawh uh leh na zuau na uh mah bangin, mite in a hong zo ding uhhi.

10. Mi neihsa na guksak uh leh mite in zong nang neihsa a gu ding aa, Pasian deihna tawh ki lehbulh gamtatna a suak ding thamlo-in, leitung na nusiat hun uh a tun ciagnin, tu aa dawi gam khuamial na muhna uh, na tun khak ding uh lauhuai hi," ci-in ka nungzui te tungah ka gen hi.

NUNTAAKNA THU SIANGTHO (13)

Leitung ka tung kik

1. Pasian in thu hong pia hi.

2. "Pau Cin Hau aw, vantung siangsawn gamnuam na mu zo hi. Tu in leinuai na en leuleu dinghi," ci-in hong sawl hi.

3. Hong sawlna mah bangin, leinuai gam en dingin ka pai hi. Tua bangin ka pai leh, tha khat thu in lei nuai gam ka tung hi.

4. Tua leinuai gam tha khat thu in ka tun ciangin, Pasian in a maa vangliatna tawh hong paisak hi, ci-in ka ngaihsun hi.

5. Leinuai gam ka vel kawikawi khit ciangin, tha khat thu in leitung ka ki pat cilna mun ka tungkik hi.

6. Tua bangin leitung ka tunkik khit ciangin, Pasian in vangliatna tawh uk aa, dawi mangpa in bum tawh uk hi, ci-in ka ngaihsun hi.

7. Pasian in a hoih bekbek bawl aa, dawi te in a sia bekbek bawl hi, ci-in ka thei hi.

NUNTAAK NA THU SIANGTHO (14)

Vantung tokhom tung

1. Khatvei lampi khat zui-in ka pai leh, vantung tokhom tungah vantungmi khat tu in a om ka mu hi. Tua vantungmi pa in kei tokhom khat hong pia in, hong tu sak hi.

2. Ka tutpih vantungmi pa in, "Pau Cin Hau aw, vantung vangliatna, vantung galkap te na mu nuam hiam," ci-in hong dongh hi. Kei-in, "Ka mu nuam mah hi," ci-in ka dawng kik hi.

3. Tua khit phet tha khat thu in hong pai na meel ki theilo in, galkap sim zawh loh tampi hong om hi. A mau te in galkap ngeina vantung vangliatna tawh gal hong khem uh aa, kei hong ensak uh hi.

4. Ka et galkap te pumpi tungah vangliatna a tuamtuam a om hi. Tua vangliatna te a pumpi tung ciat ah, aksi bangin a taang citciat hi. Tua teng ka et khit ciangin, a bei na meel ki theilo in a mang hi.

5. Tua khit ciangin, ka tutpih vantungmi pa in, "Pau Cin Hau aw, tu laitak in bang na heh bel hiam," ci-in hong dongh hi.

6. Kei-in "Pa aw, Lailui khua ka teen laitak aa, gamkau te hong mat ka heh pen hi," ci-in dawi te ka khia hi.

7. Hih thu ka gen khit phet in, ka kiangah dawi te hi ci-in, tampi hong om hi. Tua dawi te ka et ciangin, a mit tungkhit lam vive in ka mu hi.

8. Tua laitak in dawi te mawhna phel dingin  dawi mangpa hong pai aa, tua dawi mangpa ka et ciangin  ha tongh tantan a pha hi.

9. Tua khit ciangin dawimangpa bangmah pau ngamlo in a paikhia kik aa, tua dawi te khempeuh ka tutpih vantungmi pa in, tha khat thu in lei ki peisak in a mang sak hi.

10. Tua khit ciangin ka tutpih vantungmi pa kiangah, "Tu-in Lai hong hilh pa ka muzo hi. Ni tung aa khutsawm nei pa zong ka mu zo hi. Tu in vantung kumpi a lianbel, ka mu nuam hi," ci-in ka thuum hi.

11. Ka tutpih vantungmi pa in, "Vantung kumpipa a lianbel kua mah in en ngam lo hi. Tu in na muh nop leh na lungsim sungah na koh kawm in na khut sung meek in," ci-in hong sawl hi.

12. Tua hong sawl bangin ka lungsim sungah, "Vantung Kumpi Topa Pasian aw, leitung aa na sawltaak na Tapa Pau Cin Hau, na limpi leh na vaangpi hong lak in," ci-in ka khut sung ka meek hi.

13. Tua ka nget khit phet in, van laizang pan leitung mun khempeuh taan in hong kum suk aa, van leh lei kikal ah hong khawl hi.

14. Tua vantung Kumpipa, Pasian taanglua a hih manin ka telzo kei aa, "Pa Pasian aw, kong mu tel zo kei hi, hong kum suk lai-in," ci-in ka thuum hi. Ka thuum khit phet in  hong kum suk aa, leitung lo in van laizang ah hong khawl aa, lim takpi in ka en thei hi.

15. Ka muh na lim in, a inn tawh hong kum suk a hi aa, a inn leh a maa pumpi limlangh bangin a tee hi. Tua innpi sungah, a mah tokhom tungah tu in a om hi.

16. A mah in limlangh bang in tee aa, mun khempeuh taan in ki en theilo liang in, ka mit hong le'eng hi.

17. Tua Pasian in a khut langkhat sawm, a langkhat sawm, a ki gawm in sawnnih a nei hi.

18. A aang laizang ah Teipi tawh ki bangin, a tee khat a tungto hi. Amaa pumpi ka ngaihsut ciangin, beem sangin gol zaw in ka mu hi.

19. Tua Pasian taang lua ahih manin, ni sa et tawh ki bangin a hong le'eng hi.

20. Tua Pasian vaang ka muh na in vantung Pasian siangsawn gamnuam ka etna sa aa, a taang tawh kibang aa, Pasian gamnuam in Pasian vangliat na tawh taang hi, ci-in ka thei hi. Tua teng ka muh khit ciangin, vantung ah kah to kik in a mang hi.

21. Tua ciangin ka tutpih vantungmi pa kiangh "Vantung Kumpi tu in ka mu zo hi. Tua a hih ciangin, vantung galkap te ka mu nuamkik hi," ci-in ka ngen hi.

22. Tua ka nget khit phet in vantung galkap te in ki gen theilo dongin gal hong kheem kik uh hi.

23. Tua galkap te pumpi tung ka et ciangin Pasian tung aa ka muh mah bang in a maute pumpi tungah tawmtek a tee aa, a muhnop huai mahmah hi.

24. Tua teng ka muh khit ciangin, vantung galkap te vantung vangliatna in la hi, ci-in a pai na meel ki theilo in a mang hi.

25. Hih thu tua laitak ka ngaihsut na in, "Ih omna khempeuh ah Pasian om hi," ci-in ka ngaihsun hi.

26. Hih thu teng nitaak aa kipan zingsang khuavaak dong ka mu hi.

NUNTAAKNA THU SIANGTHO (15) 

Zu in vantung thu kham 

1. Pasian in thu hong pia hi.“Pau Cin Hau aw, Khamtung gam ah zu kong kha’am ngam kei hi. 

2. Bang hang hiam cih leh khamtung mi te in zu na ki vaak na uh a hihi. A hih hang in neek na lam sang ah zu in gu a hihi. 

3. Zu neek na in mawhna a hi kei hi. A hih hang in zu nee in nuamsa aa, na kham uh ciang in na kamsung pan a pai khia, ki liatsak na kammal te in dawi mangpa deihna tawh ki pawl gu a suak hi. 

4. Tua a hih ciang in ka thu zui mi te in ki-itna zangh ta un. Ki-itna na zat khit uh ciang in zu in thu kha’am a hi kei hi. Unau pa ta in ki nei ta un. 5. Tua teng na zuih khit uh ciang in vantung Siangsawn gamnuam aa ding in zu in thu kha’am a hi ding hi. 

6. Kong thu piak bang in nong zuih kei uh leh zu kong kha’am ding hi. 7. Thu kong piak khempeuh na ngaihsun in. Bang hang hiam na cih leh singkung tawh ki bangin hiang a nei hi. 8. Kong gen thu khempeuh ah zuih ding thu tampi a om hi.”ci-in Pasian in thu hong hilh hi 

NUNTAAKNA THU SIANGTHO (16)

Mihing Pianna

1. Tua khit sauvei ki hallo in ka mu leuleu hi. Tua ka muhna ah Pasian hi, ci-in tua Pasian in khut sawmnih a nei hi.

2. Tua Pasian kiangah a Tapa leh a na sem te a pai ngam kei hi.

3. Thu a vaihawm uh ciangin sikkhau kam tawh a vaihawm uhhi. 

4. Vantungmi khat sikkhau kamsang in a koih hi.

5. Leitung mite a pian na dingin singkuang khat a bawl hi. Tua singkuang tawh a neisak aa, a tawh a heek ciangin mihing khutpi ciacia a pai khia hi.

6. Mizawng leh mihau a ki dei na dingin tawh khat ciat in kikhen hi. Mihing a bawl na dingin singkuang khat a hihi.

7. Leitung mihing bawl, nih ahi hi. Tua mi nih te khat in mizawng te a pian na dingin a heek aa, khat in mihau te a pian na dingin a heek hi.

8. Tua lai ah, lai-at li a om hi. Mi bawl te in a hoih in a bawl hi.

9. A hih hangin lai-at te in mihing a bawl te mun khat peuhmah a sia sak hi.

10. Mi bawl te in tawh a heek khit ciangin, a bawlsa mite sungah Pasian vantung khasiangtho te leeng in mihing te sungah a lutsak hi.

11. A lutsak khit ciangin a suak ma teng hong ciang aa, lukhung aa cilsiat ding hong kha'am a hihi.

NUNTAAKNA THU SIANGTHO (17)

Mivom Mikang Nuaisiah Na

1. Pasian hong thu gen khempeuh ngaihsun in ka om laitak in lampi ah mikang te khat leh galkap sawm tawh ka ki tuak hi. Tua te lak ah, "Pasian thu na zui uh hiam?" ci-in ka dongh hi.

2. Tua thu ka dot ciangin, a maute maizum mahmah uh aa, hong en ngamlo in kam khat beek, hong dawng ngah kei uhhi.

3. Tua khit ciangin tawlkhat ka pai aa, galkap sawmthum leh a uk pa tawh kaki tuak hi.

4. Tua te lak ah, "Pasian thu na zui uh hiam? Pasian thu na zuih uh leh na um uh hiam?" ci-in ka dongh hi. Tua te n hong dawng ngamlo-in, a pai uhhi.

5. Tua bangin ka pai laitak in ka mai ah keenlei khat vantung muh zawh loh dong in a ki khungto ka mu hi.

6. Tua kenlei kei kah na dinghi, ci-in ka ngaihsun aa, a bul ah ka pai hi. Tua vantung kenlei phung ka tunciang in mi nih a om hi. Tua mi nih te in, kenlei tungah ka kah ding a hong khak hi.

7. Tuate lakah, "Kei pai na ding nong khak uh, Pasian thu na zui uh hiam? Na zuih uh leh upna tawh na zui uh hiam?" ci-in ka dot laitak in, vantung Pasian awging khat kaza hi.

8. Tua vantung awging in, "Pau Cin Hau vantung pai na ding kenlei kuamah in na khak thei kei ding uhhi," ci-in awging ka zak khit phet in ka lam hongkhak mi nih te maizum tuak mahmah in a tai khia hi.

9. Tua ciangin vantung pan in awging khat hong ki za kik aa, "Tua lamkhak mi nih te in dawimangpa sawltaak hi,"a ci hi.

10. Tua khit ciangin, tua vantung kenlei zui in ka kahto hi. Tua bangin ka kahtoh ciangin khua khat ka tung hi.

11. Tua lai ah mi pawlkhat a om ka mu hi. Tua mipawl te in, "Na kah to thei nawn kei dinghi," ci-in hong khak uhhi.

12. Tua laitak in, vantungmi khat vantung thuap nihna pan hong leengsuk  aa van laizang hong tun laitak in, "Pau Cin Hau pai na ding kuamah in na khak theikei ding uhhi," ci-in awging ka za hi.

13. Tua khit ciangin ka kah to leuleu aa, Pasian siangsawn gamnuam ka tung hi. Pasian gamnuam ka tun khit ciangin ka kum kik aa, leitung ka ki pat cilna ka tung kik hi. Tua khit ciangin vantung ka kahtoh na keenlei a mang hi.

14. Tua ciangin ka om na mun panin, "Mivom mikang ka nuaisiah na hi," ci-in vantung ah ka leeng to kik hi. Vantung Pasian gamnuam ka tung kik aa, vantungmi  vantung galkap te in a hong dawn uh hi.

15. Pasian in, "Pau Cin Hau aw, suangtang mal kong piak, bangzah ahi hiam? Ka khut bangzah pha ahi hiam, ci-in na thei hiam? Na nuntaak na, kei ka hihi. Kong sawl na pumpi, leitung ah a om hi," hongci hi.

16. Tua laitak in ka taksa pumpi, vantung gamnuam ah a leengto ka ki sak leh meigei tokhom tungah a tu ka hihi.

NUNTAAKNA THU SIANGTHO (18)

Nipi 7, Kha 7, Kum 7

1. Lai a pian khit kum (35) laitak in, Pasian in thu hong pia hi. Pasian hong thupiak na in, "Nipi sagih, kha sagih, kum sagih hun sung teng ah thu khat hong piang dinghi.

2. Tua thu hong pian khit ciangin, leitung mihing khempeuh ka hong khen ding hi. Tua mihing te ka khen ni ciangin sehthum suah sehkhat a si ding uhhi.

3. Pau Cih Hau aw, na inn na siangsak dinghi. Tua na inn, ni sawm leh ni sagih hun sung teng khempeuh na siangsak dinghi, " ci-in thu hong pai hi.

4. Tua khit ciangin gamlak munzang hoih mahmah khat ah ka pai hi. Tua ka paina ah leitung mihing a vom a kang minam khempeuh a kim hi, ci-in ka ngaihsun hi.

5. Tua mihon te lakah kei zong pai in ka om hi. Tua laitak in ka kiang aa om hi hon te in, "Pasian kamsang lianpipa in thu hong hilh dinghi," ci-in a gen uh hi.

6. Tua bangin a gen uh ciangin kei zong, "Pasian kumpipa dong mu aa, Pasian kamsang lianpi mu nailo ka hih ciangin ka mu nuam hi," ci-in ka khua dak hi. Tua bangin khua dak aa ka om laitak in, keimaa kamsung pan thu hong ki genkhia hi.

7. Tua ka kamsung pan a pu suak kammal in, "Leitung mihing te aw, tu in Pasian thu zui un. Pasian thu phatak aa na zuih kei uh leh Pasian in leitung mihing te tung ah dawite gim hong piasak dinghi, a ci hi.

8. Tua ciangin leitung mihing te in ka thu phatakpi in hong zui hi napi in, dawi te in leitung mihing te tung ah gim a piak leh Pasian in no mau ta'ang in dawt te gim a pia dinghi, a ci hi.

9. Tua ciangin mi pumpi na zahtaakna uh tawh Pasian thu ka um ka zui hi, ci-in mi na khem kei ding uhhi. Dawimangpa deihna tawh Pasian min na suang kei ding uhhi.

10. Tua thu hong khen ding vantung ah Pasian om hi," ci-in ka kam sung pan hong pu suak khit ciangin tua mi hon te ka mu nawn kei hi.

NUNTAAKNA THU SIANGTHO (19)

Khutsawm, Khut Sawmnih, Teipi

1. Pasian in van laizang ah hong kum suk aa, ni sa'ang in a taangzaw in ka mu hi.

2. Tua ka muh laitak in Pasian in, "Pau Cin Hau aw, suangtang mal gawm na leh khen na te kong hilh zo hi. Khut sawm nei pa leh khut sawmnih nei pa na muzo hi. Khut sawmnih nei pa na  muh na ah, Teipi tawh ki bang na mu zo hi.

3. Tua te in, bang thu hong pia hiam? Tu in nang in zong kong sawl bangin na na sem ta in," ci-in hong sawl hi.

4. Hong sawl na kammal in, "Pau CIn Hau aw, a siang leh a nin na khen na dingin hi bangin na bawl dinghi. Leivuui lak aa suangtang te na khawm ding aa, na khut veilam in na tawm dinghi.

5. Tua khit ciangin na khut veilam aa nalak sa te na et khit ciangin, na khut taklam in na khut veilam tung pan na la khia dinghi. Tuu aa kammal kong thu piakna in, khut sawm nei kong lah na ahi hi.

6. Khut sawmnih nei leh Teipi tawh ki bang kong lak hi.

7. Tua bangmah in leivuui sung pan suangsi na khop te na thuzui mi a hi dinghi. Na khut veilam aa na top te, thu ciamna ahi ding hi.

8. Na khut taklam aa na la'ak te, vantung siangsawn gamnuam ahi dinghi.

9. Teipi in a nin leh a siang na khen na dinghi," ci-in Pasian in thu hong pia hi.

NUNTAAKNA THU SIANGTHO (20)

Pumpi Gamtatna Leh Khaa Thu Khenna

1. Khatvei gamlak mun khat ah ka pai laitak in, ka pai na mun ah a sisa ka u Tual Hang tawh ka ki tuak hi.

2. Tua ciangin kei in ka u Tual Hang kiang ah, "U Tual Hang aw, kei thupha um lo aa Tapidaw na suah, leitung nusia na hih ciangin vantung gamnuam na ngah hiam?" ci-in ka dot leh ka u Tual Hang in mai zum in a hong dawng ngam kei hi.

3. Tua mun pan in ka ki khen khia uh aa, vantung lampi hi, ci-in lam lian khat zui in ka pai hi.

4. Tua bangin ka pai kikna ah ka u Tual Hang tawh ka ki tuak kik leuleu uhhi.

5. "U Tual Hang aw, den aa kong thu dot, Vantung gamnuam ngah lo na hi hiam?" ci-in ka dot ciangin, "Ka ngah kei hi," ci-in hong dawng kik hi.

6. Tua teng khit ciangin ka u ka nau a sisa teng leh ka nungzui ka sawltaak te tawh ka ki tuak leuleu uh aa, Pasian hong thu piakna bangin thu ka hilh hi.

7. Ka thu hilhna kammal in, "Tu in Pasian thu zui un, ci aa kong thu hilhna nong zuih, nong mannop loh uh tu in na phawk uh hiam?" ka cih khit ciangin, "Pasian thu in ih pumpi ih gamtat na leitung ih nu siat hun a tun ciangin khaa a ding  ahi hi," ci-in thu ka hilh hi.

NUNTAAKNA THU SIANGTHO (21)

No Khialhna Tawh Ka Min Hong Suang Kei Un.

1. Pasian in thu hong piak khit ka thuzui mi te in, nipi ni in Pasian minphat nuamlo ahih manin Pasian in,"Pau Cin Hau aw, kei in nipi khuavaak ni pan ki ginni dong leitung mihing te aa ding na ka sem aa, ka nipi ni in ka tawl nga hi.

2. Tua keimaa nipi ni in, na sanginn za zum ciat uh ah ka min hong phat ta un.

3. Ka minphat nuam lo te in, dawi mangpa deihna ahih ciangin no leitung mihing te khialhna tawh Pasian min hong suang kei un," ci-in Pasian in thu hong pia hi.

NUNTAAKNA THU SIANGTHO (22)

Zu Leh Dawimangpa Nasep

1. Pasian in, "Pau Cin Hau aw, no leitung mihing te nek dingin zu hong kha'am ka hi kei hi.

2. Bang hang hiam na cih leh kei in leitung mihing te nuntaak na ding a ki cingtak aa kong piaksa note in dawi mangpa zolna in na nei uhhi," ci-in Pasian in thu hong pia hi.

NUNTAAKNA THU SIANGTHO (23)

Naupang No Lasa Te

1. Khat vei gamlak mun khat ah ka pai hi. Tua ka pai na mun khat ah leitung mihing te tawh a ki bang lo, singhiang tung ah naupang honkhat a tuang ka mu hi. 

2. Tua naupang hon te in a khe vei diamdiam in la a sa uh hi. Tua a la sak uh ka ngaih ciangin,” Nuai simlei aa lun tate aw, na kaih zatam gil al bang mang ding hi e,”ci-in a sa uh hi. 

3. Tua khit ciang in huih sung pan in Pasian awging khat a pau hi. Tua awging sung pan,”Pau Cin Hau aw a val in mi na zo nuam kei ding uh hi. Duhhop na lungsim na nei kei ding uh aa, zuau thu na gen kei ding uh hi. 

4. Lungsim hoih lo aa mi zo nuam te tung ah natu, nata khang dong in khua a mial ding hi,”hong ci hi. 

NUNTAAKNA THU SIANGTHO (24) 

Nu leh Pa it na

 1. Ka pa Pasian in ,:Pau Cin Hau aw, na nu na pa uh na simmawh na bawlsia kei un. na sanggam uh leh mi khempeuh tungah mawhna zong in na simmawh kei ding uh hi. 

2. Tua teng ka thu nong man kei uh leh kei mah na Pa Pasian nong mangngilh ding uh hi. Tua thamlo in a tawp na ciang in mualpi hong cimh ding aa, leipi hong cimh ding hi,” 

3. ”Ka thupha hong zui mi te in ka minphat in na om laitak un, na gal pa in that ding in hong pai a hi zong in na thuak ding uh hi. Tua thuak lo-in lungsim dang a nei te in Pasiain aw,ci-in ka min hong suang nawn kei un. 

4. Bang hang hiam na cih leh hong simmawh, hong that nuam pa na it khit ciang in hong that ding pa in nang hong it aa hong huh khia pan ding a hihi. 

5. Tua khit ciang in dawi mangpa tawh ki pawl gualnop na sung ah na lungsim ki siat na ding in pai kei in. Bang hang hiam na cih leh tua nopna te in no te hong lal sak ding dawi mangpa hong zol na a hihi,” ci-in hong hilh hi.

NUNTAAKNA THU SIANGTHO (25)

Nin leh siang khen na 

1. Ni khat ni-in Pasian awging ka za hi. Tua awging in,”Pau Cin Hau aw a siang leh a siang lo na ki dei ding uh hi. 

2. Ki-itna aw ka za’ak khit ciang in a tawp na-ah na pumpi in thuak ta hen. Na nuntaakna kei ka om hi. 

3. Leitung mihing te in kong itna leh thupha kong piak te khempeuh thei khin na pi in hong zui nuam lo a hih man in ka thu hong um taktak leh hong um taktak lo ka hong khen ding hi. 

4. Tua thukhen na hong tun ni ciangin na pumpi na nuntaakna in thukhen na pumpi a hi ding hi. Tua ni ciangin kei hong um mi te nuntaakna in kei ka hi ding hi,” ci-in Pasian awging ki za hi.

NUNTAAKNA THU SIANGTHO (26) 

No te zuih ding thu kong pia 

1. Mikang kumpi te hong khan zawh Lailui khua ah ka teen laitak in Tapidaw A.B.M maang te Phukuh leh a pawl te hong pai aa,”Pau Cin Hau aw, ih Pasian thu gawm ni-in, nang in pawlpi sum ne in om le cin,” ci-in hong zol uh hi. 

2. A mau te in a biakna la te hong sa uh aa thu tampi hong gen uh hi. A hih hangin la hong sak laitak leh thu a hong gen laitak in a mau te a lu susu uh hi. 

3. Tua laitak in Pasian in,” Thu ma’an thu tang tawh na nasem un. Zuau thu tawh na na sem kei un. 

4. Bang hang hiam na cih uh leh mikang te a mau gam aa zat ding thu ki pia zo hi. No te aa ding aa zuih ding thu kong piak tungah mi aa na deih gawh kei un. 

5. Ka teel mi te in ka deih na bangin na nasem ding uh hi,” hong ci hi.

NUNTAAKNA THU SIANGTHO (27) 

Lam khak te

 1. Tua Pasian awging in a siang leh a nin dei in hong cih hun laitak in Pasian deih na taktak, kua mah in hong zui nuam lo a hih man in ,”Dawi mangpa deih na leh a mah Pasian deih na dei ta in,” hong cih na a hihi.

2. Tua lai tak in Pasian in la khat hong pia aa, (a)Sian ka sin thu gi bang neek teng,zin aang ah zaal ding hi ee. (b)Ka nial za in tam sang e,ka deih ci aa tawm aw e. 

3. Pasian in ka thu hong simmawk ka lam hong khak te dawi khut sung tung ding aa, gimna a thuak ding hi. 

4. Ka thu zui mi a tam a hih hangin ka deih na taktak a zui mi tawm mahmah aa, ka deih loh mi a tam zaw hi, a cih na a hihi. Pasian thu zuih na in manpha mahmah hi. 

5. Bang hang hiam na cih uh leh vantung gamnuam ka en kawikawi na mun ah, Pasian Siangsawn gam hi, a ki ci na mun vangtaang tawntung aa, dawi gam a ki cih na mun khuamial a hih man in leitung na nusiat hun uh a tun ciang in tua khuamial na dawi gam na tun khak ding uh lau huai hi. 

6. Tua bang in Pasian in la hong piak laitak in Pasian hong piak Lai leh Pasian thu a nial, mi tampi om a hih hang in gamdang biakna te khamtung ah hong tun toh maa in Pasian Siangsawn thu zuih na Pasian hong teel khiat ka hih man in leitung ka nusia a hi zong in hih Pasian thu bei ngeilo ding hi. 

7. Bang hang hiam na cih uh leh Pasian hong thu piakna thu leh hong lah na thu te a tung nai lo tampi om lai a hih ciang in, tua thu te hong tun ni ciang in mi pil te in ,”Pau Cin Hau gensa hi,” ci-in hong phawk kik pan ding uh hi. 

NUNTAAKNA THU SIANGTHO (28)

 Suahkik hotkhiat na 

1. Pasian in thu hong pia hi.“Pau Cin Hau aw, kei in nuntaakna tui ka hihi. 

2. Tua hin tui dam tui nuntaakna tui in no te hin na, kei mah vanglian bel Pasian vangliat ki cinna a hihi. Tua nuntaakna tui tawh leitung leh vantung aa om na te ka uk hi. 

3. Ka gamnuam Siangsawn innpi aa hintui damtui nuntaakna tui-in natna pan dam na, sih na pan hinkik na, mawhna pan mawh maisak na, ki siansuah na vantui siangtho hi aa, upna tawh a dawn mi-in suah kik hotkhiat na a ngah ding hi. 

4. No te nuntaakna hong pia kei mah vang lian bel Pasian misiangtho suah na leh ki aap na vantui siangtho tawh a ki peel mi-in ka gamnuam a lut zo kei ding uh hi. 

5. Tua a hih ciang in leitung mihing te in suakkik hotkhiatna na ngah na ding un, ka Tapa Pau Cin Hau in nuntaakna tui siangtho na tawi ding hi,”ci-in Pasian in thu hong pia hi.

NUNTAAKNA THU SIANGTHO (29)

 Na nuntaakna kei kiangah om 

1. Pasian in thu hong piakcil in leitung mihing te in hong zui nuamlo a hih man in cil hongphih in hong ko uh hi. 

2. Tua tham lo in teipi leh thau na ngawn tawh thah hong ki sawm hi. 

3. A hih hang in Pasian thu kim loh na a hih man in Pasian in,”Na nuntaakna kei kiangah om hi hong ci kik hi. 

4. Na khempeuh ei te aa ding in Pasian in a maa vangliat na tawh hong pia nuam a hih man in dawi biakna nam sawmguk leh nam giat hong hawl khia sak hi.

5. Tua a hih man in ei te gim na leh vangik te bei khin a hih ciang in Pasian in dawi mangpa deih na tawh a mah Pasian min ih suan ding hong nial hi. 

6. Hih thu Pasian thu piak na aa thu ki gen khempeuh kei min tawh Pasian thu a zui te in thei siang lo pi-in deih bawl in a hih kei leh bawlsia in na gen khial kei ta un. 

PASIAN TAPA IN PAWLPI TE A VAIKHAK NA 

1. Pawlpi a vaikhak te min:-(1) Sian Khaw Cin, (2) Thawng Za Al, (3) Lian Vungh. 

2. Pawlpi ka u ka nau te aw, Pasian hong thu piakna bang in um aa, mawhna ki sik kik na a nei te aa ding a mawhna ki phel na ding in Pasian kiangah apna na bawlsak ding uh hi. 

3. Tua mah bang in vantung Pasian Siangsawn gamnuam a ngah na ding in, Pasian nuntaakna tui tawh na ki ciam sak ding uh hi. Tua ki ciamna na piak na ding un, ka Lai sung aa thu te na en ta un. 

4. A hih hang in tua ki ciamna na piak na ding un, mi khempeuh in na pia thei kei ding uh hi. Pasian teel mi te bek in na zangh thei ding uh hi. 5. Tua khit ciang in nau te aw, ka pian zawh kum(20) ka phak aa ki pan Pasian hong thu hilh na kum(69)dong Pasian na ka sem hi. 

6. A hih hangin kei-in khamtung gam ah Pasian hangin a thuak masa pen ka hih hang in Pasian deih na bang in a sem zo ka hi kei hi. 

7. Bang hang hiam cih leh Pasian min tawh Pasian um aa om te in zong, Pasian a upna lian zo nai lo thamlo in khang lui ngeina deih lai a hih man in, Pasian deihna bangin Pasian lamah, a nin leh a siang ki khen zo lo aa, Pasian na ka sep ka hun a bei ding hi ta hi. 

8. Tua a hih ciang in tu aa ka deih na seh sawm suah seh khat ki zui zo pan ci aa, Pasian thupha gen khawm lo in Pasian na ka sep leitung a nusia ding ka hi zo hi. 

9. Nau te aw, khasia kei un. Kei-in Pasian hang in leitung a nusia ding ka hi zong in, tu aa na upna uh sang in ka nung ciang in Pasian deihna taktak piangsak zaw aa puah zo zaw ding ciin lam et na tawh lungnuam tak in ka hong nusia ding hi. 

10.Tua ciang in no te in,”Ih pa Pau Cin Hau in leitung nusia leh a thu bei ding hi ci-in na ngaihsun kei ding uh hi. 

11.Bang hang hiam na cih uh leh Pasian in leitung aa hong thu piak te,”Bei lo ding hi” ci a hih man in Pasian na up uh leh bei ding hi ci-in na ngaihsun kei ding uh hi. Pasian thuciam hong piak te zong na ngaihsun ding uh hi. 

12.Tua tham lo in Pasian thupha ka lai sung ah muhkhialh na leh theih khialh na zong a om lai ding hi. 

13.Tua a hih ciang in nau te aw, Pasian thupha na ngah nop uh leh na nu na pa na zo thawh kei ding uh hi. Na lawm na gual uh na it un. 14.Pasian kiangah deihna na nget laitak un, na gal pa in that ding in hong pai a hi zong in na thuak ding uh hi. Hih thu te Pasian hong thupiak a hihi. 

15.Tua a hih mah bang in ki-itna na neih zawh uh leh thupha na ngah ding uh tham lo in leitung na nusiat hun uh a tun ma in zong leitung thupha na ngah ding uh hi,ci-in hong vai khak hi. 

16.Tua bang in thu a hong vaikhak khit ciang in pawlpi te in, Pasian kamsang pipa aw, Pasian thu Pasian na nasep kum (69)pha aa, na thu zui masa te zong a om lai hi. 

17.A hih hang in tua te in zong nang om lai na pi in hong taisan khin a hih ciang in, tu-in nang hong nusia le teh akpi a no kaii a pi sangak in a mat sak mah bang in ka mangthang ding uh tawh ki bang in ka ngaihsun uh hi,ka ci uh hi. 

18.Tua ciang in Pasian tapa Pau Cin Hau in,”Hi lo hi, naute aw, leitung ah Pasian thu in a manpha genteh theih pih ding a om lo a hih mah bang in a masa te zong hong nunung ding aa, a nunung te zong hong masa ding hi. 

19.Kei zong Pasian in hong teel khiat ka hih hang in, Pasian deihna seh sawm suah seh khat zong ka zui zo nai kei hi. 

20.A hih hang in kei mah Pasian Kamsang pipa gen na te na ngaihsun le uh teh Pasian deihna bang taktak in ih sem zo a hi kei zong in dawi mangpa tawh na ki nai loh na ding uh tu mailam ah na hahkat ciat ding uh hi. 

21.Pasian in a maa deihna thu bulpi hong pia a hih hangin dawi biakna sung aa om u leh nau te tawh ki zopna thu te hang in Pasian deihna bang in na a sem zo ka hi kei hi. 

22.A hih hang in leitung ki hei na ding Pasian hong hilh na bangin a tung zo tampi om a hih ciang in leitung u leh nau in a masa a hi kei hi. Pasian a masa a hihi. ci-in na ciamteh ding uh hi. 

23.Tu mailam ah ka thugen te a hong tung a om ding hi. Tua khit ciang in na hong phawk kik pan ding uh hi. 

24.Tua a hih ciang in ka hong thugen te ka nung ciang in na ki sik loh na ding un na tu na ta khang dong un na ciamteh ding uh hi,”ci-in a hong gen khit ciang in pawlpi te in,”Hi hi,Pasian Kamsang pipa aw na cih mah bang in zuihkhialh na in ki-itna pan hong piang khia a hihi. 25.Tua bang in ki-itna pan dawi mangpa deihna thu a tun na nong gen ka theih uh mah bang in ko te zong na thuzui ka hih uh hang in hong nusia le teh zuih khialh na ka tun khak ding uh lau huai hi. 

26.Tua a hih ciang in tu aa zuih khialh na sung ah Pasian min la’ak na tampi om a hih ciangin tua te zangh le hang ih khial ding hiam,”ci-in pawlpi te in ka dot ciang un Pasian Tapa in Nau te na thei khial kha ding uh hi. Kei tung pan a piang lo thu te mi gamtatna zuih na te na eng kei ding uh hi. 

27.Banghang hiam cih leh Pasian min tawh Mangla’ak ki ci zuih na tampi a om hi. Tua te in Pasian lamkhak dawi mangpa sawltaak Aisaan Ciin Luan tung pan hong piang khia a hihi. 

28.Tua a hih ciang in kei maa Pasian thu zuih na Siangsawn ka pawlpi sung ah na om lai teng un mi gamtatna te na eng kei ding uh hi. 

PASIAN KAMSANG PIPA IN, LAILUI KHUA 

PU VUM KHAW THANG A VAI KHAK NA 

1. Pu Vum Khaw Thang in Pasian Kamsang pipa aw, Mualbem khua ah nong paisan zawh ciang in manglam dang khat ka man hi. 

2. Ka mang in,”Lamh theih ka lamh, lamh mawh ka lamh gual in zing daai bang peel e, ci-in la ka sahi. 

3. Tua khit ciang in ka ciang khut ka kam ah ka pet aa, ka khe van lam ngat in bungbu sa(gulpi lu din) in Leitung kiimkot ta ning e,ci-in ka pai hi. 

4. Hih ka mang lamdang ka sa mahmah aa, mailam ah bang thu thuak ding bangci ding ka hiam ci-in a dongh ding in hong pai hi ingh,”a ci hi.

5. Pasian Kamsang pipa in,”Vum Khaw Thang aw ka nau aw, Leitung na nusiat hun ciangin na lupna tungah na si kei ding aa, na luang lupna mun ngun khuk kham khuak a suak ding hi. 

6. Tua bek tham lo in nangmaa suan leh khak sung pan leh kei maa suan leh khak sung pan in Pasian na sem khat tuak hong piang ding aa, tua te gel ki thuah in Pasian na hong sem tuak ding uh hi. 

7. Tua ni hun ciang in Siangsawn Pasian thu khan hong ki pan ding hi. a ci hi.

PASIAN KAMSANG PI PA IN A NU NUNG BEL 

VAIKHAK NA KAMMAL 

1. Pasian Kamsang pi pa Pasian Tapa Pau Cin Hau leitung hun khenna piang in, Leitung nusia ding in a om hi. 

2. Gim mahmah in nat khoi te kiangah a khut me nih lak zelzel hi. 

3. Bang deih na hi hiam, Bang ut na hiam, Bang ki sam hiam ci-in a dotdot uh leh a gawl sung pan in “Kei leh Vum Khaw Thang sung pan Pasian nasem khat tuak hong piang ding hi. 

4. Tua te gel ki thuah khawm in Pasian na hong sep ciang in, vantung Siangsawn Pasian thu khan hong ki pan ding hi,” ci-in kam nunung a vaikhak khit ciang in vantung hun khenna tawh vantung Pasian Siangsawn innpi ah hong ciah san hi. 

NUNTAAK NA THU SIANGTHO (30) 

Tapa aw zakim ciat ta un 

1. Kei leh ka tapa Pau Cin Hau no te kiang ah kong pai ma un, Khamtung mi te nuntaakna in a niam pen nuntaakna a thalawh na hi uhhi. 

2. Vantung thu siangtho hehpih na leh itna in no te man kong neih sak na a hihi. 

3. Hehpih na a sang pen vantung ka kammal siangtho aw tawh Nuam Dim tung ah kong gen na te na zak loh uh ciang un ka tapa Pau Cin Hau vantung vangliat na a lian pen tawh khamtung mite kiang ah no mau mah tawh ki bang in leitung ci leh sa in ka hong pai sak hi. 

4. Keimah vanglian bel vantung kumpipa khasiangtho Pasian in ka vantungmi suan leh khak vantung beh minam te a sam ding in ka tapa Pau Cin Hau kong pai sak hi. 

5. Ka tapa in vantung minam lian hong suak sak, nop sak na huang sung ah a hong koih ka tapa a hihi. tu in ka tapa hong ki pulak na aw te ngai in za kim ciat ta un. 

6. Vantung khasianngtho kumpipa kei mah na Pa Pasian ka hih na a hong teel mi te leh ka maipha a hong mu mi te ka hehpih na thupha a ngah mi te a hi uh hi. 

7. Khamtung mi te kei maa maipha a hong mu lo mi te leh a hong tello mi te in na khua ul uh luang aa leisung tongh khat tum dongin nuntaakna na zon uh hang in nopsakna na ngah zo kei ding uh hi. 

8. Kei a hong tello mi te leh ka maipha a hong mu lo mi te thaman khempeuh dawi gilo te in a mau piak ding leh a mau thaman ding in a deih uh hi. 

9. Dawi mangpa in ki tung nun tuh na leh ki liatsak na hong guan aa, a mau biak piak ding bek a deih uh hi. Tua a hih man in na nasepna te khempeuh uh man nei zolo thaman a hihi. 

10.Khamtung mi te kiang ah kei leh ka Tapa vantung nuntaakna khempeuh tawh kong ki pholaak uh hi. Kei maa ta’ang in ka Tapa no te kiang ah no mau mah bang in kong pai sak hi.

11.Dawi mangpa leh dawi gilo ukcip na tawh man a nei zolo, nenniam na a thuak no te nuntaak thak na na ngah na ding un, ka tapa vantung kammal siangtho te tawh hong ki pulak na te na za thei kei uh aa, bengngong tawh na ki bang uh hi. Tua a hih man in lo kho nasem, vanpua ganhing te thaman zong a nei zolo nuntaakna a hihi. 

12.Khamtung mi te in ni khat nuntaakna ding na zon uh hang in dawi mangpa biak piak na ding a hih man in ni khat thaman zong a nei zolo nuntaakna a hihi. 

13.Vanpua ganhing te in a uk te sawl na thu mann na leh lung duai na pen tawh nisim nuntaakna a thalawh uh hi. A hih hang in kei-in no te thaman man neihna thu hong la ning ci leng bangmah a om kei hi. 

14.Dawi gilo te in khamtung mi te lokho ganhing te nuntaakna zong a ban zolo ding in haksat na, duh na leh kial na, dangtaak na te khempeuh tawh hong nenniam in hong humcip hi. 

15.Dawi mangpa leh dawi gilo te in hong humcip hong nenniam laitak na puak vangik te khempeuh uh zong suahkhiat ding, a thei lo nuntaakna khuamial sungah hong koih a hih na na thei kei uh hi. 

16.Tua mah bang in dawi mangpa ukcip na a thuak mi te dawi mangpa nenniam na sungah, pusuah na ding hong thei sak lo hong humcip a hih man in manphat na hoih na a nei lo mi mangthang na hi uh hi. 

17.Tua a hih man in tui duh, dang taak na, kial na leh haksat na tawh na ki dim uh hi. 

NUNTAAKNA THU SIANGTHO (31)

 A mau te teenna kip thei lo ding

1. Ka tapa Pau Cin Hau ka nuntaakna pumpi ci leh sa tawh lei leh van a uk ding in vantung vangliat na, vantung nasepna, vantung thusiangtho tawh no te kiang ah kong paisak hi. 

2. Vantung thu siangtho upna taktak a nei mi te aa dingin, tawntung nopsak na leh lungdam na tawh lei leh van ah vantung ka thupha a luah ding in khasiangtho teenna innpi mihing ci leh sa, vantungmi te thupha kamciam ka pia sak zo hi. 

3. Ka thu siangtho zuihna thupha in vantung nopsak na leh leitung nopsak na a luah dingin, taksa pumpi thupha kamciam a hong pia zo ka hihi. 

4. Vantung nuntaakna thusiangtho in Vantung pilna, vantung ka hoih na te khempeuh tawh ki zemsa nuntaak tawnntung na ding kammal siangtho taktak a hihi. Vantung thu siangtho a zang te aa ding in upna taktak zuih na thumaan a hihi. 

5. Leitung ah ka Tapa Pau Cin Hau ka ki ko sak na vantung thu siangtho kammal te ki zaak khem bawl in bengngong bang aa a om mi te vantung thu kham a hihi. Vantung thu kham a thuak mite aa ding in tawntung gim thuak na a hihi. 

6. Vantung thu siangtho a um mi te in vantung thupha kamciam sa na hi uh hi. Thupha kamciam ngah mi te in leitung ah na om hun sung teng un, thupha piak na huang sungah na om uh hi. 

7. Kei leh ka Tapa Pau Cin Hau hong um taktak mi, vantung thu siangtho a nei mi te in ka min nong phat ding uh hi. 

8. Ka min hong phat aa hong um taktak mi te in leitung ah na om hun sung teng un, ka man neih na leh ka man phat na tawh no te aa ding in ka bawlsa te khempeuh a uk ding na hi uh hi.

9. Misiangtho te khut vantungmi te in leen aa, vantung aa om na Pa leh ka Tapa Pau Cin Hau min tawh no te zawhna kong nei sak hi. 10.Vantung thu sinagtho a nial te aa ding in a mau te teen na a kip theilo gu a suak hi. 

11.Vantung thu siangtho itna leh lungdam na a neilo mi te kiangah ka bawlsa na te khempeuh gu suak in thu khenna lianpi a hong piang ding aa, dah na leh lau na, duh na leh kial na te khempeuh tawh ki thuak zolo lungsim kitamzan in taksa pumpi gimthuak na a piang ding hi. 

12.Kei a hong it lo mi te mannei nawn lo in hehpih na leh itna ka bei sak ding hi. Tua bang in kei a hong nusia mi te kua mah in a honkhia zo kei ding aa, ki siik mahmah na lungsim dang a om nawn lo tawntung lungdam na tawh a hong ki ko te hehpih na sung ah ka koih ding hi. 

13.A hih hang in mawhna a bawl teitei mi-in,vantung thu khen na lianpi a nuntaakna sungah piang in samsiat na lianpen vantung thu hilh na lianpi a thuak ding hi. 

NUNTAAKNA THU SIANGTHO (32)

No te ta’ang in a thuak ka Tapa 

1. No te kiangah kei maa vantung nuntaakna si leh sa tawh a piang mihing sung aa a hong suak ka Tapa Pau Cin Hau, vantung nuntaakna tawh ki pholaak in kong paisak hi. 

2. Tua minam mel leh sa sun ding in mihing Tapa Pau Cin Hau hong pai a hihi. Bang hang hiam cih leh tua minam te in man a nei zolo minam te a hih hang a hihi. 

3. Dawi mangpa humcip sal leh sila aa a khawi a ki nenniam mi te nuntaak tawntung na ding leh ka man neih na thu a hong pia ding in a hong sam ka hihi. 

4. Dawi mangpa dawi gilo te bawl siatna a thuak sal leh sila aa hong khawi leitung mihing te ka Tapa Pau Cin Hau in hong sam aa, vantung ka nuntaakna tawh hong ki khek sak in a siangtho nuntaakna sungah hong honkhia khin zo hi. 

5. Vantung Siangsawn ka innpi pan in ka Tapa Pau Cin Hau sapna a hong um mi te a siangtho nuntaakna sungah na om uh aa misiangtho na hi uh hi. 

6. Ka Tapa Pau Cin Hau in a ki nenniam mi te khempeuh thuak na hong pua in tua minam te puak vangik khempeuh a suah khiat sak hi. 

7. Haksatna khempeuh thuak in a hong puak hang in a ki honkhia tua minam te in ka Tapa Pau Cin Hau it ding zah itna a nei zo kei uh hi. A hih hang in ka Tapa Pau Cin Hau in itna a tawngnung pen hong piak khit ciang in kei maa maipha hong musak hi. 

8. Ka tapa Pau Cin Hau in Khamtung mi te nenniam na leh man nei zolo vangik pua te khempeuh hong suah khiat sak aa, khasiangtho nuntaakna zong a hong pia hi. Tua a hih man in ka Tapa Pau CIn Hau in no te thuak na ta’ang khempeuh a thuak hi. 

9. Ka tapa Pau Cin Hau in leitung mihing te aa ding in a nuntaakna tawh hong thalawh a hih hang in vantung ka thaman te na ngah uhhi. 10.Ka Tapa zawh bangin zawhna thumaan taktak na neihtheih na ding un, a maa nuntaakna tawh hong ki pholaak ka hihi. 

11.Ka Tapa Pau Cin Hau in vantung ka hoihna leh manphat na te khempeuh tawh no te hong pholaak a hih man in leitung mihing te in a mannei thaman na ngah uh hi. 

12.Dawi mangpa in ka Tapa Pau Cin Hau vantung manneih na thaman leh a hong piak hoihna khempeuh a hong sut nuam hi. 

13.Tua a hih man in dawi gilo te in ka Tapa Pau Cin Hau a nial ding in leitung mihing te hong zangh aa, mihing te siatna ding bek a zong hi. 14.Dawi mangpa sawltaak te in ka Tapa Pau Cin Hau man neihna te khempeuh a ngah hang in a lungdam thei kei uh aa, dawi mangpa khemna thuak in ka Tapa Pau Cin Hau a mudah mahmah uh hi. 

15.Ka Tapa Pau Cin Hau in leitung ah a nuntaakna tawh vantung vangliat na te pua in, na haksat na te khempeuh hong puak sak a hih hang in itna na pia zo kei uh hi. 

16.Vantung nuntaakna a hong pia ka Tapa Pau Cin Hau in leitung mihing te nuntaakna man neihna thu a hong pia hi. 

17.Ka Tapa Pau Cin Hau man neihna om kei leh leitung mihing te in a ki thuak zolo gawtna na thuak den ding uh hi. 

18.Tapa Pau Cin Hau hotkhiat na thupha na ngah ma un ganhing si leh sa, ganhing nuntaakna tawh biak sapna lo ngal in leitung mihing nuntaakna a om zo kei hi. 

19.Ganhing nuntaakna zong a ban zolo leitung mihing te kiangah, ka Tapa Pau Cin Hau vantung Siangsawn nuntaakna kong pia sak aa, kei leh ka Tapa a hong um taktak mi te in vantung thupha piak minam te na hi uh hi. 

20.Ka Tapa Pau Cin Hau in vantung nuntaakna hong pia kei leh kua mah in nuntaak thakna na ngah kei ding uh hi. 

21.Ka Tapa Pau Cin Hau in vantung Siangsawn hoihna tawh leitung mihing te hong honkhia kei leh totcil na leh nenniamna na thuak tawntung ding uh hi. 

22.Leitung mihing te manneih zawh loh na hangin ka Tapa Pau Cin Hau in itna a ki cing a lian pen tawh hong sam aa, a nuntaakna tawh no te puak ding gimna khempeuh thuak in hong honkhia hi. 

23.A maa hong itna a lungdam thei lo mi-in man a nei zolo ganhing khat nuntaakna tawh a ki kim a hihi. 

24.Tua a hih man in man a nei lo khempeuh man a nei sak misiangtho hong suaksak, misiagtho a piangsak kei maa mipawl hong suaksak in ka Tapa Pau Cin Hau nuntaakna a hihi. 

25.Kei leh ka Tapa Pau Cin Hau thaman luah in a hong nei mi te in misiangtho pawlpi te na hi uh hi. 

26.Misiangtho pawlpi te in vantung minam lian te a hi uh hi. Tua a hih man in kei mah vantung kumpi pa nuntaakna tawh hong pai ka Tapa Pau Cin Hau in no te misiangtho nuntaakna hong pia a hih man in Misiangtho Kumpi pa a hihi. 

NUNTAAKNA THU SIANGTHO (33) 

Aw siangtho kammal lamdang 

1. Misiangtho Kumpipa ka Tapa Pau Cin Hau man neihna te thaman hong la lo in vantung nuntaakna thu siangtho upna taktak tawh a hong zuan mi te aa ding in a ki pia khong vantungmi te thupha piakna na ngah ding uh hi. 

2. Ka Tapa in leitung mihing te tung ah itna leh hehpih na te khempeuh hong pia in a maa vantung nasepna thaman te la ding in no te kiang ah hong pai a hi kei hi. 

3. Vantung nuntaakna khempeuh leh lei leh van aa ka bawlsa na te khempeuh, uk na leh zat theih na ding in, hehpih na a lian pen tawh hong pai a hihi. 

4. A mah in no leitung mihing te nuntaak tawntung na ding leh na kisapna te uh huh in a hong pia ding in hong pai a hihi. 

5. Ka Tapa Pau Cin Hau in vantung pan in no te kiangah, lengla bang in hong pai a hi kei hi. No te belh ding innpi a hi zaw hi. 

6. Kei-in no te kiangah ka hoihna tawh ka nuntaakna hong pia in hong pai ka hihi. No te in leengla hawh bangin nong tel kei uh aa nong thusim kei uhhi. 

7. Ka Tapa Pau Cin Hau hoihna tawh kong pai laitak bang ding in kong hong honlo na hi uh hiam? 

8. Kei-in ka hoihna leh ka Tapa Pau Cin Hau hoihna tawh nang leh na om na khempeuh man a neisak ding in hong pai ka hi zaw hi. Tua a hih man in kei leh ka Tapa Pau CIn Hau hong um mi te in manphat na tawh man a nei khawm ding ih hi hi. 

9. No te kisapna omlo ding hoihna lamdang te tawh ka Tapa hong piakkhong nuntaakna te na nial kei ding uh hi. 

10.Kei-in vanlai zang ah Siangsawn van ka innpi hoihna lamdang te tawh ka hong ki pholaak laitak, no leitung mihing te aa ki pan ka bawlsa na te khempeuh, manpha a hih na thu na tel ding uh hi. 

11.Ka Tapa in vantung aw siangtho kammal lamdang te tawh hong pulak kammal siangtho te hangin, a ki nial zolo nopsakna leh van huah na te ngah aa, nong la’ak ni uh ciang in na nuam pan ding uh hi. 

12.Amaa hong ki ko na vantung thu siangtho thaman hang in leitung mi te aa ding nuntaakna ka piang sak hi. 

13.Vantung ka nuntaakna lamdang te tawh kei maa ta’ang in ka Tapa Pau Cin Hau leitung mi te kiangah, leitung nuntaakna pan in vantung nuntaakna, vanhauh na, taksa nopsakna hong guan ding in itna lamdang te tawh a hong pai hi. 

14.A hong en nuamlo a hong mu thei lo mi te khempeuh khasingtho khua muh na mittang hong piangsak ngaihsut na a siangtho lungtang hong nei sak, vantungmi lianpa ka Tapa Pau Cin Hau thaman in no te neihzah sangin a tamzaw no te hatna zah sang in a lian zaw, hiam na lamdang te sang in a hiam zaw, a hiam te sang in a bun zaw, na khempeuh te sang in a lian zaw vantung vangliat na te khempeuh tawh leitung mi te tungah ki tel na a om lo lungsim nei te thukhen dingin hong pai a hihi. 

15.Tua a hih man in a ki muh khem bawl leh a ki theih khem bawl te aa ding in nuntaakna a pia ka hi kei hi. 

16.Vantungmi te vangliat na a ki gawm, vangliat na a lamdang te khempeuh tawh ka Tapa Pau Cin Hau in leitung ah hong pai a hihi. 17.Mawhna tawh a ki ciam mi te khempeuh a mau te mawhna gu suak in, haksatna nam khempeuh tawh nuntaakna a thuak ding a hihi. 18.Kei leh ka Tapa thumaan gamtatna a nial mi te khempeuh in mawhna tawh a ki ciam haksat na nam khempeuh a thuak ding a hihi. 

19.Kei leh ka Tapa Pau Cin Hau hong um lo in thumaan gamtatna a nial mawhna tawh a kiciam mi te a puak uh vangik kua mah in a suah khia thei kei ding hi. 

20.A ki pulak zolo haksatna a thuak mi te in mawhna a lian pen a hihi. Mawhna lian a thuak mi te in khang sagih a thuak ding uh a hihi. 

21.Kei leh ka Tapa Pau Cin Hau hong nial in thumaan gamtatna a deih lo mi mawh te in khang sagih na pan in ki sik kik na lian a nei mi te itna lei a bat te uh vantungmi te in loh sak ding aa, a puak vangik te ki suah khia pan ding hi.

 22.Khuamial na gam aa om mi te khuavak ding aa a mit uh ki hong in, ka Tapa Pau Cin Hau a mu ding uh hi. A mau te in vantung minam te suak kik in ka Tapa thaman manphat na tawh a nungta ding uh hi. 

23.Hehpih na a lian pen piak kik vantung ka kammal siangtho te hangin mawhna nei mi khempeuh leibat na te pan vantung minam hong suak kik sak ka Tapa Pau Cin Hau in kei maa zawh bangin a zo pa a hihi. 

24.Ka Tapa Pau Cin Hau a um mi te kei hong um a hi ding aa, kei hong um mi te in ka Tapa a um mi a hi ding hi. A mau te nat na te khempeuh bei in a leiba khempeuh uh a maai ding hi.

NUNTAAKNA THU SIANGTHO (34)

Ka Tapa min lo tawh

1. Leitung mihing te kiangah vantung nasepna thu a om bangin ka Tapa Pau Cin Hau hong pai na thu kua mah in a tel zo kei hi. 

2. Kei maa neihsa te leh vantung minam,vantung ci leh sa kong suah sak na thu hong tel sak ding in nuntaak thak na a hong pia ka Tapa a hihi. 

3. Kei leh ka Tapa hong um taktak mi te vantung Siangsawn gamnuam ka innpi ah nong pai thei ding uh hi. 

4. Kei leh ka Tapa Pau Cin Hau hong um lo mite cik mah hun in ka thei ngei kei ding aa ih ki gamla ding hi. 

5. Vantung Siangsawn gamnuam, ka inn pi, tawntung nuntaakna sungah kei leh ka Tapa phal na lo tawh kua mah na tung zo kei ding uh hi. 

6. Tua a hih man in ka Tapa min lo tawh vantung Siangsawn man neih na, vantung thu siangtho nuntaakna, kua mah in na ngah zo kei ding uh hi. 

7. Ka Tapa Pau Cin Hau min tawh nong koh khempeuh uh ka hong dawng ding aa, na haksatna te pan suah taakna ka hong pia ding hi. 

8. Ka Tapa in leitung mihing te tung ah a siangtho vantung thupha leh a siangtho itna lamdang hong pulaak, hong piakhia in a sem khia zo ding mihing te in ka Tapa nuntaakna nei in nuam aa, a lungdam tawntung uh hi. 

9. Tua a hih man in ka Tapa Pau Cin Hau in no te nuntaakna hong paii aa, Tapa luahza a ngah na hi uh hi. 

10.Tapa luahza a ngah leitung mihing te in vantung ka thaman a hi aa, kei maa thaman a ngah te in vantung Siangsawn ka gamnuam ka innpi ah pai na ding leh ciah kik na ding ka Tapa Pau Cin Hau a hihi. 

11.Ka Tapa in no te taang in lei leh van ah a zo pa a muanhuai penpen belh ding innpi a nuntaakna tawh hong pia pa a hihi. 

12.Ka Tapa in Itna a neihzah siit lo in hong piak khiat na thaman a lungdam mihing te a ding in nuntaakna a ki cing kong pai sak khin zo hi. 13.Kei leh ka Tapa Pau Cin Hau itna thaman a nial mi te in ka bawlsa na khempeuh zat theih na thu a neih uh hangin tom kal hun khat sung in zong na ki itna uh gu suak in ka bawlsa na khempeuh tawh man neilo gu suah na a piang ding hi. 

14.Bang hang hiam cih leh kei leh ka Tapa Pau Cin Hau itna thaman a ngah zo lo, a hong tello leitung mihing te in ka bawlsa na khempeuh zangh in a nuntaak pih uh hang in, dawi mangpa leh dawi gilo te in no te pumpi leh ka bawlsa na khempeuh tawh a mau te biakpiak na leh biak sapna in a hong nei sak uh hi. 

15.Dawi mangpa biak sapna in vantung thusiangtho lungdam na thumaan taktak itna te nial in ki liatsak na lungsim tawh no te hong zangh hi. 

16.Ki liatsak na lungsim leh a pusuak kammal te in dawi mangpa deihna a hih man in kei maa maipha leh ka Tapa maipha hong liah sak aa nong mu thei kei uh hi. 

17.Dawi gilo te in ki liatsak na leh tungnun kituh na tawh leitung mihing te nuntaakna bawl sia in no te pumpi leh kong piaksa na te khempeuh, man neilo biak piak na leh biak sapna tawh hong gaih sak tawntung hi. 

18.A man neilo huang sung ah hong koih a hih man in ka Tapa Pau Cin Hau in leitung mihing te leh dawi mangpa ki zopna vantung vangliat na tawh khak tan in a bei sak hi. 

19.A hih hang in leitung mihing te in vantung lungdam na leh hehpih na te mu zolo a hih man in a lungdam thei kei uh aa ka Tapa Pau Cin Hau a nial uh hi. 

NUNTAAKNA THU SIANGTHO (35)

Vantung minam lian kei maa mi pawl te 

1. A lungdam theilo leitung mihing te kiang ah vantung hehpih na leh lungdam na thu na luahtan theih na ding un, note khempeuh itna lamdang hong neisak in ka Tapa Pau Cin Hau kong thalawh sak hi. 

2. Ka Tapa man neihna thaman misiangtho innkuan nopsak na leh vantungmi te thupha piak na, na ngah ding uh dawi gilo te in hong haza a hih man in no te hong zol aa vantung lungdam na thu hong nial sak hi. 

3. Ka Tapa in vantung lungdam na thu no te tung ah hong nga hi. 

4. Vantung Siangsawn lungdam na thu ka Tapa Pau Cin Hau thu neihna te hang in leitung mihing te ka mipawl ka si leh sa kei maa neihsa te kong suak sak hi. Tua a hih man in kei maa innkuan te na hi uh hi. 

5. Kei leh ka Tapa hong um taktak mi te in vantung Siangsawn ka minam ka pawlpi te na hi uhhi. 

6. Ka Tapa in leitung ah vantungmi suan leh khak, vantung minam te a hong suak sak, ka sawl bang in a zo pa a hihi. 

7. Ka Tapa zawhna hang in vantung ka Siangsawn lai te ka hong pia aa, no te in vantung minam kei maa mipawl te na hi uhhi. Ka mipawl te in kei tawh ih om khawm tawntung ding hi. Kei tawh a om khawm te in ka it mipawl te a hi ding hi. 

8. Ka mipawl te kiangah ka Tapa Pau Cin Hau in ka tate sam in a hong zong a hihi. Ka mipawl, ka minam te in kei leh ka Tapa thupha piak na huang sung ah a om khawng ding uh a hihi. 

9. Thupha piak na huang suangah a om khawm mi te ka vantung lai kong pia aa vantung minam lian te ih hihi. Kei maa vantung lai in no te khempeuh ka thupha piak ka tel minam, ka pawlpi, vantung minam lian te a hong suaksak a hihi. 

10.Vantung suan leh khak minam lian te ka Tapa Pau Cin Hau in kai khawm in hong sam khin zo aa, dawi mangpa leh dawi gilo te huang sung sihna pan hin kik na hong pia ka Tapa thaman a hihi. 

11.Vantung manphat na huang sungah na tun khit uh ciang in dawi gilo te in na lungsim uh leh na gamtatna te khempeuh uh gu ding in hong pai hi. 

12.Dawi gilo te nasepna siatna in guta bang in hong pai a hihi. Kei leh ka Tapa Pau Cin Hau in ka mipawl te tung ah dawi mangpa hong zol na siatna guta bangin hong pai laitak nial in ka deih kei uh hi. 

NUNTAAKNA THU SIANGTHO (36)

Kum (8) sung phat na 

1. Kei hong um aa ka Tapa Pau Cin Hau a it vantung minam te a susia nuam leh a gu ding in no te kiangah dawi gilo te a hong pai uh hi. 

2. Kei-in,”Ka mipawl, ka minam te kua mah in na susia zo kei ding uh aa na gu zo kei ding uh hi,:ci-in ka Tapa vantung thuciam ka pia sak hi. 

3. Ka thupiak na bangin ka Tapa Pau Cin Hau in kum (8) sungah nuntaakna a nei khempeuh siat na ding a bawl kei aa, phatna a bawl tawntung hi. 

4. Dawi gilo te in kum(8) sungah thumaan gamtatna, thuciam na tawh ki pelh in kei leh ka Tapa Pau Cin Hau hoih na zolo a hih man un, leitung nuntaakna a nei ganhing te genloh, leitung mihing te na ngawn a hong that hi.. 

5. Dawi gilo te in phatna leh dikna, hoihna leh manphat na bawl zolo in siatna ding leh sih na ding nasep in nei a hih man in vantung thuciam kum (8) sungah vantungmi te a hong zolo a hihi. 

6. Ka Tapa Pau Cin Hau in vantung thusiangtho tawh a mannei zawh na hong neih khit ciang in, kei maa mipawl te hong sam in kei maa thu phapiak na huang sungah hong koih a hihi. 

7. Note in ka minam te leh ka si ka sa te na hi uh hi. ka mipawl ka minam te in dawi gilo te tung aa biak piak na leh biak sapna te bei-in dawi gilo te tawh kizopna a bei hi. 

8. Tua a hih man in dawi gilo biakpiak na leh biak sapna na nei nawn kei ding uh hi. 

NUNTAAKNA THU SIANGTHO (37)

Pasian ni,ni thupi ni te 

1. Leitung mihing te gim na ta’ang ding in a thuak ka Tapa Pau Cin Hau in vantung ka vangliat na lamdang, hiamna lamdang leh zawhna lamdang te tawh dawi gilo, dawi mangpa nasepna te khempeuh kum (8) sungah a zozo hi. 

2. Ka Tapa Pau Cin Hau zawhna lamdang te hangin kei hong um mi te khempeuh, vantungmi te in na hun leh na nuntaakna te a mannei manphat na tawh a siangtho nuntaakna hong piangsak in ka vantung vangliat na tawh hong zeem hi. 

3. Vantungmi te thaman a ngah kei hong um mi te in nisim na hun neih te khempeuh vantung hun geel na, vantung nasepna thaman a piang ding hi. 

4. Vantungmi te huhna a ngah mi te in kalkhat ni sagih sung aa om kei mah Pasian ni leh ka ni thupi ni te ah, hong phawk in ka min nong phat ding uh hi. 

5. Phatna a hong nei mi te khempeuh in vantung lungdam na thu a ngah a hi ding hi. 

6. Vantung lungdam na thu a ngah mi te in kei maa ni thupi ni leh ka ni siangtho nite ah, no mau pumpi nuntaakna leh ka bawlsa na te khempeuh ki siasak lo, susia lo in, nuntaakna nei khempeuh na that kei ding uh aa, itna lian pen nong piak na uh tawh ka ni thupi ni, ka ni siangtho ni te na siangtho sak ding uhhi. 

7. Ka bawlsa na khempeuh mannei tak aa zat theih na ding in kei leh ka Tapa Pau Cin Hau upna leh muan na lungtang khempeuh hong pia in phawk na lianpen tawh ka ni thupi ni na siangtho sak ding uh hi. 

8. Tua ni te ah kei leh ka Tapa sim loh a dang upna neilo in na lungsim uh na siangsak ding uh hi. Lungsim leh pumpi gamtatna a nin sak ding peuhmah na nial ding uh hi. 

9. Bang hang hiam na cih leh kei maa ni siangtho, ni thu pi ni te ah kei leh ka Tapa Pau Cin Hau min tawh thupha na ki piak zahzah uh vantungmi te nasepna a hi ding hi. 

10.Vantung lungdam na thu a manpha mahmah hoihna te note sia lo in a sia kei ding hi. 

11.Ka Tapa in note thuak na ding ta’ang in kum giat sungah dawi gilo te a zozo hi. Ka Tapa zawhna thaman hang in no te in zong lei leh van ah a zozo na hi uh hi. 

12.A hih hangin dawi gilo te in mawhna hong zong in siatna guta bang in hong pai laitak kua mah in um kei un la, na nial ding uh hi. 13.Vantung lungdam na thu a nial dawi gilo te in samsiat na, na pulak ding uh leh vantung lungdam na thu tatsiat gamtatna tawh na nial ding uh thupi a sa mahmah uh hi. 

14.Kei-in no te kiangah phatna leh dikna khempeuh tawh kong sam tawntung hi. 

15.Kei maa nuntaakna a hong taisan te in dawi mangpa uk sung khuamial na gam a ngah a ki mu zolo kha mangthang te a suak ding uh hi. 16.A hong taisan a hong nusia mi te in vantung minam lian suahna ding a haksa hi. 

NUNTAAKNA THU SIANGTHO (38)

7,7,7 khang sagih

1. Kei maa mipawl vantung minam suan leh khak minam te ka Tapa Pau Cin Hau in vantung siangsawn ka nuntaakna tawh hong keem a hihi. 2. Vantung lungdamna na neih zah tawh ki piak khiat na in thumaan thu tang nuntaakna taktak a hihi. 

3. Thumaan thu tang taktak tawh a nungta tawntung ka Tapa vantungmi te in vantung lungdam na tutphah a pia uh hi. 

4. A nuntaakna a lim a meel zong misiangtho nuntaakna lim leh meel ka piangsak hi. 

5. A siangtho upna taktak a nei mi-in, mi siangtho Kumpipa ka Tapa Pau Cin Hau tawh kizop na hangin kisapna om nawnlo lungdam na a kip sak a hihi. 

6. Siangsawn ka mipawl te in vantung lungdam na thu minphat na innpi vantung ah a om mah bangin leitung ah zong vantung lungdam na thu minphat na innpi na bawl ding uh hi. Minphat na innpi dei thum in na dei ding uh hi. 

7. Ka Tapa Pau Cin Hau thalawh na in 7.7.7 khang sim nopsak na thaman thupha kamciam a hi aa, thupha nial te in 7.7.7 khang sagih sim thuak na a ngah ding uh a hihi. 

8. Zatmi kamsang sawltaak 7.7.7 ni sagih, kha sagih, kum sagih vantung thu khenna a piang, vantung nasepna a hihi. Mihing(11) ciapteh na thaman a piang ding ahihi. 

9. Mittaw leh khel baai tawh a ki bang kei hong tello mi te in mawhna a lian penpen a mau a ki samsia uh a hihi.

NUNTAAKNA THU SIANGTHO (39) 

Pian leh khan ki khek sak ka Tapa 

1. Leitung mihing te nuntaakna in a man neilo kulhpi dawi mangpa huang sung gim thuak na haksatna kulh pi sungpan suahtaak na ding in ka Tapa Pau Cin Hau in keima vangliat na te pua in tua gim tawntung na kulhpi te satkham aa, Pa aw, a ci mi khempeuh suahtaak na leh nuntaak thakna pia in a maa nuntaakna lampi hong zui sak hi. 

2. A mah in keimaa tang aa hong sam ka Tapa a hihi. Tu-in ka bawlsa na te khempeuh lawng in zangh thei ta un. 

3. No te in dawi mangpa huang kulhpi sung ah na om laitak un na kulhpi te ki tam zo hi. 

4. Na lungsim taktak tawh ngaihsun in hong en le cin, ka bawlsa na te khempeuh a manpha in na zangh thei ding uh aa, tua ni ciang in kei leh ka Tapa hong lawngkha na hi uh hi. 

5. Zakna leh muhna a khak tan kulhpi khempeuh vantung vangliat na tawh a ki tam zo hi. Tua kulhpi sungah kua mah na pai nawn kei ding uh hi. 

6. Tua samsiat na leh nenniam na kulhpi pan in nang hong ki sam zo hi. 

7. Leitung aa ka bawl ngun leh kham te sang in a manpha zaw vantung hoih na te kei hong um mi khempeuh in a nei na hi uh hi. 

8. Tua a hih man in a lungdam mi khempeuh in na aw neih zah, lungsim na neih zah, na pumpi khut leh khe te zangh in, na lungdam na zah tawh ki piakhia in ka minphat na nong nei ding uh hi. 

9. Ka Tapa Pau Cin Hau in pian leh khan ki khek sak pa a hihi. Kei-in ka Tapa tung ah ka piak ka lah, vantung pilna leh vantung hoihna te kong pia sak hi. 

10.Tua vantung hoihna leh vantung pilna manphat na te tawh leitung a zeem ding leh ka thupha a pia ding in ka Tapa Pau Cin Hau kong pai sak hi. 

11.Kei leh ka Tapa hong um mi khempeuh in vantung pilna leh vantung hoihna a ngah na ding vantung thu khun ahi hi. 

12.Vantungmi te bawlsa taksa pian na gam leh vantung aa om na khempeuh manpha a hih na thu a lungdam ding in leitung mihing te hong piang sak ka hihi. 

13.Phatna leh lungdam na thu a neilo mi-in a ki nuainen gim tawntung na dawimang pa ukna gam kulh pi sung a hihi. 

14.Ka Tapa leitung ah kong paisak na thaman hang in ka bawlsa na te khempeuh sang in a man nei zaw itna sung ah hong koih aa, phatna a hong piang sak ka Tapa nasepna a hihi. 

15.Tua a hih man in ka minphat aa om mi te khempeuh in nuamsa aa a lungdam na liansak semsem in a gol sak semsem te in ka vantung thupha, ka vantung huah na ka leitung thupha nopsakna te zuan in a nai semsem a hihi. 

16.Ka Tapa in ka minphat na leitung ah a hong zat man in nuntaakna a ngah na hi uh hi. Phatna a bawl ka Tapa nuntaakna in no leitung mihing te aa ding a hihi. 

17.Itna leh lungdam na taktak tawh ki piak khiat na in gamtatna a hihi. Upna leh gamtatna a ki gawm thaman nasepna in zuihna a hihi. 18.Itna a tawngnung pen piakkhiat na in misiangtho kumpipa ka Tapa lungdam na hi aa, a maa lungdam na in vantung aa om kei mah na pa Pasian maipha a mu na hi uh hi. 

19.Kei maa maipha a hong mu mi te ka Tapa in no te hong tel in, hong tel hong it mi te in a maa manneih zah, luahzaa aa hong pia ka hihi. 20.Kei maa maipha hong mu ka tate aw ka tapa luahzaa na ngah laitak un a ki susia zolo nuntaakna sungah kong koih aa, vantungmi te tawh khut ki len in vantung nasepna te lei leh van ah a zo ding ih hi hi. 

21.Dawi gilo te in itna leh zahtaak na, minphat na te khempeuh mai khak in om a hih hang in, kei leh ka Tapa nasepna a khaktan zo kei ding hi. 

22.Kei maa ta’ang aa hong pai misiangtho kumpi pa ka Tapa Pau Cin Hau vantung kammal siangtho te, kua mah in a nial zo kei ding hi. A nial mi khempeuh puk in a bei ding a hihi. 

23.Misiangtho kum pipa nuntaakna sungah no te nuntaakna a kidim ding a thupi mahmah a hihi. Bang hang hiam cih leh no te nuntaakna sungah kei leh ka Tapa nuntaakna te om hen ka cih na a hihi. 

24.Tua ni ciang in kei maa hoihna leh ka Tapa hoihna na nei ding uh aa ka tel minam, vantung mi te thupha piak minam na hi ding uh hi. 25.Leitung mihing te lak ah ka tel mi te in ka deihna bangin vantung nasepna te na zo ding uh hi. 

26.Misiangtho te mai ah mai khak dawimang pa nasepna te khempeuh a bei ding a hi pan hi. 

27.Vantung sawltaak teltuam minam te leitung mi te in itna a hong nei semsem ding uh hi. 

28.Biak sap na leh biak piakna te a hong bei ding aa, vantung lungdam na thu siangtho thumaan taktak hong ki zangh ding hi. 

29.Leitung mihing te ki itna hong lian semsem ding aa, hinsau na hong piang ding hi. 

30.Misiangtho te om na in thupha piak na gam hong suak ding aa, nah teh pan ki pan sing kung lopa, mihing ganhing a hong manpha mahmah ding hi. 

31.Singkung lopa, gah leh teh, huih leh tui leitang tungah vantung lungdam na thu hong ki dim ding aa, misiangtho te teen na in Kham khuapi hong suak ding a hihi. Tua ni ciang in leitung pumpi in khuapi lian khat hong suak ding hi. 

32.Ni, Kha, Aksi, vanawng thawl te nuntaakna in na zangh thei ding uh hi. 

33.Misiangtho thupha piakna te hang in leitung ah gal leh sa, sal leh sila aa ki muh na leh ki deidan na te hong bei ding hi. 

34.Tua ni ciang in leitung mihing te in vantung thusiangtho upna taktak na nei ding uh aa, ki itna innkuan khat in hong piang ding hi. 35.Leitung lungsim tawh ka min suang aa nasepna te khempeuh vantungmi te in nial in leivui suak in a bei khin ding a hihi. 

36.Vantung thumaan thutang taktak tawh ka min siangtho phatna a hong piang ding hi. 

37.Bang hang hiam na cih uh leh misiangtho thupha piakna leh mannei taktak itna leitung mihing te luahtan na in vantung thuciam, kei leh misiangtho kumpipa ka hi uh hi. 

38.Tua a hih man in vantung lungdam na a nei mi te in lei pan a piang na khempeuh tawh minphat na in vantung nasepna te a hihi. 39.Leitung ki ukna tawh ki zui in vantung minphat na nasepna, hawm in a ki pia ding hi. Tua ni ciang in leitung ah pian leh khan ki khek ding hi.

40.Silh leh ten, neek leh dawn ki khek ding hi. Vantungmi te pilna tawh leitung mi te ki zeem in ki ukna piang ding hi. 

41.Kei leh ka Tapa Pau Cin Hau hong um mi te in kei maa kiang ah hong ciah kik ding aa, nuntaak tawntung na, na ngah ding uh hi. 

42.Kei maa kiang ah hong ciah ding mi te in vantung minam lian te a hi uh hi. 

43.Bang hang hiam cih leh no te in vantungmi te sung pan leitung ah piang in, lei leh van ah ka bawlsa na te khempeuh ka minphat ding in vantung thuciam ngah te na hi uh hi. 

44.Vantung thuciam ngah te in dawi mangpa deihna siatna khempeuh nin bang in na kih ding uh hi. 

NUNTAAKNA THU SIANGTHO (40) 

Misiangtho thupha piak 

1. Kei-in note pa ka hi hi. A siangtho kha nuntaak na zong ka hihi. Na khempeuh piangsak in a hong bawl na Pa Pasian ka hihi. 

2. A kipatcil in vantung innpi ka piangsak aa ka nuntaakna leh ka vangliatna tawh vantungmi vangtung galkap te ka paingsak hi. 

3. Keima tang in vantungmi, vantung galkap te a uk dingin, vangtungmi tapa ka nei hi. 

4. Vantung Siangsawn innpi pan a piang ka bawlsa te khempeuh vantungmi ka tapa ka uk sak hi. 

5. Vantung Siangsawn ka innpi ka vangliat na tawh ka piangsak aa vantung ka min hong phat ding in vantung mi, vantung galkap te ka piangsak hi. 

6. Tua khit ciang in van awngthawl, Ni, Kha, Aksi, Leitung ka paingsak hi. Van awngthawl ah leitung mite nuntaakna ding a ki cing tak in piangsak in ka koih hi. 

7. Kei maa vantung gamnuam Siangsawn innpi leh ka vangliat na tawh Ni ka bawl hi. Ni leh ka vangliat na gawm khawm in Kha ka piangsak aa, Ni, Kha leh ka vangliat na gawm khawm in Aksi ka piang sak hi. 

8. Ka vangliat na tawh ka bawl NI, KHA, Aksi te gawm khawm in leitung ka piangsak hi. Leitung ka painsak khit ciang in huih, tui, tuisung ganhing, singkung lopa ka piangsak aa, tua khit ciang in leitung ganhing ka paing sak hi. 

9. Leitung ah mihing taksa a pianna ding in vantungmi te thu pia in ka sawl hi. Vantungmi te sung pan apiang khia taksa pumpi in leitung ah om ahih man in leitung mihing te kong ci hi. 

10.Mihing te in lei leh van a ka bawlsa na khempeuh vantung minphat na tawh hongphawk den ding in vantungmi te sung pan hong piangsak ka hihi. 

11.Tua ahih man in vantungmi pa ka Tapa Pau Cin Hau in leitung ah vantung minam suan leh khak te zong ding leh vantung minphat na hong pia ding in, mihing si leh sa tawh kei maa tang in hong pai ahihi. 

12.Ka Tapa leh vantungmi nungzui sawltak te kei maa hoihna lamdang te ka en sak aa, leitung mihing te tungah vantung Siangsawn minphat na thu hilh ding in apiang sak ka hihi. 

13.Ka Tapa in vantung khasiangtho nuntaakna tawh vantung sawltaak hong teel aa, ka Tapa sawltaak ka zatmi te in vantung nasepna piang in na zo ding uh hi. 

14.Kei maa kiang pan a pai vantungmi te in leitung ah a mau te lim leh meel tawh mihing taksa apian sak mah bang in, vantungmi te bawlsa mihing taksa pumpi hinna, gamtatna, nuntaak tawntung na ngah theih na ding in, kei maa lim leh meel khasiangtho no te sungah hong koih ka hihi. 

15.Keimaa khasiangtho kha pumpi, ka nuntaakna leh taksa pumpi a ki gawm khawm in mihing ahihi. 

16.Kei mah in no te sung a om khasiangtho hopih in, taksa nuntaakna thu ka piak sak ciang in, khasiangtho in ngaihsut na a siangtho thumaan taktak a hilh hi. 

17.Khasiangtho thupiak na in kei maa thu hilh na hi a, thumaan taktak gamtatna a piang sak ka hihi. Thumaan taktak gamtatna thaman in taksa pumpi gamtatna a hihi. 

18.Tua ahih man in khasiangtho leh taksa ki gawm khawm ka minphat na te na zawh khit ciang un, khasiangtho in kei maa kiangah a hong ciah kik ding vantung nasepna, vantungmi sawltak thuciam na a hihi. 

19.Kei maa kiang ah a hong ciah lo vantungmi sawltaak thuciam tawh a ki pelh mi in ni sagih, kha sagih, kum sagih, 7.7.7 dong, khuamial na gam gimna sung a hi ding hi. Tua a hih man in na pumpi na bawlsiat uh leh mawhna ahihi. Kei sim loh adang lungsim na nei kei ding uh hi. 20.Vantungmi te sungpan a piang taksa pumpi in leitung ngak ta hen. 

21.Keimaa nuntaakna khasiangtho vanmisiangtho in a pian na gam vantung Siangsawn ka innpi ah hong ciah kik ta hen. 

22.Vanmisiangtho in vantung nasepna zo hen la, ka ni thupi ni te ah taksa ten na gam, misiangtho ten na gam, thupha piak na gam, vantungmi sawltaak thuciam bang in zo ta hen. 

23.Tua a hih man in misiangtho te taksa ten na gam in thupha piakna gam a suak ding hi. 

24.Misiangtho te tenna gam in thupha piak na gam ahih mah bang in vantung thuciam manphat na leh hoih na tawh na ki pelh thei kei ding uh hi. 

25.Misiangtho thupha piak na te a gu ding leh a susia ding in dawi mangpa in hong khem a hih hang in misiangtho te tangin vantungmi nasepna a piangding hi. 

26.Tua a hih man in misiangtho te aw thuman lo gamtatna te in dawi mangpa deihna a hih ciangin na nial ding uh hi. 

27.Banghang hiam na cih uh leh keimaa thunial dawi gilo te in samsiat na huangsung khuamial gam a luah ding uh hi. 

28.Dawi gilo te in nuntaak tawntung na leh thupha piakna gam a pian na ding hong haza uh aa, nuam luat na, heh luat na, dah luat na lungsim hong nei sak hi. 

29.Dawi mangpa galhiam siatna in guta bangin hong pai a hih na thu na thei ding uhhi. 

30.Kei maa kiang pan pai khia in lungsim dang a nei mite a mau te deihna huang sung ah amau minam suak ding in a hong deih uh hi. Tua a hih man in a man neilo gamtatna leh ki pulak na te na zang kei ding uh hi. 

31.Thu maanlo gamtatna a thuak dawi gilo te in vantungmi te samsiat na a thuak a hihi. siatna te in dawi mangpa khaici vawh a hihi.

NUNTAAKNA THU SIANGTHO (41) 

A vanglian bel vantung kumpi pa 

1. Kei in na khempeuh piangsak in ka bawl hi. Ka bawlsa na te khempeuh ka vangliat na tawh uk in ka kem hi. 

2. Ka Tapa misiangtho kumpipa Pau Cin Hau in ka bawlsa na khempeuh a maa nuntaakna tawh hong pia khia hi. 

3. Ka Tapa upna taktak a nei mi khempeuh in a siangtho nuntaakna a nei uh hi. Misiangtho kumpipa ka Tapa nuntaakna siangtho te hang in misiangtho innkuan hong suaksak hi. 

4. Ka Tapa in kei maa tang in vantung ka vangliat na te tawh vantungmi vantung galkap te uk in, vantung vangliat na tawh pian leh khan a ki khek sak hi. 

5. Vantung galkap tulza khat ciang in vantungmi guk in a uk hi. 

6. Ka Tapa Pau Cin Hau min tawh vantungmi, vantung galkap te nong sap uh ciangin ka Tapa nasepna hong piang aa no te pulak zah leh a ki sam zah vantung nasepna a piang hi. 

7. Na thuak haksatna te khempeuh bei sak in tawldam na hong pia ka hihi. 

8. Ka Tapa Pau Cin Hau min tawh nong nget na khempeuh hong dawng in na haksatna te leh na gal te uh ka zo ding aa kua mah in a hong khaktan zo kei ding hi. 

9. Ka innpi leh ka vangliat na te khempeuh tawh taanna lamdang te pua in kong ki pholak laitak, a hong um taktak mi te in ka Tapa Pau Cin Hau nuntaakna sung ah, launa leh dahna omlo a muanhuai na belh ding nuntaakna innpi sung ah aom na hi uhhi. 

10.A khut sung mek in ka Tapa hongsap na hangin, aman nei vantung ka hoihna tawh hong zeem a hihi. 

11.Kei leh ka Tapa misiangtho kumpi pa hong um taktak te in tawntung nuntaakna ki sapna om nawnlo, ka anglai zang ah hong paii in, thuak na om nawnlo zawhna kumpipa si leh sa te na hi uh hi. 

12.Ka Tapa in no te khempeuh a nuntaakna tawh hong paii tawntung aa, a sia theilo tawntung nuntaakna hong pia a hihi. 

13.Ka bawlsa na te khempeuh leh no te in ka Tapa neihsa te na hi uh aa ka vangliatna tawh ka uk hi. 

14.Ka anglai zang ah a luangsuk ka nuntaakna tui, upna taktak tawh a dawn mi in leitung ci leh sa pan vantung minam lian suak kik in tawntung nuntaakna kei maa kiang ah kei leh ka Tapa manneih na a luah ding na hi uh hi. 

15.Kei leh ka Tapa upna taktak a hong nei mi khempeuh in vantung kham lukhu, vantung manphat na tawh hong zeem ka hihi. 

16.Tua ahih man in khauhna lamdang te sang in a khauh zaw, hiam na lamdang te sang in a hiam zaw te tawh na maa uh ah pang in ka zo ding uh hi. 

17.Ka Tapa Pau Cin Hau a um taktak ka thupha piaksa suan leh khak te in Siangsawn misiangtho ka pawlpi a hi uh hi. 

18.Kei in na khempeuh a piangsak vanglian bel vantung kumpipa ka hi aa, kei sang in a lianzaw kua mah aom kei hi. 

19.Ka Tapa hong ki ko na leh a hong pulak te khempeuh lei leh van ah piang in vantung nasepna te vantungmi, vantung galkap te zawhna ahi ding hi. 

20.Ka Tapa Pau Cin Hau min tawh nong nget te khempeuh uh vangtungmi, vantung galkap, vanmisiangtho te nasepna vantung zawhna a hi ding hi. 

21.Tua a hih man in kei leh ka Tapa nong mangngilh ngei kei ding uh hi.

NUNTAAKNA THU SIANGTHO (42) 

Pumpi siasak thei zang ken 

1. Vantung pilna leh hoihna khempeuh tawh leitung mihing te a ki vaak ding na hi uh hi. 

2. No ka tate om na ka thupha piak na gam sungah na khempeuh a cing tak tawh hong nungta sak ka hihi. 

3. Vantung ka thusiangtho lungdam na in no te nuntaakna taktak hong pia ka hihi. no leiitung mihing te deih na tawh ka min nong suang kei ding uh hi.  

4. Vantung thu siangtho kammal nuntaakna tawh a ki pelh gamtatna in dawi mangpa galhiam a hihi. 

5. Kei leh ka Tapa Pau Cin Hau hong um taktak te in kong piaksa nuntaakna na pumpi uh vantung thu siangtho zahtaak na leh itna tawh na keem ding uh hi. 

6. Vantungmi te in thu maanlo gamtatna a nial mah bang in vantung thusiangtho phalna leh thukim na omlo in leitung ci leh sa gamtatna thu maanlo numei leh pasal gamtatna in guta a hi aa, dawi mangpa nasepna a hih man in vantung thukham a hihi. 

7. Kei hong mangngilh sak ding leh na lungsim lal na ding in gualnop luat na ah na pai kei ding uh aa zu na ne kei ding uh hi. 8. No te Dawi mangpa in zu tawh hong bum aa na kamsung uh pan ki liatsak na kammal te na pusuak sak uhhi. 

9. Tua ki liatsak na kammal te in kei hong nial na uh aa, na pumpi a ding gu suak a hih man in vantung thukham a hihi. tua a hih man in pumpi a siasak thei ding peuhmah na zangh kei ding uh hi. 

10.Dawi te in no leitung mihing te khem in hong uk nuam a hih man in nisim na nuntaakna na gamtatna ah na zatna khempeuh leh na nek na khempeuh tungah gu a khah hi. 

11.Kei nong mangngilh na ding un ki liatsak na gualnop na leh nekna tawh hong bum a hih man in kei nong phawk tawntung ding uh hi.

NUNTAAKNA THU SIANGTHO (43) 

Vantungmi te sung pan pian khiat na 

1. A kipat cil in Pasian ka om hi. Kei-in a siangtho khaa nuntaakna ka hihi. Ka bawlsa na khempeuh ka vangliat na tawh uk in ka keem hi. 

2. Nopna a saang bel vantung siangsawn ka innpi, vantung gamnuam thuap sawmthum pan in ka vangliat na tawh van awngthawl, ni, kha, aksi, leitung, tui, huih, singkung, lopa, tuisung ganhing, leitung ganhing ka piangsak hi. 

3. Vantung aa ka bawlsa khempeuh manpha a hihna thu ka minphat ding in vantungmi, vantung galkap te ka nuntaakna tawh vantung Siangsawn ka innpi pan in ka piang sak hi. 

4. Vantungmi, vantung galkap te in vantung ka nasepna te vantung minphatna nam khempeuh zangh in ka min hong phat uh hi. 

5. Vantung mi, vantung galkap, vanmi siangtho te in vantung aa om khempeuh ka min hong phat mah bang un leitung aa ka bawlsa khempeuh ka min hong phat ding in vantungmi sung pan leitung mihing kong piangsak hi. Vantungmi te sung pan aa piang ka tate mihing kong ci hi. 

6. Vantungmi, vantung galkap, vanmi siangtho te in ka min hong phat bang un, leitung mihing te in zong a ging thei na khempeuh tawh lei leh van ah ka bawlsa na te khempeuh phatna nong nei ding uh hi. 

7. Ka minphat aa kei hong it mi te leh a lungdam mi te kiangah, maa ka pang ding aa vantungmi te tawh khut ki len in lei leh van uk in zawhna lamdang te tawh vantung nasepna na zo ding uh hi. 

8. Vantungmi bawlsa mihing ci leh sa, vantung ka nuntaakna, vantung ka khasiangtho tawh, mihing nuntaakna ka piang sak hi. Tua a hih man in mihing ci leh sa in vantungmi lim leh meel a hi aa, khasiangtho in kei maa lim leh meel a hi hi. 

9. Ka tate aw leitung ah ka bawlsa na khempeuh vantung nasepna ka minphatna na zawh uh ciangun, kha siangtho pumpi vanmisiangtho in Siangsawn ka innpi ah hong ciah ta hen. 

10.Vantungmi te bawlsa ci leh sa, guh leh taang in leitung ngak ta hen la, khaa pumpi vanmisiangtho hong ciah in vantung ka innpi luah ta hen. 

11.Vanmisiangtho vantung ah hong ciah kik na ding vantung nasepna a khak tan a susia kei hong um lo te in na tu na ta khang dong in khua a mial ding hi. Tua a hih man in na nuntaakna, na pumpi na bawl siat leh mawhna a hihi. 

12.Khasiangtho ka hopih ciang in taksa pumpi-in lungsim ngaihsut na a siangtho kong neisak aa, thumaan gamtatna ka hong piang sak hi. 13.Thumaan gamtatna a nial, mawhna tawh a ki ciam te in, nuntaak haksatna na thuak ding uh hi. 

14.Kei mah na Pa Pasian ni thupi ni te ah vantungmi, vantung galkap, vanmisiangtho te in taksa teen na gam, thupha piakna gam a piangsak ding vantung thuciam na hi uh hi. 

NUNTAAKNA THU SIANGTHO (44)

Vantung kham lukhu 

1. Misiangtho te in taksa teen na ding khua a zong ih hihi. Misiangtho te teen na gam in kham khuapi lian a suak ding misiangtho gam a hihi. 2. Tua kham khuapi sungah taanna lamdang te tawh taang khawm in vantung pilna leh leitung pilna, vanhauh na leh leitung nopsakna luah in nuntaakna ih nei ding hi. 

3. Tua ni ciang in ka Tapa Pau Cin Hau a um taktak aa Pa aw ci in itna lian pen tawh a sam mi te zong ih sam ding hi. 

4. Mawh maisak na in itna a lianpen hi aa, itna ki pumkhat na in vantung lungdam na a lian pen a hihi. 

5. Misiangtho innkuan a suak te aa ding in kham khuapi sung ah hoihna lamdang te tawh a om khawm ding vantung minam lian te ih hihi. 

6. Vantung minam, misiangtho ka tate nasepna thaman in vantungmi te nasepna thaman a piang ding ahihi. 

7. Misiangtho te aa ding nisim vantung hun gualh na vantungmi te nasepna a nial mi te in vantungmi te thaman a nial a hi uhhi. 

8. Tua mah bang in misiangtho nasepna a za nuamlo a umlo te in vantung minam lian misiangtho thaman neilo a hi ding uh hi. 

9. Tua bang minam te khatvei ih sam kik ding aa, a hong dawnglo teitei te ih nusia ding hi. 

10.Bengngong bang aa om mi te in dawi mangpa seelcip ki liatsak na, ki deidan na leh ki nuainen na tawh uk na gam a suak ding a hihi. 11.Vantung suan leh khak vantung minam lian misiangtho te thaman in leitung ah thumaan gamtatna, vantung thaman sem in a vawh ding a hihi. 

12.Keimaa nasepna te kua mah in a nial zo kei ding uh aa, misiangtho te vantung tawh kizop na, vantung ciahna lampi zong a pia zo ka hihi. 13.Misiangtho te vantung ciahna lampi leh misiangtho thaman thumaan gamtatna te dawi mangpa leh a pawl te in khaktan ding in hong ki pat hang in a hong zo kei ding uh hi. 

14.Vantung Siangsawn innpi tawh kizop na leh ciahna lampi kua mah in a khaktan zo kei ding hi. 

15.Thumaan gamtatna tawh Misiangtho te zawhna in kei leh ka Tapa Pau Cin Hau zawhna a hihi. 

16.Kei leh ka Tapa misiangtho Kumpipa tungah a lungdam mi te khempeuh in misinagtho innkuan lungdam na a hihi. 

17.Misiangtho te lungdam na thaman in lei leh van aa ka bawlsa na te khempeuh a manpha aa zat theih na ka piangsak tawntung hi. Tua ni ciang in misinagtho te pumpi a en ngam kei ding uh hi. 

18.Kei a hong um taktak te lo ngal kei tawh kizop na a om thei kei ding hi. 

19.Misiangtho kumpipa ka Tapa in no te khempeuh a hong maitai sak aa, vantung kham lukhu a hong khu sak hi. 

20.Nuntaak tawntung na keimaa thupha piakna gam, misiangtho thupha piakna gam sungah a hong koih hi. 

21.Tua a hih man in misiangtho kumpipa ka Tapa Pau Cin Hau in misiangtho vantung minam lian te Pa taktak ka hihna a hong lak ka Tapa a hihi. 

22.Ka Tapa in keimaa maipha a hong musak pa, a ki selcip mi te vantung hoihna te tawh hong pholak khia in, Khamkhuapi sungah a hong koih nuntaakna a hihi. 

23.Ka bawlsa na te khempeuh ka minphat ding in vantungmi te sungpan kong piansak vantungmi suan leh khak, vantung minam lian no te kiangah ka Tapa Pau Cin Hau in vantung pilna hilh ding leh vantung lungdam na thusiangtho puak ding in leitungmi te tawh a ki bang si leh sa in hong pai sak ka hihi. 

24.Ka Tapa hong piakkhiat sa vantung pilna leh lungdam na zangh in pulak khiat na hun sem in na lah khiat ni uh ciangin, kei leh ka Tapa um in hong mu, a hong lawngkha,v antung minam lian te a suak ding na hi uh hi. Tua ni ciang in lei leh van ih uk ding aa misiangtho gam a suak ding hi. 

25.Tua hun ciang in vantung Siangsawn ka innpi pan vantung ka nuntaakna tawh misiangtho gam a piangsak vantung minam lian, vantungmi suan leh khak na hi uh hi. 

26.Vantung minam lian, vantung mi suan leh khak te kiang ah kei maa ta’ang in a hong pai ka nuntaakna pumpi tawh a hong om khawm, misiangtho kumpipa ka Tapa Pau Cin Hau in vantung Siangsawn hoihna lamdang te tawh no te hong manpha sak hi. 

27.Tua a hih man in no te in vantung Siangsawn nopsakna lamdang te tawh a hong zawhpih ka Tapa thaman na hi uhhi. 

28.Ka Tapa Pau Cin Hau in itna lamdang te tawh note khempeuh a hong neih khit ciang in ka Tapa tawh a om khawm na hi uh aa, ka Tapa thaman Tapa luah za’a a ngah na hi uhhi. 

29.Ka Tapa thaman a ngah te khempeuh in kei leh ka Tapa misiangtho kumpipa tawh vantung Siangsawn ka innpi ah a nungta tawntung vantung nasepna a zo ding misiangtho innkuan te ih hihi.

NUNTAAKNA THU SIANGTHO (45) 

Belh ding innpi misiangtho kumpipa 

1. Vantungmi suan leh khak minam te a zong ding in vantungmi nasepna a hong om ding hi. Vantungmi te in a mau suan leh khak a hong zon ciang in ei misiangtho pawlpi te ih hi ding hi. 

2. Misiangtho sapna vantungmi te aw a hong ging ding aa, vantungmi te in vantung pengkul mut in misiangtho a hong kaihkhop ni ciang in vantung ka thukhen na lianpi a hong piang ding a hihi. 

3. Tua ni ciang in misiangtho vantung minam lian te in leitung ah hing silsial na ngah in, a tawntung nuntaakna vantung Siangsawn lungdam na thaman tawh ih nungta tawntung ding hi. 

4. Kei leh ka Tapa Pau Cin Hau a hong nial, a hong um lo te dawi mangpa nuainen na ki liatsak na, ki deidan na tawh dawi mangpa in a uk ding hi. 

5. Kei a hong um lo a hong zong lo mi, dawi mangpa ukcip minam te in, kei leh ka Tapa hong um mi te ii seh thum suah seh khat a hi ding aa tua mi te a si ding uh hi. 

6. Vantung thukhen na a hong tun ni ciang in kei leh ka Tapa Pau Cin Hau hong um lo hong taisan mi te, duh na leh kial na, dangtaak na tawh nuntaakna a nei ding uh aa man a nei zo kei ding uh hi. 

7. Hiam na lamdang te sang in a hiam zaw, khauh in a bun zaw vantung Teipi in, nin leh siang khenna a hihi. Kua mah in vantung thukhen na a nial zo kei ding aa, a ki khaktan zo kei ding hi. 

8. Kei leh ka Tapa a hong um taktak mi te aa ding a belh ding innpi a muanhuai pen misiangtho Kumpi pa ka Tapa Pau Cin Hau a hihi. 

9. Ka Tapa tawh kizopna a nei mi khempeuh in misiangtho nuntaakna a hiihi. 

10.Ka Tapa in vantung thumaan gamtatna taktak tawh vantung nasem pa a hi aa, haksatna a thuak mi khempeuh aa ding in tawldamna a hihi. 

11.Ka Tapa thaman thalawh in a hong um taktak mi te ki ko na aw te khempeuh za’a in kong dawng ding aa, vantungmi nasepna a piang ding a hihi. 

12.Ka Tapa Pau Cin Hau in no te ta’ang ding in hong ki pulak khiat na a maa aw siangtho tawh hong ki ko khiat na thaman in vantung lungdam na ka piang sak aa leitung pilna tawh pian leh khan ka ki khek sak hi. 

13.Kei mah in vantung aw siangtho tawh kong ki pulak laitak kua mah in nong thei kei uh hi. Kei leh ka Tapa bek in ka thei uh hi. 

14.No te lak ah vantung thusiangtho a hong pulak, vantung ki vangliat na tawh a zo ka Kamsang lian pen Pau Cin Hau in a ki nenniam, a ki nuainen dawi mangpa ukcip a thuak mi khempeuh hong sawpsiang in, misiangtho a hong suaksak ka Tapa a hihi. 

15.Ka Tapa in misiangtho te lak pan vantung ka vangliat na tawh a lian pen zawhna a hong nei misiangtho Kumpipa hi aa, a maa hong pulak na te na ngaihsun khial kei ta un. 

16.Leitung ah mawhna tawh a ki ciam te in duhhop na leh huaiham na tawh hong ki pulak hang in a mau te a it a ki lempih khat zong omlo ding aa ka nial ding hi. 

17.Kei leh ka Tapa hong um taktak thumaan gamtatna hong nei mi te a mau te ta’ang in a maa uh pang in ka zawhpih ding hi. 

18.Vantungmi te suan leh khak te in na taksa pumpi na bawl sia kei ding uh hi. 

19.Kei maa maipha hong mu lo kei leh ka Tapa kizopna thumaan gamtatna a nial mi te in dawi mangpa deih na a hih man in ka min a hong suang thei kei ding uh hi. 

NUNTAAKNA THU SIANGTHO (46) 

Hong enkik ka Tapa 

1. Kei-in na khempeuh bawl in ka piang sak hi. Ka bawlsa ni taang tawh taanna lamdang te kong lah khiat lai tak, leitung mihing te kiang ah ka bawlsa na khempeuh a pia ding leh a lak khia a sem ding in ka Tapa Pau Cin Hau simloh a dang kua mah a om kei hi. 

2. Ka hoihna leh ka manphat na lamdang te tawh kong ki pulak khiat ka bawlsa na te no leitung mihing te aa dingin ka piansak a hihi. 

3. No te aa ding in ka bawlsa na te khempeuh hong haza’a dawi gilo te guta bang in hong pai aa hong sut uh hi. 

4. Kong piaksa te khempeuh dawi gilo te in hong guk sak khit ciang in man a nei zo nawnlo gimna a thuak na hi uh hi. 

5. Dawi gilo te in vantung hoihna tawh ka bawlsa te khempeuh a mau nam suah theih na dingin, biak piak na leh biak sapna a deih uh hi. 

6. Dawi gilo te guk khempeuh bei-in man neilo a hih hang in na thei zo tuan kei uh hi. 

7. Ka bawlsa na te no te aa ding in kong piaksa na khempeuh dawi gilo te in a hong guksak khit ciangin gu a hong pia hi. 

8. Zu kham aa kei nong mangngilh uh ciangin dawi mangpa in mailam nuntaakna na masuan uh gel theihloh na ding in na mai uh hong humcip aa, kei nong mu zo nawn kei uh hi. 

9. Tua a hih man in mihing pumpi a siasak khempeuh leh zu in vantung thukham a hihi. 

10.Siatna te khempeuh in dawi mangpa nasepna a hi aa, phat na te khempeuh in kei maa nasepna a hihi. 

11.Siatna in guta bang in a hong pai ding aa, mawhna in nang hong selcip in a mangthang na hi ding hi. 

12.Siatna leh mawhna te khempeuh nin bang in na kih ni hong tun ciangin ka bawlsa na te khempeuh leh na pumpi uh mannei in a piang ding aa, kei leh ka Tapa Pau Cin Hau a hong mu na hi ding uh hi. 

13.Dawi gilo te in zukham in nuamsa aa na kamsung uh pan a pai khia ki liatsak na kammal te tawh na mai hum in a hong selcip hi. 

14.A ki selcip a ki nenniam, a ki mu zolo khua mial na gamsung aa te’eng dawi mangpa ukcip na a thuak minam te ka Tapa in hong en kik in hong honkhia hi. 

15.Dawi mangpa ukcip a ki nenniam nin bang aa a kihhuai minam neu te a khut vei lam tung pan hong la aa, a khut taklam misiangtho pawlpi nuntaakna sungah hong en kik in a hong koih kik hi. A khut taklam aa hong teel sa mi te in misiangtho pawlpi te ih hihi. 

16.Misiangtho pawlpi te nuntaakna in kei leh ka Tapa khutkuak muanhuai bel sungah a om a hihi. 

17.No te in thuciamsa nuntaakna huangsung a muanhuai pen ka khutkuak sungah kong koih thupha piaksa suan leh khak misiangtho ka pawlpi na hi uh hi. 

18.Note kiangah om in note hong khauhsak hong hiamsak vantung manphat na tawh hong zeem ka hihi. 

NUNTAAKNA THU SIANGTHO (47) 

Taksa gamtatna in thu khenna 

1. Dawi gilo te in leitung mihing te leh ka bawlsa na khempeuh a mau te neihsa a suaksak nuam uh hi. 

2. Tua a hih man in mihing te lungsim khem na ding a hong zongzong uh aa, mihing ngaihsut na khempeuh a hong uk nuam uh hi. 

3. Mihing te neihsa khempeuh a hong uk zawh na dingin mihing te lungsim zangh in ngaihsut na te hong zongzong aa, tua te khempeuh tawh a hong uk uh hi. 

4. A ging thei thu lamdang te leh mangmat na khat peuhpeuh tawh uk in a hong khe’em uh hi. 

5. Dawi mangpa khe’emna huang sungah a om mi khempeuh haksatna a thuak na te uh pan bangmah ngaihsun theilo, ngaihsut na a bei zah dong in a hong khe’em uh hi. 

6. Dawi mangpa ukcip a thuak mi khempeuh in a thuak zawh nawn loh lungsim ki tam za’an na dong a tun ciangin, muan na dang om nawnlo itna tawngnung pen tawh hong sam mite hong ki ko na uh leh hong ki pulak na zahzah a mau te mai ah maa pangin ka huh ding hi. 

7. Kei simloh a dang lungsim a nei mi khempeuh in,”Pa aw,” ci-in hong sap hang in ka dawng kei ding aa lungsim ki tam za’an lo tawh a mau te ka honkhia kei ding hi. 

8. Dawi gilo te in ka bawlsa na pumpi uh leh na neihsa khempeuh uh tawh a mau te biakpiak leh biaksap ding deih a hih man in mangmat na khat peuhpeuh leh thu khat peuhpeuh tawh na lungsim uh hong en a hihi. 

9. Tua a hih man in ka Tapa misiangtho Kumpipa Pau Cin Hau itna na neih zah tawngnung pen tawh phawk in na lungngai ta un. A mah in thumaan thutang taktak tawh lei leh van ah a zo pa a hihi. 

10.Thumaan thutang taktak tawh a zo pa ka Tapa hoihna leh manphat na khempeuh a susia ding in leitung taksa a sanggam te leh midang pawlkhat tawh kop in, dawi gilo te in a susia ding leh gal in a muh theih na ding in khe’em aa, a ki kopsak hang in a zo kei uh hi. 

11.Tua a hih man in taksa pumpi gamtatna in vantung thukhen na hi aa, taksa thukhen thuak na in khaa pumpi thuciam ngah gamtatna a hihi. 

12.Ki manna a neilo ka tate lungsim a lal na ding leh kei mah na Pa Pasian nong mangngilh na ding un, mang gilo tawh a hong khe’em hi. 13.Lungsim hoih lo, ngaihsut hoih loh na tawh hong bum in thumaan gamtatna hong nial sak aa, midik mi te huat na leh muhdah na ding tawh hong bum in git loh na lungsim a nei te a hong it sak aa, nuntaakna siangtho hong nin sak uh hi. 

NUNTAAKNA THU SIANGTHO (48) 

Vantungmi te tawh pumkhat suahni 

1. Kei leh ka Tapa Pau Cin Hau in leitung mihing te aa ding in na a sem ka hi zaw uh hi. 

2. Ka nasepna te khempeuh uh kaal khat ni sagih a cin sim keimah Pasian ni-in, ka min nongphat ding uh aa lungdamna na nei khawm ding uh hi. 

3. Ni sagih, kha sagih, kum sagih hun thupiak na te na lungngai ding uh hi. 

4. Kei-in no te aa ding leh na nuntaakna ding uh na sem ka hih man in ka ni thupi ni te ah ka min nongphat ding uh hi. 

5. Ka hunkhen na zui-in ka ni thupi ni te ah ka min hongphat mi te khempeuh in vantungmi te tawh pumkhat suah na a hihi. 

6. Ka ni thupi ni te ah ka hong piaksa na te khempeuh kei maa min tawh lungdam in a pahtawi aa, thupha ki piak na a nei mi te aa ding in vantung thaman a hihi. 

7. Ka ni thupi ni te ah kei simloh a dang lungsim piakna leh kong piaksa na neih sa te khempeuh uh a dang piak khiat na na nei kei ding uh hi. 8. Ka ni thupi ni te ah lungsim a siangtho pen a ging khia kammal siangtho, leipan aa piang kong piaksa na te khempeuh tawh itna leh lungdam na zah ka minphat na nong nei ding uh hi. 

9. Kei maa neihsa na hihna uh ka kipsak na hang a hihi. 

10.Tua ka ni thupi ni te ah kei sialo in no te zong na sia kei ding uh aa, ka bawlsa na khempeuh suksiat na leh nuntaakna a nei khempeuh na that kei ding uh hi. 

11.Na pumpi keem lecin dawi mangpa hong zolna khempeuh tawh na ki pelh ding uh hi. pumpi kep na in kei maa thumaan nasepna a hihi. 12.Ka ni thupi ni te ah itna leh zahtaak na a lianpen tawh ka min suangin thupha ki piakna na nei ding uh aa, thupha ki pia nuamlo dawi mangpa deihna tawh lamkhial mi te in ka min nong suang kei ding uh hi. 

13.Ka ni thu pi ni te ah misiangtho te in thupha na ki piak na zahzah uh thupha san ni a hi dinghi. 

14.Lungsim tawngnung pen tawh thupha a ki pia mite kiangah kei ka om aa, a mau te thupha ki piak na zahzah, vantungmi te nasepna piang in misiangtho Kumpipa thaman a hi ding hi. 

15.Kei-in ki-itna sungah ka om aa zu te va te in munnuam gamnuam a zuan uh hi.

NUNTAAKNA THU SIANGTHO (49) 

Zu in dawi mangpa galhiam 

1. Kong piaksa nuntaakna khempeuh tawh nuamsa in na hong mangnilh uh ciangin vantung thukhaam a hihi. 

2. A hong mangngilh mi te in a hong taisan te a hi uh aa, a mau te in kei maa kiang a hong zuat na ding uh thu khaam tawh a ki bang hi. 

3. Tate aw no te neek ding a ki cing tak aa kong piaksa te a hong khaam ka hi kei hi. zu in dawi mangpa hong bum na a hih man in vantung thukha’am a hihi. 

4. Dawi mangpa bum na huangsung aa om mi khempeuh in no te pumpi leh kong piaksa na te khempeuh gu suak in, na tung aa vantung Siangsawn hoihna thupha khempeuh a bei khin hi. 

5. Dawi gilo te in no ka tate tung aa vantung Siangsawn hoihna thupha khempeuh bei hen,ci-in hong bum na a hihi. 

6. Dawi gilo te in kong bawlsa no te khempeuh na bei na ding un a hong khem a hihi. Dawi mangpa galhiam te khasiangtho vangliat na galhiam tawh do in ih zo ding hi. 

7. Vantung khasiangtho galhiam tawh ka Tapa Pau Cin Hau in kum giat sung ah, a zo khin zo hi. Ka Tapa zawhna thu te thumaan taktak a hih na thu, ka Zatmi te tungah hilh kik in kong ki langh khia sak hi. 

8. Pumpi a siasak lungsim hoihlo tatsiat gamtatna te leh pumpi gamtatna nin a suaksak zu, taksa pumpi aa ding vantung thusiangtho tawh ki leh bulh kham theih khempeuh, ka Tapa a um taktak mi te hong zo sak khin ka hih man in nin bang in na kih ding uhhi. 

9. Kei hong um taktak mite aa dingin, ka Tapa Pau Cin Hau in kumgiat zawhna te a hong zawh khit ciang in leitung ah ka thuhilh in kong sawl hi. 

10.Van a saang bel aa om na Pa Pasian leh ka Tapa Pau Cin Hau nuntaakna in lin na leh lau na a omloh na na belh ding innpi a hihi. 

NUNTAAKNA THU SIANGTHO (50) 

Nuntaak thak na hongpia ka Tapa 

1. Leitung mihing te annek ding khempeuh, dawi mangpa leh dawi gilo te in gu suaksak aa, vantung thumaan gamtatna te khempeuh nial in mihing gamtatna tawh dawi khempeuh kih taak biak sapna, ngei na a hong zangh sak hi. 

2. Dawi gilo te hong ukcip na hang in vantung pilna vantung thaman te na muh loh na ding un na mai uh hum in a hong khaktan hi. 

3. Kong piaksa na te khempeuh tawh hong bum in leitung ki liatsakna tawh hong uk hi. 

4. Mihing gamtatna leh ngaihsut na te khempeuh ah vantung thusiangtho manphat na te khempeuh seelcip in dawi te in amau ngeina tawh hong uk hi. 

5. Dawi gilo te in vantungmi te pil bang in na pil ding uh leh vantungmi te manphat bangin na manphat ding uh hong haza’a a hih man in mihing te hong khemkhem aa, a mau te om na khuamial na gam, vantungmi te samsiat na huangsung ah a mau te tawh ki bangin a nungta khawm ding hong deih a hihi. 

6. Misiangtho Kumpipa ka Tapa Pau Cin Hau in note khempeuh hong thalawh in dawi mangpa hong zol na te khempeuh dokkhia aa no te ta’ang in a zo pa ka Tapa a hihi. 

7. Ka Tapa in nuntak thak na gam leh thupha om na gam ah note khempeuh a hong paipih hi. 

8. Ka Tapa a um taktak mi te in ka Tapa zawhna la in a nei na hi uh hi. 

9. Kei leh Ka Tapa zawhna la in hong taisan lo, itna tawngnung pen tawh thuciam a hong pia mi te in dawi mangpa galhiam siatna leh buai na te ka Tapa zawh bangin a zo ding uhhi. 

10.Vantungmi te in zong ka tate gal khempeuh omna lei ki pei sak in a mangsak ding hi. 

11.Ka Tapa Pau Cin Hau zawhna la in vantung Siangsawn lungdam na a nei mi te khempeuh, dawi mangpa galhiam duhhop na huaiham na, zuau phuak na leh deidan na, ka bawlsa na khempeuh tungah tatsiat na te na zangh kei ding uh hi. 

12.Dawi mangpa galhiam tawi in a zangh teitei khuamial na gamsung aa om minam te a mau te nuntaakna keem in nuntaak thak na a pia ding kua mah a om kei hi.

NUNTAAKNA THU SIANGTHO (51) 

A tul theilo thupha piak na gam 

1. Samsiat na a thuak dawi gilo te a mial tawntung mannei lo huang sungah vantungmi te in a samsia uh hi. 

2. Kei leh ka Tapa upna a nei lo thumaan gamtatna a neilo mi te in vantungmi te samsiat na, pian leh khan a ki khek theih loh na tawntung gimna, luzang humsip aa khai samsiat na huang sungah a om ding a hihi. 

3. Leitung aa ki liatsak na leh tungnun ki tuh na dawi mangpa galhiam a zangh mi te khempeuh, misiangtho thupha piak na tawh vantungmi nasepna piang in hun a ki khen ding hi. 

4. Ka Tapa zuan in a beel mi te a sia ngei kei ding aa nuntaak tawntung na a hi ding hi. 

5. Na teen na gam in thupha piakna gam suak ding aa, a teek thei lo, a tul thei lo thupha piakna gam sung a hi ding hi. 

6. Na vawh khiaci kip ding aa na suan bang in hing ding hi. Na sap bang in hong zuan in na kaih bang in hong zui ding hi. 

7. Kei hong it mite kiangah ka om ding aa, a mau te nuntaakna ka hi ding hi. Tua hoihna leh manphat na te sung pan lal in na pai khia kei ding uh hi. 

8. Singgah tang neilo te na bang kei ding uh aa na gal te kiangah na om kei ding uh hi.

NUNTAAKNA THU SIANGTHO (52) 

Siangsawn kham lukhu 

1. Dawi mangpa galhiam khempeuh bei ding aa, ki muhdah na leh ki tel khialh na te khempeuh hong bei ding hi. 

2. Misiangtho vantung minam lian te in khua ih zong ciat ding aa, leitung ah vantungmi te in ki-itna hong zong ding uh hi. 

3. Ki-itna te unau innkuan khat hong pian ciangin ka bawlsa leitung leh na khempeuh no suak in vantung hoih na tawh ki zeem ding aa, hoihna lamdang te tawh ka zuun ding hi. 

4. Tua ni ciangin hinsawt na leh khansau na piang in vantungmi te pilna leh hoihna te na zangh thei ding uh aa ka teel mi leh ka thupha piak minam na suak ding uhhi. 

5. Singgah tang khat hong po ciang in kungpi lian in hong piang aa, mihing leh ganhing te in ki vaak na in a neih mah bang in misiangtho khat bek thupha piakna in zong a vawh khaici hong po ding hi. 

6. Gah tampi a nei singkung bangin na liim ah khawl in, na thupha vawh te khempeuh gah in na gah hong ki lo ding aa, mihing te aa dingin nopsakna a piang na vawh khaici a ngah na hi ding hi. 

7. Tua ni ciangin vantungmi te pilna khempeuh tawh kong zang ding aa, vantung minam lian ih hi ding hi. 

8. Tua hun ciangin a ki pholaak khialo leitung mihing te ii muh zawhloh leh theih zawh loh, vantungmi te pilna leh hoihna hong hilh in Siangsawn vankham lukhu, vantung minam lian te a hong pia ding ka hihi.

NUNTAAKNA THU SIANGTHO (53) 

Biak piakna leh biak sapna 

1. Leitung ah pian leh khan a ki khek ni ciang in nasem ganhing tawh nuntaak zonna te khempeuh hun ki khek na hong piang ding hi. 

2. Banghang hiam cih leh misiangtho thupha piakna hang in nuntaakna kikhel na in misiangtho nasepna a hihi. 

3. Tua mah bangin leitung mihing te vantungmi te pilna pia in pilna sang lian pi na tung ding uh aa nuntaakna ki khek ding hi. 

4. Pian leh khan a ki khek ciangin a mah leh a mah thupi a ki sa dawi mangpa mizat hong om ding hi. 

5. Tua te khempeuh leitungah a mun a gam zui in hong om hang in, hun a nei zo kei ding uh aa gu a suak ding hi. 

6. Dawi gilo te in khua leh gam minam zui-in biak piakna leh biak sapna hong nei kik nuam ding uh aa, kei leh ka Tapa Pau Cin Hau in misiangtho te tawh nial in a zo ding ih hihi. 

7. Tua a hih man in vantung thusiangtho kong piak vantung minam lian ei misiangtho te in, leitung biak piakna biak sapna te khempeuh ih nial dinghi. 

8. Misiangtho vantungmi suan leh khak minam te tungah vantung nuntaakna tawh ki ukna a piang ding hi. 

9. Tua ni ciangin misiangtho ngeina tawh ki-uk na hong piang ding aa, minam lian ih hi ding hi.

NUNTAAKNA THU SIANGTHO (54) 

Phatna lamdang tawh thu ciamsa 

1. Kei mah in na khempeuh piangsak in ka bawl hi. Ka bawlsa na te khempeuh it in ka uk hi. 

2. Van leh lei aa ka bawlsa na te khempeuh vantung nasepna ka min hong phat ding in vantungmi, vantung galkap te leh leitung mihing, vanmisiangtho te a hong piangsak ka hihi. 

3. Ka bawlsa na te khempeuh it in na lungdam thei ding uh hi. 

4. Phatna leh lungdam na thu a hong pia ding leh lungdam na thu a nei ding in leitung ah ka Tapa Pau Cin Hau hong pai hi. 

5. Kei leh ka Tapa tungah a lungdam mi khempeuh in lei aa piang na khempeuh tawh ka min nong phat ding uh aa, a ging thei na khempeuh tawh vantung ka nasepna te nong phat ding uh hi. 

6. Kei leh ka Tapa kong piak uh simloh ngeina dang te tawh ka minphat ding ka nial hi. 

7. Ka min kawm in dawi mangpa deihna leh leitung ngeina tawh minphat na te in kei maa kiang pan a hong pai a hi kei aa, leitung ngaihsut na a hih man in ka thuzui mi taktak a hi kei ding uh hi. 

8. Kei maa deihna taktak tawh ka min hongphat nuamlo te in kei hong upna uh neu lai-in hong itna uh a tawm lai a hihi. 

9. Tua a hih ciang in kei hong sam te kiangah ka om ding aa, a hong nial mi te kiangah ka om kei ding hi. 

10.Kei hong phawk tawntung te Tapa thupha kamciam na vantung thaman, hoihna leh pilna lamdang te tawh hong neih thu ciamsa na hi ding uh hi. 

11.Thu ciamsa te a hong tun ni ciangin vantung thusiangtho thumaan taktak, khasinagtho vangliat na leh vantungmi te pilna a nei mi te in itna a lian pen tawh hong phawk tawntung ding uh hi. 

NUNTAAKNA THU SIANGTHO (55) 

Nuntaakna tui hong pia ka Tapa 

1. No leitung mihing te in vantungmi te nuntaakna tawh si leh sa nei ding in leitung ah a hong PAUCINHAU PASIAN SIANGSAWN NUNTAAKNA THU SIANGTHO 45 Zon ol na piang sak ka hihi. 

2. Vantungmi te bawl taksa pumpi si leh sa guh le taang in taksa pian na gam leitung ngak ta hen. 

3. Bang hang hiam cih leh misiangtho taksa pumpi-in leitung ah phatna a bawl man in vantungmi te thupha piakna gam a piang ahihi. 

4. Vantungmi te in a mau lim leh meel tawh taksa pumpi hong piangsak a hi aa, keimaa lim leh meel tawh ka nuntaakna khasiangtho no te sungah a om sak ka hihi. 

5. Nuntakna khasiangtho in misiangtho thupha piakna gam a thalawh a hi aa, taksa pumpi-in na khempeuh a pian na gam vantung Siangsawn ka innpi thalawh na a hihi. 

6. Nuntaakna khasiangtho in vantung Siangsawn ka innpi ah hong ciah ciangin vanmisiangtho thaman thalawh a hihi. 

7. Vanmisiangtho in vantungmi te bawlsa taksa teenna gam, misiangtho gam leh thupha piakna gam a suak sak dingin taksa teenna gam uk kik ta hen. Bang hang hiam cih leh misiangtho te thaman a hihi.

8. Kei sialo-in ka nuntaakna tawh a piang ka tate na sia kei ding uh hi. 

9. Vantungmi te bawlsa mihing taksa pumpi-in, vantung nasepna, sawl na leh vantung thuciam siasak lo-in a zo ding a hihi. 

10.Kei maa thaman a ngah mi te na khempeuh ka uk zawh na ka aang laizang ah a luang suk ka nuntaakna tui a hong pia dingin misiangtho Kumpipa ka Tapa Pau Cin Hau kong pai sak hi. 

11.Kei leh ka Tapa a hong um mi te khempeuh in ka nuntaakna tui ne in ka si, ka sa a suak na hi uh hi. No te kei maa si leh sa hong suak kik na hih man un suak kik na thu a hihi. 

12.Kei maa vantung minam suah kik na in no te gamtat na te khempeuh vantungmi nasepna lamdang, nasep na thaman a piang ding a hihi. 13.Ka nuntaakna tui-in vantung minam suah kik na, vanmisiangtho suah na, tawntung nuntaakna Siangsawn ka innpi luah na hi aa ka Tapa thaman a hihi. 

14. Kei leh ka Tapa thaman hang in taksa teenna gam in thupha piakna gam suak sak in ka nuntaakna tui upna taktak tawh a dawn mite sung ah kei leh ka Tapa nuntaakna a ki dim hi. 

15.Ka nuntaakna tui upna taktak tawh a dawn mi -in, kei leh ka Tapa tawh innkuan khat suak in kei maa neihsa te na hi uh aa Misiangtho Kumpi minam lian te na hi uh hi. 

16.Ka aang laizang pan a luangsuk nuntaakna tui-in, vantung ka vangliat ki cin na a hihi. 

17.Lei leh van ah ka bawlsa khemepuh ka uk na, natna namcin a thuak mi khempeuh suahtaak na a hihi. 

18.Misiangtho leh khasiangtho thaman a ngah zolo te sih na ding pan nuntaak tawntung na, mawhna khempeuh pan mawh maisak na, vantungmi suah na a hihi. 

19.Misiangtho Kumpipa thaman a ngah taksa pumpi-in, a mial ngeilo tawntung nuntaak nopsak na ngah in khasiangtho in van a sang bel Siangsawn ka innpi a luah ding a hihi. 

20.Tate aw, leitung ah na om lai sung un, lei pan aa piang gah leh teh a ging thei na te khempeuh tawh vantung minphat ding a ki sam zah pahtawi minphat na in na tu na ta khang pahtawi piakkhiat na a hihi. 

21.Leitung ah na om hun sung un nopsak ding zah leh na lungdam ding zah uh minphat na nong bawl ding uh hi. 

22.Vantungmi suak kik in vantung nong tun uh ciangun vanmisiangtho in thupha puak thupha a sep theih na ding in leitung ah phatakpi in thupha na bawl ding uh hi.

NUNTAAKNA THU SIANGTHO (56) 

Vangik te suahkhiat na 

1. Ka Tapa Pau Cin Hau man neihna hang in a hong pai vantung thaman te in a bucip, a ki selcip nuntaakna na ngawn a nei zolo khempeuh, na puak uh maizum na leh vangik te hong suah khiat sak ka Tapa a hihi. 

2. Ka tapa Pau Cin Hau in a ki humcip mit leh bil te hong hon sak in ka maipha hong musak aa, ka Tapa itna lamdang te leh ka Tapa man neihna in kong itna hang a hihi. 

3. Dawi biakna nam sawmguk leh giat biak sapna ngeina te in vantung thumaan lam paina hong khak tan hong selcip in, na mit na bil te uh hong humcip aa, natna leh kial na, dah na leh manthan na, a kih huai mahmah nin te lak pan ka Tapa in a hong sawp siang hi. 

4. Na puak uh vangik te ki suahkhia a hih hang in a lungdam theilo thaman nei theilo te na ngawn zong hong honkhia in, itna lamdang te tawh a hong nei hi. 

5. Ka Tapa Pau Cin Hau in, leitung mihing te khempeuh vantung Siangsawn ka gamnuam luah in, nuntaak tawntung na leh vantung minam lian a hong suak sak kik nuntaakna a ki cing ka Tapa a hihi. 

6. Ka Tapa in na puak uh lungsim vangik leh na thuak uh mannei zolo gimna te khempeuh a suahkhia, thumaan thu tang a hihi. 

7. Ka Tapa na upna in na puak vangik khempeuh a suahkhia in tawldam na a hihi. 

8. Tu-in na vangik khempeuh bei khin a hih ciang in, haksat na leh samsiat na kulhpi sungah kua mah na lut nawn kei ding uh hi. 

9. Vantung thuciam ka Tapa tawh hong pia ka hi aa, thuciam ngahsa mi te khempeuh in kei leh ka Tapa Pau Cin Hau dikna leh hoihna te khempeuh tawh a nungta tawntung ding kei maa mi pawl te na hi uhhi.

NUNTAAKNA THU SIANGTHO (57) 

A vulsa paak no suak kik ding 

1. Thumaan taktak ngaihsut na leh gamtat na tawh nong it zah uh leh nong muan na uh a lian pen nong piak khiat na un, kei maa mai ah a etlawm pen leh a namtui pen a hihi. 

2. Kei mah a hong um te in siatna te nin bang in na kih ding uh aa, A etlawm pen leh a namtui mi te na hi ding uh hi. 

3. Kei hong um taktak thumaan gamtat na a nei te in, gahtam a gah singkung lian te tawh ki bang aa, vantung ka thupha piak misiangtho innkuan te a hi uh hi. Duhhop na leh huaiham na in, mannei zolo singgah hu’ut tawh ki bang hi. 

4. Misiangtho ka tate aw, nisim in kei hong lungngai tawntung un. 

5. Itna leh muan na a lian pen nong piak man un, na vawh khaici a hu’ut ngei kei ding aa, na ansaal ah an hong dim ding hi. 

6. Na lo lai-in, tawldam na hong piang ding hi. Lo lai aa ankung te a paak leh a gah hong tam bang in, upna thumaan gamtat nong piak khiat na in, ankung na vawh bang in hong gah ding aa na tuh bangin hong po ding hi. Tawntung nuntaakna ah thuciam na a hihi. 

7. Kei-in, no te Pa ka hihi.Na khempeuh piangsak in, a bawl na Pa Pasian ka hihi. kei in no te nuntaakna leh hong huh hong nei na Pa Pasian ka hihi. Kei simloh, Pasian dang a om kei hi. 

8. No te kong it aa lungdam na leh muanna, lam et na a lian pen tawh nong koh nong zak sak te uh, za’a in kong huh ding hi. 

9. Misiangtho ka tate aw, no te ii nong zaksak te khempeuh uh vantung thuciam ka suaksak hi. 

10.Leitung pan thuciam nong piak te uh lei leh van ah ka zo ding aa, nong ciah uh ciang in vantung ah van misiangtho thuciam in, leitung ah thu ciamsa te thupha piakna gam a piang ding a hihi. 

11.Leitung aa ka bawl ngun leh kham sangin a manpha zaw misiangtho te in van kham lukhu na hi uh hi. 

12.Misiangtho gam thak, khua thak a hong piang ding aa, a vulsa paak te hong no suak kik in, leitung aa mi mawh mi, mawhna lian a bawl mi te kisik kik na lian hong piang ding hi. 

13.A mau te hong no suak kik in teeltuam gam thak, khua thak tawh hong ki bang in leitung in hong ki zuun, hong no suak kik ding hi. 

14.Man anei zolo te kolbulh bang in haksat na, duhna, kialna leh dangtaak na a thuak te hong suakta in pian leh khan ki khek ding hi. 

15.Tua ni ciang in tagah daaipaam, khua zalo tawh a ki bang te zong hausa lian hong suak ding hi. 

16.A ki nenniam te ka teel minam, kei maa zatmi-in hong piang ding hi. 

17.Haksatna na thuak laitak lungkia kei in. Tha khauh na la in phul le cin, na mai ah kong dawn ding aa, vantungmi tawh ki len in na zo ding hi. 

18.Ka minphat in na om laitak haksatna thuak in a luang na khitui malkhat in, man nei mahmah lapsang na van kham lukhu hi aa, a hong tun mateng ngak le cin nuamna khitui hong suak ding hi. 

19.Thalawh na in kalsuan na hi aa, kei maa manpha na muh na ding a hihi. 

20.Ka minphat aa leitung ah na om lai sung un na gal pa in that dingin hong pai a hi zong in na thuak ding uh aa na lungsim neih zah tawh nuam khol in hong pahtawi ta un. Zawh na khua mual ah ih suak khawm ding hi. 

21.Tu in nuam khol un la a ging thei na khempeuh tawh vantung lungdam na thu nong pahtawi khol ding uh hi. 

22.Eite in haksatna vangik te ih suahkhiat khit ciangin sun aa ni taang mah bang in zan in hong taang ding aa,kham khua thak gamthak a hong piang ding hi. 

23.Leitung aa ka bawl singkung lopa aa ki pan ka bawlsa te vantung pilna tawh na zangh ding uh aa, hin sawt na leh khansau na hong piang ding hi. 

24.Vantung lungdam na thu minphat na te in khasinagtho kha pumpi lungdam in nang hong zeem aa, hong no suak sak in hong lam kaih hi. 

25.Na masuan dikna tawh hong zawhpih khasiangtho nasepna kong pia hi. A hong zawhpih vantungmi galhiam te na pua ding aa, leitung in gamthak in hong piang ding hi. 

26.Tate aw, ki thawi un. Gam thak ih zong ding aa ki deidan na, ki liatsak na, dawi mangpa galhiam te haltum in, vanthak leithak a piang tawh hong ki bang ding hi. 

27.Khua zalo bengngong bang aa om te leh khua mulo mittaw bang aa om te ih sam ding aa, a puak uh vangik leh natna te lei ah ih khia ding hi. 

28.A gilkial mi te thazaw in a om laitak an ih vaak ding aa, khasiangtho hoihna tawh ih honkhia ding hi. 

29.Vu’ui leh tang nei zolo thadah pa lolai ankung te hong no suak in hong khang dawng kik ding aa upna hong neilo a si tawh ki bang te a hong hing kik ding hi. 

NUNTAAKNA THU SIANGTHO (58) 

Nupa suah na Pasian thugui 

1. Vantungmi ka bawl hi. Vantungmi-in kei maa lim leh meel a hi aa, leitung mihing te in vantungmi lim leh meel a hihi. 2. Vantungmi nu leh pa leitung ah ka koih hi. A mau te sung pan a piang khia ka tate,”Mihing,”kong ci hi. 

3. Mihing pian na leh nuntaakna in vantungmi te sung pan na hi uh hi. Ki-itna leh pumkhat suah na in zong vantungmi te sung pan a hihi. 

4. Kei leh ka Tapa Pau Cin Hau, vantungmi, vantung galkap te mai ah, ki-itna thupha a kipia nupa suak te in midik khaici na hi uh aa, kei maa maitang ah ki-itna thupha a ki pialo nupa a suak te in guta na hi uh hi.

NUNTAAKNA THU SIANGTHO (59) 

Nupa suah na nuntaakna tui 

1. Kei-in no te Pa ka hihi. No te in vantungmi ka bawl te sung pan a piangkhia na hi uh hi. Vantungmi te in keikiang pan a piang a hi uh hi. 

2. Na nuntaakna uh kei sung ah a om aa, no mau sungah kei maa nuntaakna a om hi. No ka tate nuntaakna in vantung aa om kei mah na Pa Pasian ka hihi. 

3. Kei-in nuntaakna tui zong ka hihi. nupa suah na nuntaakna tui dawn aa nupa a suak te in kei tawh ih hing khawm ding aa, ih nungta tawntung ding hi. Tua a hih man in kei maa nuntaakna tui, nupa suah na nuntaakna tui tawh na om khawm ding uh hi. 

4. Ka nuntaakna hintui damtui tawh ki-itna thupha a ki pia aa nupa a suak, kei mah vantung na Pa Pasian leh vantungmi te ci leh sa suan leh khak ka ta te aw, manpha un la mi hoih khaici te suak ta un. 

5. Tua nuntaakna tui ka anglai zang sung pan a luang suk in, nupa suah na nuntaakna tui a hihi. 

6. Kei maa mai ah nupa suak aa nuntaakna tui dawn in, ki-itna vantung thusiangtho tawh ki teeng aa nupa a suak te in, cik mah hun in kong nusia ngei kei ding aa, na sung aa om ka nuntaakna khaici suan leh khak te in,a tul theilo ka nuntaakna khaici manpha a hi ding hi. 

7. Nupa suah na nuntaakna tui na nusiat uh leh ka hong kem kei ding aa, vantung na Pa Pasian innpi ah ciah na ding leh tun na ding a haksa ding hi. 

8. A ki khen theilo itna kamciam thupha a ki pia mi-in, kei mah tawh ih om khawm tawntung ding hi. 

9. Thupha a ki pia sa taisan in a nusia, nupa suah na nuntaakna tui a siasak mi-in, cik mah hun in kem in ka zangh ngei kei ding hi. 

10.Vantungmi te in leitung ah pumkhat suak in, ki-itna pumkhat suan leh khak ka neihsak ka tate aw, kei mah vantung na Pa Pasian kiangah nong ciah hun uh a tun ciang in zawhna vanmisiangtho om khop na ih bawl ding hi.

NUNTAAKNA THU SIANGTHO (60) 

Dawi mangpa lamkhak na 

1. Kei hong umlo te leh itna thumaan gamtatna a nei lo leitung mihing te in dawite tawh a om khawm na hi uh hi. 

2. Dawi te in mihing te thupi sak na ding leh belh nop na ding in, mihing lungsim khem in a khengval ngaihsut luat na tawh zangh in a hong bum uhhi. 

3. Dawi mangpa leh dawi gilo te in ka nasepna te suksiat ding leh khem ding hong ngaihsun den uh hi. 

4. Tua a hih man in no te khat leh khat tungah ki liatsak na, duhhop na, huaiham na, angsung theih na aa ki pan thupi ki sak luat na tawh leitung mihing te khem in a hong bun den uh hi. 

5. Leitung ah ka bawlsa nuntaakna a nei a neilo, man nei tak in ka hong piaksa, a manpha aa na nuntaak pih ding uh dawi te in hong haza aa, ganhing tawh biak piakna, na nek ding khempeuh uh tawh biak piakna, hong nei sak in hong khem uh hi. 

6. Kei-in no leitung mihing te aa ding a ki cing tak aa kong piaksa dawi mangpa zolna in na nei uhhi. 

7. Tu in dawi mangpa zu leh sa, sisan tawh biak piakna, na zangh nawn kei ding uh hi. 

8. No te vantung thu siangtho nuntaakna tawh manpha in na om ding uh leh thupha na ngah ding uh dawi mangpa in hong haza’a in hong khem aa, zu leh sa gual nopna tawh hong khak tan hi.

NUNTAAKNA THU SIANGTHO (61) 

Ka Tapa it bangin hong it in 

1. Kei-in na khempeuh piang sak in no te nutaakna ding a ki cing hong pia na Pa Pasian ka hih na leh vantung lungdam na thu na muh theih loh na ding un, dawi mangpa leh dawi gilo te in zu leh sa ganhing sisan biakpiak na tawh hong khak tan hi. 

2. Zu leh sa ne in nuamsa aa thupi na ki sak na un dawi mangpa gal hiam a hihi. 

3. Leitung aa om ka tate aw lei pan aa piang gah leh teh tawh ka min nongphat ding uhhi. 

4. Gah leh teh tawh ka min hongphat te in no te leh kei tawh a ki lawm a ging thei na te khempeuh tawh zong ka min nongphat ding uhhi. 

5. No te in kong sawl bang in ka thu na sem ding uh aa, ka min nongphat tawntung ding uh hi. 

6. Leitung ah na om hunsung un dawi mangpa deihna na nial tawntung ding uhhi. 

7. Kei -in kongpiak thupha te khempeuh ka Tapa tawh itna thu hong nei khawm ka hih manin ka Tapa luah in manneih na thu hong hilh ka hihi. 

8. Dawi te in no ka tate manneih na te zu leh sa ganhing nuntaakna tawh na nuntaakna uh hong uk in, na manphat na uh hong khak tan na, na phawk tawntung ding uh hi. 

9. Ka Tapa Pau Cin Hau in kong it bang in no te hong it aa, kong neih bangin no te hong nei hi. 

10.Leitung mihing te tungah vantung nuntaakna thu a hong hilh dingin ka sawl ka Tapa Pau Cin Hau a hihi. 

11.A mah in dawi mangpa bum na leh khem na, dawi mangpa galhiam te khempeuh pan kei a hong um taktak mite honkhia ding in ka sawl a hihi. 

12.Vantung thusiangtho tawh nuntaakna a nei thei ding in ka sawl ka Tapa Pau Cin Hau a hihi.

13.No ka tate in leitung hun zawh na, lei leh van ka bawlsa na te khempeuh ka minphat na, na zat khit uh ciang in vantung Siangsawn van innpi ka gamnuam ah nong ciah kik na ding un, ka Tapa Pau Cin Hau misiangtho Kumpipa nuntaakna a hihi. 

14.No te misiangtho innkuan hong suaksak leh Siangsawn vantung gamnuam ka innpi ah ciahna ding lam hoong pa a hihi. 

15.Kei a hong um mi te nuntaakna a hong sawpsiang,vantung lungdam na thu a hong pia ka Tapa Pau Cin Hau a hihi. Amah in leitung ah kei maa ta’ang aa nasem pa ahihi. 

16.Vantung thusiangtho hong hilh kammal in, vantung ka nuntaakna ka aw siangtho,vantung ka kammal a hihi. 

17.Kei mah na Pa Pasian ahong um mi te in ka Tapa Pau Cin Hau a um na hi ding uh aa, ka Tapa a um mi te in kei maa vantung minam te na hi uh hi. 

18.No te dawi mangpa in hong khem in kongpiak thupha sut aa, hong bawlsiat laitak in ka Tapa Pau Cin Hau in,itna khempeuh tawh a khutsung meek in kei hong sam hi. 

19.No te in bawlsiat na leh suksiat na, na thuak laitak un ka Tapa ii hong hopih na leh deih hongnget na te za in ka dawng hi. 

20.Ka Tapa hong ki ko na te dawng in vantung vangliat na tawh no te dawi khutsung pan ka hong suak ta sak aa, nuntaak tawntung na ka hong pia sak hi. A mah in nuntaak tawntung na leh ka thupha hong pia vantung thu hilh pa ahihi. 

21.A maa khutsung meek in a hong koh thu te hang in no te tawldam na a hihi. A mah in na belh ding innpi, linna leh lau na a om lo hong nungta sak tawntung, ka Tapa Pau Cin Hau nuntaakna a hihi. 

22.A maa it minam te in kei mah na Pa Pasian tawh a nungta khawm tawntung ding a maa neihsa te na hi uhhi. 23.Misiangtho kumpipa vantungmi pa in, vantung ah kei tawh a om khawm tawntung ka hi uhhi. 

24.A mah in leitung mihing te kei tawh vantung innkuan khat hong suaksak vantungmi pa a hihi. 

25.Leitung mihing te sihna ding galhiam khempeuh phel in, a sattat pa leh ka thupha a pia pa, leitung mihing te kiangah ka sawltaak pa hi aa, leitung mihing te taksa pumpi bang in hong pai in hotkhiat na ka hong piasak hi. 

26.Leitung mihing te aa ding in vantung ka innpi ah nasem pa a hi aa, vantung nasepna te leitng ah a hong zawh pih, vantung thupha leitung thupha hong pia, vantung konghoong leitung kong hoong pa a hihi.

NUNTAAKNA THU SIANGTHO (62) 

Ka Tapa min tawh deih hong ngen un. 

1. Ka thupha a deih mi te khempeuh in deih nongnget uh ciang in ka Ta Pa Pau Cin Hau min tawh nong nget te uh ka hong dawng ding hi. 

2. Kei hong um ka thuzui mi te in ka Tapa min tawh vantungmi,vantung galkap zattheih na ding a hong ngen te aa ding, vantungmi vantung galkap te nasepna ka piangsak ding hi. 

3. Ka Tapa min tawh nong nget te khempeuh uh ka kip sak hi. Ka Tapa in thuciam na te khempeuh a nungta sak tawntung vantung nasem Tapa a hihi. 

4. No te ii nongnget te khempeuh uh keem in no te tawh a nungta tawntung ka Tapa a hihi. 

5. Ka Tapa thumaan gamtat na in pian leh khan ki khek sak na a hihi. A maa min lo tawh deihnget na te ka pia kei ding hi. 

6. Vantung na sem ka Tapa Pau Cin Hau vantungmi pa in pian leh khan ki khek sak in vantung na lamdang te tawh vantungmi,vantung galkap nasepna piang in leitung ah mihing te in hong up na zah,hong itna zah lung dam na vantungmi nasepna a piang hi. 

7. Vantungmi lai-at te ciapteh na zui in vantungmi te in leitung mite thupha piak ding vantung nasepna a hihi.

NUNTAAKNA THU SIANGTHO (63) 

Vantung min phat ding 

1. Kei-in na khempeuh bawl in ka piang sak aa, ka bawlsa na te khempeuh it in ka vangliat na tawh uk in ka nei hi. 

2. No leitung mihing te in kei maa sung pan aa piang vantung nuntaakna leh vantungmi te in si leh sa tawh a hong piansak kei maa neihsa ka tate na hi uh hi. 

3. Vantung pan aa piang kei maa neihsa ka tate in lei leh van ah ka bawlsa na te khempeuh ka minphat ding in, leitung ah kong paisak ka nasem te na hi uh hi. 

4. Kei maa nasem ka thuzui mi te in lei pan a piang gah leh teh tawh ka min hongphat ding, vantungmi thu ciamsa te na hi uh hi. 

5. Gah leh teh tawh ka min hongphat te in vantungmi te thaman na hih man un, dawi mangpa deihna ngei na, ganhing that aa sisan tawh biakpiak na ngeina leh gualnop luat na te na nial ding uh hi. 

6. No te in vantungmi ka Tapa Pau Cin Hau thu ciamsa te na hih mah bang un na thuak uh nencipna na lungsim vangik te khempeuh hong honkhia zo ka Tapa nuntaakna te zong na hi uh hi. 

7. Lei leh van ah ka bawlsa na te khempeuh no ka tate aa ding leh ka minphat na ding aa kong piak te khempeuh, dawi te in a mau zolna dingin piakkhiat na hong nei sak uh hi. 

8. Tu in dawi mangpa hong khem na te na nial ding uh aa, kong piaksa na lungsim leh na te khempeuh dawi mangpa zolna in na nei kei ta un. 

9. Vantungmi suan leh khak te vantung minphat ding in ka hong piangsak hi. 

10.Vantung thusiangtho tawh ki leh bulh gamtat na te na zang kei ding uh hi. 

11.Ka Tapa Pau Cin Hau phalna taktak tawh kong piak na in, no te aa ding hotkhiat na leh tawldam na a hihi. 

12.Vantung thusiangtho lungdam na thu tawh na nungta ding uh hi. 

13.Vantung lungdam na in no te aa ding ka thaman hi aa ka Tapa Pau Cin Hau nasepna itna leh hong paii na te hang in no te tawh innkuan khat hong suak sak, vantungmi te piakkhiat na thaman te na hi uh hi.

NUNTAAKNA THU SIANGTHO (64) 

Ka Tapa in na belh ding innpi 

1. Ka bawl na khempeuh a manpha in ka bawl a hihi. PAUCINHAU PASIAN SIANGSAWN NUNTAAKNA THU SIANGTHO 52 Zon ol na 

2. A hih hang in note in ka Tapa itna ding zah leh na khempeuh a piangsak na pa Pasian it ding zah, lungsim ngaihsut na leh gamtat na tawh nong neih zawh loh uh ciangin ka bawlsa na khempeuh note aa dingin gu a suak hi. 

3. Note in ne aa na ki sawl uh khat vai bek gilvah na a hihi. Kei in ne aa kong sawl te na ansaal dim tawntung hen la, nisim nekding an kicing tawntung hen, kong cih na a hihi. 

4. No leitung mihing te in vantung thusiangtho na mangngilh uh ciangin, na ki-it na un tomkal hunsung khat in zong gu a suak hi. 

5. Keimaa sung aa om mi khempeuh in tawntung nopsakna na ngah na ding un na nuam den ding uh aa, na khempeuh pailet in muh theih na zong no te aa dingin kong piaksa a hihi. 

6. Bengngong leh mittaw bangin a om mi te kiangah na ga’algen kei ding uhhi. A mau te kiangah pai in na lawngsak ding uh hi. 

7. Ka Tapa Pau Cin Hau in note aa dingin na belh ding a muanhuai innpi a suak hi. Note aa ding keimaa zawh bangin a zo pa ka Tapa Pau Cin Hau a hihi. 

8. Kei tawh kizop na hong hilh pa zong a hi aa, vantung ka gamnuam vantung ka innpi, kha siangtho teen na innpi pai na ding lamhilh pa zong a hihi. 

9. Leitung mihing te vantungmi te tawh vantung innkuan suahna thupha pia pa zong a hihi. 

10.Kei hong um taktak mi te aa dingin misiangtho Kumpipa thaman thupha piak na gam, misiangtho khua misiangtho gam, gamthak mun thak khua thak ah ei te a om khawm ding thupha piaksa te ih hihi. 

11.Thupha piaksa suanleh khak te ii na teen na,om na gam in, ngunkhua khamkhua a suak ding aa, vantungmi te bawlsa guh leh taang ci leh sa in leitung ngunkhua khamkhua luah hen la, kei maa lim leh meel kha pumpi vanmisiangtho in, vantung ka gamnuam vantung ka ngun innpi ka khaminnpi luah ta hen. 

12.Khasiangtho thumaan gamtat na kua mah in a khaktan thei kei ding hi. 

13.Note aa dingin ka bawlsa na khempeuh a kicing tak in ka hong pia zo hi. Mittaw leh khelbaai bangin na om uh ciangin ka thupha angah zolo na hi uh hi. 

14.Kei-in van leh lei ni leh kha, aksi te piangsak in no te aa dingin na a sem ka hihi. 

15.Na khempeuh a piangsak na Pa Pasian,itna lamdang nong neih theih na ding uh leh ka bawlsa nitaang sangin a taangzaw, thupi in lian mahmah ka hih na nong phawk tawntung na ding un ni suah na lam nga in lungdam tawntung na lungsim neih zah nong piak na ding un deihnget ki ap na ka hong nei sak hi.

NUNTAAKNA THU SIANGTHO (65) 

Nong lam et na zahzah nang maa aa 

1. Vantung thusiangtho a hong zui mi te khempeuh in phatakpi in hong zui un. Nuamtak leh lungdam tak in hong zui un. 

2. Kei hong lam en mi te kiangah ka ki nai semsem ding uh aa, a mau te kiangah maa ka pang den ding hi. 

3. Kei hong lam en mi te in phatakpi in hong um tawntung un la, no te aa ding in maapang ka hih na thu na lung uh damsak tawntung un. 

4. Kei tungah deih hong ngen mi te in nong lam etna zah uh na lungdam khol ding uh hi. 

5. Kei hong lamen in a lungdam khol hong um taktak mi te aa ding ka hihi. Leitung pan na lungdam zah vantung pan in thuh kik na, na ngah ding hi. 

6. Nong lam et na zahzah nang maa aa ding a hihi. Leitung ah nasep zahzah nang maa thaman a hi ding hi. 

7. Tua bang mah in mi te mawhna na ciapteh na thaman in nang maa aa ding a hihi. 

8. Na khensat na leh na gamtat na thaman a hong ki piak ni ciang a namtui pen thupha piakna na ngah na dingin, nisim in kei na hong mangngilh kei ding uhhi. 

9. Thumaan gamtat na tawh kei a hong um taktak mi te in ka bawlsa na te khempeuh leh na pumpi simmawh in na bawlsia kei ding uh hi. 

10.Na u na nau, na nu napa mi khempeuh tungah mawhna zong in na simmawh kei ding uh hi. 

11.Thumaan gamtat na neilo upna nei lo te in na ciamsiat leh na samsiat thaman gamtat na te vantung pan in thu khen na leh thu hilhna na thuak ding uh aa, Na nuntaakna uh keem in ka zangh kei ding hi. 

12.Tu in kei hong um mi te khempeuh in kei leh ka Tapa nong mangngilh ngei kei ding uh hi. 

13.Vantung thupha piaksa suan leh khak te in kei maa ni thupi ni te ah nahteh pan ki pan singkung lopa, miksi thovaai, azu ava na that kei ding uh aa na bawlsia kei ding uh hi. 

14.Na nuntaakna na pumpi leh na lungsim kei mah tawh ki zopna a khaktan thei ding hong siasak thei ding khempeuh ki nialna pan ki pan na zangh kei ding uhhi. 

15.Nang maa lungsim na neih zah itna nong neih zah a dang lungsim pia lo in, kei na hong phawk tawntung ding uh hi. 16.Kei leh ka Tapa Pau Cin Hau leipan aa piang gah leh teh te tawh ka min nongphat ding uh hi. Ka min hong phat te in kei sialo in kua mah a sia kei ding uh hi. 

17.Tua mah bangin ka ni thupi ni te ah kong piaksa na pumpi nuntaakna leh nahteh pan ki pan singkung lopa, nuntaakna a nei peuhmah that lo in sih sak na, na nei kei ding uh aa ka bawlsa na te na susia kei ding uh hi. 

18.Kong piaksa lungsim leh na neihsa, kei simloh kua mah tungah piakkhiatna na nei kei ding uh hi. 

19.Kei in na khempeuh a piangsak vantung Kumpipa na Pa Pasian ka hih man in nisim in nong phawk tawntung ding uh hi. 

20.Ka nuntaakna leh ka vangliat na tawh ka piansak nitaang tawh ka bawlsa na te khempeuh ka uk hi. 

21.Note a hong nei nitaang sangin a taang zaw kei mah na pa Pasian itna leh lungsim na neih zah uh nong pia tawntung ding uh hi. 

22.Ni suah na lam nga in lungsim khempeuh piakkhiat na itna khempeuh piakkhiat na tawh ka minphat in deih nong ngen ding uhhi. 

23. Leitung mihing te in nong itna thaman un ka Tapa Pau Cin Hau thaman a hihi. 

24.Kei-in leitung mihing te aa dingin ni,kha,aksi,vantung,leitung,van aawngthawl te leh nuntaakna a nei a neilo kong piak khong a hihi. 

25.Kong piak khong ka bawlsa na khempeuh tungah ka vangliat na te ka dimsak hi. Kei maa neihsa te tungah a ki cing na zat theih ding uh ka koih khin zo hi. 26.Note in nong upna zah uh tawh ka bawlsa na te khempeuh na zattheih na un ka thupha ngah na a hih.

NUNTAAKNA THU SIANGTHO (66) 

A puakpih kua mah omlo ding 

1. Leitung mihing te aw ka bawlsa na khempeuh it in ka kem hi. 

2. Kei kong itna zah ka Tapa misiangtho kumpipa Pau Cin Hau itna thaman a nei lo mi te, a ki sel zo kei ding uh a, a bu zo kei ding uh hi. 

3. Thaman a nei zolo mi mawh mi te a mau te kiangah hun tawp ni ciangin, a ki sel zo kei ding uh aa ka pho laak ding hi. 4. Thaman a nei zolo,thadah te in mi mawh mi a hihi.Thaman nei zolo mi mawh mi te a om na gam uh neu in a ki uk na te uh haksat na a piang ding hi. 

5. Tua ni ciangin a ki ko na te uh kua mah in za in a dawng a om kei ding hi. A mau te thuak gimna te thuak in a puak pih kua mah a om kei ding hi. 

6. Thaman neilo a zawngkhal thadah mi te om na leh a teen na uh a kip ngei kei ding aa Khuamial tawh ki bang ding hi. 7. Bang hang hiam cih leh mawhna tawh ki ciam mi te a puak uh vangik lian semsem ding aa Mawhna thaman in a nencip ding hi. 

8. Ka thupha na ngah laitak un, nuamsa in kei nong mangngilh uh leh a ki samsia na hi uh hi. 

9. Na pumpi uh bawlsia in a samsia te in kei a hong nial na hi uh aa, no te dawi mangpa in hong gu a hihi. 

10.Dawi mangpa in no te a hong guk ciangin hong piang sak na Pa Pasian hong mangngilh sak in ki liatsak na leh huaiham na tawh hong zol aa, a mangthang khaici te na hi uh hi. 

11.Thadah pa lolai aa khaici te cik teh hong ding na hi uh hiam?Ankung te na kem ding uh hi. 

12.A gah khaici te koi lai ah koih ding na hi uh hiam? Bang hun ciangin nong zong ding uh hiam? 

13.Leitung mihing te aa dingin nuntaakna a ki cing ka thupha kong pia zo hi.

NUNTAAKNA THU SIANGTHO (67) 

A siangtho nuntaakna lutang 

1. Leitung mihing kong pian sak khit, vantung kum za tampi cing khin zo a hih hang in, nuntaakna a siangtho na ngah zo kei uh hi. 

2. No te aa ding nuntaakna a ki cing hong pia zo ka hih hang in, kong piak na khempeuh tawh nungta in na nuamsa uh aa kei nong mangngilh uh hi. 

3. Kei nong mangngilh hun uh a tun ciangin, dawi mangpa deihna tawh mihing khat leh khat tungah bawlsiat na leh ki neu muh na tungnun ki tuh na, leitung ah siatna namcin na thuak uh hi. 

4. Hih haksatna gimna te hangin vantung nasepna te tawh vantung sawltaak te mun leh gam zui -in a hong pai ciat uhhi. 5. Vantung nasem sawltaak te in kei maa deih na bang leh ka sawl na bangin a sem ciat uh hi. 

6. Kong hilh kik hangin hong zui nuamlo leh hong umlo na hih man un hun tawp na ding lei leh van hotkhiat na leh suah taakna a ki cing a siangtho nuntaakna a hong pai sak ka hihi. 

7. Tua a hih man in mihing te in kong piaksa thupha khempeuh tawh nuamsa aa, kei nong mangngilh uh ciangin, vantung thusiangtho hilhkik na thu a hong pai sak ka hihi.

8. A siangtho nuntaakna ii lutang, misiangtho kumpipa ka Tapa Pau Cin Hau ka hong pai sak hi. 

9. Leitung minam khempeuh te aa dingin ka bawlsa na te khempeuh tawh ka min hongphat dingin, vantungmi te sung pan a hong piangsak ka hihi. 10.Mivom mikang te zong ka hilh khin zo hi. 

11.Tu in no te in zong vantung lungdam na vantung thusiangtho tawh leitung ah ka bawlsa na te khempeuh zangh in ka min nongphat ding uh hi. 

12.Leitung mihing te in lei leh van aa ka piansak na khempeuh leitung ah ka minphat dingin vantungmi te sung pan a piang khia vantung minam te na hi uh hi. 

13.Vantung mite sungpan a piang ka tate ka bawlsa na te khempeuh vantung pilna tawh zat theih na ding, pilna hong pia zo ka hih man in ka Tapa itna na neih zah khempeuh tawh phatna na hong bawl tawntung ding uh hi. 

14.Ka Tapa in vantung siangsawn ngun innpi leh kham innpi vantung gam a dawldawl te en aa ka sawl bangin a en khin zo hi. 

15.Tua vantung Siangsawn innpi tun na ding ka Tapa misiangtho kumpipa nuntaakna a hihi. 

16.Vantung ngun inn leh kham inn, leitung mihing te aa ding ka Tapa Pau Cin Hau tungah, ka hong lak khin zo hi. 17.Note tun na ding vantung gamnuam dawl sawmthum, vantung Siangsawn ka innpi kong pia zo hi. 

18.Ka Tapa in no te aa ding kei maa vantung pilna leh vantung tawntung nuntaakna a ki cing na belh ding innpi a hihi. Kei sia lo in ka Tapa zong a sia kei ding hi. 

19.Ka Tapa Pau Cin Hau a um taktak mi te aa ding in kei mah tawh om khopna tawntung nuntaakna zong a hihi. 

20.Ka Tapa hong pai sak kei leng leitung ah pian leh khan ki khek na om lo in, manphat na a piang kei ding hi. 21.Vantungmi te sung pan kong pian sak leitung mihing te leh ka bawlsa na khempeuh it ka hih man in ka Tapa Pau Cin Hau hong pai sak ka hihi. 

22.Ka Tapa in vantung ngun innpi leh kham innpi en khin zo a hih man in pian leh khan hong ki khek ding aa, pilna manphat na sang lianpi a kuitung kong piak ban ah ni, kha, aksi, van awngthawl manphat na te zong ka hong pia lai ding hi. 

23.Hih kong piak ding thupha kamciam te in lei leh van konghong misiangtho kumpipa ka tapa Pau Cin Hau vantung lungdam na thaman hang a hihi. 

24.Leitung ah no ka tate in vantungmi te pilna khawk khen lianpi te lak pan, khawk khen khat zong na ngah zo nai kei uh hi. 

25.Vantung thusiangtho phatakpi in zui le uh cin, khamtung gam in khamkhuapi hong suak ding aa, tua ni ciangin leitung mihing te tungah, vantungmi te pilna kong piak khawk khen khat na ban pan ding uh hi. 

26.Leitung mihing khempeuh tungah kong piaksa pilna te vantungmi te pilna khawk khen khat zong ban zo nai lo a hih hang in,”Tu aa nong upna uh sangin liansak zaw aa, na puah zo zaw ding uh hi,”ci-in ka Tapa hong thupiak khempeuh vantung lungdam na vantung thaman thusiangtho te tawh no te khempeuh kong manpha sak ding hi. 

27.No leitung mihing te in kong thupha piak khempeuh tungah duhhop na, huaiham na, ki liatsak na te na zang kei ta un. 

28.Dawi mangpa khemna te khempeuh tawh na ki pelh na ding un, kei hong mangngilh lo in nong phawk tawntung ding uh hi. 

29.No te aa ding kong piak thupha khempeuh tungah mi aa na deihgawh kei ding uh aa, na khempeuh a piangsak na Pa Pasian leh ka Tapa Pau Cin Hau lo nga’al, lungsim dang na nei kei ding uh hi. 

30.Nong mangngilh hun uh a tun ciangin ka bawlsa na te khempeuh no te aa ding in gu suak in pian leh khan a ki khek thei kei ding hi. 

31.Pian leh khan ki khek aa upna lungsim tawngnung hong pia ka tate in, vantungmi te tawh om khawm in kei tawh zong a om khawm na hi uh aa,Vantungmi te pilna leh thupha te na ngah ding uh hi. 

NUNTAAKNA THU SIANGTHO (68) 

Ka Tapa Pau Cin Hau in zo khin zo 

1. Ka Tapa Pau Cin Hau in leitung mihing te aa dingin, vantung ka nasep na te ka thupiak na ka sawlna bangin a zo ka Tapa a hihi. 

2. Vantung ka innpi ah vantung kum sim in kum tampi ka na sem pa a hihi. 

3. Leitung mihing khempeuh te aa ding ka vantung pilna leh thupha a hong pia vantung thusiangtho piakkhiat na, nuntaak thak na, pian leh khan ki khek na a hong nei sak ka Tapa nuntaakna a hihi. 

4. No leitung mihing te in kong piakkhiat sa thupha te khempeuh zangh khial in, dawi mangpa zu leh sa tawh biak piak na ngeina te na zang kei ding uh hi. 

5. No te in nuamsa in na lungsim uh a lal na ding leh kei nong phawk loh na ding uh dawi mangpa in hong khem aa hong bum in hong zol a hihi. 

6. Zu leh sa tawh biakpiak na ngeina te in vantung lungdam na hi lo a hih man in a hoih lo gamtat na, ngaihsut na a ki pan siatna leh mawhna te khempeuh nin bang in na kih ding uh hi. 

7. Siatna leh mawhna te khempeuh nin bangin na kih hun uh a tun ciangin, no te tawh a om khawm ding ih hihi. 

8. Ka Tapa in note tawh a ki bang in a om laitak kei nong mu zo kei uh hi. Kei nong tel zo kei uh aa, nong phawk zo kei uh hi. 

9. Ka Tapa in itna a lian pen hong pia aa no te mah tawh om khawm in a nuntaakna te khempeuh a hong pia khin a hi zaw hi. 

10.Na nuntaakna ding vantung nuntaakna thu siangtho, vantung vangliat na te tawh, lengla bang in a hong hawh a hi kei hi. 

11.A mah in kei maa kiang ciah kik na ding in Siangsawn nuntaakna a hihi. 

12.Siangsawn nuntaak tawntung na hong pia ding in lei leh van kong hoong pipa no te kiang ah a hong pai a hi zaw hi. 13.A mah in ka sawl bang in leitung ah zawhna a neih khit ciang in vantung siangsawn ka innpi vantung gamnuam dawl sawmthum kei maa kiang ah hong ciah kik in a zo pa a hihi. A mah in a zo khin zo hi. 

14.Ka Tapa Pau Cin Hau hong pai na thaman in ni tawp ni ciangin vantung hun khenna, vantung thuciam na, vantung thusiangtho zuihna, vantungmi te pilna, vantungmi te nasep pian leh khan ki khek na, vantungmi suah kik honkhiat na, mawh maisak na leh lei leh van kong hong nuntaak thak na hi aa kei leh ka Tapa thaman na sep na te a hihi. 

15.Ka Tapa Pau Cin Hau phawk in na lungngai tawntung ding uh aa, na mangngilh ngei kei ding uh hi. 

16.A maa nuntaakna a lim leh a meel te na nuntaakna siangtho pen tawh ki langh tak in na phawk den ding uh hi. 

NUNTAAKNA THU SIANGTHO (69) 

Nong apna te kong dawng 

1. A ki patcil in na Pa Pasian ka om hi. Kei-in a siangtho kha nuntaak tawntung na zong ka hi aa, vantung vangliat na tawh a ki dim na Pa Pasian ka hihi. 

2. Vantung Siangsawn ka innpi, vantung gamnuam a dawl sang pen pan in, van awngthawl, ni, kha, aksi te ka vangliat na tawh ka bawl hi. 

3. Vantung gam a thuap tuamtuam te ka bawl mah bangin leitung ah ka bawlsa na khempeuh ka min hong phat ding in minam a hong bawl ka hihi. 

4. Ka bawlsa na te khempeuh ka minphat ding in no te om na ding leitung a piang sak ka hihi. 

5. Vantung Siangsawn vantung ka innpi sung pan in vantung ka vangliat na tawh vantung ka bawlsa na te khempeuh uk in a sem ka hihi. 

6. Kei maa om na innpi sungah, vantungmi, vantung galkap, vantung Tapa, misiangtho kumpipa ka Tapa Pau Cin Hau, vantung na sem te leh vanmisiangtho te om na ka bawl hi. 

7. Kei mah in vantungmi, vantung galkap, vanmisiangtho te tawh ka bawlsa na khempeuh tungah uk in a sem ka hihi. 

8. Leitung mihing te nuntaakna ding in nahteh pan ki pan singkung lopa a ki cing tak in kong pia zo hi. 

9. Ka bawlsa na te khempeuh tawh ka minphat dingin, nuntaakna a ki cingtak tawh vantungmi te sung pan kong pian sak na thu, hoihna leh manphat na te khempeuh dawi mangpa leh dawi gilo te in haza in a hong khak tan uh hi. hong bawlsia uh aa hong khem uh hi. 

10.Haksatna na thuak laitak un, no te a hong thei lo ka hi kei hi. Na haksat na te uh kiko in nong koh na thu te uh za in ka thei hi. 

11.A tawntung itna leh muan na takpi tawh thuakin nong ki apna te uh kong dawng aa no te aa ding in tawl dam na a hihi. 

12.Na ki ko na te uh leh na sepkhiat gamtat na te in, vantung thaman vantung nasep na hi ding hi.

NUNTAAKNA THU SIANGTHO (70) 

Hilhkik na vantung lungdam na thu 

1. Leitung mihing te lakah Ka Tapa Pau Cin Hau ka thu hilh ding in kong sawl hi. 

2. Ka Tapa in leitung mihing te lak ah ka sawl bangin kei maa ta’ang aa ka na sem pa a hihi. 

3. Thumaan na leh ka manphat na te tawh a hong pai ka Tapa Pau Cin Hau kua mah in a khaktan thei kei ding hi. Kei sialo in a mah in siatna a thuak kei ding hi. 

4. A mah in kei maa kiang tawntung nuntaakna lam hilh pa, kei mah hong tello, khua mulo bang aa om te khua vaak lam lak pa, khua zalo bangngong te khua za sak in, vantung thusiangtho, vantung Siangsawn ka nuntaak na a sem, a hong pia pa ka Tapa Pau Cin Hau a hihi. 

5. Ka Tapa Pau Cin Hau in kei maa vangliat na te pua in dawi mangpa leh dawi gilo te khem na, bawl siat na leh natna, netniam na leh lamkhak na a thuak mi te khempeuh honkhia dingin a hong pai sak ka hihi. 

6. Bang hang hiam na cih uh leh kei mah na Pa Pasian in ka hong piansak sa ka tate khempeuh it in a hong zong ka hi aa hong kem in no te hong honkhia ka hihi. 

7. No te khempeuh hong itna te pua in a hong thuak pih, ka Tapa misiangtho kumpipa nuntaakna te hang in, no te khempeuh a mannei na hi uh hi. 

8. A maa hong itna te dawi mangpa deihna tawh ki liatsak na lungsim, huaiham na leh thu maanlo gamtat na tawh na om uh ciang in, leitung mihing te tungah vantung thu hilh na, vantung thukhen na a hong pia ka hihi. 

9. Ka Tapa in a khut vei lam pan hong la in, a khut taklam ah a hong teel misiangtho te in mi dang te ii gamtat na dawi mangpa deihna na nial ding uh hi. 

10.Nisim in tate aw, no te tungah kong hilhkik na thu te ngaihsun in na nuntaak pih ding uh hi. Kong hilhkik na vantung lungdam na thu in,no te aa ding in suahkik hotkhiat na,vantung thusiangtho lungdam na thu a hihi. 

11.Kei mah na Pa Pasian leh kong piaksa vantung thu siangtho ngaihsun in nong mangngilh ngei kei ding uh hi. 

12.No te in kei hong mangngilh sak dawi mangpa deih na te khempeuh nial in na ki pelh na ding un, leitung ah na om hun sung un ka thu siangtho pha takpi-in zui-in, na hanciam ding uh hi. 

13.Kei min tawh na nuntaakna te khempeuh uh pia in thuakna te in, haksatna na puak te khempeuh uh, kei maa zawhna leh kei maa nasepna a hi ding hi. 

14.Kei mah na Pa Pasian upna taktak tawh thumaan gamtat na nei-in a thuak mi te aa ding in, thuhkikna na Pa Pasian ka hihi. 

15.Leitung ah na om lai hun sung un upna leh thumaan gamtat na tawh ka minphat na a nei te in na om na khempeuh ah Pasian om hi, ci-in lungmuang in nong ngaihsun tawntung ding uh hi. 

16.Tua bang mi te aa ding in a mau te tawh maa pang khawm aa, a zo ding na Pa Pasian ka hih na thu nong up na uh leh nong muanna uh na liansak semsem ding uh hi. 

NUNTAAKNA THU SIANGTHO (71) 

Vantung lungdam na khai ci vawhpa 

1. Ka Tapa Pau Cin Hau in lei leh van uk dingin, vantung vangliat na tawh zangh in ka sawltaak pa a hihi. 

2. A mah in vantung lungdam na thu zatna leh piakkhiat na, vantung thupha khaici te vawh in zatmi te a hong piangsak kei maa vantung thu siangtho lungdam na khaici vawh pa a hihi. 

3. Paak a hoih a namtui pen leh a etlawm pen te khaici manpha a hi uh aa, tua khaici te khempeuh a sia thei lo khaici manpha, a tul ngeilo hoihna tawh a ki dim ankung te a hoong dingin kong sawl ka Tapa in khaici manpha te kaikhawm ding leh a puah dingin misiangtho khaci a hong vawh hi. 

4. A maa khaici vawh te in vantung thu siangtho lungdam na thu keem in, kong sawl nasepna te khempeuh na zo ding uh hi. 

5. No te in sawltaak nasepna ka Tapa Pau Cin Hau khaici vawh huancing ka sawltaak nasem te na hi uh hi.

NUNTAAKNA THU SIANGTHO (72) 

Munthak gamthak zong ding 

1. No leitung mihing te aa ding in ka Tapa Pau Cin Hau tung aa kong piak vantung nuntaakna thu siangtho kammal te tello in na zui nuam kei uh aa na theih loh uh ciangin hilhkik na ka hong pai sak hi. 

2. Hong hilhkik ding ka zatmi te kong sawl khit ciangin vantung thu siangtho lungdam na thu, vantung khaici manpha it aa a puah dingin ka sawltaak te kong pai sak hi. 

3. No hong it ka hih man in hilhkik na kammal siangtho tawh vantung thu siangtho zuih ding thu kong pia aa, nong zuih kei teitei uh leh ka bawlsa na te khempeuh na zang thei kei ding uh hi. 

4. Lei leh van aa ka bawlsa te thu hilh na a hong piang ding hi. Ni sagih, kha sagih, kum sagih, vantung thu khen na a hong piang ding hi. 

5. Tua ni ciang in minpi mualpi cimh ding tuuktaam mautaam ding a tuh khaici polo in ni sat na om ding hi. 

6. Tui khal mual te cimh ding aa leitung ah pilna tawh a ki zo zolo, nat na hong piang ding hi. Ni tawp ni ciangin a mau te kiangah hilhkik na ka pia ding hi. 

7. Kei hong um taktak te nuntaak tawntung nopsak na gam sung ah ih om dinghi. Tua a hih man in tate aw, eite in munthak, gamthak ih zong ding hi. 

NUNTAAKNA THU SIANGTHO (73) 

Kei hong um minam te in kei maa minam 

1. Khaici te hoong un, Khaici a gah te kai khawm un. 

2. Ankung te hoong un, Khaici vawh na lolai te hah un. 

3. No te in na ngaihsut na te uh kei maa sungah upna pumkhat suahna na bawl ding uh hi. 

4. Kei maa min tawh na ki piak thupha te khempeuh hah un la kai khawm ta un. It in na keem ding uh hi. 

5. Gah nei a vui a tang te bang in thupha piak suan leh khak minam te sungah, kei mah upna taktak tawh thupha na ki piak khempeuh uh a hong piang ding lam en tawntung un. A hong lam en mi te tawh a ki nai semsem ka hi ding hi. 

6. Thupha vawhsa Vui leh gah hong piang ding te guta te guk ding ka phal kei hi. 

7. Dawi mangpa sawltaak lungsim hoih lo aa mi zo nuam te tawh na om khawm kei ding uh hi. 

8. Dawi mangpa hong zol na te na um kha kei ding uh hi. 9. Kei a hong um minam te in kei maa minam te na hi uh hi. Kei maa neihsa te a om khawm na hi uh hi. 

10.Thadah pa lolai aa ankung te na bang kei ding uh hi. Ankung te ki hah lo, vui leh gah nei lo thadah mi-in, mimawh mi a hihi. 

11.Ka khaici te hong un la, ka it mi te kei maa mintawh thupha na pia ding uh hi. 

12.Kei maa kha siangtho, kei maa lim leh meel in no te sungah om aa, tua vantung khaici mihing numei leh pasal tungah ka koih thupha te khempeuh zahtaak in na keem ding uh hi. 

13.A bawl sia a susia mi te in vantung thukhen na a tu a ta khang dongin, khua mialna gam sung a tung ding hi. 14.Vantung khaici te na it ding uh hi. Vantung khaici a ki vawh no te sungah a om te khempeuh, kei mah itna leh lungdam na tawh lungsim ki tuak in itna innkuan suahna tawh ka thupha na ki pia ding uh hi. 

15.Khaici te po aa dawn khia in a om mah bang in kei maa suan leh khak te in zong ka vantung nasep na te, sem in na zo ding uh hi. 

16.Kua mah in ka khaici te na bawlsia thei kei ding uh hi. 

17.Kei-in ki-itna te sungah ka om aa, zu leh va te in linna leh lau na a omlo, munnuam leh gamnuam zuan in a beel uh hi. 

18.Eite in ka bawlsa lei leh van uk in vantung nasepna te ih zo ding aa, vantungmi suan leh khak vantung minam lian te ih hi ding hi. 

19.Tu in mittaw bang aa khua mu lo mi te ih lawng sak ding hi. Bengngong bang aa khua zalo mi te ih ga’al gen kei ding aa, a mau te kiangah pai-in ih gen ding hi. Khelbaai bang in a pai thei lo mite kiangah pai-in ih kalsuan pih ding hi. 

20.Na Pa Pasian ka hih na a hong tello a zawngkhal mi te kiangah ih pai ding hi. 

21.Tua ni ciangin lungsim na neih zah nong upna leh nong itna zah sitlo in na ki ko na aw te vantungmi te kiko na leh vantungmi nasepna hong piang ding hi. 

22.Kei tawh a om lo na ki sak laitak hun hong om ding hi. Kei-in no te hong tel in no mau mah tawh om khawm ka hih na nong mangngilh kei ding uh hi. Tua ni ciangin ling in na om kei ding uh hi. 

23.Kei hong zuan aa hong nai semsem te kiangah kei zong a nai semsem ka hihi. 

24.A ki honglo lolai te leh a ki hahlo ankung te ih puah ding aa vantung thaman ka hong pia ding hi. 

25.Nisim na nekding an hong ki cing tawntung ding aa, na ansaal ah an dim tawntung in misiangtho te teen na gam in thupha piakna gam hong suak ding hi. 

26.Tate aw tu in na vawh khaici te po in vui-in hong gah ding aa, na om na gam in hoihna lamdang te tawh taang tawntung ding hi. 

27.Tua ni ciangin kei hong um lo teitei mi te in tang neilo singgah huut te tawh ki bang ding aa, nuntaak tawntung na tawh ki pelh ding hi.

NUNTAAKNA THU SIANGTHO (74) 

No te in a hong ga’al et 

1. Tate aw tu in kei koi lai ah om hi, ci-in nong um uh hiam? 

2. Kei hong um taktak te leh ka Tapa Pau Cin Hau itna taktak a nei mi te kiangah, ka vangliat na te tawh om ka hih na thu nong mu ding uh hi. 

3. Kei leh ka Tapa nong itna uh lungsim tawngnung pen tawh ngaihsun in hong phawk tawntung le uh cin om ka hih na thu nong tel zo ding uh hi. 

4. Kei hong mangngilh aa na om hun laitak un, no te mawhna in hong seel aa, lamkhial te tawh a ki bang na hi uh hi. 

5. Tua lai tak in,”Ka Pa Pasian in hong taisan hi,”na ci kha ding uh hi. 

6. Kei-in hong taisan ka hi kei hi. No te in hong gal et bek na hi uh hi.

7. Mittaw te leh khelbaai te tawh a ki bang na hi uh hi. 

8. Leitung aa om ka bawlsa na khempeuh leh a gingthei na khempeuh tawh ka min nong phat ding uh aa, lei pan aa piang gah leh teh te tawh zong ka min nong phat ding uh hi. 

9. Dawi mangpa deihna zu leh sa sisan tawh ka min nong phat kei ding uh hi. 

10.Dawi mangpa huang sungah na om loh na ding un, ka thu hahkat in phatakpi-in nong zui ding uh hi.

NUNTAAKNA THU SIANGTHO (75) 

Mawh maisak na in itna a lian pen 

1. Kei a hong thei lo mi te in mittaw leh bengngong tawh ki bang in ka bawlsa na lamdang te a thei kei ding uh hi. 

2. Bengngong te leh mittaw te in ka Tapa hoihna leh manphatna te tawh kong thupha piak pian leh khan ki khek na a hong mu ding uh aa, hoih ka hih na leh thupi ka hih na a hong theih na a lian sak semsem ding uh hi. 

3. Tua ni ciangin ka Pa Pasian manphat na leh hong itna lamdang te hang hi na ci ding uh aa, nong muan na leh nong upna uh a ki mu khia gamtatna tawh sem khia in na lak khia ding uh hi. 

4. Dawi mangpa deihna ki liatsak na lungsim te na kam pan pai khia in na zangh kei ding uh hi. 

5. Haksatna a thuak mi te ih honkhia ding aa, gilkial mi te anvaak in nuai nenna a thuak mi te ih la’am to ding hi. 

6. Lungdam mi te nuam pih un la, ki-itna a nei mi te phatna bawl tawntung un. 

7. Kei tawh ki zopna bawl tawntung in kei hong zuan tawntung un. Kei tawh a ki zom mi te in ka it mi te a hi ding aa, a sia ngei kei ding uh hi. 

8. Itna leh thumaan gamtatna na nei tawntung ding uh aa, hehpih na leh maisak na zong na nei tawntung ding uh hi. 

9. Na nuntaakna leh na pumpi uh kei maa aa ding in ki phal in.Na nuntaakna uh hong manpha ding hi. 

10.Mawh maisak na in itna a lianpen a hihi. Thumaan gamtatna in zawhna a lianpen nasepna hi. 

NUNTAAKNA THU SIANGTHO (76) 

Keimaa na a sem te 

1. A ki khihcip ganhing te sut un la, a ki puah lo a ki hah lo ankung te puah ta un. 

2. Na genkhiat sang in itna leh hehpih na, deih sak na tawh na piak khiat na in, vantungmi te aa ding in vantung nasepna te ah ih gam gol in ta’ang zai zaw hi. 

3. Tua a hih mah bang in kei nong upna taktak tawh gamtat sep khiat na in, nang hong namtui sak in hong dik sak tawntung hi. 

4. A hong picing sak a etlawm pen kei mah na Pa Pasian tawh na ki lawm khawm hi. 

5. Upna taktak tawh sem khia in a ki mu khia nong piakkhiat gamtatna in, kei maa sungah thumaan taktak a hih na nong lah khiat man in na vawh khaici hong manpha ding aa vantung hoihna van kham lukhu manphat na tawh ih maang khawm ding hi. 

6. Tua hun ciang in thumaan gamtatna misiangtho kamciam na in, thu ciamsa suak in a vul thei lo thupha na ngah kik ding hi. 

7. Nuntaak thak na hong piang ding aa vantungmi te tawh a etlawm zawhna hong piang ding hi. 

8. A vulsa paak te hong palh kik ding aa, a no suak paak te bang in ka nuntaakna hoihna lamdang tawh ka zuun kik ding hi. 

9. Midik mi-in mipha suahna hi aa, nuntaakna lampi zong na hi ding hi. 

10.A dangtaak mi te a puak uh gimna leh vangik te khempeuh kei maa min tawh ka nuntaakna tui tawi in, tawl damna na pia ding uh hi. 

11.A mau te ka hoihna leh ka manphat na te tawh na zuun ding uh hi. 

12.Dangtaak na leh haksat na a thuak mi te kiangah, vantung Siangsawn nuntaakna nopsakna leh tawldam na ka hih na thu pia in na gen ding uh hi. 

13.Kei maa khaici vawh te in thumaan thutang tawh khaici manpha vawh ta un. 

14.Kei maa nasem te in no mau nasepna te ka sem ding aa ka zo ding hi. 

15.Ka min hong phat te ka vantung thupha tawh kong pahtawi ding aa, kei hong zuan te a mau te tawh ka om khawm ding hi. 

16.A nuntaakna un manpha ding aa. a kang ngeilo tuinaak tawh ki bang ding hi. 

17.A mau gal te ka beisak ding aa, ka zawhpih den ding hi. 

18.Hun na neih khempeuh na om na khempeuh leh na masuan khempeuh uh zasak in nong ap tawntung ding uh hi.

NUNTAAKNA THU SIANGTHO (77) 

Vantung mi suah kik na 

1. Kei mah in ka nuntaakna tawh no te khempeuh hong it in ka neihsa te a hong pia ka hihi. Kei maa neihsa te a om khawm na hi uh hi. 

2. Lei leh van kei maa manphat na te ka thupha hong pia dingin ka Tapa Pau Cin Hau kong pai sak hi. 

3. Ka Tapa in vantung Siangsawn ka innpi ah vantung nasepna te ka zawh sak khit ciangin leitung mihing ci leh sa tawh leitung ah ka hong pai sak hi. 

4. Leitung ci leh sa no te mah tawh ki bang in kong paisak na in ka neihsa te khempeuh a om khawm na hi uh hi, kong cih na a hihi. 

5. Ka Tapa Pau Cin Hau in Siangsawn nuntaak tawntung na a zawh mah bangin kei leh ka Tapa hong um vantungmi suan leh khak te in a maa zawh bang in vantungmi suah kik na, na ngah ding uh hi. 

6. Tua a hih man in no te in kei maa kiangah vantungmi a suak kik ding vantung minam te na hi uh hi. 

7. Ka Tapa itna leh hehpih na te hangin vantungmi suakkik aa lei leh van a uk ding kei maa mi pawl, ka minam ka pawlpi te na hi uh hi. 

8. Lei leh van aa ka bawl na te khempeuh mannei leh manpha ka hih na thu phatna la te leh Siangsawn vantung nuntaakna thu siangtho kammal te tawh ka min hong phat dingin leitung ah ka hong pai sak, vantungmi na sepna a hihi. 

9. Ka Tapa in kei maa mi pawl, kei maa minam, vantungmi suan leh khak minam te suahkik hotkhiat na a ngah theih na ding in no te kiangah hong pai-in a maa it mi te na hi uh hi. 

10.Ka Tapa a it mi te ka hong mangngilh ngei kei ding aa, vantung itna thupha in hong taisan ngei kei ding hi. 

11.Ka Tapa a it mi te in kei mah na Pa Pasian hong it mi na hi uh aa, lin na lau na ka hong thuak sak kei ding hi. 

12.Kei leh ka Tapa hong it mi te thumaan gamtatna, migit lungduai na tawh maa a pang ding te ih hihi. 

13.Ka thu a mang ka thu zui mi te in tawntung vantung nuntaakna tawh na ki pelh ngei kei ding uh hi. 

14.Kei hong um taktak mi te aa ding in ka bawlsa na khempeuh a hong pia ka hihi.

NUNTAAKNA THU SIANGTHO (78) 

Lei aa na kip sak te 

1. Ka aang laizang sungah a luangsuk vantung Siangsawn nuntaakna tui in no te khempeuh kei maa mipawl kei maa minam, vantungmi suan leh khak taktak na hih na uh leh vantungmi te tawh ki bang in, vantung ka nasepna te zo in a om khawm ding vantungmi suan leh khak te na hih na uh a hihi. 

2. Ka nuntaakna tui-in kei upna taktak muan na a lian pen itna na neih zah uh tawh a dawn khawm mi te aa dingin vantung nuntaakna si leh sa te na hi uh hi. 

3. Kei maa nuntaakna te no te sung ah a om aa no te nuntaakna in zong kei leh ka Tapa nuntaakna sungah ka koih hi. 

4. Ka Tapa in bang mah man a nei zolo, a ki mu zolo nin leh leivui te lak pan in itna a lian pen tawh hong samkhia aa a khut taklam tung pan hong enkik in vantung thuciam ngah te hong suak sak hi. 

5. Man a nei zolo te man nei sak in a hong teel minam te ka Tapa khutkuak muanhuai sungah tawldam na leh lungmuan na vantung lungdam na te khempeuh hong pia na belh ding innpi a hihi.

 6. Kei leh ka Tapa um in hong zuan mi te leh a hong beel mi te suksiat na ka hong thuak sak kei ding aa, a hong bawl sia ding na gal te zong ka dal ding hi. 

7. Ka Tapa ii a khut taklam aa hong et kik thuciam ngah te in vantung thuciam, vantung thu siangtho, vantung nuntaakna kammal siangtho tawh a hong hilhkik ka minam te na hi uh aa, ka Tapa Pau Cin Hau nuntaakna in note aa ding in hotkhiat na leh tawldam na a hihi. 

8. Tua a hih mah bang in kei mah na Pa Pasian tawh vantung innkuan khat a suak ih hihi. 

9. Note nuntaakna in kei maa sung leh ka Tapa nuntaakna hong hilhkik khutkuak muanhuai sungah a om khin zo hi. 10.Leitung aa thu na ciam te vantung thuciam a hong suak ding aa, vantung thuciam vantung thukhenna in zong leitung ah vantung nasepna a hong piang ding hi. 

11.Tate aw, misiangtho te kiko na aw te khempeuh za in kong dawng ding aa, kei maa min tawh thupha na piak te zong vantung nasepna a hong piang ding hi.

12.Leitung aa na kipsak te vantung thuciam na a hi ding aa, na sep bang in a hong piang ding hi. 

13.Leitung pan na sut khiat te zong vantung nasepna hong piang ding aa, na sut bang in hong ki phel ding hi. 14.Sepkhiat na zahzah, piakkhiat na ka nei ding hi. Note kalsuan na vantung nasepna hong piang ding hi. 

15.Lei leh van aa ka bawlsa te khempeuh vantung ka thaman te hi aa, kei maa zawh bang in ka Tapa Pau Cin Hau in zong a zo hi. 

16. Kei-in no te aa ding ka Tapa Pau Cin Hau tawh na sem ka hi zaw hi. 

17.Kei maa nipi khua vaak ni khat ni pan ki ginni kikal leitung mihing te aa ding na ka sem aa, no te in kei maa nipi kei maa nisiangtho ni-in na Pa Pasian ka hih na thu vantung innkuan suahna minphat na innpi Zum sungah ka min nong phat ding uh hi. 

18.Ni sagih, kha sagih, kum sagih hun te mah bangin ni sagih ah khat vei, sagih aa khat gah leh teh tawh piak khiat na lei leh van aa ka bawlsa na te khempeuh phawk in kei leh ka Tapa min nong phat ding uh hi. 

19.Ni sagih ah ni khat piak khiat na in no leitung mihing te aa dingin na kasep na thu nong phat ni ding uh ni siangtho ni a hihi.

20.Tate aw, kei mah in ka bawlsa khempeuh it in ka keem hi. Ka it te it unla, kei maa deih te deih ta un. Ka hoih na te la unla, ka manphat na te tang ta un. 

21.Manphat na leh hoihna te in nang hong hoih sak in, a etlawm pen leh a namtui khaici manpha na hi ding hi. 

22.Na vawh khaici it in la, na piak thupha khaici te khempeuh na kaikhawm kik ding hi. 

23.Thupha ki piasa khaici te in nuntaak tawntung na a hihi. Hing in hoihna lamdang te in vul in a pulh thei kei ding hi. 24.Khaici vawh te in a manpha khaici vawh ta un. Mittaw te in khaici a muh zawh loh hang in, khai kung te hong hing ding aa, a kung lianpi hong piang ding hi. 

25.Ka thu a um lo mi te in mittaw tawh ki bang aa ka thu a um mi te in muh zawh loh ding khaici tang neu a hih hangin manpha in kung lianpi hong suak ding hi. 

26.A manpha khaici-in a gah tam in a paak tawh om khawm a hih mah bang in thupha aki vawh khaici khempeuh in gah tam singkung lian tawh ki bang aa, phung cing in misiangtho thupha piakna gam misiangtho khua, misiangtho gam hong zai ding hi. 

27.Bang hang hiam na cih uh leh misiangtho khat nuntaakna in khuapi lian khat tawh ki bang hi. 

28.Mi hoih lo gamtatna in samsiat na khaici tawh ki bang hi. Samsiat na khaici vawh te in mei tawh hal sang in a sa zaw, luzang humsip aa kha’ai ki ngakna a omlo, lungsim ki tamzaan gim tawntung na a hihi. 

29.Lungsim hoih lo aa mi zo nuam te in samsiat na khuamial na gamsung, dawi mangpa kiang a tung ding hi. 

30.Mi hoih lo te in lingkung tawh ki bang aa, duhna leh kialna, dangtaak na a thuak ding hi. A mau te mawhna in seel in a ki mu zo kei ding uh hi. 

31.Tu in tate aw, lungsim hoih lo aa mi zo nuam te in a tu a ta khang dong in khua a mial ding hi. A mau te tawh cik mah hun in ka om khawm thei kei ding hi. 

32.A mau te sihna a pia tawh kibang uh aa, a mau te nuntaakna keem in ka zangh kei ding hi. Haksat na in len in mawhna in a seelcip te a hihi. 

33.Na nu na pa na sanggam leh mi khempeuh tungah, simmawhna na zangh kei ding uh aa, zuau thu na gen kei ding uh hi. 

34.Kei-in hoihna bekbek ka bawl aa, dawi mangpa in siatna bekbek a bawl hi. 

35.Tu in na pumpi uh it in keem ta un. Thumaan thutang tawh na om ding uh hi. Ngaihsut na lungsim lamkawi te tangsak un. 

36.Mawhna zong in a ki sia, a ki telkhial, a ki simmawh mi te khen un. 

37.Thumaan na a nei mi te phat in na laamsaang ding uh hi. 

NUNTAAKNA THU SIANGTHO (79)

It na leh upna om lo 

1. No te in kei mah tawh ki zopna nong bawl tawntung ding uh hi. Kei tawh ki zom aa hong hopih deih hong ngen te in itna a lianpen leh ngaihsut na a lian pen tawh lungsim tawngnung nong pia masa ding uh hi. 

2. Kei-in a masa penpen piak khiat na ka deih hi. Kei-itna a picing leh a masa pen piak khiat na deih ka hih man in no te in lungsim ngaihsut na leh kei tawh ki zopna, deihnget piak khiat na a masa penpen nong zang tawntung ding uh hi. 

3. A masa pen piak khiat na in itna tawh a ki lawng thei gamtatna a hih man in kei in zong a ki lawng thei itna tawh thupha thuhkikna Pasian ka hihi. 

4. Thu maanlo gamtatna te in man a nei lo thaman a hihi. Kua mah peuhmah in itna thaman a nei lo te lawng kei ta hen. 5. Na nuntaakna te uh tel un la, na ki sapna te uh ngaihsun in tel ciat ta un. 

6. Mihing leh misiangtho khentel ta un. Tu in bang hun ah om ka hiam cih nong tel uh hiam? 

7. Na ga’al aa om a ki mu zolo te ngaihsun in en ken la, tu in ka nuntaakna bang in a piang ding hiam?ci in ngaihsun zaw un. 

8. A ki tamza’an sak thei dawi mangpa nasepna lungsim galhiam ngaihsut gamtatna te nisim in lungngai tawntung in. 

9. Dawi mangpa mawh zon na, lamkhak na te tawh na ki pelh ding uh hi. 

10.Kei-in, nuntaak thak na leh hotkhiat na zong ka hihi. Suahkik na leh nopsak na zong ka hihi. 

11.Na khempeuh piangsak in no te hong nei na Pa Pasian ka hihi. 

12.No te huhna leh panpih na kong neih na thu nong phawk tawntung ding uh hi. 

13.A ki valhcip a ki seelcip te zong honkhia in suahtaak na hong pia aa, hilhkik lungdam na thu tawh no te kong laam saang hi. 

14.Ka vangliat na tawh na khempeuh piangsak in ka uk hi. 

15.No te in kei ma nuntaakna lampi nong zui ding uh aa, kei in no te kong nusia ngei kei ding hi. Kei maa lampi a zui mi te in ka piaksa nuntaak tanwtung na leh na luah ding uh ka thupha te na mu ding uh aa na nei ding uh hi. 

16.Kei-in no te it ka hih manin ka Tapa pumpi nuntaakna tawh zong in a hong samsak ka hihi. Itna a om loh man in pumpi gamtatna omlo aa, upna a omloh man in sep khiat na omlo hi. 

17.Upna a mangthang itna a zawngkhal mi te honkhia ding in, ka Tapa Pau Cin Hau in no te a hong zong hi. 

18.Vantung thu siangtho in sang lua leh niam lua cih om lo hi. 

19.Kei leh ka Tapa hong um aa bulphuh piakkhiat khentat na in, upna thumaan piak na a hihi. 

20.Ka thu phatakpi aa hong zui te tawh a om khawm ding ka hihi. Ka thupha pia in a mau te nopna sungah a om ding uh hi. 

21.Kei leh ka Tapa Pau Cin Hau in no te a ding in na a sem ka hi zaw hi. 

22.Kei maa nasepna te ah upna taktak tawh khentat aa nasepna in a ki mu gamtatna a hong pia na hihi. 

23.Tu in tate aw, ling in na lau kei ding uh hi. No te mai aa om na hun na vai te uh leh nong koh te uh ka sem ding hi. Ih Pasian in zolo ding hi,ci-in na ngaihsun kei ding uh hi. 

24.Ka thu in leimong khat leh leimong khat, gam mong khat leh gam mong khat hong zeel ding hi. 

25.Tua ni ciangin vantung thu siangtho lungngaih na a siam mipil te in ka thu hong kan ding hi. 

26.Sikseek pa in a sikseek sa ding hi,ci-in lawng ngam lo hi. A lawng nuam te in lawng ta hen.

NUNTAAKNA THU SIANGTHO (80) 

Kuan in semkhia un. 

1. Tate aw, lei pan aa piang gah leh teh te tawh ka min nongphat ding uh hi. Ka min nong phat theih uh ciangin, singkung leh leitang te ka minphat in a ki ko tawh hong ki bang ding hi. 

2. Hih kong thupiak te a tun hun ding ciangin, guntui luitui te na zang thei ding uh hi. Sun aa nitaang te mah bang in zan in zong mei taang in sun leh zan na nasem ding uh aa, Zogam leitang kham khuapi suak in ka thu zui mi khat om na nangawn ah zong manphat na piang ding hi. 

3. Lei leh van ki ko in nasepna te hong lian semsem ding hi. Mihing te khansau na leh ki itna te hong lian semsem ding hi. 

4. Tua ni ciang in kei maa mipawl, kei maa minam vantungmi suan leh khak taktak na hih na uh nuam in hong ki lungdam mahmah ding hi. 

5. Vantungmi te suan leh khak, vantung minam ut na hong lian semsem ding hi. 

6. Khasiangtho makaih na hong lian semsem in vantung vangliat na no te tungah ki dim in zawhna lamdang te tawh zawhna hong lian semsem ding hi. 

7. Khasiangtho nuam in laam na tawh hong phat ding aa, vantungmi leh vantung galkap te tawh na sep khop na hong piangin vantung innkuan nuam suahna thupi in hong lian semsem ding hi. 

8. Tua ni ciang in leitung mihing te in ka Tapa misiangtho kumpipa Pau Cin Hau na upna uh leh na muan na uh lian sak in a nunung te masa in, a masa te hong nunung ding hi. 

9. Ka min tawh nasepna te khempeuh ah kei leh ka Tapa Pau Cin Hau ko in hong sam tawntung un. Kei leh ka Tapa ap in hong um un. Sem aa kong sawl te a ki mu khia gamtatna tawh kuan in sem khia un. 

10.“Kei a hong zuan mi te na manpha ding uh hi,”ka ci ding aa, a vul theilo paak palh te na bang ding uh hi.

NUNTAAKNA THU SIANGTHO (81) 

Zawh na in kei mah na Pa Pasian 

1. Nisim in na lungsim khempeuh leh na nuntaakna kei leh ka Tapa Pau Cin Hau aa ding in nong ki phal tawntung ding uh hi. kei in no te ki phalna zahzah thupha kong pia ding hi. 

2. Kei leh ka Tapa thukim na in no te aa ding lungdam na hi aa, a tawntung nopsak na leh van kham lukhu a hihi. 

3. Na pumpi na lungsim leh a ging thei na khempeuh te tawh ki phal in, upna taktak tawh deih nong nget na uh leh ka min nong phat na te un, no te om na leh paina khempeuh ah vantungmi tawh a omkhawm na hi uh hi. 

4. Nong piakkhiat na zah uh lungdam na in no te khempeuh hong hoih sak aa, hong tawldam sak hi. 

5. Kei hong lam en mi te tawh a ki nai semsem ka hihi. 

6. Itna leh lungdam na tawh hong lam en mi te in nopsak na pahtawi na tawh a ki nai semsem a hihi. 

7. Kei tawh a ki gamla te in a ki valhcip a ki humcip, gawtna a thuak te a hihi. 

8. Nisim in kei hong ngaihsun un. Hong lam en tawntung mi te in khuavaak bang in a taang tawntung nuntaak na a hihi. 9. A ging khia aw tawh zat na in a gingkhia aw tawh sepkhiat na hi. A ki mukhia gamtat na tawh sep khiat na in, lawng in a ki mu thei tawh sepkhiat na hi. 

10.Vantung lungdam na thu a thak a thak nuntaakna khasiangtho khan lawh na a pian na ding in, no te sep khiat na ka deih hi. 

11.Kei-in no te Pa ka hi aa, kei simloh Pa dang na nei kei uh hi. Kei-in van leh lei na khempeuh piangsak in, a bawl na Pa Pasian ka hihi. 

12.Nisim in kei tawh ki zop tawntung ding ngaihsun in na hanciam ding uh hi. 

13.A masa penpen na neih zah uh lungdam na leh phatna tawh piak khiat na in na haksat na te uh bei-in ka zawhna a hihi 

14.Na hun neih khempeuh uh kei maa hun hi aa, zawh zawhna te in vantung na Pa Pasian ka hihi. 

15.Vantungmi te in vantung nasepna tawh ka min hong phat in a mau te sepna khempeuh kei maa nasep a hihi. 16.Vantungmi te in ka min hong phat mah bang in no leitung mihing te in zong ka ni thupi ni te leh ka ni siangtho ni te ah ka min nong phat ding uh aa, nisim in a masa penpen upna leh muan na tawh gamtat piakkhiat na ka minphat na nong nei tawntung ding uh hi.

NUNTAAKNA THU SIANGTHO (82) 

Hong um taktak mi te leh nuntaak thak na 

1. Ka ta Nuam Dim kong piakkhiat na in pian leh khan ki khek theih na ding in kei maa sawl a hihi. 

2. Pian leh khan a ki khek sak ka Tapa Pau Cin Hau in leitung ah ka thu hilh in ka sawl hi. Lei leh van a uk, a zo pa ka Tapa a hihi. 

3. A mah in kei maa vangliat na te pua in ka bawlsa na te khempeuh na zat theih na ding uh, piak khiat na hilh na kong nei sak hi. 

4. A mah in sawltaak ka Mizat pa zong a hihi. A maa hong zawhna te vantung Siangsawn nuntaakna thumaan thutang tawh Mizat Kamsang thak ciapteh na ka hong neisak hi. 

5. Mizat kamsang thak pa in ka Tapa Pau Cin Hau thaman a hihi. Bang hang hiam na cih uh leh ka Tapa leh vantung Siangtsawn ka innpi aa om kei mah na Pa Pasian nasepna te thumaan thutan na leh ka vantung na sepna kong hilhkik na a hihi. 

6. No te dawi mangpa humcip, mittaw leh khel baai tawh ki bang na thuak laitak un, ka Mizat dawi dem kum(8) zawhna ka hong pia zo hi. 

7. Ka Tapa Pau Cin Hau thu ciamsa te thuciam piak kik kong hilh kik na vantung thu siangtho thumaan taktak ka hih na thu a hong hilh ka hihi. 

8. A hong um taktak mi te in nuntaak thak na sungah om in a manpha ding hi. 

9. Vantung thu ciamsa kong thupiak te khempeuh zui nuamlo na hih man un, vantung thuciam kik hilhkik na hong pia ka hihi. 

10.Thuciam kik na sungah hong zui nuamlo teitei te hehpih in ka sam kik nawn kei ding hi. 

11.A hong nial zah uh a mau te thaman hi ding aa, vantungmi te in thuhilh na thu kho pang ding hi. Kua mah in thuciam kik na, na nial zo kei ding uh hi. 

12.No te in kei tawh ki zopna nong nei ding uh hi. 

13.Kei maa sung ah a om mi te in hing silsial in maitai na leh lungnop na tawh na ki dim ding uh hi. 

14.Na vawh khaici lungdam na te in kong thupha piak vantung lungdam na thupha na tungah hong vawh kik ka hihi. Khaici manpha a ki vawh te hong gah kik ding hi. 

15.Ka Mizat te hong thuak na in ka vantung thupha kong vawh khaici te hi aa, a um mi te aa ding in na puak vangik haksat na te na van hong za’ang in na tawldam ding hi. 

16.Itna leh thupha thuh kik na in vantung Siangsawn lungdam na a gah kei mah na Pa Pasian thaman a hihi. 

17.Vantung lungdam na thu a nei lo te in manphat na leh dikna a bei a hi uh hi. Kong piak thupha leh itna lung dam na thu nuam in nong phat ding uh hi. 

18.Laam in a hong phat lo te in lungdam na leei a hong baa uh hi. Kong itna khempeuh lungdam tawntung un la, kei maa vantung thu neih na tawh kong itna te hong saang un. 

19.Vantung thuciam a hong pia ka Tapa in kei maa kong piak khong a hihi. 

20.Kei ma kiangah deih a hong ngen te in vantung minphat na la te tawh min nong phat ding uh hi. 

21.Misiangtho te in na khut te uh la’amsang in nong nget te uh na pahtawi ding uh aa, phatna late tawh na lungdam khol ding uh hi..

22.Nuam na leh lungdam na tawh nong ngak ding uh hi 

NUNTAAKNA THU SIANGTHO (83) 

Khasiangtho thupha lamkhak te 

1. Tu in na lungdam na leh na nuam na te na pumpi leh mi khempeuh tungah khem in na ko kei ding uhhi. 

2. Tua bang mah in mi pumpi leh nang pumpi tungah simmawh in na khe’m kei ding hi. 

3. Hong piangsak vantungmi thumaan na leh itna te na susia kei ding uh aa, thu ciamsa leh thuciam kik te sungah a nungta na hihna thu na phawk kik ding hi. 

4. Na pumpi leh mi te tungah mawh ciam piak na thu maanlo nasepna te taang in na pumpi na nuntaakna na phal kei ding hi. 

5. Kei maa mai ah deih hong ngen in a lungdam khol mi nong nget te uh pahtawi in laam aa a nuam mi te in mi mawh mi te ta’ang in na pang kei ding uh hi. 

6. Vantung thu siangtho tawh ki leh bulh ngaihsut na leh gamtatna na zangh kei ding uh hi. 

7. Mi neihsa tungah a nei a keem te phalna om lo pi-in na laksak kei ding uh aa, mi hehna ding in na gamta kei ding uh hi. 

8. mizi mita mipasal tung ah ngaihgawh in ci leh sa lupkhop na thu maanlo gamtatna, vantung khaici manpha te thumaan loh na tawh na zangh kei ding uh hi. 

9. Numei leh pasal tungah thumaan lo lunggulh in duhhop na leh huaihamna na zangh kei ta un. 

10.Vantung lungdam na leh khasiangtho lungdam na thu nial in na ko ngei kei ding uh aa, dawi mangpa hong bum na zu na zangh kei ding uh hi. 

11.Pumpi leh lungsim hong siasak thei gu nam te na zangh kei ding uh aa, upna sungah a hun zui aa gamtat theih loh na, na zangh kei ding uh hi. 

12.A kheng val lua gualnop na leh ki liatsak na, kam ki sel na leh tungnun ki tuh na, lungsim galdo na leh gal aa muh na te aa ki pan mi mawhna te phul kik, thukkik na te na zang kei ding uh hi. 

13.Vantung thu ciamsa thuciam kik te sungah keimaa deih loh khasiangtho thupha lamkhak te nin bang in na kih ding uh hi.

NUNTAAKNA THU SIANGTHO (84) 

Ei vantungmi te leh zawhna kham lukhu 

1. Leitung mihing a piangsak ding in vantungmi sawl in ka hilh hi. 

2. Vantungmi te sung pan a piang khia ka tate, leitung mihing kong ci hi. 

3. Leitung mihing te in vantungmi lim leh meel, ci leh sa tawh a piang khia na hi uh aa, khaa pumpi-in kei maa lim leh meel khasiangtho a hihi. 

4. Vantungmi te bawlsa taksa pumpi khasiangtho in thumaan gamtatna tawh, sawl in pumpi gamtatna a piangsak hi. 

5. Kei mah in khasiangtho hopih in khasiangtho lam hilh na a siangtho thumaan gamtatna tawh pumpi ci leh sa hong uk ka hihi. 

6. Kei mah upna leh muanna hong nei te in khasiangtho hopih na, khaa thu hilh na te leh khaa lam kaih na te a hong tel na hi uh aa, thumaan gamtatna lammaan a hong zui sak ka hihi. 

7. Vantungmi te bawlsa ci leh sa in khaasiangtho thupha piakna tawh lei leh van ka bawlsa na khempeuh ka min hong phat ding leh lei pan aa piang gah leh teh tawh ka min hong phat ding in, vantung thuciam vantungmi nasepna te na hi uh hi. 

8. Vantungmi te bawlsa taksa pumpi in vantungmi te thupiak na a om mah bang in kei maa lim leh meel kha siangtho vanmisiangtho in, leitung hun tawp na ci leh sa tawh minphat khopna a zawh ciangin, kei mah na pa Pasian om na Siangsawn vantung gamnuam innpi ah nong ciah kik ding hi. 

9. Vantungmi te bawlsa ci leh sa taksa pumpi in leitung luah in ngak ta hen. Taksa teen na gam in thupha piak na gam a suah na ding in vanmisiangtho in vantung thuciam na thupha piak kik na, vantung nasepna te na zo ding hi. 

10.Bang hang hiam na cih uh leh vantungmi te bawlsa taksa pumpi leh khasiangtho in leitung minphat na hun sung in deih nong nget na uh laam in pah tawi aa, khut siangtho te laam sang in nuam khol in na ki sialhkholh na uh tawh thupha vawh khaici te sia ngei lo in ni sagih ni siangtho kei maa nipi ni ki piakkhiat na te leh kha sagih hun sagih hun khen thuciam piak na te vanmisiangtho in a kip tawntung lungdam na tawh taksa teen na gam leitung ah vantung ka nasepna vantung Siangsawn ka innpi sung pan na zo ding hi. 

11.Tua mah bang in leitung ah na om lai hunsung un, kei maa min tawh na khut siangtho te laam sang in ka min tawh thupha na ki piakna vantung lungdam na thu tawh na kamciam te uh, vanmisiangtho in vantung ah na zo ding aa, keimah na Pa Pasian in vantung nasepna te ka zo ding hi. Ei vantungmi te in zawhna kham lukhu ih khu ding hi. 

12.Na it mi te leh hong it mi khempeuh tungah na lungsim na ngaihsut na leh kamciam gamtatna tawh itna thu ciam na piak na te khempeuh vantungmi thupha piak na kei maa nasepna te hong piang ding hi. 

13.Ei misiangtho te in lei leh van uk in misiangtho thupha piakna hong piang tawntung ding hi. Taksa pumpi sihna in vanmisiangtho khaa pumpi vantung ciahna lampi hi. 

14.Vanmisiangtho suah ni pawi, vantung gamnuam Siangsawn innkuan nuam suah ni pawi in vantung ni thupi ni a hihi. 15.Vanmisiangtho a hong ciah hun sung in leitung ngeina dawi mangpa biakpiak na ki liatsak na te leh sisan tawh biakpiak na, nuntaakna a nei khempeuh thah na, suksiat na, lungsim hoih lo gamtat na, ki nialna te na zangh kei ding uh hi. 

16.Vanmisiangtho suah ni in vanmisiangtho in lei leh van uk ding thupha kamciam ni vantung innkuan nuam suah ni pawi a hih man in misiangtho innkuan te in vanmisiangtho ciahna late tawh phat in, na khut siangtho te uh laamsaang in pahtawi na tawh phatna late sa in na nuam ding uh hi. 

17.Dawi te in misiangtho gam tangzai in picing ding deihlo a hih man in na lungsim uh a bei na ding leh vanmi siangtho thupha piakna hong khaktan nuam hi. 

18.Tua hun sung in na lungsim na pumpi hong siasak thei ding dawi mangpa hong zolna gal hiam, guih theih nam khempeuh na zang kei ding hi. 

19.Vantung lungdam na nuntaakna thu siangtho in leitung ah u leh nau a masa a hi kei hi. Kei mah na Pa Pasian a masa pen ka hi aa, kei sim loh a dang lungsim ngaihsutna na nei kei ding uh hi. 

20.Tua a hih mah bang in gah leh teh tawh min nong phat ni uh ni siangtho ka ni pi ni, misiangtho pawi vantungmi suan leh khak ni thupi ni, nuntaakna thak suahkik hotkhiat zatmi te ni, hilhkik na thuciam piakkik ni siangtho ni, lei leh van konghong misiangtho kumpipa ka Tapa Pau Cin Hau ni thupi ni, Siangsawn kumthak ni te ah vanmisiangtho, vantung mi, vantung galkap te vantung thupha piak nasep ni thu pi ni te ah, na lungsim te singtho sak in, a siangtho lungdam piak khiatna na bawl ding uh hi. 

21.Vantung ni thupi ni siangtho ni te ah no leitung mihing te leh vantungmi te thupha ki piak na hun pia in hong bawlsak ka hihi. 

22.Vantungmi te sungpan pian khiat na thu phawk na Nu te ni, thu ciamsa leh hilhkik nuntaakna thu siangtho lungdam na thu tangko ni, nuam in upna leh muan na lungtang taktak tawh pahtawi na lapawl ni, ni thupi ni te ah thupha ki piak na, nasepna te leh piakkhiat na te lungdam thuciam piak na te vantungmi, vantung galkap, vanmisiangtho te in minphat na innpi a hong ngak vantungmi te nasepna thupiak na bangin, vantung ni thupi ni te ah ka sem sak hi. 

23.Ka min nongphat na un no te ngaihsut na lungsim gamtat na te hong siangtho sak aa, nisim zawhna thu hong piangsak in a hong bawlsia ding dawi mangpa pan ki pan na galte a hong zawhpih den vantung tha khauhna a hihi. 

NUNTAAKNA THU SIANGTHO (85) 

Nuntaak na siangtho lungtang 

1. Ka minphat aa na om lai hun sungun nisim na ngaihsut na ah na lungsim tawngnung pen leh itna a lian pen gamtat piakkhiat na tawh misiangtho te nuntaakna na belh ding innpi, misiangtho kumpi pa Tapa Pau Cin Hau itna taktak tawh phawk in zahtak na, na pia tawntung ding uh hi. 

2. Lungsim tawngnung pen itna leh zahtaak piak gamtat na in kei itna a hong nei na hi uh hi. 

3. No te hong manpha sak in hong mannei sak misiangtho kumpipa siangtho nuntaakna, siangtho lungtang tawh na nungta ding uh hi. 

4. Itna a lian pen tawh nuam in zahtaak lungdam piakkhiat gamtatna in mannei in a manpha ding zah a hong zo sak ka hihi. 

5. Misiangtho kumpipa ka Tapa Pau Cin Hau lungsim tawngnung a ki mu thei mittang tawh mu in mangngilh hun na nei kei ding uh hi. 

6. Tua ahih man in ka Tapa Pau Cin Hau nuntaakna te a luah na hi uh hi. 

7. Ka Tapa nuntaakna siangtho lungtang upna taktak a nei mite in ka bawlsa nuntaakna anei anei lo, nahteh pan ki pan singkung lopa, mihing ganhing simmawh in na bawlsia ngei kei ding uh hi. 

8. Kei maa bawlsa te it in ka kep mah bang in no te zong it in kong keem aa, no te in ki nial na samsiat na, na zang kei ding uh hi. 

9. No ka bawlsa te a om khawm na hi uh hi.

NUNTAAKNA THU SIANGTHO (86) 

Na pumpi vantung thuciam 

1. Kong piaksa na pumpi leitung ah a om hi. Nisim in na nuntaakna na pumpi phat in nuam sak in. 

2. Pahtawi in la, ka min tawh thupha pia in. Lawng in la,ka min tawh thupha pia in. 

3. Haksat na bawlsiat na, simmawh na thuak sak kei in. Ko in simmawh na leh gensiatna na nei kei ding hi. Nang maa neihsa hilo a hih man in na bawlsiat leh mawhna a hihi. 

4. Zahtak in la it in. Vantung nasem a hih man in Keem in la, nuntaak pih in, Kei leh na pumpi vantung thu ciam a hi hi. 5. Kua mah peuhmah in simmawh in na bawlsia kei ding uh hi.

NUNTAAKNA THU SIANGTHO (87) 

Ki liatsak na lungsim 

1. Tate aw ka ni thupi ni-in mannei manpha na hih na uh hong thupi sak ni siangtho ni te a hihi. 

2. Ni siangtho nipi ni in kei hong taisan aa lungsim a dang piakkhiat na leh kong piaksa van te piakhia in zat khiatna na nei kei ding uhhi. 

3. Hih ni thupi ni te ah minphat na innpi kizop na innsung, tau tung lo nga’al a dang lungsim na nei kei ding uh aa, na lungsim leh thuciam napiakna kammal te leitung mihing te aa ding nasem in nipi kaalkhat hun sung kong piaksa na te simloh, a dang na khempeuh zang in na paii khia kei ding uh aa na pai kei ding uh hi. 

4. Bang hang hiam na cih uh leh kong piak khiat sa lungsim leh pumpi aa ki pan na khempeuh tungah dawi mangpa leh dawi gilo te in kei mah tawh ki zopna leh vantung lungdam na thu a bei na ding in a mangthang thei gamtat na tawh hong khem in a hong zol uh hi. 

5. Na lungsim lal na ding kei simloh a dang ngaihsut na sungah pai-in, gamtatna na bawl kei ding hi. 

6. Vantung thu siangtho tawh ki leh bulh gamtatna te in dawi mangpa hong khem na a hihi. 

7. Dawi mangpa hong khem na te kua mah in na um kei ding uh aa, midang te gamtatna na eng kei ding uh hi. 8. Mawhna in nang hong zong in, siatna in nang hong selcip ding hi. 

9. Dawi mangpa deih na ki liatsak na leh gualnop na, hehpih na leh itna a bei sak, nenniam na lungsim na zang kei ding uh aa, mi khempeuh tungah neu et na tawh mawhna zong in na gensia kei ding uh hi. 

10.Dawi mangpa in no te lal na ding leh bei na ding hong khem in hong bum aa, na pumpi leh na nuntaakna te mi khempeuh te a ding in gal leh gu hong suaksak hi. 

11.Dawi mangpa khem na te kua mah in zang in na um kei ding uh aa, leitung ki liatsak na lungsim nei in kong itna hong mangngilh te in,”Pasian aw,:ci-in ka min nong suang kei di.

NUNTAAKNA THU SIANGTHO (88) 

Lam hong khial sak lo 

1. Nisim na nuntaakna leh na gamtatna te ah a taktak thumaan muh na leh theihna om masa lo pi-in nial kei in. Ko kei-in la,gensia kei in. 

2. Kei-in thumaan thutang ka hihi. Hehpih na leh itna zong ka hi aa, na khempeuh a piangsak a nungta tawntung na Pa Pasian ka hihi. 

3. Ka thu thei siang lo pi-in, gen khial in na zang kei ta un. 

4. Vantung kammal te in na khempeuh a piangsak, nuntaakna thu siangtho a hihi. 

5. Mawh ki sikkik taktak te bek a mawhna uh mai sak in kei hong um taktak te zong it in ka huh tawntung ding hi. 

6. Mawhna te khempeuh maisak in a hong nungta sak kik kei maa nuntaakna a hihi. 

7. No te in lungsim galhiam na zang kei ding uh aa, mi hehna ding in gamtatna na nei kei ding uh hi. 

8. Vantung thu siangtho phatakpi in nong zuih uh ciangin, mit tawh mu aa thuciam na, gamtat na tawh thu ciam na,na pulak thuciam na te tawh lei leh van uk ding mi manpha te na suak ding uh aa, na teen na leh na om na in ngun khuk kham khuak suak in vantung lungdam na thu ih tang ko ding hi. 

9. A kullo gamtatna leh ngaihsut na te na nial ding uh aa, mawhna tawh ki ciam te in thu khaam a hihi. 

10.Dawi mangpa deihna na nial ding uh aa, a ki samsia suksiat na pan na pai khia ding uh hi. 

11.Dawi mangpa in nisim mawhna zong in na gamtatna te ah hong zol in hong khemkhem hi. 

12.Dawi mangpa deihna tawh ki pawl ki liat sak na, duhhop huaiham na, mawh zon na te leh sal bang aa bawl na, na nei kei ding uh hi. 

13.Tu-in ka hoih na leh ka manphat na te la ta un.“No te manpha un la, a mannei suak ta un”. 

14.Na thuciam na in misiangtho gam, misiangtho khua a piang ding hi. 

15.No te in kei maa sungah nuam in na om laitak hun un, kei maa khasiangtho lim leh meel khaa pumpi zong nuam in hong zeem aa, hong pahtawi in a hong zuun hi. 

16.Tate aw, khasiangtho lungdam na in lam hong khial sak lo lammaan hong tawn sak in thupha lam hong hilh hi. 17.Lungdam theih zah lungdam neih zah a tawngtung lungdam na tawh nakpi tak in ki ko in nuam aa pahtawi na in kei maa lim leh meel khasiangtho nasepna tawh zawhna a piang den hi. 

18.Kha leh taksa suahtaak na in pumpi cidam na hi aa, a hong zawhpih den khasiangtho lamkaih na hong piang a hi ding hi. 

19.Tu in kong piaksa thupha te leh lungdam na te humcip in meekcip kei in. 

20.Khasiangtho thu hilh na khasiangtho lung kim loh na hong piang ding hi. 

21.Mi te mawhna zong in na kawk leh khasiangtho in nang zong hong kawk ding hi. 

22.Tu in khasiangtho tawh kuan khia in vantung lungdam na thu siangtho tawh nakpi tak in ki ko in. 

23.Na ki ko na a liat zah a gol zah na khasiangtho hong ki ko in na dipna tantan a hong dim ding hi.

NUNTAAKNA THU SIANGTHO (89) 

Upna thumaan gamtat na in thu zuih na 

1. Kei hong sam aa nakpi tak in nong ki ko na aw te zaknop mahmah leh it huai mahmah a hih na ngaihsun in nong sapna nong koh thu te za in ka hong dawn na thu nong phawk tawntung ding uh hi. Tua a hih man in nuam in na laam khol ding uh hi. 

2. Kei hong lam en in nong kiko mah bang un na upna bang in sem un la, na sep bang in um ta un. Na up bang un hong piang ding hi. 

3. Kei um aa hong lam en mi te tawh a om khawm tawntung ka hihi. 

4. Ka Tapa in leitung ah ka thu a sep hun sung in gamkau te bawlsiat na a thuak laitak hong ki ko na aw te za in ka dawng aa vantungmi khat in a lam khak dawigilo te khempeuh lei ki peisak in a mang sak hi. 

5. No ka tate in na kisapna te uh upna leh lam et na a lian pen tawh nakpi tak in nong ki ko na te ka sem ding hi. 

6. Ka sepna te khempeuh a siangtho taktak itna tawh kong piak khiat na a hihi. 

7. Nong ki ko na te uh thumaan taktak a hih na, khasiangtho lungdam na thu lei leh van zong hong ki ko ding aa, nasepna khempeuh leh na ciamsa khempeuh tungah nakpi takin hong ki ko ding hi. 

8. No te nasepna khempeuh thumaan taktak tawh na zo tawntung ding uh aa, no te in zong cik mah hun in na khial ngei kei ding uh hi. 

9. Tate aw vantungmi te bawlsa ci leh sa, taksa pumpi leh ka nuntaakna, kei maa lim leh meel khaa pumpi te in pum khat suak in leitung mihing pumpi khat in a piangsak ka hihi. 

10.A hong suak nau ngeek ka ang laizang pan a luangsuk ka nuntaakna tui tawh keem in kei maa minam suah na, thupha piakna na nei ding uh hi. 

11.Thupha a ki pia sa vantung khaici in cik mah hun in a sia thei kei ding hi. A sia ngei lo kha pumpi in mihing ci leh sa a siangtho ding a deih hi. 

12. Vantung hoihna tawh zeem in a manpha na belh ding innpi, nuntaak thak na kong piangsak tawntung ding hi. 13.Khaa pumpi teenna innpi vantungmi te bawlsa taksa pumpi siangtho den ta hen. 

14.Bang hang hiam na cih uh leh khaa pumpi kei maa lim leh meel in a siangtho kei maa sung pan thumaan gamtatna tawh ka pian sak khasiangtho a hih man in siantho na in vantung nasepna a hihi. 

15.Misiangtho te in nong upna uh a siangtho a namtui pen gamtatna na nei ding uh hi. Upna thumaan gamtat na in thu zuihna ahihi. 

16.Vantung khaici a ki pia sa te in zong ka nuntaakna tui tawh innkuan nupa suah na thupha ki piakna na bawl ding uh hi. 

17.Bang hang hiam na cih uh leh kei maa sung pan aa piang ka tate in kei mah tawh innkuan khat suah na, mi dik suah na leh a siangtho pen innkuan nuam suah na zangh in na bawl ding uh hi. 

18.Innkuanuam suak in a ki-it mi te sung ah vantungmi te thupha piakna piang ding hi. zu te va te in zong lin na leh lau na a omlo munnuam gamnuam zuan in, kei-in ki-itna te sung ah ka om hi. 

19.Ki-itna te sungah innkuan nuam a suak nupa te aw, misiangtho innkuan misiangtho suan leh khak, kei maa hoih na te tangin maitai na leh nopsak na tawh maipha ngah in leitung thupha na ngah ding uh hi. 

20.Vantungmi suan leh khak mihing taksa pumpi ka nuntaakna tui tawh thupha piak na in vantun.

NUNTAAKNA THU SIANGTHO (90) 

Thu ciamsa thupha in hong zuan ding 

1. Kei maa mipawl vantung suan leh khak minam te in, vantungmi te bawlsa taksa pumpi leh kei maa lim leh meel kha pumpi te ka nuntaakna sungah om khin a hih na thu nuam in na taksa pumpi vantungmi suan leh khak ci leh sa pahtawi in phatna na bawl ding hi. 

2. Phatna a bawl ka mipawl te aw, lei leh van kong hon na thupha thu ciamsa leh thuciam kik kong hilh kik na thu mu khol in nuam na tawh na taksa pumpi uh thupha piakna nei in phatna na bawl ding uh hi. 

3. Kei nong up taktak leh thu ciamsa leitung thupha te nang kiangah hong pai in hong zuan ding hi. 

4. Thupha in belh ding innpi in hong nei a hih na thu nuam in vantungmi te bawlsa na taksa pumpi pahtawi na leh etlawm sak pen na tawh a it huai mahmah in mu in na phat ding hi. 

5. Vantungmi te bawlsa na taksa pumpi it in la keem in. Pa’akta in la a etlawm bang in mu in. Sal leh sila bang in bawl ken la, leeibaa siik in simmawh ken. 

6. Bang hang hiam na cih uh leh khasiangtho in a teen na innpi etlawm na pen tawh pa’ak ta in zeem tawntung aa simmawh ding deih lo hi. 

7. Misiangtho kumpipa ka Tapa Pau Cin Hau in vantungmi te suan leh khak te vantung manphat na leh thumaan taktak tawh vantung thuciam ka pia zo hi. 

8. Kei nong up taktak uh ciangin na leeibaa te bei-in na haksatna pan na suakta ding uhhi. 

9. Kong bawlsa na pumpi kei leh ka Tapa tungah thumaan na tawh zahtaak in la it in. Sal aa na bawlna pan suakta in na leeibaa te hong bei ding hi. 

10.Phatna la te tawh zeem lecin ka dikna leh ka hoihna te tawh na manpha ding uh aa, A manpha vantung khaici na hi ding hi. 

11.Kei upna leh muanna thalawh na omlo kong piak te hong sang lo pi-in na pumpi tungah na leeibaa te siik kei in. 12.Thumaan gamtatna omlo lamet na a omlo, sepkhiat gamtatna tawh man a nei zolo thadah te in nin tawh ki bang hi. 13.Itna zahzah, phal na zahzah, upna ki piakkhiat na tawh minphat na in ka hong piak khong ka Tapa Pau Cin Hau thaman a hihi. 

14.Itna leh hehpih na a theilo, huh na leh panpih na a nuam lo, upna gamtatna khentat na a nei lo ka min hong phat nuamlo thadah te in nin a hihi. 

15.Itna a nei lo, phat na a bawl zolo, lungdam na leh thumaan gamtat cihtak na a nei zolo te vantungmi te thu hilh na hong piang ding aa, na leeibaa hong ki siik ding hi. 

16.Tu in phatna zah, nuam na zah, na lungdam na zah tawh sepkhiat gamtatna ka deih hi. Bang hang hiam na cih uh leh no te tawh maa a pang nuam ka hi zaw hi.

NUNTAAKNA THU SIANGTHO (91) 

Hong umlo hong taisan te 

1. Muhna omlo pi-in, theihna leh gamtatna om thei lo hi. Itna omlo tawh gamtatna pha piang zolo hi. 

2. Ka Tapa Pau Cin Hau in no te mu in hong tel aa, itna thumaan hong pia hi. a mah in a siangtho lo ngaihsut na leh gamtatna a nial hi. 

3. A mah in itna tawh sam in a hong zong zong hi. A maa zon mi te mannei thupi sak in a ki sam zah tawh uk in a nei hi. 4. Ka Tapa it mi te khempeuh zong kei mah in ka it hi. A maa sap te zong sam in ka huh tawntung ding hi. 

5. Hoih na te ngen un. Phat na te ngen un. Tate nget te khempeuh za in ka hong dawng ding hi. 

6. Kei leh ka tate a khen zo kua mah omlo ding hi. 

7. Thumaan gamtatna in cihtak gamtatna a hi aa, cihtak gamtatna in ngaihsut na a siangtho a nei misiangtho te a hihi. 

8. Ngaihsut khentat na omlo pi-in thumaan gamtatna a piang thei kei hi. 

9. Kei mah na Pa Pasian in van leh lei na khempeuh a piangsak ka hih na thu um in thumaan taktak tawh ngaihsut khentat na te, mi pha gamtatna leh a etlawm ngaihsut na a nei mi in a pahtaak huai ka tate na hi uh hi. 

10.Tua a hih man in kei hong it mi te in vantung manphat na la te sa unla, nong phat kikkik ding uh hi. 

11.Vantung minphat na te in khut tawh lawngin phat na, laam na tawh pahtawi in phat na, khut te laamto in vantungmi nasep na nuam khol in minphat na, kei leh ka Tapa itna leh muan na tawh lam en aa minphat na te hi aa, vantung lungdam na thuciam te tawh nisim minphatna na nei tawntung ding uh hi. 

12.Lam etna zah hong gah in vantung lungdam na vantungmi thuciam a gah hong piang ding aa tua khempeuh tawh nuam in a lungdam khawm na hi ding hi. 

13.Kei mah na Pa Pasian bei-in ka mang ngeikei ding aa, ka kisia ngei kei ding hi. 

14.Kei hong umlo te in siatna leh a hoih lo gamtatna sepna te tawh dawi mangpa in khem in mawhna sung ah a om hi. 15.Mi mawh te in kei hong umlo hong taisan te hi aa,a teen na te uh kip ngei lo in,a sep na te uh manpha ngei lo ding hi. 16.Mawh na thaman sang te in siatna a thuak ding uh aa, ki siik kik na mahmah a neih ma teng kua mah in honkhia zolo ding hi. 

17.Mawhna in hong seel in siatna in nang hong zong aa, dawi gilo te in hong khemkhem hi. 

18.Kei it aa hong zuan mi te manpha in a sia ngei kei ding uh hi. 

19.Ka Tapa Pau Cin Hau in ka sawl bang in a zozo pa a hihi. A maa pai na ding kua mah in a khak tan zo kei ding hi. 20.Vantung thuciam a maa hunkhen mah bang in leitung ah pian leh khan ki khek hi. 

21.A maa zawh bang in na zo ding uh hi. Ka tapa a um mi te tawldam na, a muang mi te hotkhiat na, a tel mi te in manphatna na ngah ding uh hi. 

22.Tua bang mah in leitung nasepna ih zawh khit ciangin vantung ah vanmisiangtho suah ni pawi ih bawl ding aa, lei leh van uk in vantung Siangsawn ka mi pawl te ih hi ding hi. 

23.Ka minphat aa na om laitak muhdah na hong piang ding hi. Na lungdam laitak khem na leh do na hong pai ding hi. 24.Lau in, na li’ing kei ding hi. Dawi mangpa galhiam te in eite hong zolo ding hi. 

25.A tawp na ciangin nang hong that ding na gal te in zong nang hong it-in, nang hong honkhia pan ding na kal suan na a hihi.

NUNTAAKNA THU SIANGTHO (92) 

Kei-in manpha ka hih na thu 

1. Leitung mihing te aw, na ki-itna uh kip zolo in tom kal hun khat sung in zong gu a suak thei hi. No te ki-itna te in neu in mannei zolo hi. 

2. Kei hong um mi te ki itna in kei mah na Pa Pasian tawh vantung innkuan suahna ahihi. 

3. No te in ne aa na ki sawl uh khat vei bek gilvah na ding leh khat vei bek ne aa a ki sawl na hi uh hi. 

4. Kei-in ne aa kong sawl na in nisim in na kham ding an ki cing den hen la, na ansaal ah an dim den hen hong ci ka hihi. 5. Bang hang hiam na cih uh leh ka nuntaakna te hong pia in no te khempeuh hong nei tawntung ka hih na thu, na theih na ding uh deih in hong hilh ka hihi. 

6. Ka bawlsa na khempeuh luah in tang ta un. Kei-in no te nuntaakna hong nei in ka keem tawntung hi. 

7. No te hoihna in tomkal hun khat sung in zong bei thei aa, kei maa hoihna te in a sia thei kei hi. 

8. Kei in manpha ka hih na thu um in nong phawk tawntung ding uh hi. 

9. Upna a om man in gamtatna piang aa, gamtatna a om man in sepkhiat na piang hi. 

10.Kei nong up taktak ni uh ciang in siatna leh mawhna te nin bang in na kih ding uh hi.

NUNTAAKNA THU SIANGTHO (93) 

Khaa pumpi in nang hong huh dingin hong pai 

1. Khaa pumpi-in nang maa aa ding leh nang hong huh ding in a hong pai a hi zaw hi. A mah in siangtho na leh thumaan gamtatna tawh a zo tawntung khasiangtho nasem a hihi. 

2. Tua a hih mah bang in khaa pumpi teenna taksa pumpi-in ngaihsut na a siangtho leh gamtatna a siangtho pen tawh nisim nuntaakna a deih hi. 

3. A nin ngaihsut na leh gamtatna te nial aa, vantung lungdam na tawh ki lehbulh dawi mangpa nasepna te deih lo hi. 

4. Tua a hih man in kua mah bu in na ki seel zo kei ding uh hi. A bu zo kua mah a om kei ding uh hi. 

5. Khasiangtho leh vantungmi te in ka bawlsa na te pailet in a mu uh hi. 

6. Khasiangtho in vantung ka thupiak na bang in thakhat thu in a zo hi. 

7. No te in zong vantung thupiak na ka nasepna te khempeuh na zo ding uh hi. Kong thupiak te khempeuh hong zui khial kei un.

8. Leitung ah na om hun lai teng un na nu na pa na sanggam leh mi khempeuh tungah khasiat sak na leh simmawh na, na bawl kei ding uh aa zuau thu na gen kei ding uh hi. 

9. Kei maa sung pan a piang khia vantungmi te suan leh khak ka tate na hih man un kei in ta kong ci aa no te in Pa nong ci ding uh hi.

NUNTAAKNA THU SIANGTHO (94) 

Ki phal in piak khiat na 

1. Nuam in a lungdam thei lo, mittaw khelbaai bengngong mi te vantung thu hilh na leh thu khenna a piang ding hi. 

2. A mau te kiang ah pai-in lungdam na thu na thei sak ding hi. 

3. A mau te zong ih sam kik teitei ding aa, suahkik hotkhiat na thu ih pia ding hi. 

4. Hotkhiat na thu thei na pi za napi in a theilo a zalo a ki neih te in Itna leibaa nei-in a mannei zo kei uh hi. 

5. Tua a hih man in a mannei zolo mi mawh mi te kiangah, vantungmi nasepna thu khenna hong piang ding hi. 

6. Nang tung aa mawhna hong nei te a mawhna uh maisak in thuak in la, itna leh hehpih na tawh nuntaak thak na sungah koih in na nuamsak ding hi. 

7. Kei-in nasepna te leh nong ki ko na te khempeuh tungah ka sem ding hi. 

8. Thuk kik na Pasian ka hihi. 

9. Thumaan na taktak tawh upna leh muan na ka deih hi. 

10.Kei itna a hong thei lo khempeuh te na nuntaakna leh na pumpi zangh in phatna tawh sepkhiatna na mu sak ding hi. 11.Na piakkhiat na in ka Tapa Pau Cin Hau leh kei a hong lawng na hi ding aa, upna tawh sep-khiat na a gah in kei a hong lawngkha na hi uh hi. 

12.Ka minphat aa na om laitak un duh na kial na, dangtaak na gal bang in a hong pai ding aa, nong upna taktak uh tawh na thuak na zahzah zawhna ka piang sak ding hi. 

13.Haksatna na thuak laitak nopsak na khuapi sungah a tung ding na hih na thu, kei leh ka Tapa itna tawh lungdam na, vantungmi te in thukho pang ding a hih na, na phawk tawntung ding uh hi. 

14.Vantungmi te in vantung zawhna te a ngah na ding in, thuak na te khempeuh tawh a zawh mah bang un, na thuak na zahzah uh vantung thupha thaman in a piang ding hi. 

15.Ka minphat aa na om laitak na gal pa in that ding in hong pai a hi zong in upna taktak tawh hong pahtawi leh hong phat dingin sepkhiat sak theih na thu nei sak aa, na hilh na in a nung sang ciangin nang hong huh khia ding aa, na lawm hoih penpen leh vantung nasem hong suak ding hi. 

16.Ka deihna bang a pian na ding huntawp mateng ngak in nong phatna in itna leh thumaan na tawh phatna hi aa, thaman neihna leh thupha ngah na a hihi. 

17.Tu in tate aw, kong hilh thupha khempeuh mannei in zang ta un. 

18.Na upna lungsim mittang tawh na muh te na ngawn, vantungmi te sepkhiat na hong piang ding hi. 

19.Tua a hih man in kei nong upna tawh piang ding hi, ci-in upna khentat kalsuan na in khasiangtho khanlawh na, khasiangtho ki pholaak na a hihi. 

20.Khasiangtho ki pholaak na in misiangtho te thumaan gamtatna, vantung nasepna lianpi hong piang ding hi. 21.Khasiangtho ki pholaak na khaa khanlawh na in taksa thuciam leitung ah pian leh khan ki khek na, kha siangtho thupha hawm na hong piang ding hi. 

22.Kei hong um lo amau leh a mau a ki nenniam a ki seelcip minam te kiangah khasiangtho in a maa vantung minam te zongin a hong pholaak ding hi. 

23.Kei hong um lo te in a mau nuntaakna leh a pumpi selcip in, a mau leh a mau a ki nenniam te a hi uhhi. 

24.Kei a hong um lo thadah mimawh mi a mau leh amau ki nenniam aa a ki seelcip minam te taksa pumpi lungdam na thu thumaan taktak a hong piankhiat ni ciang in khasiangtho thumaan gamtatna nakpi tak in ki pho laak in pian leh khan hong ki khek ding hi. 

25.Taksa lungdam na thu ki pholaak na dingin vantungmi te phatna la te tawh ka min nong phat ding uh aa, vantung vaikuan na khasiangtho ki pholaak na thu nakpi takin ka piang sak ding hi. 

26.Bang hang hiam na cih uh leh vantungmi te nuam in lungdam aa, ka min hong phat na la te gamtatna tawh a lak khia uh hi. 

27.Vantungmi te in phatna la te na sak uh ciangin nuam mahmah uh aa, khasiangtho ki pholaak sak in kha siangtho tawh kop in, vantung minam te zong in vantung thupha hawm na a sem khia uh hi. 

28.Kei hong um taktak mi te in na nuntaakna uh leh na pumpi uh, nakpi tak in ki phalna a lian pen piakkhiat na in vantungmi te aa a hihi. 

29.Nong itna un ki phal in piakkhiat na a hi aa, no te ki piakkhiat na in vantungmi te zawhna a piang ding hi. 30.Khasiangtho in ngaihsut na lungtang a siangtho deih aa, vantungmi in upna taktak leh muan na a lian pen tawh ki phal in sepkhiat na a deih hi. 

31.Kei hong um taktak te kua mah in nial in a khaktan zo kei ding hi. 

32.lei leh van ah ka bawlsa na khempeuh a uk dingin hong sawl ka hihi. Kong sawl na pumpi-in leitung ah a om hi. 33.Khasiangtho thumaan na bang in taksa pumpi in thuciam aa, vantungmi te tawh khut ki len khawm in ih zo ding hi. 34.Taksa pumpi teen na gam in misiangtho khua misiangtho gam, nasepna khuapi lian hong piang ding aa, a etlawm pen gah namkim tawh leitung no suak kik in a vulsa paak te palh in a etlawm gam hong suak ding hi.

NUNTAAKNA THU SIANGTHO (95) 

Na sik na leitang hong ki ko ding 

1. Tate aw, nisim gamtatna ding kha leh taksa nong ki ap tawntung ding uh hi. Hun nong ap khempeuh kei maa nasep, kei maa zawhna hong piang dinghi. 

2. Nong ap loh te leh nong zaksak loh te uh sepkhiat na a om thei kei dinghi. 

3. No leitung mihing te in manpha ka hih na leh thupi ka hih na thu nong phawk tawntung na ding un ngaihsut na a lian pen piakkhiat na ka dieh hi. 

4. No te in lian mahmah leh thupi ka hih na thu tel in nong phawk tawntung na ding un deihnget na leh kizop na ah ngun leh kham, sum leh paai tawh thuciam piak na a om theih na dingin, sumpi tawh nong ki ap ding uh hi. 

5. Kei -in man nei manpha ki hih na thu, upna leh gamtatna ki gawmkhawm in, sepkhiat gamtatna sumpi tawh ki ap na in, nong apna leh deih nget na thu te man ka neih sak na leh thupi a hih na thu ka lian sak hi. 

6. Khasiangtho ki pholaak na ding khasiangtho vaikuan nasepna, khasiangtho gam tangzai na ding na up bang in khasiangtho tawh na sepkhiat na zah, vantung nasepna a pian na dingin kha thahop na sumpi tawh sepkhiatna na nei ding uh hi. 

7. Lungdam tak in a hong pai ding nuam khol aa misiangtho gam tangzai na ding deih ngen aa, thupha kamciam te tangzai tak in sepkhiat na in, lungdam koh na sumpi vantung nasepna lianpi ahihi. 

8. Ki zopna sumpi in kha leh taksa nuntaakna hong siasak lo in, a man nei mahmah thuciam piak bang in, dawi gilo te in bawlsiat na a nei thei kei ding aa, na deih nong nget te uh kip in ka sepkhiat na, vantung ka thu neih na thu a hihi. 

9. Tate hong sapna aw te bei ngei lo ding hi. Deih ngen aa nong sapna aw te za in kong dawng hi. 

10.Nong koh thu te sangin nong ki ko na aw te ka za hi. na ki kona, na sikna leitang zong hong ki ko ding hi. 

11.Na lungsim tawngnung pen tawh nong ngetna zah na om na gam zai in, uk na gam a suak ding hi. 

12.Na om na leh na din na mun hong ki ko ni ciangin kei tawh ki zopna sumpi, deih ngetna sumpi, kha thahop na sumpi te tawh nong ki zopna thu te ka ki ko sak dinghi. 

13.Tua ni ciang nong ki ko na leh deih nong nget na te khempeuh lei ah kip in leitung na nusiat hun uh a tun ciangin, vanmisiangtho in taksa kamciam na vantung nasepna tawh a zo tawn-tung dinghi. 

14.Leitung ah na sep mah bang in na upna zahzah a hong piang ding hi. 

15.Kua mah in misiangtho te ki ko na nial in a khaktan zo kei ding hi. 

16.Misiangtho te ki ko na te in a sia thei kei ding aa, tua vantung lungdam na thu kua mah in seel in a bu zo kei ding uh hi. 

17.Misiangtho te aw nong ciamsa leh nong ki ko na deih nong nget na, na sik na leitung mun leh gam tawh thu kho pan na ka piang sak ding aa, na tu na ta khang dong in a mang kei dinghi. 

18.Ka bawlsa leitung in kei maa minphat na ding in ka pian sak a hihi. 

19.Minphat na ding aa ka piansak leitung ah ka bawlsa nuntaakna a nei a nei lo, man nei ding ka bawl ka it a hih mah bang in kua mah khempeuh in ka bawlsa na khempeuh simmawh in na bawlsia kei ding uh hi. 

20.Na pumpi leh leitung aa om na khempeuh susia in a simmawh te in bang mah a nei lo ki man na zong a om lo, thaman a nei zolo mizawng mi a hihi. 

21.Mizawng te in ka bawlsa na khempeuh leh leitung mihing te aa ding in, ki manna a om zolo gu in a piang hi. 

22.Tua a hih man in kei hong um lo mi te cik mah hun in bu in na ki seel zo kei ding uh hi. 

23.Manphat na tawh a lungdam tawntung hehpih na leh itna a nei kei maa maipha mu in kei hong um tawntung, a maa pumpi nuntaakna leh mi khempeuh te aa dingin ka bawlsa na khempeuh it aa manphat na tawh a zangh mi te in mihau mi manpha a hihi. 

24.A manpha misiangtho in mi khempeuh aa ding in nuntaakna a hi ding hi. Misiangtho te kua mah in a susia zo kei ding hi. 

25.Tu in tate aw, no nong itna uh leh kei kong itna koi lian zaw hiam? 

26.Kei in ka nuntaakna te hong pia in na mawhna khempeuh uh hong maisak, kong itna thupha tawh ka neihsa khempeuh hong luah sak ka hih man in kong sapna aw te na ngai tawntung ding uh hi. 

27.Ka Tapa Pau Cin Hau in a nuntaakna a siangtho pen tawh no te hong zongin, no te in zong na belh ding innpi a siangtho ka Tapa nuntaakna sungah, tawldam in kei nong lungngai den ding uh hi. 

28.Kei in a siangtho kha nuntaakna ka hi aa, kha pumpi in a siangtho nuntaakna sungah a om ding thu pi hi. 

29.Tua ahih mah bang in kei maa mai ah lungsim a siangtho pen upna leh gamtatna ki gawm in ka min nong phat ding uh hi. 

30.Kei maa lim leh meel kha pumpi leh ka nuntaakna tawh hong piang sak ka hih man in ka bawlsa na te hong uk sak ka hihi. 

31.Tate aw, kei neih bang in a nei na hih mah bang un, vantung thu neihna thu lungdam in ka min nong phat ding uh hi. 32.No te in, kei maa neihsa te na hi uh aa Kei maa neihsa te in mawhna gam pan a piang ahi kei hi. Na khempeuh piang sak in no te pian na Pa ka hihi. 

33.No te ka nuntaakna tui tawh sawp in a siangtho nuntaakna kong nei sak hi. 

34.Ka Tapa Pau Cin Hau nuntaakna leh kei maa hoihna tawh no te a hong zeem ka hihi. 

35.Mi mawh mi te in a pumpi gu a pia tawh ki bang aa, a ki mu zolo a ki liah cip, a ki hum cip, a ki seel tawh ki bang hi. Hih mawhna te in dawi mangpa khaici vawh a hihi. 

36.Dawi mangpa hong khemna te kua mah in na um kei ding uh hi. 

37.Mi mawh te in kei tawh ki gamla semsem aa, dawi mangpa tawh a ki nai semsem hi. 

38.A ki sikkik taktak mi te in upna thumaan gamtatna tawh kei a hong zong ding aa, hong mu te bek kei maa mipawl suah kik in ka honkhia bek ding hi. 

39.Dawi mangpa in mawhna tawh no te hong zolzol aa hong khemkhem hi.

NUNTAAKNA THU SIANGTHO (96) 

Siatna leh mawhna in misiangtho te gal lian pen 

1. Kei itna taktak hong nei zolo mittaw leh khelbaai man a nei zolo mi zawng mi te nuntaak thak na ih pia ding hi. 

2. A hih hang in a mau te khatvai ih dong kik ding aa, mawhna leh siatna a bawl teitei te, ka zong nawn kei ding hi. 

3. Haksatna dangtaak na ahong thuak ding uh aa,”Pa aw”, ci-in a hong sap uh hang in ka dawng kei ding hi. 

4. Tua a hih man in kong piakkhiat sa na khempeuh leh na pumpi nuntaakna keem in na it ding uh hi. 

5. Dawi gilo te in kei tawh kizopna a bei theih na ding leh no te siatna ding bekbek zong in zu a ki pan mihing lungsim suksiat na hong nei hi. 

6. Dawi te in ka bawlsa na khempeuh leh mihing khempeuh tungah simmawh in ki liatsak na lungsim neu muh sak na lungsim ngaihsut na hong guan in mi te gal ding in hong piangsak aa kei tawh kizopna a bei sak hi. 

7. Tua a hih man in Vantung lungdam na thu tawh ki leh bulh gamtatna te na zangh kei ding uh hi. 

8. Bang hang hiam na cih uh leh kong piaksa na nuntaakna leh na khempeuh tungah hong deih gawh aa sisan tawh biak piak ding a deih man a hihi. 

9. Ei misiangtho te in mihing gen loh ganhing tungah suksiat na bawl lo in keem in a puah zaw ding, ei vantungmi te nasepna a hihi. 

10.Dawi te in leitung mihing te mawhna zong in a vakvak uh hi. 

11.Misiangtho te a ding in zu a ki pan ki liatsak na leh vantung thumaan gamtatna tawh ki leh bulh ngaihsut na te vantung thukhaam a hihi. 

12.Tua hih man in siatna leh mawhna te in misiangtho te nuntaakna a susia ih gal lian pen a hihi. 

13.Zu ne in nuamsa aa na om laitak un kei nong mangngilh uh aa, a hong taisan na hi uh hi. Tua bang aa hong taisan mi te in a si tawh ki bang hi. 

14.Tua a hih man in vantung thu siangtho tawh a lungdam thei lo mite vantung thukhaam a hihi. 

15.Thu hilhna a thuak mi te in haksatna leh gimna a thuak ding uh aa, kei hong um mi te nopsak na leh tawl dam na a hihi. 

16.Tu in tate aw, na nu na pa itna tawh na sap leh vantung aa om na Pa Pasian in na nu na pa te ta’ang in, ka hong dawng ding hi. 

17.A mau te in misiangtho khaici a ki vawh na vantungmi te thupha piaksa, ka thumang mi te a hi uh hi. Tua a hih man in na nu na pa simmawh in na bawlsia kei ta un. 

18.Nu leh pa simmawh in a bawlsia te in Kei hong nial na hi ding uh hi. 

19.Vantungmi te in kei maa sung pan piang in leitung mihing ka tate in vantungmi te sung pan a piang khia na hi uh hi. 20.Vantungmi te sung pan a piang tate in na nu na pa uh it in zahtaakna na nei tawntung ding uh aa, phatna na bawl tawntung ding uh hi. 

21.Vantungmi nu leh pa in amau sung pan a piang mihing khaici te samsia ngeilo hi. 

22.Tua a hih man in no sung pan vantung khaici a piang khia te nu leh pa te in simmawh in na samsia ngeikei ding uhhi. ko in na gensia ngei kei ding uhhi. 

23.Vantung khaici innpi na hih man un na ta te na samsiat uh leh khasiangtho teen na innpi kisia in haksat gimna na thuak ding uhhi. 

24.Kua mah in nang hong zuan nawnlo ding hi. a ki siasa belh ding innpi kua mah ut nawnlo ding hi. na pumpi a bawlsia tawh ki bang hi. 

25.Ta thu manglo te kua in bawlsia ding ci a hi hiam? Kei hong um mi te in na ki itna uh unau sak in na ki innkuan sak ding uh hi.

NUNTAAKNA THU SIANGTHO (97) 

No te gal khempeuh bei 

1. Ka thu siangtho ka thupha zuihna in no te gal khempeuh bei sak na leh misiangtho nuntaakna a hihi. 

2. Lam khial mi te in a khialh na ki phawk kik hen la, mawhna a bawl te in mawhna ki sik kik hen. 

3. Kei hong zuan mi te ka it aa amau te misiangtho suah na a hihi. 

4. Leitung mihing te aw, no te tungah kong ciamsa thu te a tun ni ciangin, pian leh khan hong ki khek ding aa, kei leh ka Tapa a um taktak mi te leh mipil te in kei leh ka Tapa itna hong lian sak semsem ding uh hi. 

5. Tua hun ciang in thupha piaksa suan leh khak minam te na hi ding uh hi. 

6. Dawi gilo biakna nam(68) deihna leh gamtatna te na nial ni uh ciang in na puak uh gimna leh vangik te khempeuh suahkhia in tawldam na hong piang ding hi. 

7. Tua ni hun ciangin na teenna inn, na paina lampi, na om na mun khempeuh manphat na leh hoihna tawh ki zeem in, nuntaakna a manpha a siangtho pen leh a namtui paak huan tawh hong ki bang ding hi. 

8. Vantung ngeina tawh leitung ah tawlngak na omlo, tu a sangin a thupi zaw vantungmi te tawh nasep khop na lian in hong tam semsem ding hi. 

9. Vantungmi te in mipha mihau in a ciapteh thupha piaksa suan leh khak te pulak na leh sepkhiat na vantung nasepna lianpi piangin na sep bangin vantungmi te nasepna hong piang ding hi. 

NUNTAAKNA THU SIANGTHO (98) 

Haksatna na thuak laitak 

1. Tate aw, kei maa manphat na leh hoihna te nisim in na zang thei ding uh hi. 

2. Kei upna leh muan na tawh na pai laitak kei tawh kizopna lungdam na thu mangngilh in nong itna uh beisak in na puk laitak un, a tuuk mi khempeuh na ki phong ding uh hi. 

3. Numei a tuuk leh pasal in na phong ding uh aa, pasal a tuuk leh numei in na phong ding uh hi. 

4. Bang hang hiam na cih uh leh kei maa sung ah a om mi te in na ki itna uh unau in nong upna uh na innkuan sak ding uh hi. 

5. Ki-itna unau in na upna uh a innkuan te in cik mah hun in kua mah in hong susia zolo ding hi. 

6. Na tuuk laitak in na thawh kik ding ngaihsun in la, thawh hak ding ngaih sun kei in. 

7. Haksatna na thuak laitak”Pa aw,” ci-in ding khia in ka min nong phat ding uh hi. 

8. Lungdam na khasiangtho sam in maa ih pang khawm ding hi. 

9. Bang hang hiam na cih uh leh vantungmi, vantung galkap, vanmisiangtho te in lungdam na thu ka min hong phat uh aa, a maute in a zo uh hi. 

10.No te in haksatna na thuak laitak un, khasiangtho lungdam na thu na sam ding uh aa, khasiangtho ki pholaak sak in upna, deih na ki-itna innkuan khat suak sak in na sem khawm ding uh hi. 

11.Vantung lungdam na nuntaakna thu siangtho tawh upna innkuan ki-itna unau kei mah tawh ma pan na in, no te aa dingin haksatna khempeuh ka beisak ding aa, khasiangtho in nopna innkuan suah na, upna thumaan gamtatna tawh khasiangtho ki pholaak in khasiangtho daikaih na hong piang ding hi. 

12.Nong nget te khempeuh sem in ka piang sak ding hi. 

13.Kei maa sung pan upna lampial mi te in a ki samsia na hi uh aa, kei hong um mi te in vantung nuntaakna nei in tha khauh na leh thahat na a lamdang te tawh ih zo ding hi. 

14.Tu in nong nget te uh um un la, phawk tawntung un. Ngak unla, lungdam un. Nang maa kiangah a hong pai ding pahtawi un la, laam sang un. 

15.Hong lam en tawntung un la, phatna na bawl tawntung ding uh hi. 

16.Ka min hong phat lo te in a ki susia na hi uh hi. Tua bang mah in vantungmi te bawlsa susia in a simmawh na hi uh hi. 17.Kei maa thunial mi hoihlo te in lingkung tawh ki bang hi. 

18.Vantungmi te bawlsa susia in a samsia mi-in, na bawlsiat na zah na tungah hong tung kik in, vantung thu hilh na hong piang ding hi. 

19.Vantung lungdam na khasiangtho lungdam na thu a nial mi te in dawi mangpa khaici vawh mi te a hi uh hi. 

20.Dawi mangpa in mihing te ngaihsut na sangin a thupi zaw tawh hong khem zo hi. 

21.Na suan na khak kei maa vantungmi nasepna samsia in na simmawh leh nasepna zahzah na tungah hong tung kik ding hi. 

22.Kei tawh kizopna gam la in na om uh ciangun, khasiangtho khanlawh na tawm in kong thupha piak ding tawm hi. 23.Hun khat ki zopna nong bawl loh hun sung uh zong kei tawh kizopna khawl in manphat na omlo hi. 

24.Kei tawh kizopna hahkat in a hong um mi te a maa ki hong in masuan zawhna piang aa, khasiangtho lungdam na thu a om hi. 

25.Khasiangtho lungdam na thu a neih ciangin khasiangtho daikaihna hong piang aa, taksa in lin na leh lau na thuak lo in nopna sungah a om hi. 

26.Kei mah tawh kizopna ah mi maitang zahtaak na tawh piakkhiat na sangin, upna taktak tawh piakkhiat na ka deih zaw hi. 

27.Bang hang hiam na cih uh leh thumaan upna taktak omlo tampi piakkhiat na sangin, upna taktak a lian pen gamtatna tawh piakkhiat na a tawm zaw a hih hang in manpha ka sa zaw hi. 

28.Kei-in upna taktak leh thumaan na taktak ka deih hi. 

29.Na nu leh na pa sungah nuntaakna ding a ki cing tak in ka koih khin zo hi. 

30.Na nu na pa itna a lian pen tawh sam in na hopih na a manpha mahmah sapna aw te ka dawng ding aa, upna taktak tawh ki phal in piakkhiat na zahzah manpha ka sa hi. 

31.Leitung buppi ah ki tungnun tuh na tawh piakkhiat gamtatna te nakpi tak in ka nial hi. 

32.Kei nong piak te uh zong nong upna taktak uh tawh piakkhiatna taktak a siangtho bek ka deih hi. 

33.Thumaan lo gamtatna tawh na u na nau, na nu na pa mi khempeuh tungah, mawhna zong in a simmawh te in naak neilo tuikhuk tawh ki bang hi.

34.Ka bawlsa nuntaakna a nei a neilo te khempeuh kei maa it bang in it in keem in na zang ding uh hi. 

35.Kei maa kiang pan a paikhia numei te in singbul sel tawh ki bang hi. 

36.Ta pasal te in zung nei lo tawh ki bang hi. 

NUNTAAKNA THU SIANGTHO (99) 

Midik vawh khaici sia in huut ngei lo 

1. Thumaan thutang zang lo in itna leh hehpih na a nei lo, vantung kong thuhilh na te tawh ki leh bulh zuih khialh na in na gal lian penpen a hihi. 

2. Tua a hih mah bang in ka thupha khempeuh khak tan aa, ka nasepna te nial in khuamial sung ah a om tawh ki bang hi. 

3. Kong thupiak te khempeuh thumaan tak tawh nong zui ding uh hi. Midik mi-in a vawh khaici sia in huut ngei lo hi. 

4. Tua mah bang in kong thupiak te na zuih khialh loh na ding un, na ngaihsun tawntung ding uh hi. 

5. Khaici manpha te in kung limci in gui zaam aa gahtam a neih mah bang in kei hong um ka thupha piak mi thumaan gamtatna a nei mi te in man nei tawntung ding ka thupha piak suan leh khak minam in piang tawntung ding aa, a etlawm pen tawh nuntaakna a nei ding hi. 

6. Mawh maisak na a nei te tungah thumaan na leh hehpihna na hih mah bang in, lapsangna na ngah ding hi. 

7. Itna tawh na a sem te in huhna na ngah ding uh aa hehpih na tawh maa a pang te in a suakta tawntung thupha na ngah ding uh hi. Tua a hih mah bang in kei mah tawh a nungta khawm tawntung ding uh hi. 

8. Nenniam na tawh ki pelh in gentheih na om nawnlo suahtaak na tawh zawhna piang in, sih theih nawn loh tawntung nuntaakna tawh ih om khawm ding hi. Lapsaang na in thupha namcin tawh hong hing sak hi. 

9. Vangliat na sung aa om mi te in a kip tawntung ka Tapa Pau Cin Hau manphatna na ngah ding uh hi. 

10.Bang hang hiam na cih uh leh a ki khihcip nuntaakna na thuak laitak un, kei-in kong itna tawh hong om pih in haksatna pan kong khak khia hi. Tua a hih man in kong it mi te in itna thupha khaici manpha te a hihi. 

11.A manpha khaici vawh te in na sia ngei kei ding uh aa, siatna leh mawhna bei in midik mipha na suak ding uh hi. 12.Hih kong piak thupha te khempeuh keem in na zang thei ding uh hi. 

13.Bang hang hiam na cih uh leh itna thupha khaici manpha te a susia dingin dawi mangpa nasepna galhiam ki liatsak na leh nenniam na hong lut loh na ding in hun na neih khempeuh uh ap in nong phawk tawntung ding uh hi.

NUNTAAKNA THU SIANGTHO (100) 

A gilkial mi te honkhia un 

1. Vantungmi vantung galkap te huhna leh hehpih na te hang in suakta in nuntaak tawntung na huang sungah om khin na pi mawhna a maisak lo mi mawhna te ciamteh aa mawhna leibaa a siikkik mi a nuntaakna uh a tuancil mi te in vantungmi vantung galkap te huhna hehpih na a ngah kei ding hi. 

2. Vantungmi vantung galkap te huh na hehpihna a ngah lo, mawhna a maisak zolo, hehpih na a nei lo dawi mangpa khaici te in a mau leh a mau a ki humcip a hi uh hi. 

3. Tua a hih mah bang in thupha kong piaksa te khempeuh keem un la, zahtaak na tawh na it ding uh hi. 

4. Kong piaksa thupha leh manphat na te ki dem na leh deidan na tawh na zang kei ding uh hi. Lungsim hoih lo gamtatna te ka nial hi. 

5. Tua a hih mah bang in itna thupha kong piak khempeuh a nei ka tate aw, dangtaak in a gilkial mi te honkhia un la, kong piak thupha te khempeuh tawh tawldam sak un. Hong paipih in kei hong tel sak un. 

6. No te mah bang in gilkial na leh dangtaak na a nei mi te khempeuh, nuntaak thak na huang sungah koih in minam khat ih suak ding hi. 

7. Ei vantung minam te in tawldam hithiat in nuntaak tawntung na kisapna om loh na mun ah kei tawh ih mang khawm ding hi.

NUNTAAKNA THU SIANGTHO (101) 

Kha siangtho galhiam tawh zo ding 

1. Vantungmi te in tha khat thu in mun khempeuh pailet in theih na leh muh na nei aa, vantung galka te in tha khat thu in sep zawhna a nei uh hi. 

2. A mau te ka piak vangliat na in vantung nuntaakna a ki cing a hihi. 

3. Note in zong kong hilh bangin hong zui unla, kong gen bang in hong um un. Kong lah na te khempeuh tel un. 

4. Kong sinsak na te ngaihsun un la ,vantung mi te zawh bang in note in zong, khasiangtho galhiam tawh zo in maa ih pang khawm ding hi. 

5. No te in leitung ah ka min hong phat ding vantungmi thuciam bangin vantung lungdam na thu tawh lei leh van uk in ihzo ding hi. 

6. Kong piak vantung thu siangtho sim loh a dang ngaihsut na leh gamtatna na zangh kha kei ding uh hi. 

7. Phatakpi-in um aa a hong zui mi te in vantungmi te pilna tawh a zo ding na hi uh hi. 

8. Khasiangtho mittang tawh na muh kholh mah bang un, taksa tawh mu in hong piang ding aa, na lawng ding hi.

9. Khasiangtho teltak in hong hilh kholh na te nuam na leh ki paakna tawh thupha pia in la, leitung ah hong piang ding thalawh na te nisim in maitai na tawh maipha pia in na dawn khol ding uh hi. 

10.Khasiangtho lamkaih na te nuam in a lungdam mi khempeuh in thupha hawm na a ngah ding uhhi. 

11.Khasiangtho thupha hawm na a nial te in vantungmi vantung galkap te thupha hawm na te khak tan in, dawi mangpa lungsim galhiam te a hihi. 

12.Tua bang mi gilo te in kei tawh ki gamla in khasiangtho in a lawng ngei kei ding uh aa, vantungmi vantung galkap te in zang lo in a mau te ka mu ngei kei ding hi. 

13.Tu in khasiangtho hilhna thupha hawm na te ah a namtui tawh piak khiat na a ngah ding a siangtho pen tawh thukim pih na in leitung ah taksa pumpi manphat na a namtui pen thupha piak na a hihi. 

14.A namtui pen thupha piak na in no te hong etlawm sak in na manphat na uh vantung piakkhiat na ka Tapa thaman a hihi. 

15.Ka anglai zang pan aa luangsuk ka nuntaakna tui tawh ka tapa ii a namtui pen thupha piak na in, kei maa mai ah a etlawm pen leh anam tui pen thupha piak na a hihi. 

16.Khasiangtho ki pholaak in khasiangtho in a sap te khempeuh vantungmi te piak khiat na, ci leh sa tawh lawng in na ngah ding uh hi. 

17.Khasiangtho in it in a kaih khop minam a namtui misiangtho innkuan te nopna sungah hong sam a hih man in, khasiangtho na ki lawngsak ding uh hi. 

18.Khasiangtho in nang hong deih in nang hong zang nuam hi. Hong zatnop zah ki phal in la, maitai na leh maipha pia ta in. 

19.Khasiangtho ki pholaak in a laam mi te in vantungmi te bawlsa taksa pumpi pahtawi in na Pa Pasian hong phat na hi uh hi. 

20.Khasiangtho minphat na te nial in na khaktan kei ding uh hi. 

21.Khasiangtho thumaan gamtatna te nial in na khaktan kei ding uh hi. 

22.Khasiangtho thumaan gamtatna te susia in na nin sak kei ding uh hi. 

23.Khasiangtho ki pholaak na leh vaikuan na te nuam in a ging thei na khempeuh tawh, ka min nong phat ding uh hi. 24.Khasiangtho in a dipnop a hawm khempeuh dim sak un la, khasiangtho zawhna a hong pian khit ciang in ka Tapa Pau Cin Hau thaman, vantungmi te pilna khawk khen khat na ngah ding uh aa, tua in vantung thaman kei maa nasepna a hihi. 

25.Vantungmi te pilna khawk khen khat na ngah ciang un, khasiangtho daikaih na, khasiangtho ki pholaak na tawh vantung thupha vantung pilna hong hilh in zogam khamkhua pi ka piangsak ding hi. 

26.Tua ni ciangin mi dang te in khamtung gam leitang khut pham khat la in a gam ah ciah pih leh zong nuntaak nopsak na a ngah zo lai ding uh hi. 

27.Bang hang hiam na cih uh leh khasiangtho thumaan gamtatna ki pholaak lo in, leitung ah ki-itna hong piang zolo ding aa, khasiangtho thupha hawm na lungdam in, a nuntaak pih te kiangah nopsak na a ngah ding uh hi. 

28.No te sung aa om khasiangtho ka hopih ciangin khasiangtho in taksa pumpi hilh in hong gen aa, no leitung mihing te in ngaihsut khentat theih na nei in khasiangtho in hong lam kaih hi. 

29.Kei maa thupiak khasiangtho thumaan gamtatna a nial te in kei hong nial a hi uh aa, ka nasepna te susia in ka lamkhak te a hihi. 

30.Kei maa nasepna te a khaktan te in vantung thu hilhna a thuak ding uh hi. 

31.Khasiangtho hilhna te kheem na, bawlsiat na, thaangbawl na, deih bawl na leh huaiham na tawh zangh in na gen khial kei ding uh hi. 

32.Thu maanlo gamtat pula’ak khiat na in git loh na a lian galhiam dawi mangpa nasepna a hihi. 

NUNTAAKNA THU SIANGTHO (102) 

Vantungmi ci leh sa suahna 

1. Kei maa mi pawl kei maa minam, vantungmi suan leh khak leitung mihing te aw, no te in vantungmi suan leh khak taktak na hih na uh a hong hilh dingin nuntaak thak na sungah ka Tapa Pau Cin Hau leitung ah sawl in kong paisak hi. 

2. Ei vantungmi te ih hih na ka tapa Pau Cin Hau vantung lai kong piasak hi. 

3. Vantung lai in vantung minam taktak na hih na uh leh vantung innkuan taktak na hih na thu, ka Tapa Pau Cin Hau vantung innkuan suahna a sem, a piangsak ding in a hong pai hi. 

4. Tua a hih man in vantung lai-in lei leh van ah ka bawlsa uk zawh na ding vantungmi ci leh sa taktak hih na misiangtho taktak suahna leh dawi mangpa leh dawi gilo te ii a hong bawlsiat theih loh na dingin ka ta taktak na hih na leh kong neih na a hong pia ka hihi. 

5. Kei maa vantung lai in nin leh siang ka khen na hong um taktak mi te vantungmi ci leh sa kong suah sak na thu piakna lai a hihi. 

6. Tua a hih man in kei maa minam kei maa mi pawl te bawlsiat na leh suksiat na kua mah in pia theilo ding a pai na lampi kua mah in khaktan thei loding hi. 

NUNTAAKNA THU SIANGTHO (103) 

Ka Tapa lim leh meel 

1. Ka min nongphat na ding un minphat na Zum innpi na lam ding hi. 

2. Kei-in na khempeuh piangsak in a bawl na Pa Pasian, thupi leh a lamdang mahmah in lian hi, ci-in nong phawk tanwtung na ding un, ka bawlsa nitaang sangin lian zaw aa, lamdang taanna leh lamdang hoih na khempeuh tawh, manpha hi ci-in vantung minphat na innpi ni suah na lam nga in deih hong ngen sak ka hihi. 

3. Minphat na innpi dei thum na phasak ding uhhi. 

4. Ka minphat na thuzui mi te om na, minphat dawl tungnung te om na, kei maa minphat na tau, deihnget na tau sang dawl khat, gah leh teh tawh piak khiat minphat na tausang, kei maa mi suahna ka nuntaakna tui phatna tausaang dei thum in na bawl ding hi. 

5. Ka minphat na innpi ka Tapa Pau Cin Hau liim le meel tausaang tungah a etlawm pen leh paak hoih a namtui te tawh ka minphatna nong bawl ding uh hi. 

6. Ka minphat na innpi sungah zingtung a masa penpen lungsim piak khiat na, deih nget na leh minphat na nong bawl tawntung ding uh hi. 

7. Vantung minphat na la te tawh ka min nong phat ding uh aa, deih nget na te nuam tak in na zang ding uh hi. 

8. Vantung nasem vantungmi lai-at te in deih nong nget na te uh leh ka min nong phatna te uh khasiangtho ki ko na te puak in a hong gen tawntung hi. 

9. Ka innpi sungah khasiangtho in nakpi tak in ka min hong phat nuam a hih man in lungdam kipaak in ka min nong phat ding uh hi. 

10.Khasiangtho lungdam in deih hong nget te uh no te ki phalna zahzah vantung mi li hong koh te dawng in piakkhiat na kong nei hi. 

11.Tua a hih man in deih nong nget uh ciangin ka innpi ah pai in hong ngen un. 

12.Minphat na tausaang ah pai-in phatna nong nei ding uh hi. 

13.Minphat na innpi in vantung lungdam na, thu tangko na innpi, lungsim vangik pua aa om mi te tawldam na innpi, kei maa kiang zuan in nong hopih na innpi, kei maa misiangtho suahna minphat na innpi, no te leh kei ki zopna minphat na innpi, vantung ka thupha piakna leh ka thupha hawm na khasiangtho thupha piak na innpi, haksatna lamkhak na a thuak mi te suahtaak na, vantung minphat na innpi lian a hihi. 

14.Kei sim loh na vangik suah khia in tawldam na hong pia kua mah a om kei hi. 

15.No te nong upna uh innkuan na ki-itna uh unau sak aa, lungsim ki tuak in deih nong uh ciang in vantung lungdam na thu minphat in, ka nuntaakna tui tawh ap in deih nong ngen ding uh hi. 

16.Ka nuntaakna tui tawh hong ki ap te in kei maa nuntaakna tawh thak suah na, no te aa ding ka zawh na, no te belh ding a muan huai pen ka suahna hi aa phatna te za in, deihnget na te dawng in ka sem ding hi. 

17.Kei maa nuntaakna tui a dawn mi-in dahna linna leh launa na nei kei ta un. 

18.Upna taktak tawh dawn aa a ki ap mi-in nong nget na te uh saang in, suahkik hotkhiatna na ngah uh hi. 

19.Suahkik hotkhiat na a ngah ka tate in van leh lei na khempeuh a piangsak, vantung kumpi a lian bel innkuan minam suahna ding a hihi. 

20.Kei maa mi pawl kei maa minam te in ka Tapa lim leh meel tawh na om khawm tawntung ding uh hi. 

21.Ka Tapa lim leh meel tawh a om khawm te in ka Tapa upna taktak tawh upna thumaan gamtatna nei ta un. 

22.Upna thumaan gamtatna tawh kei hong um mi te ka vangliat na tawh cing in, ka keem tawntung ding hi. 

23.Kei hong um mite in kei leh ka Tapa tawh ki zom tawntung aa, vantungmi te tawh innkuan khat ih hihi. 

24.Vantung Siangsawn nuntaakna lampi zong nang maa neihsa suak in na pulak zah vantung nasepna piang ding hi. 25.Ka Tapa Pau Cin Hau in no te hong thei tawntung aa no te a hong lawng a hihi.

NUNTAAKNA THU SIANGTHO (104) 

Nuntaakna khempeuh a dim ding 

1. Tu in taksa teen na inn kei mah tawh kizop tawntung na dingin misiangtho kumpi pa ka Tapa Pau Cin Hau lim leh meel suang in min phatna tausang te na bawl ding uh aa vantungmi na sam ding uh hi. 

2. Bang hang hiam na cih uh leh no te teen na inn sungah a ki sam van leh nuntaakna khempeuh a dim dingin khasiangtho leh vantungmi nasepna a hihi. 

3. Vantungmi-in a ki pulaak gamtatna leh ngaihsut na te khempeuh hong ko in ki zopna hong bawl den hi. 

4. Khasiangtho in taksa teen na gam puah in zuun ding, a maa vantung nasepna hihi. 

5. Khasiangtho in taksa pumpi gamtatna leh upna ki gawm khawm in sepkhiat minphat piakkhiat na, a ki sam zah deih tawntung hi. 

6. Ka min hong phat te in ka deihna bang in nong phat ding uh hi. 

NUNTAAKNA THU SIANGTHO (105) 

Ka Tapa hotkhiat na lo tawh 

1. Kei leh ka Tapa Pau Cin Hau lo tawh hoihna leh nopsakna na ngah zo kei ding uh aa hong tawi sang leh hong laamsang kua mah a om kei hi. 

2. No te in kei maa sungah nungta in nuamsa aa tawldamna na ngah uh ciangun, kei leh ka Tapa nuam in hong pahtawi ka hihi. 

3. A maa nuntaakna lungtaang taktak na up ni uh ciangin, na pumpi leh ka bawlsa na te khempeuh, vantungmi vantung galkap te a manpha in na zang thei ding uh hi. 

4. Tua a hih man in no te in kong itna tel un la, ka Tapa phawk tawntung un. 

5. Ka Tapa Pau Cin Hau manphat na hang in lei leh van ka thupha, vantung gamnuam Siangsawn tawntung nuntaakna ka hong nei sak ding hi. 

6. Bang hang hiam na cih uh leh ka nuntaakna leh khaa pumpi hong pia ka hih man in, ka bawlsa na khempeuh nei in uk theih na thu leh vantung Siangsawn gamnuam no te aa dingin ka bawl a hihi. 

7. Tua a hih man in ka Tapa in no te a ding kua hi ding hiam? 

8. Ka tapa Pau Cin Hau in a maa vantung khasiangtho tawh no leitung mihing khaa pumpi vanmisiangtho, vantung nasepna thu om zawh tawntung na ding, vantung sawltaak pi nasepna ka zo sak hi. 

9. Leitung mihing te suahkik hotkhiat na thu a hong pia dingin, leitung ah vantung suan leh khak minam te kong honkhia sak hi. Hotkhiat na thu om kei leh suahkik na thu na ngah kei ding uh hi. 

10.Kei maa lim leh meel khaa pumpi in kei maa kiang ciah kik na thu na ngah theih na ding un, ka Tapa Pau Cin Hau hotkhiat na suahkik na lo tawh ka gamnuam na tung zo kei ding uh hi. 

11.Suah kik hotkhiat na pian leh khan a kikhek sak ka tapa Pau Cin Hau in nuntaak thak na sungah a om mi te aa ding in a muanhuai na belh ding innpi a hih na thu na phawk tawntung ding uhhi. 

12.Ka Tapa itna a phawk mi te khempeuh in vantungmi suak kik in vantung minam lian te na hi ding uh aa, van misiangtho na suah ni uh ciangin kei maa kiang pan taksa teenna gam suahkik hotkhiat na tawh uk in vantung nasepna ih zo ding hi. 

13.Tua a hih man in ka Tapa in no te lam hong hilh hong leen in hong kai aa, a tuuk mi te hong phong in, a ih mu mi te hong tho sak aa, a tuantual mi te hong zawh pih ka Tapa misiangtho kumpipa a hihi. 

14.No te nuntaakna in ka Tapa nuntaakna sungah ka koih khin zo hi. A mah in kei maa kiang ciah na ding, suahkik hotkhiat na hong pia pa hi.

NUNTAAKNA THU SIANGTHO (106) 

Lei leh van kong hong ka Tapa 

1. Leitung ah ka Tapa Pau Cin Hau hong pai maa in ka bawlsa mihing te khempeuh dawi mangpa in bawlsiat na leh ukcip na tawh no te pumpi leh mihing ganhing a ki pan nuntaakna a nei a neilo, a mau te biakpiak na dingin hong nei sak uh hi. 

2. Dawi te in mihing te tawh biakpiak na, ganhing tawh biakpiak na, leitung aa om khempeuh leh singkung lopa tawh biakpiak na mihing khat leh khat ki ukcip biakpiak na te hong nei sak uh hi. 

3. Dawi mangpa bawlsiat na a thuak leitung mihing te honkhia ding in ka Tapa Pau Cin Hau leitung ah ka thu hilh in kong sawl hi. A mah in dawi biakna nam (68) te pan hong hon khia vantungmi suahkik na, nuntaak thak na hong pia ka Tapa Pau Cin Hau a hihi. 

4. Ka Tapa nuntaakna hong pia kei leng kua mah in suahtaak na, vantung minam suah na, suah kik hotkhiat na na ngah zo kei ding uh hi. 

5. Ka-ang laizang sungah a luang suk, vantung Siangsawn ka nuntaakna tui hong pia in, no te a siangtho a ki khek nuntaakna sungah a hong koih ka Tapa Pau Cin Hau a hihi. Ka Tapa a umlo mi te in a mau ki samsia in a ki tuancil te a hi uh hi. 

6. Tua bang aa pumpi a bawlsia mi te in vantung thu hilh na piangin haksatna a thuak ding uh hi. 

7. Ka Tapa in kei maa ta’ang aa nasem vantungmi pa lei leh van uk in pian leh khan ki khek sak kei maa manphat na te tawh hong nungta sak ka Tapa Pau Cin Hau misiangtho kumpipa nuntaakna a hihi. 

8. Tua a hih mah bangin deih nong nget uh ciangin ka Tapa Pau Cin Hau min tawh deihngen in ka min nong phat ding uh hi. 

9. Ka Tapa Pau Cin Hau min tawh deihngen in vantung phatna la te tawh ka min hong phat aa, nuam in a lungdam tawntung te nong ki ko na uh kong dawng ding aa, deih nong nget te khempeuh uh ka sem ding hi. 

10.Ka Tapa min tawh na sep te khempeuh uh kua mah in khaktan in a bawlsia zo kei ding uh hi.. A mah in na hun te hong ngak in na masuan hong zawhpih hi. 

11.Ka Tapa in vantung pilna leh vantung siangsawn nuntaakna tui hong pia in kei hong tel sak aa, kei maa mi pawl kei maa minam, vantung Siangsawn minam hong suak sak hi. 

12.Mawh nei mi khempeuh hong honkhia in mawhna ki sik kik na taktak a nei nin bang aa kihhuai mi te, mawhmai na hong pia in tawldam na zong hong pia ka Tapa a hihi. 

13.Ka Tapa Pau Cin Hau sep te khempeuh kei maa nasep a hi aa, kei maa nasep te khempeuh ka Tapa sep a hihi. 

14.A mah in vantungmi te hoihna tawh hong zeem in vantung manphat na tawh hong puah aa, vantung ka thu pha tawh man hong nei sak, a mah a um taktak mi te tungah ki itna thupha hong pia sak ka hihi. 

15.A mah in hehpih na leh itna a ki cing mawh maisak pa leh a hong tawi saang vantung thupha tawh nuntaak na hong pia, vantung lungdam na thu tangko, ka na sem pa a hihi. A mah in kei maa nuntaakna tawh piang in lei leh van kong hong ka Tapa Pau Cin Hau a hihi.

NUNTAAKNA THU SIANGTHO (107) 

Nisim in a masa pen ki zopna 

1. Tate aw, kong piaksa no te pumpi it in keem ta un. Na pumpi uh na bawlsia kei un. Na bawlsiat uh leh mawh na hi. 

2. Tua mah bang in no te pumpi in cih takna neilo lungsim leh thumaan gamtatna nei lo lungsim tawh bawlsia in na khem kei ding uh aa, na nu na pa, na u na nau, mi khempeuh gamtat hoihlo tawh mawhna zong in na simmawh kei ding uh hi. 

3. Thumaan lo ta’ang in na pang kei ding uh aa, na pumpi leh mi khempeuh gal dingin na om kei ding uh hi. 

4. Leitung mihing te mawhna zong in mi te gal leh lamkhak na te na sem kei ding uh hi. 

5. A ki humcip a ki meekcip te honkhia un. Haksat na thuak mi te tawldam sak un. 

6. Lungsim vangik pua aa haksat na a thuak mi te kei leh ka Tapa Pau Cin Hau min tawh honkhia unla, tawldam na huang sungah koih un. 

7. Kei maa min tawh thupha vawh mi te a huh ding thuh kik na Pasian ka hihi. Mi khempeuh tungah lungdam na pia un. 8. Kei maa min tawh duhhop na huaiham na lungsim nei in dawi mangpa deihna tawh mi te khem in, ka min nong suang kei ding uh hi. 

9. Tua bang mah in kei maa min tawh ki neih khem in mi te tungah zang khial in, ka min nong suang kei ding uh hi. 10.Dawi mangpa deihna tawh ki neih khem in ka min hong suang mi khempeuh tungah cikmah hun in no te kong thei ngei kei ding hi. 

11.Dawi mangpa in dah luat na, nuam luat na, a khengval ngaihsut na leh gamtatna tawh uk in mihing te hong zol aa hong khe’em hi. 

12.Tua a hih man in no te hong khem theih loh na dingin nisim in kizopna, piakkhiat na a masa pen nong nei ding uh aa, nisim in ka min nong phat tawntung ding uh hi.

NUNTAAKNA THU SIANGTHO (108) 

Lungsim guh nat na 

1. Leitung na nuntaak hun sung mi te heh na ding leh khasiat na dingin na aw na kam zang kei in. 

2. A gingkhia kammal tawh kua mah khempeuh tungah simmawh in lungsim guh natna pia kei in. 

3. A pusuak kammal lungsim guh natna a piang zahzah, nang maa tungah hong tung kik teitei ding hi. 

4. Lungsim guh natna na piak zahzah a kih taak huai pen na gal lianpi a hong piang ding hi. 

5. Tua a hih man in ka bawlsa mihing khempeuh leh ka bawlsa na khempeuh tungah, gensia in na ko kei ding uh hi. 

6. Na kamsung pan a paikhia ki liatsak na kammal mi te aa ding in guh natna a piangsak, dawi mangpa deihna tawh ki pawl gensiat na te na zang kei ding uh hi. 

7. Nang maa kamsung pan a pusuak kammal tawh mi khat leh khat kisiat na, a pusuak gitloh na kammal gu a suak zah khempeuh nang maa kiang hong tung kik teitei ding hi. 

8. Gu a suak zah na tu khang, na ta khang dongin hong piang ding hi. 

9. Tua a hih mah bangin mi khempeuh tungah, guh natna lungsim kua mah khempeuh in na pia kei ding uh hi. 

10.Mi khempeuh simmawh gensiat na in, nangmaa tungah na vawh bangin hong tuh kik tektek ding uhhi. 

11.A hong tuh khaici te in nang maa thaman a gah hong hi ding hi. 

12.Tua a hih mah bang in lamkhial mi te hilh unla, a theilo mi te tel sak un. 

13.A ki tawng mi te khen unla, a gim mi te tawldam na pia un. 

14.An duh gilkial mi te na vaak un la, silh ding neilo te tungah pia khia in a mau te huh in pan pih un. 

15.Ka thu zui mi khempeuh in kei maa min tawh a ging khia kammal, a ki mu thei gamtatna tawh thupha na bawl tawntung ding uh hi.

NUNTAAKNA THU SIANGTHO (109) 

A tamzaw lungdam na 

1. Vantung thu siangtho a zui Siangsawn ka pawlpi te in, nuam na sak laitak in hong phawk unla, ka min phatna hong bawl un. 

2. Haksatna na thuak laitak un zong ka min nongphat ding uh aa, na haksat na te uh nong ko ding uh hi. 

3. Kei tung aa hong ki ap mi te ka huh tawntung ding aa, lungdam na hong ko te zong huh in ka panpih ding hi. 

4. Deih hong nget te zong a mau te hong phawk na zah in ka huh ding hi. 

5. Na nek na dawn aa ki pan kong piakkhiat sa te lim takpi in na it ding uhhi. 

6. Kong piakkhiat sa ka thupha na ngah te uh mi khempeuh tungah ki sial in, ki liatsak na leh hazatna na zang kei ding uh hi. 

7. Thupha tawh kong piakkhiat sa te nang bek ii theih ding sangin, a tamzaw lungdam na ding ka deih zaw hi. 

8. Bang hang hiam na cih uh leh leitung mihing te in kei maa sungpan a piang, vantungmi te suan leh khak minam te na hih mah bang un, kong piakkhiat sa na khempeuh te tawh a lungdam khawm dingin ka deih hi. 

9. Kong thupha piaksa khempeuh tawh nuamsa in ki tungnun tuh na leh ki liatsakna na zang kei ding uh aa, neihsa tawh kha thahop na, thupha piak na, lungdam koh na, thu tangko na, innkuan nuam suahna ka deih hi. 

10.Na pumpi leh ka bawlsa a om na khempeuh zahtaak na tawh it in keem ta un. 

11.Kei mah na Pa Pasian om ka hih mah bangin na khempeuh a om hi. 

12.Kei simloh kua mah in piansak na leh nuntaakna a nei kei uh hi. 

13.Tate aw, ka bawlsa na te zattheih na ding thu kong piak mah bang in uk in a nei thei na hi uh hi. 

14.Uk aa neih theih na thu kong piak mah bangin ka it te na it ding uh hi. 

NUNTAAKNA THU SIANGTHO (110) 

Vantung pilna ngah ding 

1. Vantungmi te in ka bawlsa na khempeuh pailet in tel in a thei uh hi. 

2. A mau te in a khauh mahmah tawh zawhna lamdang te a neih mah bangun, a neem penpen tawh zong zawhna lamdang te a nei uh hi. 

3. Vantung vangliat na lamdang te khempeuh te pua in a zo vantungmi te a hi uh hi. 

4. Kong hilh kong lahsa thute khempeuh phatak pi-in hong zui un. 

5. Vantungmi te pilna te in vantung nasepna a piangkhia sak kei mah na Pa Pasian ka hihi. 

6. Leitung mihing te pilna leh vantungmi te pilna ki gamla a hih hangin, no leitung mihing te in zong ka thu pha takpi-in hong zui le uh cin vantung pilna na ngah ding uh hi.

NUNTAAKNA THU SIANGTHO (111) 

No te thuak na hilo in kei maa aa’ 

1. Leitung aa om ka nasem ka sawltaak te in kei maa thupiak na bangin ka thu um in, nasem tawntung ding uh hi. 

2. Kei maa min tawh gilkial dangtaak na dahna na haksat na nam khempeuh na thuak laitak un, leitung mihing te aa ding nuntaak nopsak na a hong pian na dingin kalsuan na a hihi. 

3. Tua hun laitak kei tawh a om khawm na hi zaw uh aa, simmawh na leh bawlsiatna na thuak laitak, no te thuak na hi lo in kei maa aa a hihi. 

4. Tua hun ciang in kei maa nasepna te hong piang ding aa kei nong ngak ding uh hi. 

5. Kei maa min tawh nasem khempeuh in mi khempeuh mawhna maisak in haksatna na thuak laitak in zong, ka min nong phat ding uh hi. 

6. Ka min tawh thupha na bawl ding uh hi. 

7. Ka Tapa Pau Cin Hau in kei maa ta’ang aa nasem pa a hihi. 

8. No te in kong sawl mah bangin leitung hun na zawh mateng uh pha takpi-in na zo ding uh hi. 

9. Kei maa nasem te kua mah in susia in a bawlsia zo kei ding hi. 

10.Kei maa nasem te a susia a bawlsia teitei te in na om na leh na pai na a kip ngei kei ding hi. 

11.Vantung nasepna a susia te in na tu na ta khang dongin khua a mial ding aa, suahtaak na leh hotkhiat na hong pia kua mah a om kei ding hi. 

12.Kei hong upna a zawngkhal sak te in ka thunial ka nasepna lamkhak te a hih man in dawi khut sung tung ding hi. 13.Mi sih na ding leh siatna ding na na sem kei ding uh hi. 

14.Ka thusem te in leitung ah kong hilh bang in na sem ding uh hi. 

15.Kei nong mangngilh hun uh a tun ciangin ke’n no te zong in kong mu kei ding aa, itna a bei sak te in kei hong nial a hi ding hi. 

16.Kei hong nial ka lam hong khak te in a si tawh a ki bang hi. 

17.Upna pan a tai khia, a tai mang muan na neilo inn mang te in vantung innpi neilo in nu leh pa nei lo tawh ki bang hi. 18.A mangthang khaici te in a ki hahlo ankung te leh vui leh gah a nei zolo ankung te tawh ki bang hi. 

19.Hong um na pi-in muan na a neilo upna neu lungsim kip neilo te in a nuntaak pih innkuan leh sanggam nei lo tawh ki bangin tua bang minam dang upna neu te vantung nasepna vantungmi te huh na om thei lo ding aa, itna thaman neilo thaman tawm a hi ding uh hi. 

20.Kei leh vantungmi te tawh kizop na itna innkuan pan a paikhia man a nei zolo te in a nuntaakna uh bawlsia in a beisak tawh ki bang aa mawh nei mi a suak ding uh hi. 

21.Tua a hih man in nuntaakna lampi, hin tawntung na lampi zui un la, nuntaakna neu upna neilo thaman a omlo kei mah tawh ki pelh te gamtatna na zui kei ding uh hi. 

22.A huut khaici te in tang nei zolo, thaman nei lo a hihi. 

23.Siatna in guta bang in a hong pai ding aa, dawi mangpa in mihing nuntaakna susia ding leh beisak ding in na lungsim hong gu in, midik suahna pan na hun leh na nuntaakna a bei ding hi. 

24.Dikna in ni suak bangin om ding aa, a mial ngeilo a taang tawntung nopsak na hi ding hi.

NUNTAAKNA THU SIANGTHO (112) 

Vantung thaman a nei zolo mi te 

1. Tu in tate aw, leitung ah ka minphat dingin a hong paisak ka hihi. 

2. Na pumpi uh leh ka nuntaakna kong piak mah bangin ka min hong phat nuamlo te leh sepkhiat gamtatna a nei zolo thadah te in mi mawh mi a hihi. 

3. A ki mu khia gamtatna tawh upna a nei lo mi-in, a si tawh ki bang hi. 

4. Thaman neilo upna si te in a mangthang khaici te a hihi. 

5. Mannei zolo upna si te in khasiangtho lamkhak te na hi uh aa, khasiangtho lungkim loh na vantung thu hilh na lianpi a thuak ding uh hi. 

6. Khasiangtho lungkim sak lo te in a nuntaakna uh leh a pai na lampi kip ngei lo in, tawntung gimna a thuak ding uh hi. 7. Khasiangtho minphat na a nei mite nial in nopsak na huanpi sungah pai na ding khak tan aa, vantung thu piak na khaktan in suksiat na a nei mite tuiduh dangtaak in kial na tawh ki dim ding hi. 

8. Khasiangtho lungdam na nuntaakna sungah a om mi te susia in a bawl sia mi te in, a ki phel khia zo nawnlo mawhna lianpi a hihi. 

9. Thumaan gamtatna tawh khasiangtho lamhilh aa ka minphat na a nei mi khempeuh , kei maa it ei vantung minam te ih hi aa no te tawh a om khawm ih hihi. 

10.Ka min hong phat kei hong um mi te suksiat na leh bawlsiat na a nei mi te in a tu a ta khang dong in a mawh na uh a phel ding kua mah a om kei ding hi. 

11.Tua bang mi mawh te in thei na pi hong nial te a hihi. 

12.A mawhna thei na pi seel in mawhna tawh a ki ciam te in mong nei lo haksat na gim tawntung na sungah om in, a lungsim a nuntaakna in khuamial tawh ki bang ding hi. 

13.Vantung nuntaakna thu siangtho um in a zui mi te khempeuh tungah, khuavaak in a taang tawntung ding hi. 14.Vantung nuntaakna thu siangtho kammal, tawntung nuntaakna leh lungdam na susia in mal khat tah khat zong na gen khial kei ding uh hi. 

15.Vantung kammal te in na khempeuh piang sak in ka ukna hi aa vantung thu siangtho kammal khat zong deih bawl in, up khailh na tawh na zang khial kei ding uh hi. 

16.Tua a hih mah bangin no te kampau khempeuh zong za in mal khat na ngawn zong dawng in ka hong saang hi. 17.No te vantung thuciam kammal tham lo, upna taktak tawh lungsim khentat aa gamtat piak na zong ciamteh in huh na leh piakhiat na, vantung thaman kong sang sak hi. 

18.Tua a hih man in tate aw, vantung thaman nei zolo mimawh, mi nin upna a siangtho lo te tawh na om khawm kei ding uh hi.

NUNTAAKNA THU SIANGTHO (113) 

Pumpi a siasak thei zu 

1. Vantung gamnuam kei maa kiang a hong tung lo kha gilo te in, no te hong haza in na lungsim uh a lal tha’ang na ding leh na lau theih na ding a ging thei na khempeuh tawh hong kheem aa, na nuntaakna uh susia ding in guta bangin a hong pai hi. 

2. Kha gilo te in na lungsim te uh hong kheem aa thadah na, ngaihsut ki kim lo lungsim gitloh na tawh bawl siat na hong nei uh hi. 

3. Dawi te in mihing te thupha ngah na ding khak tan in gualnop luat nop na lungsim hong guan aa thadah na tawh hong bawlsia hi. 

4. Kei maa mai ah a man neilo mimawh mi na suah na dingun, nisim in mawhna hong zong hi. 

5. Leitung mihing te dawi mangpa in mawh hong zon laitak upna lampial mi te Pasian thukhaam manglo hi ci-in hong bawlsia aa, no te khuamial na gam na tung uh hi. 

6. Tate aw, thadah na in dawi mangpa hong kheem na hong zol na te hi aa na lungsim uh a bei na ding leh a lal na ding in dawi mangpa tawh ki pawl gualnop na te ah na pai kei ding uh hi. 

7. Dawi mangpa nasepna te nial in kei tawh nong ki zom tawntung ding uh hi. kei tawh a ki leh bulh gamtatna, ngaihsut na leh ki liatsak na te na zang kei ding uh hi. 

8. Dawi te in nisim gamtatna leh na nek na dawn khempeuh tungah, gu suaksak nuam in no te mawhna hong zongzong hi. 

9. No te ki vaak na ding kong piaksa an te zu suak sak aa, ne in na kham uh ciang in na kamsung pan a paikhia ki liatsak na kammal te dawi mangpa deihna a hih man in ka nial hi. 

10.Tua a hih man in pumpi a siasak thei zu pan ki pan guihtheih khamtheih khempeuh in vantung thu kham a hihi.

NUNTAAKNA THU SIANGTHO (114) 

Misiangtho khat bek om na ah 

1. Khemna tawh gamtat sak na in gu pia tawh ki bang hi. 

2. Tua a hih man in zuau thu na gen kei ding uh aa, mi na khem kei ding uh hi. Gu pia in a bawlsia na hi uh hi. 

3. A mau te pai na ding lam khak in a nuntaakna uh a bawlsia a lamkhak na hi ding uh hi. 

4. A tawp na ciangin thu maanlo gamtatna te in nang hong khem kik ding aa, sih na gim tawntung na sungah na om ding uh hi. 

5. Leitung ah na om lai hun sung un mi bawlsia in lungsim ki lehbulh theih na ding khat leh khat tungah thu maanlo lungsim, galhiam na zang kei ding uh hi. 

6. Thu maanlo lungsim galhiam in a pian na phung hong zui kik ding aa, na suan bangin a gah hong po ding hi. 

7. Mi neihsa khempeuh tungah thu maanlo gamtatna tawh na laksak kei ding uh hi. 

8. Thu maanlo gamtatna tawh a pusuak kammal leh mi te neihsa guk sak na in a nuntaakna bawlsia in a khihcip na hi ding hi. 

9. Simtham gitloh na lungsim galhiam mihing te tungah zangh kei-in. 

10.Nang in mi gal na hi ding aa, khasiangtho in nang hong nial in, vantungmi vantung galkap te vantung vangliat na tawh thukhen na leh thu hilh na ka piang sak ding hi. 

11.Mi hoih lo te in lingkung tawh ki bang aa, mi dik te in nuntaak thak na a hihi. 

12.Ka bawlsa na khempeuh no leitung mihing te aa ding ka bawl a hih man in it in na lungdam tawntung un. 

13.Nuam un la nisim in maipha pia tawntung un. Ni sim in nuam in ka min nong phat den ding uh hi. 

14.Ka bawlsa na khempeuh tungah a lungdam theilo mi lungdam na ding haza in, a khaktan duhhop na lungsim huaiham na a nei te in a mau a ki khumcip a ki meekcip a mau leh mau gawtna a ki pia uh a hihi. 

15.Kei hong um aa hong zuan mi te aw, manphat na leh hoih na tawh nuntaakna nei ta un. 

16.Mimawh mi te mawhmai na a pia lungsim hoih misiangtho te ki ko na aw te saang in, a mau mawhna te zong ka maisak hi. 

17.Misiangtho te nuntaakna in manpha mahmah aa, misiangtho khat bek om na ah midang te in zong manphat pih uh hi. 

18. Sapna aw te ngai-in nget na aw te ka dawng ding hi.

NUNTAAKNA THU SIANGTHO (115) 

A selcip mawhna hong pulaak ding 

1. No leitung mihing te in ka Tapa Pau Cin Hau manphat bangin a mannei ding vantung thuciam te na hi uhhi. 

2. Vantung thuciam ngah te in upna ciampeel in kei maa kiang hong zuat kik ni ciangin a ki siikkik na uh hong lian mahmah ding aa, a selcip uh mawhna hong pulak ding hi. 

3. Kong piak thupha te khempeuh taipih in ki selcip nop na, ngaihsut mawhna lian zaw in na ki sel zo kei ding uh hi. 

4. Na selcip mawhna pan ki sikkik taktak aa kei nong zuat ni uh ciang in “Pa aw”,kei-in ka ki sel zo nawn kei hi. Ka mawhna te kong phola’ak hi. 

5. Nong piak thupha ngah in nuamsa aa, na minphat ding sa’ang tai khia in kei mah in ka nuntaak pih ding khom nei zo ing, ci-in ka ngaihsut khialh na te hang in nang kong mu zo nawn kei aa, ka khialh na te pan in hong phel khia in. 

6. Ka nuntaakna nang maa neih sa hi. Nang maa deih bang in hong zang kik in. Nang maa aa dingin man nei na sak zah leh manpha na sak zah tawh hong zang kik in. 

7. Kei in nang kiang pan a taikhia ta mangthang ka hih hangin, nang kiang kong zuan kik hi. 

8. Nang maa aa ding ka nuntaakna khempeuh hong zang in la, a taimang mi mangthang ka hi nawn kei ding hi. 

9. Ka lungsim leh ka nuntaakna in cik mah hun in kong taisan nawn kei ding aa, nang maa vantung thuciam bangin kong zui ding aa ka thuak ding hi. 

10.Nang maa vantung Siangsawn nuntaakna thu siangtho ka luzang ah nga in nuntaakna thu siangtho kammal tawh hong honkhia in la, nang maa Siangsawn nuntaakna huang sungah kei hong om sak in. 

11.Ka lungsim ka nuntaakna khempeuh kong pia hi,”ci-in a taimang te in kei hong zuan kik ding uh aa, a mau te khut pan vantungmi te in len in, a mawhna te uh zuut khia in, mawhmai na vantung Siangsawn ci leh sa a suakkik ding vantungmi nasepna a piang ding hi. 

12.Leitung mihing te vantungmi te bawlsa ci leh sa taisan in a bawlsia mi te in vantungmi te thu kham a hi aa mawhna a hihi. 

13.Bang hang hiam na cih uh leh vantung thu siangtho a zuilo te in vantungmi te bawlsa taksa pumpi bawlsia in a simmawh a hi aa kong piak khong khaa pumpi khasiangtho tawh kizop na thupiak na leh khasiangtho hong gen thu te khempeuh nial in gu a suak hi. 

14.Tua a hih man in Siangsawn vantung thu siangtho leh khasiangtho khaa pumpi deihloh mawhna te ninbang in na kih ding uh hi. 

NUNTAAKNA THU SIANGTHO (116) 

Vantung thu khen na lian 

1. Khasiangtho in vantung siangsawn innpi pan taksa pumpi thu pia ding leh kei tawh ki zom dingin a hong pai a hihi. 

2. A mah in siangtho na leh thumaan gamtatna nei a hih man in a siangtho thumaan gamtatna a deih hi. 

3. Leitung mihing te in vantungmi te bawlsa ci leh sa tawh piang na hih man un, khasiangtho hilh na thu tel in na zui ding uh hi. 

4. Khasiangtho tawh ki leh bulh mawhna a bawl te in khasiangtho thuhilh na thuak in, a masuan khempeuh ah khentat theih na om lo, nisim ngaihsut na tawh lungsim gimna a thuak ding uh hi. 

5. Tua a hih man in khaa pumpi-in a hoih lo gamtatna ngaihsut na aa kipan, manphat na a om lo ding peuh mah a nial hi. 

6. Khasiangtho in mawhna gam pan hong pai a hi kei aa thu maanlo gamtatna te leh nuntaakna thu siangtho tawh a ki leh bulh khempeuh a nial hi. 

7. Leitung in kei maa nuntaakna tawh ka bawlsa a hih mah bangin, vantung thu siangtho gamtatna tawh a ki tuak lo, gamtat hoihlo khempeuh khasiangtho in nial aa leitung ah vantungmi te thu hilh na piangin, vantung thu khen na hong om ding hi. 

8. Vantungmi te in leitung hal in a sat mahmah na mun hong piang ding aa tuikhal mual te hong cim in nisat na leh guah tui tam na mun khat leh mun khat ka bang lo ding hi. 

9. Vantung thu khen na lianpi hong piang ding hi. 

10.Tua ni ciang in kei hong um taktak te lin na leh lau na om lo in a hing silsial dinghi. 

11.Leitung mihing te in kei hong um lo in, ka thu hong zuih kei teitei uh leh, minpi mualpi cimh ding, tuuktaam mautaam in, singkung lopa, mihing ganhing haksat na piangin, na tuinaak uh gu suak ding, nuntaakna a nei khempeuh leh nuntaakna aa na zat khempeuh uh gu suak ding hi. 

12.Kei hong um taktak leh hong muang taktak te in haksat na a thuak kei ding uh aa, misiangtho khua, mi siangtho gam, mun thak gam thak khua thak piangin, misiangtho te in khua ih zong ding hi. 

13.Ka Tapa Pau Cin Hau thaman hangin misiangtho nuntaakna tawh leitung in a etlawm pen tawh no suak in lei pan aa piang gah leh teh tawh ka min nong phat ding uh aa, gam khat leh gam khat ki siat na, minam khat leh minam khat ki deidan na omlo in, ki-itna tawh leitung in khua khat in piang ding hi. 

14.Leitung mihing te in ka Tapa tung aa kong thupiak te hong zui nuamlo na hih man un, hong hilhkik ka hihi.Tu in vantung thu siangtho pha takpi-in na zui ding uh hi. 

15.Vantung thu siangtho nuntaak thak na, na zat theih kei uh leh vantung thu khaam a hihi. 

16.Itna leh hehpih na thupha kong piak te khempeuh manphat na tawh zangin nong phawk tawntung ding uh hi. 

17.No te in kei maa neihsa te na hih man un vantung thu siangtho nuntaak tawntung na tawh na om ding uh hi. 

NUNTAAKNA THU SIANGTHO (117) 

Midik gamtat na in vantung nuntaakna 

1. Dawi gilo te in no te lungsim leh gamtatna khempeuh hong bawlsia nuam a hih man in, kei mah na Pa Pasian nong mangngilh ngei kei ding uh hi. 

2. Dawi te in nong mangngilh theih na ding un a kheng val ngaihsut na, deih luat na, heh luat na leh kha siat luat na tawh no te hong bum in a man neilo nuntaakna sungah a mau te tawh ki bang in hong koih nuam hi. 

3. Kei hong taisan te in man neilo nuntaakna a hihi. 

4. Na tuuk laitak in na thawk kik ding hun ngaihsun in la, na thawh kik hak leh ze ka’ai in dawi gilo te in hong lam khak ding hi. 

5. Na ihmut laitak in na khanlawh ding zeka’ai kei in la, vantung thupha piak nasepna te na za’ak ding zeka’ai kei in.

6. Na nuntaakna hong bawlsia ding na gal te tawh na om khawm kei ding uh hi. 

7. Kei hong zuan un la, ka hoih na te la ta un. 

8. No te in ka thu phatakpi-in hong zui thei lo na hih man un, vantung thupha piak hilhkik na a hong pai sak ka hihi. 

9. Ka thu hong zui lo ka thu manglo te in vantung nuntaakna pan pai khia in dawi a suak ding uh hi. 

10.Khaici vawh te in a manpha khaici vawh ta hen. na vawh khaici po ding aa, leitung ah na om lai hun sung un, thumaan gamtatna nei ta un. 

11.Thumaan gamtatna a nei mi khempeuh in vantung nuntaakna thupha na saang ding uh hi. 

12.Leitung mihing te pumpi sungah a ki pat cil in nuntaakna ding a ki cingtak in vantungmi te ka hong pia sak zo hi. 13.Tua vantungmi te nuntaakna hang in no te khempeuh sungah vantungmi suan leh khak ci leh sa tawh pian na thu ka bawl zo hi. 

14.Vantung thu neih na thu te kua mah khempeuh in susia in simmawh na tawh, na bawlsia kei ding uh hi. 

15.Thumaan lo gamtatna tawh numei leh pasal tungah simmawh na leh si leh sa bawlsiat na, na zang kei ding uh hi.

16.Midik gamtatna in vantung nuntaakna a hihi. 

NUNTAAKNA THU SIANGTHO (118) 

Kei min tawh itna a ki pia te 

1. Leitung mihing te in vantungmi te pilna khawk khen khat na bat ni uh ciagin, ka Tapa Pau Cin Hau tung aa no te aa ding na lamdang tampi ka lah sa thu te a hong piang ding aa kei nong upna leh nong it na uh a lian pan bek ding hi. 

2. Tua ni hun ciang in ka nasepna te itna na nei pan ding uh aa, ka tate aa ding aa kong piak vantung thu siangtho kammal manpha te mannei-in na nuntaak pih thei ding uh hi. 

3. Kei maa na lamdang bawl te leh ka nasepna te kua mah in susia in a khak tan zo kei ding hi. 

4. Kei-in hehpih na leh itna ki cing na Pa Pasian ka hih na nong phawk pan ding uh hi. 

5. Tate aw, kong thupha piaksa te khempeuh nuam sa in vantung pilna thupha hong pia ka Tapa Pau Cin Hau na mangngilh kei ding uh hi. 

6. A hong mangngilh te in a puk na hi uh hi. 

7. Vantung lungdam na manphat na thu te tawh kei hong it in a lungdam tawntung ka thu zui mi te in, nong upna uh lian semsem in nong itna uh khang semsem aa, leitung ah khan sau na hong piang ding hi. 

8. Tua ni ciangin ka thu um in a zui mi te na manpha mahmah ding uh hi. 

9. Vantung thu siangtho in a siangtho nuntaak tawntung na a hih man in, no leitung mihing te deihna tawh deih bawl in na zang khial kei ding uh hi. 

10.Leitung ah pilna kong piak te vantungmi te pilna khawk khen khat zong ban zo nailo na hih man un, ka thu siangtho leh ka thupha, pha takpi-in hahkat na tawh nong zui ding uh hi. 

11.Kei maa deihna bang in a zui te aa dingin tawntung nuntaakna leh tawldam na a hi aa, ka deih loh up khialh gamtatna te gim tawntung na a hihi. 

12.Sepna thaman ngah na in pumpi taksa tawh thalawh na pan a hong piang a hihi. 

13.Kei sung ah a nungta mi te in kei maa nuntaakna no te sungah a om hi. 

14.Thupha piaksa suan leh khak te in thu ciamsa te vantung Siangsawn ka innpi ah kip tawntung aa, a ciamsa leitang in manphat na ka piangsak ding hi. 

15.Kei maa min tawh itna a ki piakhia mi khempeuh in lei leh van ah kip tawntung ding in nuntaak thak na a ngah ding uh hi. 

16.Nuntaak thak na a ngah te kua mah khempeuh bawlsiat ding leh suksiat ding ka phal kei aa ka keem hi. 

17.Tua a hih man in no te in zong kei maa kong it bang in nong it ding uh hi.

NUNTAAKNA THU SIANGTHO (119) 

Vantung thupha manphat na 

1. Nipi kaalkhat ni sagih keimaa nipini-in ka bawlsa na te susia in, nuntaakna a nei peuhmah na that kei ding uh hi. 

2. Tua ni-in na lungsim, na ngaihsut, na gamtat na te, na siangtho sak ding hi. 

3. Nuntaakna a nei peuhmah na si sak kei ding uh aa, kong piak khiatsa lungsim, van leh na khempeuh kei sim loh a dang tungah piakkhiat na, na nei kei ding uh hi. 

4. Kei maa nipi ni siangtho ni-in lungsim a siangtho piakkhiat na, minphat na lungdam na a ki cing asiangtho pen tawh ka min nong phat ding uh hi. 

5. Kei maa nipi khuavaak ni khat ni pan ki pan ki gin ni ki kaal sung leitung mihing te aa ding na ka sem aa, kei maa nipi ni-in minphat na innpi ah a siangtho lungdam na tawh ka min nong phat ding uh hi. 

6. Kei maa nipi ka ni siangtho ni-in dawi mangpa in hong zol aa no te mawhna hong zong hi. 

7. Ni sagih nipi-ni minphat na innpi ah, a ging thei na khempeuh leh lei pan a piang gah leh teh tawh, vantung mi te hong bawlsa taksa pumpi-in ka min nong phat ding uh hi. 

8. Kei maa ni pi ni in lungsim leh gamtatna a siangtho tawh ka min nong phat ding uh aa, kei sim loh a dang ngaihsut na na nei kei ding uh hi. 

9. Kei maa vangliat na tawh na khempeuh piang sak in ka keem hi. 

10.No te aa dingin zong nuntaakna aki cing kongpia zo hi. 

11.Vantung thupha manphat na te no te sungah a kip tawntung na dingin ka min nong phat ding uh hi. 

12.Ka min hong phat aa om te in khaa pumpi leh taksa pumpi kei maa tungah nong ki ap ding uh aa, lei leh van aa ka bawlsa na khempeuh tawh ka minphat in deih nong ngen ding uh hi. 

13.Lungsim ki tuak khawm deihnget khop na zangh in ka min nong phat ding uh hi. 

14.Ka la te sa aa lungsim ki tuak in deihnget na te in no te ki tangsap na te vantungmi nasepna a piang ding hi. 

15.Ka la te sa in ka min hong phat khawm mi te phatna aw te kong dawng ding aa, no te thei in ka hong keem ding hi. 16.Tua a hih man in tate aw za aa, a sang pen lungdam na tawh deihnget na te hong pia in ka zo ding hi. 

17.Kei maa sungah upna innkuan khat ka minphat aa hong pai mi te masuan khempeuh vantungmi nasepna hong piang ding hi. 18.No te nuntaakna ding kaTapa Pau Cin Hau in a ki cing in a koih khin zo hi. 

19.Hoih na leh dik na tawh a ki zom ka tate in nasepna khempeuh na zo tawntung ding uh aa, kei maa zawhna a piang ding hi. 

20.Kei maa thupha piaksa zui lo in lam khial mi te hong huh in hong zong ding kua mah a om kei ding hi. 

21.Lam tang tawn unla, thumaan zui un. 

22.No te nong ciah hun ciang un, vantung Siangsawn innpi ah vantung nasepna te zo in ih om khawm ding hi. 

23.No te in vantung Siangsawn gamnuam na tun na ding uh, phatakpi in zui un. No te aa dingin tawntung nuntaakna, van thak Siangsawn ka gamnuam a hihi. 

24.Vantung gamnuam thuciam ngah te in ka bawlsa vantung, leitung, ni, kha, aksi te vantung pilna tawh uk in na len thei ding uh hi. 

25.Ka Tapa Pau Cin Hau leh hilhkik zatmi te tung aa nuntaakna thu siangtho, ka deihna bang in um in a zui mi te in, vantung pilna ngah in vantung manphat na khaici te na suak tawntung ding uh hi. 

26.Na lungsim khempeuh tawh lungdam tawntung aa hong ki ap thuciam na zahzah, vantung thupha manphat na te tawh kong thuk kik ding aa, vantungmi te zawh bang in na zo tanwtung ding uhhi. 

27.Kei hong um taktak ka Tapa Pau Cin Hau a it misiangtho kumpipa a siangtho nuntaakna lungtang tawh, upna innkuan khat suahna in, na sepkhiat na leh vantung thuciam kammal khat bek in zong, leitung ah ka bawlsa ngun leh kham te sang in manpha ka sa zaw hi. 

28.Itna tawh hong sam aa kei hong phawk tawntung mi khempeuh te tungah linna leh lau na, duh na leh kial na a thuak ngei kei ding uh aa kei tawh ih omkhawm ding hi. 

NUNTAAKNA THU SIANGTHO (120) 

Na lungsim leh na thatang si’it kei un. 

1. Kei maa nasem ding in na ngaihsut na uh a vekpi-in hong pia khia un. Ki piakkhiat na ding lungsim leh tha tang siit kei un. 

2. Kei maa min tawh na sep te khempeuh zong na lungsim khempeuh tawh sem unla, na tha uh siit kei un. No te zang in thupha hong ki pia thei lo hi. 

3. Na lungsim tha khauhsak un la nong upna zah khempeuh uh tawh sepkhiat gamtatna, a ki mu thei-in thu kho pang un. A ki mu thei a ki lawng thei thu kho pan na ka deih hi. 

4. Na pai na mun khempeuh ah kei hong ngaihsun tawntung unla, upna thumaan thukho na pang ding uh hi. 

5. Kei hong lungngai mi te tawh maa ka pang khawm aa, a mau te gilkial na leh dangtaak na ka thuak sak kei ding hi. 

6. Nisim in kei hong hopih tawntung unla, na om na leh na hun khempeuh nong ap tawntung ding uh hi. 

7. Kei hong hopih ka tate aw, no te aw ka zaak na ah ka hong ompih tawntung ding aa, Pa it in a sam mi te na hun neih khempeuh kong zawhpih ding hi. 

8. No te na ki it unla, na ki itna te uh thuak khawm in nong upna te uh innkuan khat suak sak unla, nang leh mi khempeuh tungah huh na leh piakkhiat na ka vantung thupha la in, no te khut ki let khopna tawh zawhna a hong piang ding vantung ka thupha piak te na hi ding uh hi. 

9. Itna na zat khit ciangin a manpha itna in nang hong len aa, thupha in nang tungah hong kip tawntung ding hi. 

10.Tua mah bang in mi khemppeuh tungah itna na piak leh itna thupha hong tung kik ding aa, hehpih na na piak leh huhna na tungah hong piang ding hi. 

11.Itna zang in kei hong phawk tawntung, ka thupha bawl te in kei mah tawh a ki zom tawntung na hi uh aa, hehpih na ki itna a neilo te tungah kei ka om kei ding hi. 

12.Hehpih na leh itna a neilo te in ka bawlsa na khempeuh a maa aa dingin gu a suak ding hi. 

13.Bang hang hiam na cih uh leh kei maa lim leh meel kha pumpi in hehpih na leh itna ki cing a hi mah bang in, taksa pumpi-in zong mi khempeuh tungah gamtatna tawh itna thupha bawl ding in khasiangtho in thupi sa in deih hi. 

14.Itna lamdang te hong pia le uh cin itna thupha na tungah hong luang ding aa, ka Tapa manphat na tel le uh cin ka hoih na leh ka manphat na te na luah ding uh hi. 

15.Vantung thu siangtho lungdam na thu upna tawh sepkhiat na a gah in, vantungmi te pilna thupha te hi aa no te in na zang thei ding uh hi. 

16.Kong itna leh kong hehpih na te na tel ni uh ciangin na nusiat sa thupha leh na hun khempeuh a lamdang phawk na leh itna na nei ding uh aa, na nusiat sa thupha te khempeuh na ki siik na uh hong lian mahmah ding hi. 

17.Na nusiat sa uh vantung thupha leh nopsakna te na thalawh ding uh aa, vantung thupha piakkik na saan ni uh ciangin, a lamdang nakpi tak in khasiangtho ki pholaak in nuam na khitui hong luang ding hi. 

18.Nuam na leh khan lawhna khitui malkhat in vantungmi te thaman piakkhong tawh ki bang hi. 

19.Nuam na leh khan lawh na khitui luan na in, khasiangtho thu kho panna leitung ah ngun leh kham sangin a manpha zaw, nasep khempeuh na zawhna ding khasiangtho in hong lawng in a hong zawhpih na, vantung thaman a hihi. 

20.Tua bang mah in nopsak na thaman vantung thaman a sang te in misiangtho ka pawlpi te na hi uh hi. Mi siangtho ka pawlpi te a susia dingin dawi mangpa leh dawi gilo te hong pai hangin a zo kei ding hi. 

21.Tua ni ciangin kei hong it taktak te a sia ngeilo tawntung nopsak na a ngah ding aa nuamna khitui thupha vawh dingin khasiangtho vaikuan na hong piang ding hi. 

22.Misiangtho te in minphat na la te sa in nopna sungah ih om ding aa, minphat na innpi sungah thupha siim dingin hong ki zuan ding hi. 

23.Tua ni ciang in minphat na innpi-in thupha hawm na thupha piak na innpi hong suak ding hi. 

24.Pian leh khan hong ki khek ding aa, leitung mi te in ka thaman a saang ding uh hi. Ka Tapa Pau Cin Hau tha man a saang mi te na leibaa khempeuh ka bei sak ding hi. 

25.Bang hang hiam na cih uh leh kei leh ka Tapa upna thumaan gamtatna tawh zongin hong zuan mi te tungah, no te thaman thuh kik na ka hi a, na khempeuh ukna leh na hun khempeuh zawhna ka piang sak ding hi. 

26.Tua ni ciangin mawhna hong nei mi khempeuh te tungah mawh maisakna na pia dinguh aa, mawhna lian ki siik kik na a nei te zong a mawhna te uh kei leh ka Tapa min tawh nong phel ding uh hi. 

27.Lei leh van aa a ki ciam teh mawhna lei pan na phel te khempeuh vantungmi te ciapteh na pan vantungmi te in a phel ding uh hi. 

28.A hih hang in mawhna a bawl kik teitei te in kei maa thu nial kei maa nasepna a khaktan a hih man in vantungmi te phel khiatsa mawhna sagih ii sagih a zah sagih a thuak kik ding uh hi. 

29.Misiangtho te in lei pan aa nong ki ko na te uh van pan kong dawng ding aa, na ki ko na aw te uh ka saang ding hi. 30.Misiangtho te in leitung ah na ciapteh khempeuh uh vantung ah zong thei in ka ciapteh mah bang in na su’ut te uh zong vantung pan ka khah ding hi. 

31.Vanmisiangtho na suah ni uh ciangin na taksa pumpi-in na lungdamna te thukkik in vanmisiangtho nasepna hong piang ding aa na lungkim loh thu maanlo nasepna te zong vanmisiangtho nasepna hong piang ding hi. 

32.Tua ahih man in leitung ah na om lai hun teng un na ki-it unla, na ki-itna uh itna innkuan na suaksak ding uh hi. 33.Itna innkuan nasep khoppih te tawh vanmisiangtho thupha hawm na leh vantung hoih na tawh hong zem in manphatna na ngah ding uh hi. 

34.Tua a hih mah bangin vantung ka kamciam te vantung thuciam bang in ka zo ding aa, hotkhiatna na piak te suah taak na ka pia ding hi. 

35.Leitung ah na om lai teng un a manpha vantung thupha khaici na vawh ding uh aa, vanmisiangtho in a ze’em na gam piang ding hi. 

36.Vanmisiangtho uk na gam thupha piakna gam piang ding hi. 

NUNTAAKNA THU SIANGTHO (121) 

Ka bawlsa na te a manpha in zangthei 

1. Ni, kha, aksi, leitung, van awngthawl te in no leitung mihing te aa ding in ka bawl ka piansak a hihi. 

2. Tua te in ka min nong phat na ding uh leh taksa teenna gam ah na zat theih ding un hong pia ka hihi. 

3. Huih, tui, singkung, lopa, ganhing nam khempeuh zong no te aa dingin ka bawl a hihi. 

4. Tua a hih man in ka thu phatakpi-in nong zuih ciangun, lei leh van ka bawl na khempeuh a manpha in na zang thei ding uh hi. 

5. Ka vangliat na in na khempeuh sungah ki dim in ka uk hi. 

6. Upna thumaan gamtatna nei zolo na hih man un, vantung pilna a ngah zolo na hi uh hi. 

7. Ka thu phatakpi in nong zuih zawh hun uh a tun ciangin, vantung thaman manphat na te na tungah hong kip ding aa, na pumpi-in a manpha in hong piangin, khaa pumpi in vantung hoih na tawh hong zeem ding hi.

8. Ka Tapa Pau Cin Hau in leitung mihing te leh kei maa tungah itna leibaa a neikei hi. 

9. Kei maa sawl bang in a zo aa, leitung mihing te aa ding vantung ciah na innpi zong hilh in kong lak sak khin zo hi. 10.Ka bawlsa te uk in lelh na omlo vantung ki innpi ah kei tawh ka maang khawm hi. 

11.A mah in thumaan thutang ka Tapa Pau Cin Hau a hi hi. 

12.Ka Tapa nasepna te khempeuh vantung hun gualh na bang in vantungmi te nasepna a piangsak hi. 

NUNTAAKNA THU SIANGTHO (122) 

Thupha piakna in vantung ka nasepna 

1. Ka-ang laizang pan a luangsuk ka nuntaakna tui-in, vantung thu siangtho nuntaakna kei maa misuah na, mawhna pan mawh maisak na, sih na pan hinkik na, nat na pan dam na vantung siangsawn ka innpi ah ciah na ding suah kik hotkhiat na nuntaakna tui a hihi. 

2. Kei hong um taktak mi te tungah ka nuntaakna tui na zang thei ding uh hi. 

3. Ka-ang laizangah a luangsuk ka nuntaakna tui-in kei maa vantung minam suah na vantung hoih na leh dik na khempeuh tawh misiangtho suah na leh vanmisiangtho tawntung nuntaakna tui a hihi. 

4. Ei misiangtho te in vantung lungdam na thu siangtho tawh thupha bawl minam suan leh khak te ih hihi. 

5. Kei hong it aa, a hong um mi te leh no te it in a hong um mi te tungah, thupha puak ei vantung minam te ih hihi. 

6. Vantung Teipak in nin leh siang kong khen na, na khempeuh te sungah pai let in vantung tha khauh na a lian pen thukhen na hi aa kua mah a ki seel zo kei ding uh hi. 

7. Vantung tha khauh na in hiam na lamdang, khauh na lamdang te tawh nin leh siang kong khen na a hihi. 

8. Leitung minphat na huntawp ni vantung ciah kuan hun ki khen laitak a nunnung vaikhak hun ciang in kei maa khasiangtho ka nuntaakna tui tawh nong ap ding uh hi. 

9. Kha pumpi in leitung huntawp ni ciang in, thukhen na a hong piang ding aa ka ang laizang ah a luang suk vantung nuntaakna tui tawh vanmisiangtho na ap ding uhhi. 

10.Leitung a nusia vanmisiangtho in leitung huntawp ni ciang in taksa pumpi teenna gam, vantung phatna sepkhiat gamtatna khempeuh en kik in vantungmi te in peengkul mut in vantung kong pi ki hong aa, vanmi siangtho in vantungmi te tawh Siangsawn ka innpi ah vanmisiangtho suah ni pawi ih bawl ding hi. 

11.Vanmisiangtho in leitung minphat na sepkhiat na te khempeuh ngaihsun kik in, vantungmi te in peengkul a mut laitak, van laizang pan in na ngaihsut na etkik te khempeuh vantung nasepna vanmisiangtho in na zo ding hi. 

12.Ei vantungmi te in leitung mi te aa ding in vantung nasepna te thupha a pia kik ding, ka Tapa in a khut kuak muanhuai sung a taklam tungah hong etkik vantung thu ciamsa, thu ciamkik, hilh kik na thupha a ngah minam te ih hihi. 

13.Vantungmi te bawlsa taksa pumpi leh kha pumpi-in leitung ah ka bawlsa na khempeuh tawh ka min nong phat ding uhhi. 

14.Khasiangtho in leitung taksa pumpi tawh minphat khop na huntawp na hun hong tun ciangin, vantungmi te in vantung peengkul mut in, vantung kongpi ki hong ding aa, vanmisiangtho in vantungmi te tawh van lai zang pan taksa tawh minphat khopna hun khempeuh ngaihsun kik in, nang hong it mi te leh nang maa it mi te khempeuh tungah, van laizang pan taksa teen na gam leitung enkik in vantung thuciamsa te khempeuh tawh vantung siangsawn ka innpi ah vanmisiangtho suah ni pawi ni thu pi ni, vantungmi, vantung galkap, van misiang tho te leh kei leh ka Tapa tawh ih bawl khawm ding hi. 

15.Vanmisiangtho in van laizang pan leitung na etkik vantung thuciam te khempeuh, ei vantungmi te in taksa teen na gam thupha ih pia kik ding hi. 

16.Taksa pumpi in vantungmi te bawlsa thuciamsa taksa pumpi a hih man in leitung luah in ngak ta hen. 17.Vanmisiangtho ka khasiangtho in taksa teenna gam vantung thupha piakna gam a suak sak ding na hih man in na nasepna te zo tawntung ta in. 

18.Vanmisiangtho aw, vantung Siangsawn ni thupi ni te ah nang hong it mi te leh na it mi te tungah, na kampau na, na gamtatna, na piakkhiat na, thupha na bawl na zah, deih nong ngetna leh ka bawlsa na khempeuh it aa, thupha na piakna khempeuh a kip tawntung thuciamsa a hih mah bang in, vantungmi, vantung galkap te tawh a muanhuai mahmah lungdam na thu thupha piakna na nei ding hi. 

19.Vanmisiangtho thupha piakna in ka tate it aa vantung ka nasepna a hihi. taksa pumpi leh khaa pumpi ki khen aa, taksa pumpi sihna in vantung ciahna lampi a hihi.

NUNTAAKNA THU SIANGTHO (123) 

Teipak in a nin leh a siang kong khen na 

1. Vantung teipak in kei hong um taktak leh leitung lungsim nei vantung thu siangtho tawh ki leh bulh up khialh na a nei te nin leh siang kong khen na hi. 

2. Vantung thukhen na vantung vangliat na te kua mah in nial in a khak tan zo kei ding hi. 

3. Nin leh siang kong khen na in thumaan gamtatna a nei leh a nei lo, vantung vang liat na lamdang te tawh thu khen na a hihi. 

4. Kei in itna tawh kongsam kik aa, mawhna pan mawh maisak na, sih na pan hin kik na, suah kik hotkhiat na kong pia hi. 

5. Tapa thupha khempeuh luah in a etlawm pen leh a pahtak huai pen tawh kei maa maipha mu aa, vantung thu siangtho thumaan gamtatna na neih tawntung na ding un, ka nuntaakna tui tawh nong ki ap den ding uh hi. 

6. Ka nuntaakna tui-in ka vangliat na tawh zawhzawh na, vantungmi nasepna tawh no te kong zawh sak den na leh a etlawm pen kong suak sak kik na a hihi. 

7. Taksa pumpi leh, khaa pumpi in vantung thu neihna tawh na zawh tawntung na ding un, ka nuntaakna tui hong pia ka hihi. 

8. Ka nuntaakna tui in kei leh ka Tapa Pau Cin Hau tawh vantung innkuan suah na a hihi. 

9. Vantung innkuan suahna in van leh lei a piangsak na Pa Pasian in tate kiko na, vantung thuciam deihngetna te za in kong dawng aa, vantungmi te tawh sepkhopna a hong piang ding hi. 

10.Ka tate aw ka zakna ah ka om ding aa, lei leh van ih uk ding hi. Kei mah in thumaan taktak na Pa Pasian ka hihi. 11.Tua a hih man in kei maa khasiangtho, thumaan taktak phatakpi in nong zui ding uh hi. 

12.Misiangtho na suah ni uh ciang in, na heh na leh na khasiat na te uh hong bei ding hi. 

13.Midang te tungah Heh na leh khasiatna na neihna in nang maa pumpi hong bawlsia aa hong ninsak a hihi. 

14.Nang hong nin sak ngaihsut na leh gamtatna te khempeuh in kei tawh kizopna khaktan in ka maipha muh na a nial hi. 

15.Kei nong up taktak uh ciangin na tung aa mawhna hong bawl te na maisak ding uh aa, na khasiatna te khempeuh uh na beisak ding uh hi. 

16.Na tung aa mawhna hong bawl te Kei upna taktak tawh na maisak khit ciangin a mau te hong bawlsiat nop zah a mau kiangah ciah kik ding hi. 

17.A mau te in lungsim hoihlo gamtatna thaman a sa’an ni ciangin, lungsim tawh ahi zong in, kampau na tawh a hi zongin, ki theisak in na genpih kei ding uh hi. A mau te thuak na thaman in a mau gamtatna a hihi. 

18.Tate aw, mawhmai ki piakna in ki-itna hi aa no te sungah kei mah ka om hi. Mawh a maisak te kei mah in ka huh ding aa, a mau te tawh maa pang khawm in a masuan ka zawhpih ding hi. 

19.Innkuan mawh ki maisak na in belh ding a muanhuai innkuan suaksak hi. Mawh a ki maisak innkuan te sungah, vantungmi te tawh maa pang khawm innkuan nuam te a hi uh hi. 

20.Innkuan nuam a suak mawh ki maisak te siatna in hong peel tawntung ding aa, dikna in hong zuan ding hi. 21.Thupha in na innsung ah dimin, ngun leh kham sang manpha zaw, ka thupha piak inn suak ding aa a om kha mi khempeuh lungsim vangik te ki suahkhia in tawldam na hi ding hi. 

22.Tua a hih man in nisim in no te in kei maa min tawh thupha na ki pia ding uh aa, ka bawlsa na te tungah itna thupha na pia ding uhhi. 

23.Ka min tawh thupha na ki piak laitak un, na ki piak uh thupha a tawntung in itna leh lungdam na tawh keem in na siasak kei ding uh hi. 

24.Ka min tawh thupha na ki piak te khempeuh uh a lian penpen itna tawh keem in zahtaak unla, na nuam khol ding uh hi. 

25.Thupha na ki piak te uh a gah na lawh ni ciang a tul thei lo itna leh lungdam na liansak semsem un. 

26.Ka min tawh thupha ki pia in a gah na lawh ni uh ciang in, ki liatsak na ki tungnun tuh na lungsim tawh a nin gamtatna te zang in na bawl kha kei ding uh hi. 

27.A nin gamtatna a zangh te in a mau nuntaakna bawlsia in a simmawh a susia a hi ding uh hi.

NUNTAAKNA THU SIANGTHO (124) 

Thupha puak vantungmi, vantung gakap, vanmi siangtho 

1. Misiangtho pawi, Kamsang Zatmi te ni, Lei leh van konghon na Pasian Tapa Pau Cin Hau misiangtho kumpi pa ni Siangsawn kumthak ni siangtho ni te ah vantungmi nih, vantung galkap nih, vanmisiangtho nih ka tate minphat na innpi sungah ka hong paisak hi. 

2. Vantungmi, vantung galkap, vanmisiangtho a hong pai te in ka tate nong nget te uh leh ka min nong phatna innpi sungah vantung mi (4) te ciapteh na tawh gawm in hong puak hong gen uh hi. 

3. Tua bang a hong puak leitung mihing ka tate in deih nong ngetna te uh zat masak ding, zat nunung ding, zat pah ding, zat nai loh ding, zat theih loh ding dong ah ka hong khen sak hi. 

4. Inn aa kizopna Tapa lim leh meel ngak vantungmi-in innsung huang sung aa om leitung mihing te tawh ki zopna hong bawlsak in deih nongnget te uh leh thu piang khempeuh a hong gen hi. 

5. Kei leh ka Tapa upna muan na a hong nei taktak mi te in deih nong nget te khempeuh uh nuam in lungdam khol aa, ka minphat na la te tawh phat in na khut te uh laamsaang aa, phat na leh phatawi na hong nei te in vantung nasepna te na dawn thei ding uh hi.

NUNTAAKNA THU SIANGTHO (125) 

Taksa sihna in vantung ciahna lampi 

1. Leitung pumpi in huntawp na hun hong tun ni ciang taksa pumpi hun khen na hun hong tungta, na tungah gamdai in na ngaihsut na te khempeuh khawl in vantung ah nong ciah ding hi. 

2. Leitung ah taksa tawlnga in sihna hong tunni ciang khaa pumpi vantung ciahna lampi a hihi. 

3. Tua ni ciang leitung gamdai in khuakhing aa, taksa tawh nasepna khempeuh zo in vanmisiangtho in vantung nasep ki pat hun ki khek laitak a hihi. 

4. Khuakhing in a lunglen huai, amul kim huai hih leitung pan vantung hun khenna hun hong tun ni ciang in vanmisiangtho in vantungmi te tawh vantung ah ciah khawm dinghi. 

5. Vamisiangtho khaa pumpi in vantung nong ciah ni ciang in leitangh leh tuiluang te ki ko in leitung mihing te a ding manpha semsem nuntaakna a pia ding in vanmisiangtho nasepna a hihi. 

6. Vanmisiangtho in vantungmi suakkik aa vantung na tun ni ciang in na nusiat leitung mihing te vantung ah na ki muhkik mateng leitung ah van kham lukhu khu sak in nuntaakna sungah na koih dinghi. 

7. Vanmisiangtho aw vantung nong tunkik ciang ka Tapa tawh maang khawm in leitung ah na ciamsa, na vawhsa khaici thupha te leitung minam khempeuh te a ding hinsawt na thupha a gah vantung pan kamciam in thupha na piakik ding hi. 

8. Kei in vantungmi te bawlsa ci leh sa sungah ka khasiangtho nuntaakna ka koih hi. 

9. Ka khasiangtho khaa pumpi in taksa pumpi a hoih lungsim gamtatna te nisim in lam ka hilh sak hi. 

10.Khaa pumpi leh taksa pumpi a susia ding leh a khem ding in dawi te in mihing te mawhna a zong tawntung hi. 

11.Kei mah tawh kizopna ki sia sak lo vantung thu siangtho phatakpi in a hong zui mite vantung nong ciah ni uh ciang in vantungmi in van laizang pan vantung peengkul hong mut ding hi. tua ciang in vantung kongpi ki hong aa, vanmisiangtho in vantungmi te tawh ka gamnuam siangsawn innpi ah ciah in na luah ding uhhi. 

12.Van laizang pan vantung peengkul ging in vantung kongpi hong ki hon laitak vanmisiangtho khaa pumpi aw leitung ah taksa pumpi tawh na om hun sung ka bawlsa na khempeuh tung ah itna thupha na bawlna, mihing te tung ah ka min tawh thupha na piakna, nang hong it mite leh na it mite tung ah thupha na bawl na te khempeuh ngaihsun in na en kik ding hi. 

13.Van laizang pan na etkikna na zawh ciang in vantung siangsawn ka innpi ah vantungmi te tawh nong ciah khawm ding hi. 

14.Leitung ah nuntaakna a ki mu zolo nuntaakna a neu, dahna tawh a ki dim khitui luang te khempeuh a vulsa paakpalh te tawh ki bang in dawn suang sak, a no suak sak kik ding vanmisiangtho vantungmi nasepna zo ta in. 

15.Vantung gamnuam na tun na ding a ni hong tungta hi. 

16.Leitung ah hun ki khen in taksa pumpi tungah gamdai in a om laitak leitung hun zawhna hong tung in vantung innkuan suah ni hi. 

17.Vanmisiangtho in tawntung nuntaakna nopna gam ah Pa Pasian tawh vantung innkuan suahni hi. 

18.Vantung nong ciah ni ciang un vantungmi te bawlsa ci leh sa guh leh taang in leitung ngak ding aa, ka khaa pumpi vanmisiangtho in vantung ka innpi ah hong ciah ding hi. 

19.Taksa ci leh sa luang lupna taksa teenna gam in leitung mi te aa ding in thupha piakna gam a suah na ding na phawk tawntung ding hi. 

20.Vanmisiangtho ka khaa pumpi aw, vantung pan in taksa teenna gam enkik in la, leitung meel hoih na nam khempeuh tawh puah tawntung in. 

21.Taksa pumpi in leitung hun zawhna cing ta aa, a tawlnga na hih hang in vanmisiangtho in vantung nasepna lei leh van uk kik ding hun a ki pan na hihi. 

22.Vantung thu siangtho phatakpi in a zui kei maa kiang hong cihkik mi te in kei maa maipha mu mite hi aa, vantung ah vanmisiangtho suahni pawi in leitung ah a vulsa paak te a paakpalh ni a hihi. 

23.Leitung ah gah theilo singkung te gah lun in gah tam ding hun ki pat ni a hihi. 

24.Thupha ngahlo haksatna a thuak a ki hencip mite nopsak na thupha piakni ni thupi ni a hihi. 

25.Tawntung nuntaakna vantung ciahni in vantung innkuan suahna lungdam na ni nithupini a hihi. 

26.Tua vantung innkuan nuam suah ni vanmisiangtho pawi lei leh van uk kik ding vantung minphat ni nithupi ni hun sungah ki tot ki sel na te zang lo in nuntaakna a nei khempeuh tung ah sih sak na na bawl kei ding uhhi.

NUNTAAKNA THU SIANGTHO (126) 

Ka zatmi kong suaksak khin 

1. A masa penpen in Pasian ka om hi. 

2. Kei in khasiangtho tawntung nuntaakna ka hi aa, van a sangbel na mun vantung gamnuam siangsawn ka innpi ah ka om hi. 

3. Na teenna leitung in keimaa vangliatna khut tawh ka bawlsa a hihi. 

4. Mihing te a dingin nuntaakna a kicing ka Tapa kongpia sak zohi. 

5. Ka Tapa tung ah kong thu piaksa thu te hong piankhiat na muh ni uh ciangin Pasian bawlsa hi, nong ci ding uh hi. 

6. Tua hun ciangin kei hong um taktak mite tawh maa ka pang ding aa, ka Tapa tung ah thu piaksa mah bangin misiangtho khua, misiangtho gam, munthak gamthak hong piang ding hi. 

7. Misiangtho khua, misiangtho gam pan a dang nuntaakna a zong nuam te tungah a maute hun kapia ding hi. 

8. Tua khit ciangin a dang mipawl kei hong um taktak te ka sam ding hi. 

9. Ka Tapa khut in note hong len ding aa, tua khuapi nuam ah a mah tawh semkhawm in a nungta na hi uh hi. 

10.Ka Tapa hong hilh thu te nong up ni uh ciangun ka thupha na sang ding uh aa, nuntaakna thusiangtho in thumaan taktak hi, ci-in kei nong upna uh lian semsem ding hi. 

11.Taksa teenna leitung ah a mannei thupi na hih na uh zatmi thupha kongpiak thu te tel in na phawkkik ding uh hi. 12.Tua ni ciangin vantung thu siangtho phatakpi a zui mite ka zatmi kong suaksak khin ding hi.

NUNTAAKNA THU SIANGTHO (127) 

Sawltaak late 

1. Khasiangtho Pasian aw kei lam hong hilh inla, hong len tawntung in. 

2. Ka nuntaakna khua hong vak sak inla, nangmaa kiang vantung gamnuam khamkhuapi na innpi kong tun dong hong len in, hong ci te nusia lo in a mau te hong nget na thu te ka sang ding hi. 

3. Thuciam kik ka tapa khut taklam ah a hong teel mite zatmi(11)sawltaak(11)vantung nasem te in kham khuapi ah hong paipih in, note nuntaakna na ansaal uh hong dipsak, ka nasem ka zatmi ka sawltaak te a hihi. 

4. Hun lui khempeuh nusia in hun thak ah no mau aa ding thu kong ciam kik aa, na nuntaakna sungah ka thupha kuamah ii suksiat theihloh dingin leitung mun khempeuh ah hoihna tawh kong lakkhia tawntung ding hi. 

NUNTAAKNA THU SIANGTHO (128) 

Nisim zawhna 

1. Ka min nong phat laitak lungsim tawngnung pen tawh nong phat ding uh hi. 

2. Lungsim tawngnung pen piakkhiat na ka deih hi. lungsim tawngnung pen piakkhiat na in nisim zawhna a hihi. 

3. Nisim in kei simloh lungsim dang na neih leh kong piaksa nuntaakna leh thupha te in no te hong nusia ding hi. 

4. Thupha it in a keem tawntung te a masuan nasepna ka zawhpih den ding hi. 

5. Thupha kong piak te na ngah hun sung haksatna a thuak mite nusia in taisan kei un. A taisan mite thupha in hong taisan ding hi. 

6. Mi tampi na lungdam sak na in no te aa ding in keima nasepna a hihi. 

7. Thalawhsa thupha a taisan te in na ngahsa thupha te na tungah kiplo in hong nusia ding hi. 

8. Nisim in na pumpi leh kong piaksa thupha te khempeuh zahtaak in itna tawngnung pen na pia tawntung ding uhhi. 

9. Na pumpi na it kei leh vantungmi te bawlsa vantung nasepna thupha a simmawh a lamkhak na hih man in mawhna a hihi. 

10.Thuciam piakkik sungah saltaak (11) tawh kong ciamteh hi. 

11.A mau te in kham khuapi sung ah hong paipih in kham khuapi sungah a lut na hi uh hi. 

12.Thuciam kik na in khatvei zatmi thukhen na hong piang kik ding hi. 

13.Tua ni ciang in hong um taktak mi te tawh ka om khawm ding aa, a maute nuntaakna lampi masuan a paisuak in ka zawhpih ding hi. 

14.Kei simloh khuadak in lungsim dang na nei kei ding uh hi. 

15.Thukhen na hong pian ni ciang in na it mahmah pen nangawn zong nang lam ah a om kei ding hi. 

16.Kei lam hong zuan te in a siangtho upna lungsim a nei te a hihi. 

17.Pian leh khan ki khek na ding in thuciam kik a hong paisak ka hihi. 

18.Thuciam kik sungah leitung aa na gamtatna te khempeuh kip in vantung ah vantung mite in a ciamteh ding hi. 

19.A pha na bawl te khempeuh vantung ah kip ding aa, a sia na bawl khempeuh vantung pan thuhkik na hong piang ding hi. 

20.Tua thu hong khen ding vantung ah na Pa Pasian ka om hi. 

21.Thuciam kik sawltaak nasepna in a ki sel theilo leitung mi khempeuh ii muh khiat ding in ka sem ding hi.

NUNTAAKNA THU SIANGTHO (129) 

Hoihna thupha in tuam 

1. Vantung thusiangtho phatakpi in a zui mite in Siangsawn ka khasiangtho lungtang ka nuntaak na sungah nungta in kei sungah a om na hi uh hi. 

2. Tua misiangtho te nuntaakna in thu um thuzui mite aa ding in khuapi khat tawh ki bang hi. 

3. Vantung thusiangtho a zui mite tawh vantung innkuan khat ih suak zo hi. 

4. Thupha ngah misiangtho te nuntaakna in a namtui huanpi sung aa om paak hoih namtui te tawh ki bang in kei maa lungtang sung ah a nuntaakna uh ka nei hi. 

5. Leitung mun khempeuh ka hoih na thupha in tuam ding hi. 

6. Khuai te in paak hoih te a zuat mah bang in ka thupha ngah minam te hong ki zuan hong ki beel ding hi. 

7. Kei in Belhding innpi tawntung nuntaakna ka hihi. 

8. Hong zuan mite hoih na thupha ka pia ding aa, kei nong phawk tawntung ding uh hi. 

9. Thupha zuan mite in hunlui nuntaakna te nusia in a hing silsial nuntaakna sung ah thupha ngah mite tawh hong ki lawm khawm ding hi. 

10.Leitung ah a etlawm mahmah hoihna thupha tawh nuntaakna ngah in lei pan na thuciam te khempeuh vantung ah kip ding aa, vantungmi nasepna hong piang ding hi.

NUNTAAKNA THU SIANGTHO (130) 

Teeltuam misiangtho 

1. Ka teelna siangtho a ngah vantungmi nu leh pa te in leitung ah mihing khempeuh te a ding in a kicing sem khia aa, ka zawh sak khit ciang in leitung pan vantung ah ka ciah sak kik hi. 

2. Teelna a ngah a siangtho numei leh pasal tung ah vantung Khaici thupha vawh te na hih mah bang un leitung mite aa ding in nuntaakna lampi khua a vaak sak midik mi nu leh pa na hi uh hi. 

3. Ka teel nupa te pumkhat suak in a ki Khen theilo nuntaakna sungah a om te vantungmi te in no te muhna kawkna tan sang in a zai zaw nasepna hong piangsak ding hi. 

4. Leitung mihing te aa ding ka minphat in nong ngetsak khempeuh uh thu um thu zui mite leh a dang mipawl te tung ah zong ka pia ding hi. 

5. Vantungmi nu leh pa in leitung mihing te aa ding in teeltuam innkuan hong suaksak mah bang in teeltuam innkuan nu leh pa te in na inn sung ah itna, na ki piak zahzah uh leitung mi te aa ding in a nuntaakna uh a thupi sak vantung ka nasem te na hi uhhi. 

6. Vantung ka nasem te in leitung ah na om hun sung un thupha sepkhiat na leh nong nget na te khempeuh uh vantung ciah ni ciang lungdam na pawipi bawl in vantung ah na uk kik ding uh hi.

NUNTAAKNA THU SIANGTHO (131) 

Vantung innkuan 

1. Na leitung lungsim vangik na suahkhiat a bei mateng kei tawh na innkuan zokei ding uh hi. 

2. Kei tawh innkuan a suak nuam te in ka bawlsa na te sang in a bawl, a piangsak na pa Pasian nong itna, na liansak mahmah ding uh hi. 

3. Tua hun hong tun ciang in vantung innkuan khat ih suak ding hi. 

4. It tawntung na nong piak hun uh a tun ciang in kei maa nuntaakna sung ah a om khawm ih hi pan hi. 

5. Kei tawh a nungta tawntung te in ka Tapa sung ah a om na hi uhhi. 

6. Note aa ding in belh ding innpi tawntung nuntaakna innpi ka hihi. 

7. Nisim in na innpi nong mangngilh kei ding uh hi. ka innpi sung ah na khempeuh ki cing hi. 

8. A taisan a nusia te aa ding in a muanhuai nuntaakna a om kei hi. 

9. Nangmaa aa ding in nisim zawhna nipi hongsuak den ka hihi. 

10.A mial nuntaak na pan nipi suak bang in nuntaak tawntung na lampi nopsak na gam ah hong paisak ka hihi. 11.Nuntaakna lampi hong zui te ka nuntaakna tui kapia aa, haksatna a thuak hun ciang in tawldam na ka pia ding hi. 12.Gilkial dangtaakna a thuak mite huh in ka len tawntung ding hi. 

13.Kei hong um taktak te in ka khasiangtho nuntaakna sung ah na om uhhi. 

14.Hong um taktak mite in ka nuntaakna sialo in na sia kei ding uh hi. 

15.Van leh lei ka bawlsa na te tungah ka khawl kei ding aa, kei tawh hong ki zom te tung ah zong kong itna ka khawl ngeikei ding hi. 

16.Note in vantung pan leitung ah ka khasiangtho tawh a pai na hih man un ka bawlsa na te khempeuh tawh ka min nong phat ding uh hi. 

17.Leitung ah na huntawp dong ka min nong phat ding uh aa, na zawh khit uh ciang in kei kiang ah nong ciah ding uh hi.

NUNTAAKNA THU SIANGTHO (132) 

Phat den ning 

1. Na lunggim mahmah hun laitak in kong honkhia hi. 

2. Na lunggim mahmah aa kua mah dang na belh ding omlo, hong hon ding leh hong huh ding a om loh laitak hun in thupi tak aa nong phawk tawntung na ding un ka nuntaakna tui kong pia hi. 

3. Na lunggim mahmah hun uh hong tun ciang in note kiang ah om hun nong pia uh hi. 

4. Tua hun nong piak sung un kong zawh pih hi. nisim in kong mu aa kong thei hi. 

5. Lungsim tawngnung pen tawh hong zuan aa nong phawk uh ciang in manphat na haung sungah taksa ten na gam a nei theilo nopna tawh hong zuan hong keem ka hihi. 

6. Leitung na hunbei dong in ka min nongphat ding uhhi. 

7. Hun tawp dong a bei theilo nongphat na un note sih nawnloh na gam tawntung nuntaakna duhna leh kialna a om nawnloh na gam ah siangsawn na Pa Pasian tawh ih nungta tawntung ding hi. 

8. Cikmah hun in hong nusia ngeikei ning, hong taisan ngeikei ning, ka pa kiang ka pai na ding lampi bang zahtak in hong ki khak zong in lau in ka taisan ngeikei ding aa, ka Pa Pasian ka muh dong ka zuan ding hi, hong ci te tawntung nopsak na kham lukhu ka khu sak ding hi. 

9. Kei kiang hong zuan te in leitung mipil te muh zawh nailo vantung pilna thupha te na luah lai ding uh hi. 

10.Haksat na in hong ze-et laitak lampial lo in hong pai suak mi te in a mau bulphuh khensat na masuan te vantungmi in kawk in a uk pih ding aa, ka zo sak ding hi.

NUNTAAKNA THU SIANGTHO (133) 

Vangliat na awging 

1. Khasiangtho vangliat na awging ngai un, A lungngai te in na za ding uhhi. 

2. Lei leh van ah ki-itna a bei sak ding meeipi bang in hong kaai ding hi. 

3. Leitung pilna leh hauhna a suang te in vantung ki-itna hong khen kham ding uhhi. 

4. Tua laitak in khasiangtho Pasian aw, ci-in hong lungngai te in nong phawk ding uhhi. 

5. Kei hong phawk tawntung te in kei tawh innkuan khat ih hi aa, vantung lungsim hoihna leh pilna thupha tawh kong ompih ding hi. lungngaihna a siamte nopna sungah ih om ding hi. 

6. Kei hong umlo hong taisan mite kiang ah na pai kei ding uhhi. a bei theilo itna te na keem ding uh hi. 

7. Kei hong phawk te om na gam ah gamdai in gal aa ki muh na te a bei ding hi. 

8. Note tang in na gal te ka sim ding aa, na natna te khempeuh uh a bei na ding in ka nuntaakna tui na zang ding uhhi. 9. Nopna kicing thupha om na gam hong piang ding hi. 

10.Ki-itna a khenkham leitung lungsim ki liatsak na a nei te in kei hong taisan lo te tung ah, vanglian Pasian khut, na tung ah om hi ka lungdam hi hong ci kik ding hi 

11.Ka bawlsa singkung lopa te dum dikdek in leitangh te hong ki ko ding aa, gah Lun tampi gah in paak Lun tampi hong paak ni ciang nopna gam lianpi ihhi ding hi. 

12.Nong sapna awging te ka hong dawng ding aa ki-itna a nei mi khempeuh leh kei hong phawk tawntung mi te aa ding in nopna in guah bang in hong zu ding hi. 

13.Ka zat minam te aw, leitung in no te hang in miza tampi te hing silsial in hong itna uh Hong Lian ding hi. 

14.Leitung in Pasian khut sung ah om hi. mi tampi nuntaakna khuavaaksak zatmi misiangtho te na hi uhhi. hong kici ding hi.

NUNTAAKNA THU SIANGTHO (134) 

Lungsim tawldam na

1.Vantung pan in kei leh ka Tapa hong um taktak mite ka teel ding aa, van aa sang bel vantung siangsawn ka gamnuam ah vanmisiangtho ka suak sak ding hi. 

2. Vanmisiangtho a suak ding vantung minam te lin na leh launa a om loh na mun, dah na leh khitui luanna a om loh na mun ah lungsim tawldam na ka pia ding hi. 

3. Ka teel mi te in bang ding in dah thei ding na hi uh hiam, kong paipih na nong zui ding uhhi. 

4. Kei hong umlo hong taisan te in leitung lungsim nei in ki cin na omlo, dahna leh kahna tawh kidim in lungkim na om ngeilo gimna a thuak ding uhhi. lungleng in a buai tawntung ding uhhi. 

5. A hih hang in misiangtho te in kei hong phawk na uh lian sak semsem in paakpalh tawh na ki bang den ding uhhi. vangliat na awging te na za ding uhhi. 

6. Kei leh ka Tapa Pau Cin Hau a hong um misiangtho ka pawlpi te aw note hong ki muang in hong ki zuan ding aa, a mau te in siatna thuaklo in manphat na zong a ngah zo lai ding uhhi. 

7. Misiangtho khat bekbek hang in haksatna tawh ki pelh in nopna sung ah na om khawm ding uhhi. 

8. Ka thupha piak mi te in ka thupha a thalawh mite tung ah vantung thu khen thudot na hong pia ding hi. 

9. Mawhna tawh ki ciam mite nuntaakna in van leh lei a sia tawh hong ki bang ding hi.

NUNTAAKNA THU SIANGTHO (135) 

Vantung thusim 

1. Van a sangbel na pan no leitung mihing te pian na ding vantungmi na nu leh na pa kong pai sak hi. na pianna nu leh pa in vantungmi nu leh pa a hihi. 

2. Vantungmi te sung ah na khempeuh a kicing nuntaakna ka koih khin zo hi. 

3. Leitung in taksa ten a gam mihing te om na ding in ka bawl a hihi. 

4. Na pianna nu leh pa it aa na sap na te uh vantungmi nu leh pa nuam in kei in note kong it hi.

5. Na nu leh na pa sung ah note nuntaakna ding a ki cing tak in ka koih khin zo hi. 

6. Na itna zah vantungmi itna thupha na ngah ding uh aa, a bei theilo vantung pilna na ngah ding uhhi. 

7. Nasepna khempeuh leh na ngaihsut na khempeuh na nu leh na pa in thu kim ingh, hong cih leh na tung ah vantung thusim a omhi. 

8. A manpha bel nopna gam ah kei tawh a om khawm ding ka neihsa te na hi uhhi. 

9. Na pulak kammal leh nasepna te po in hong gah ding aa, si theilo in no suak den ding hi. 

10.Na nu na pa itna tawngnung pen tawh na sapna in vantung lungdam na a hihi. 

11.Nu leh pa tung ah itna neilo in khitui mal khat na luansak bek in zong na tu khang na ta khang dong ah na nuntaakna minpi mualpi cim tawh hong ki bang dinghi. 

12.Vantungmi nu leh pa it in leitung nu leh pa it aa, na zahtaak uh leh sih theihloh na tawntung nuntaakna gam ah vantungmi nu leh pa tawh na om khawm ding uhhi. 

13.Tua a hih man in nu leh pa a it te in kei leh ka tapa a it na hi uh aa, sih theihloh na tawntung nuntaakna gam ah ih ki mu kik ding hi. 

14.Note hong nei vantung nu leh pa tung ah leitung mihing te nuntaakna ding thupha a ki cingtaak tak in ka koih khin zo hi. 

15.Siangsawn misiangtho te omna van sang bel na mun tawntung nuntaakna sung ah a om khawm ding vantungmi suan leh khak te na hi uhhi. 

16.Vantung thusiangtho um in a zui taktak mite om na ding gam siangtho, Khua siangtho ka koih hi. 

17.Vantung Siangsawn misiangtho te keimaa kiang ah ka sam hi. 

18.Thupha piaksa suan leh khak thupha ngah mi hong tam semsem ding aa, tua ni ciangin kei hong umlo mite in no aiituam Pasian hi kei, mi khempeuh ii Pasian hi hong kici dinghi. 

19.Kei in hong it taktak te bek mah tawh maa pang in ka sem nuam hi. 

20.Vantung nuntaakna thusiangtho ngaihsut a siam mite tung ah ka khawl kei ding hi. 

21.Upna hong gal et mite tawh ka om khawm kei ding hi. nisim in na lungsim khempeuh hong pia un la, hong phat tawntung un. 

22.Ka bawlsa na te tung ah itna zangh un. mi tung ah hazatna, huai hamna na zangh kei ding uhhi. 

23.Duhhopna leh huaihamna te in kei kiang pan hong pai a hi kei hi. dawimangpa tawh ki pawl Galhiam nasepna a hihi. 24.Hong gal et upna neu te in thadah mi a hihi. upna neu thadah mite aw, na khaici tuh te na kham na ngah kei ding uhhi. 25.Upna a siangtho te in gahtam singkung lian tawh ki bang hi. na suan bang in hing in na vawh bang in hong po ding aa, na kaih bang in hong zui ding hi. 

26.Upna a siangtho te in a ki tuancil a ki nenniam mi te hon khia un. 

27.A dangtak mite tui pia unla, a gilkial mite an vaak in nopna gamah nong paipih ding uhhi. 

28.Misiangtho te tung ah nopna thupha a ki dim in ka koih khin zo hi. 

29.Kei hong gal et upna neu upna si te in lunggim tawntung na mun ah a om hi.

NUNTAAKNA THU SIANGTHO (136) 

Sapna aw te ka dawng ding 

1. Leitung mihing te nuntaakna pian leh khan a ki khek na ding in ka Tapa kong pai sak hi. a lui na khempeuh pan a thak nuntaakna a pia ding in leitung ah kong sawl hi. 

2. Ka Tapa in a nuntaakna a ang laizang ah note hong koih in nuntaak thak na lam ah hong paipih hi. 

3. Vantung thupha piak suah na leh ka gamnuam na luah na ding un kei maipha hong musak ka Tapa nuntaakna a hihi. 

4. No leitung mihing te khanggui ki zom aa, thupha piak minam na hih na uh thuciam hong kip sak ka Tapa a hihi. 

5. Pa Pasian aw kei nang tawh om khawm tawntung nuam ingh, hong ci te tawh ka om khawm ding hi.

 6. Ka maipha hong mu mite tawh maa ka pang ding aa, a tu a ta khang dong ah ka om pih ding hi. Pa aw nisim in hong keem in la, hong huh tawntung in. 

7. Nisim in cidam na leh nopsak na hong pia inla, hong mangngilh ngei kei in. na nuntaakna sung ah hong om sak den in. 

8. Nang mah bang in sih nawnloh na mun ah hong paipih inla, hong len in. 

9. Nisim in ka cidam na ding leh ka neek ding an ka kham ding hong pia tawntung in. 

10.Ka gal te hong zawhpih den inla, hong huh tawntung in hong ci mite tung ah nong sapna aw te kong dawng ding hi. 

11.Vantung thusiangtho pilna a nei mi hong tam semsem ding aa, tua te tawh ki gawm in nong it mahmah ni hun hong tung dinghi. 

12.Tua ni ciang in kei nong zangh thei ding uh aa, leitung ah mipil te hong kici ding hi. 

13.Vantung thusiangtho nuntaakna thuthuk a nei te tung ah vantungmi te in a kamciam na bang in a sem ding uh hi. 

14.Nisim na hun neih khempeuh uh hong zasak un. leitung minam khempeuh te nuntaakna ding lampi kong suak sak ding hi.

NUNTAAKNA THU SIANGTHO (137) 

A masa pen piakkhiat na 

1. Ka Tapa in hunlui nuntaakna pan vantung thusiangtho nuntaakna lam ah hong paipih hi. Nangmaa sungah vantungmi te pilna hong pia hong guan hi. 

2. Sih nawnloh na tawntung nuntaakna a nei na Pa Pasian tawh hong ki musak, note it tawntung na hong nei ka Tapa a hihi. 

3. Nisim in a masa penpen piak khiat na hong nei mite in nuntaakna lampi kalsuan na a hihi. 

4. Leitung ah nuntaakna ki cing khan sauna na deih uh leh a masa penpen in kei hong phawk tawntung unla, a masa penpen piakkhiat na hong nei un. 

5. Thupi ka sak te thupi sa unla, ka it khempeuh te it un. na gal te na ngawn lungkim sak un. 

6. Tua ni ciang in kei ma maipha hong mu te na hi ding uh aa, vantung ka thupha meel hoih na nam khempeuh tawh kong zuun ding hi. 

7. Note itna ka nuntaakna khut kuak muanhuai sungah nisim in kong keem tawntung hi. 

8. Na khan na sau sak nop aa nopna thupha na deih leh ka bawlsa na khempeuh it unla, kei maa tung ah nisim in lungdam tawntung un. na nu na pa it unla zahtaak un, mite mawhna te maisak inla, thuk kik kei in 

9. Tua thu hong khen ding vantung ah keimah na Pa Pasian ka om hi.

NUNTAAKNA THU SIANGTHO (138) 

Zawhna mualsuang 

1. Leitung ah ka thupiak na bang hong zui ka thu hong mang mite na nuntaakna hun na neih te khempeuh uh ka zangh ding hi. 

2. Na omna khempeuh nopna gam suak ding hi. 

3. Misiangtho khat bek nuntaakna in zong a dang mi pawl te nopsak na ngah sak zo lai ding hi.

 4. Thupha piaksa suan leh khak misiangtho te in pilna nei milian te hi. hong kici ding hi. 

5. Misiangtho thupha ngah minam te in keimaa tate a hihi. 

6. Vantungmi ci leh sa suan leh khak misiangtho vantung minam te pilna in vantungmi te tawh nasem khawm te a hihi.

7. Tua vantungmi te pilna in leitung mi te pilna tawh tehpih theih ding omlo hi. 

8. Misiangtho te vantungmi te pilna tawh nasepna in nopna gam hong piang ding hi. 

9. Mipil te in Pau Cin Hau gen sa hi ci-in ka thu nakpi tak in hong ki kan ding hi. 

10.Tua ni ciang in lei mong khat pan mong khat, gam mong khat pan gam mong khat dongh ah lungdamna zawhna mualsuang ih phut ding hi. 

11.Ka thu in leitung ah ki zel in hong zaam ding hi.

NUNTAAKNA THU SIANGTHO (139) 

Liim leh gah 

1. Nu leh pa itna zahtaak na a pia mi te in liim leh gah nei belh ding innpi tawntung nuntaakna a nei na hi uh hi. 

2. Kei hong zuan in hong bel hong muang taktak te in belh ding innpi na nei uh aa, liim leh gah a nei singkung in a belh tak mah bang in nisim nek ding ki cing in nopsak na tawh na ki dim uhhi. 

3. Kei maa khasiangtho daikaih na huang sung ah hinsawt khansau nopsakna tawh na lungkim zah na om ding hi. 

4. Keimaa daikaih na huang sung ah a om te in nisim in kei tawh a om khawm ih hi aa, liim leh gah nei nuntaakna bulpi tawh a om khawm na hi uhhi. 

5. Keimaa daikaih na huang sung pan khuadak in a paikhia te in sap kik na ka pia kei ding hi. 

6. A mau te in a belh ding innpi nusia in a taisan a hi uhhi. nisim nong ngaihsut na in kei tawh a ki nai semsem na hi uhhi. 

7. Kei hongzuan mite ka len tawntung ding aa, na ansal hawm ngeilo in a dim tawntung ding hi. 

8. Kei tawh a om khawm tawntung te in leitung ah khansau in a nuamsa ding hi. hinsawt na leh meel hoihna zong ka hihi. 

9. Vantung hoihna in na ngaihsut na te na ngawn zangh in ka tangtung sak hi. 

10.Thaman ngahlo mizawng te in leibaa tawh a ki dim ding hi. 

11.Zuauphuah na, thumaan lo gamtatna, gensiat na, siatna ding aa ngaihsut na tawh sep khiat na in vantungmi tawh kizop na ka pia kei ding aa, vantungmi tawh a om khawm thei kei ding hi. 

12.Tua bang mizawng te in manphatna a nei kei ding uh hi. 

NUNTAAKNA THU SIANGTHO (140) 

Khaa hopih na 

1. Vansang bel aa om vantung Pa Pasian nong hopih na aw khasiangtho in za in zaknop ka sa hi. 

2. Ko na ta te in nang maa mipawl, nangmaa minam, vangtungmi suan leh khak te nong itna thu mihing piancil pan ki pan kong muzo kei uhhi. 

3. Na khaici te kai khawm in mun siangtho nong pia hi. 

4. No te in keimaa hopih na te tel zolo in ka bawlsa na te kei sang in thupi nasa zaw uhhi. 

5. Ka bawlsa na te lamdang na sak te uh kei sang in na it zaw uh aa, thupi na sa zaw uhhi. 

6. Leitangh, tui, mei, nitang te bia in na om laitak un khasiangtho hotkhiat na thu kong pia hi. 

7. Khasiangtho tawh kong hopih na in vantungmi thupha piaksa te na hi uhhi. 

8. Vantungmi thupha piaksa te kua mah in dem zolo ding hi. kei sialo in amau te zong a sia kei ding hi. 

9. Misiangtho te kamciam bang in vantungmi in dawng ding hi. 

10.Keimaa sung ah a nungta khasiangtho tawh ka hopih ka ta te in ka bawlsa leitung hauhna sum leh paai te sang in vantung vangliatna lungdam na thu itna hong lian semsem dinghi. 

11.A mau te a ding kisapna omlo tawldam na leh uk zawhna ka pia dinghi. 

12.Leitung nopsak na sang in kei hong it hong phawk tawntung te tungah, ka bawlsa na te luah in la nei in, ka ci dinghi. 

13.Leitung hauhna sum leh paai, ngun leh kham te sangin vantung lungdam na thu a it zaw te tung ah lungdam na thu luah in ngak ta un ka ci ding hi.

NUNTAAKNA THU SIANGTHO (141) 

Nuntaakna khutkuak 

1. Ka thuzui mi te nopna huanpi a nusia te in nisim lunggim haksatna a thuak dinghi. 

2. Tu in dawi mangpa leh a pawl te lam khak na, ze-et bawl siatna a thuak te aw, kei tawh a thuak na hi uhhi. 

3. Lau kei un ka tapa zawh bang in a zozo ding na hi uhhi. 

4. Ka tapa nuntaakna khutkuak sung ah a om te aw, ze-et bawlsiat na thuak laitak un kei in nangmaa lam ah ka om hi. 

5. Na pai na lampi a ki khaktan khempeuh kong pelh sak ding aa, misiangtho ten ih zo teitei ding hi. 

6. Lei leh van ih uk ding aa, ka tapa zawh bang in ih zo ding hi. 

7. Keimaa min tawh haksatna na thuak laitak un, keimaa zawhna hong piang dinghi. 

8. Vantung siangsawn nuntaakna sih nawnloh na, tawntung melhoih na nam khempeuh tawh kong zem dinghi. 

9. Na pulak kammal leh nasep khiat te melhoih na nam khempeuh tawh ka zun dinghi.

NUNTAAKNA THU SIANGTHO (142) 

Lungdam na thu 

1. No te sung ah ka nuntaakna khasiangtho a om ciang in no te tawh ka ki lawm hi. Leitung mihing te nuntaakna a thak ah ih paipih ding hi. 

2. Tui duh daktak, duh leh kial haksatna a thuak mi te tung ah vantung nuntaakna tui ih pia ding aa, a mau te ei tawh ki bang in hing silsial nopna tawh maitai na ih pia ding hi. 

3. Ka thu a theilo a zalo mi te tung ah lungdam na thu ih gen ding aa, a mau te in ei tawh ki bang in lungdam na thu a gen ding uh hi. 

4. Nisim in ka nuntaakna lampi hong zui tawntung un. 

5. Kei hong mangngilh sak gualnop na, ki liatsak na kidem nopna lungsim a nei lam khial mi te om na ah na pai kei ding uhhi. 

6. Dawimangpa hong zol na zu na ne kei ding uhhi. 

7. Vantung lungdam na thu hang in nopna gam thak hong piang dinghi. 

8. Leitung ah minam ngeina ciat tawh phatna late sa in nuam na thu te ki tangko ding aa, lungdam na thu gen in ka minphat na hong lian semsem ding hi. 

9. Leitung in ki itna gam hong suak ding aa, ka bawl sa na te nuntaakna nopsak na pha in ka zangh dinghi. 

10.A bei theilo lungdam na thu na gen ding uh aa, leitung na hun tawp dong nop na thu piang dinghi. 

11.Kei kiang nong tun uh ciang un leitung ah na bawlsa thupha te vantung pan uk kik un la, tua ni ciang leitung mihing te aa ding in misiangtho nasepna hong lian semsem dinghi. 

NUNTAAKNA THU SIANGTHO (143) 

A siangtho nuntaakna

1.Leitung u leh nau lungsim tawh ka min hong phat te in vantung thu siangtho zuihna tawh a ki tuak kei hi. 

2. Leitung u leh nau lungsim tawh kei hong zong te in na puak uh gimna te na lel mahmah ding uhhi. 

3. Lungsim vangik te na puak ciang in thuak zawh hatna na nei ding uhhi. 

4. Leitung hong uk kumpi te zong keimaa sawl keimaa pian sak a hihi. 

5. Kei in kumpi te kumpi na khempeuh a piang sak Pasian ka hi aa, a tawntung in vantung siangsawn ah ka om hi. 

6. Kei upna sung ah a nungta lo leitung na u na nau leh midang te tung ah na puakpih lungsim vangik te na lelh ni ciang in kei hong nial kei un. 

7. No deihna tawh ka thu um kei un la, ka min hong suang kei un. 

8. Kei hong nial in ka lam hong khak te tung ah kei in a mau lam ka khak ding hi. 

9. A tawntung nopsak na a deih te in ka tapa nuntaakna sung ah na om ding uhhi. Ka tapa hong hilh na bang in zui un la, kei nong um ding uhhi. 

10.Ka tapa a um mi te in leitung mi te khempeuh nuntaakna pian leh khan ki khek sak ding hi. 

11.A siangtho nuntaakna tawh nopna lam ah hong pai pihhi. 

12.Vantung thu siangtho a zui te in leitung minam khempeuh tung ah vantung lungdam na nasep khiat na te vantungmi te nasepna hong piang dinghi. 

NUNTAAKNA THU SIANGTHO (144) 

Lungsim vangik ki suah khia 

1. Leitung minam khempeuh in ka minphat ding in leitung ah a om na hi uhhi. 

2. Tua te lak ah keimaa vangtung thu siangtho leh khasiangtho Pasian hong mu mi te kei maa sung ah innkuan u nau na suak ding uhhi. 

3. Khasiangtho tawh a nungta mi te in vantung thaman a ngah mite na hi uh aa, no te u nau innkuan na hi uhhi. 

4. Khasiangtho tawh a innkuan te in kei mah na pa Pasian tawh a ki lawm na hi uhhi. 

5. Pa Pasian tawh a ki lawm te in namtui in hing silsial uh aa, leitung ah khansau in a ngaihsut na te vantungmi in thu kim pih hi. 

6. Lungsim hoihlo aa mi zo nuam te tung ah a nuntaakna khuamial in a gamtatna te nin bang in a kih huai hi. 

7. Nin bang in a kih huai ngaihsut gamtatna a nei te in samsiat na a ngah khuamial na gam dawi mangpa om na a tung ding hi. 

8. Dawi mangpa in a nin a kih huai lungsim leh gamtatna a nei te pakta mahmah aa, misiangtho te mawhna zong in susia den hi. 

9. Mi hoihlo lungsim sia te lingkung tawh ki bang hi. 

10.Khasiangtho tawh a om khawm mi te ii a puak lungsim vangik te ka suah khia ding hi. 

11.Leitung haksat na te pan lungkia lo in kei hong um tawntung te zuihna lampi in siangtho tawntung hi. lampi maan tawn in khial ngeilo hi. 12.A siangtho lungsim leh gamtatna a nei te in a meel hoih mahmah nuntaakna a hihi.

NUNTAAKNA THU SIANGTHO (145) 

Lelh na omlo 

1. Kei upna taktak tawh kalsuan gamtat khiat na in na lunggim na te bei in dahna khitui te nuamna khitui hong suak ding hi. 

2. Ka tapa in hong sawpsiang sa misiangtho te a lui na khempeuh pan a thak nuntaakna ah len in hong paipih hi. 

3. Itna a sang bel tawntung nuntaakna hong pia siangsawn tung aa tuang na khempeuh a piangsak kei mah Pasian hong nei te in lelh na om nawnlo ding hi. 

4. A nuntaakna te khuavaak tawntung in a tee diamdiam hoihna te tawh nungta ding hi. 

5. Nuntaakna huanpi sung ah gah namkim te tawh om khawm in vantung ah nong ciah ni ciang un vanmisiangtho vantung thaman a gah na ne khawm ding uhhi. 

6. A mau te in kei hong itna uh liansak semsem in nuam a sa mahmah ding uhhi. 

7. Kei tawh a om khawm tawntung te in a vaak tawntung nuntaakna ah a om khawm ka hi uhhi. 

8. Na paina ding nuntaakna lampi te konghilh bangin zui un la,kong gen bangin hong mang un. 

9. Kei leh ka tapa in hong len tawntung ka hi uhhi. 

10.Kei tawh a ki gamla te in ka piaksa te tawh ki liatsak na lungsim nei in dawi mangpa tawh ki pawl gualnop na leh duhhop huaiham na tawh mihing te lungsim guh natna pia uhhi. 

11.Misiangtho te in kong piaksa thupha te tung ah leitung mihing te aa ding in nuntaakna lampi na hi ding uhhi.

NUNTAAKNA THU SIANGTHO (146) 

Nuntaakna lampi 

1. Leitung minam khempeuh vantung phatna hong nei mihing te lakpan ka tapa in no te kiang ah gamtat, meel leh sa ki suun in kong pai sak hi. 

2. No te hotkhiat na thu tawh hong kalsuan pih in vantungmi te tawh nuamsa khawm ka teel minam te na hi uhhi. 

3. Ka tapa ka kamsang lian pipa no te tawh kong om khawm sak hi. ka tapa deih na bang thupha piakna gam in a maa patsa khuapi lian a hihi. 

4. Ka tapa hong paipih na lampi in thumaan thutang nuntaak tawntung na lampi hi. 

5. Innkuan ki-it in nopsak na a pian na ding in nuntaakna khuavaak thupha puak ka tapa a hihi. a mah simloh leitung ah note hong honkhia ding kua mah a om kei hi. 

6. Tu in lampi khial ngeilo in nopna gam ah hong paipih hi. 

7. Haksatna na thuak laitak un khasiangtho galhiam, vantungmi te thahat na tawh a hong zawhpih ka tapa a hihi. 

NUNTAAKNA THU SIANGTHO (147) 

Hong teel misiangtho te 

1. Van sangbel siangsawn Pasian vantung hoihna nam khempeuh it in a ngai mi te tung ah vantung kham lukhu hoihna leh namtui na tawh ki zeem hi. 

2. Ka thupha piak na gam thupha piakmi teeltuam misiangtho te nuntaakna manphat na sung ah hong nei hong kem tawntung ka tapa a hihi. 3. Ei vantung minam misiangtho ka pawlpi te aw, khasiangtho thahat na la un, khasiangtho thahat na in na gal khempeuh hong zawhpih vantung thahat na a hihi. 

4. Khasiangtho galhiam thahat na a nei te in keimaa maipha mu aa midik mahmah vantung innkuan te ih hihi.

5. Vantung innkuan te in ka tapa khutkuak muanhuai sung a taklam aa hong teel, thupha piak suan leh khak vantung minam, vantungmi ci leh sa a suak misiangtho te ih hihi. 

6. Misiangtho tein nongkoh thu te leh na thuciam thu te uh vanpan kip in lei ah a piang ding hi. 

7. Note in ka tapa lungsim leh ngaihsut na te a tawntung in na suun ding uh hi.

NUNTAAKNA THU SIANGTHO (148) 

Nuntaakna khuavaak 

1. Koi mun ka pai zaw diam, koi ah ka nuntaakna khuavaak ding hiam? 

2. Ka nuntaakna kua in huh in hong kem zo ding hiam, ci-in vantung thusiangtho lungdam na thu a tello mi te in nakpi tak in a buai mahmah ding uhhi. 

3. Tua bang mi te khasiangtho aw tawh ka sap hang in a za pak thei kei uhhi. A mau te nuntaak na ding lampi zong ka hilh hang in thupiak kik hilhkik na zong a tel zo kei uhhi. 

4. Kei simloh lungsim dang a nei te in lungdam na thu a za kha kei uhhi. 

5. Siangsawn munnuam gamnuam ah a pai te in hing silsial in maitai na tawh nuam sa mahmah uhhi. 

6. Tua te kiang ah nopsak na leh khansau na a tu a ta khang dong ah ki zop tawntung na ding in ka en kik ding hi. 

7. Kei simloh a dang lungsim a nei te in hong taisan in hong gal et tawh ki bang ding hi. 

8. A hing silsial siangsawn nuntaakna keimaa kiang ah nong pai ding uhhi. 

9. Van a sangbel Pasian a minthang hen, lei mun khempeuh ah ukna gam piang hen, hong ci te tawh ka om khawm thei bek ding aa, tua minam te tung ah uk zawhna vantung pilna ka pia ding hi. 

10.Ka piak pilna te hang in leitung mihing te in keimaa kiang zuanlo pi in vantung pilna leh ka thupha deih in hong ki phul hong ki tuh ngeingai ding uhhi. 

11.Thupha deih te pia ding cih a hih hang in itna taktak tawh hong zuan mite ka pia bek ding hi. 

12.Misiangtho te in gamgi neilo in nopsak na paisuak lei mong van mong ah ki zeel ding hi.

NUNTAAKNA THU SIANGTHO (149) 

Lungsim ki tamzan 

1. Hong huh ding omlo vangik pua aa na lelh laitak khitui kang zah dong na lungsim hong ki tamzan ciang in Pa aw hong ci te a tung pan a puak vangik te ka suah khiat sak ding hi. 

2. Tua laitak na mai ah hong en na pa Pasian ka om hi. 

3. Leitung lungsim vangik te na puak zawh lai teng un kei nong mu kei uhhi. 

4. Maizum na te khempeuh nusia in nong phawk na uh lian mahmah ding hi. 

5. Ka tapa min suang in nong nget na te za in ka hong dawng ding aa, nong muh na pan na vangik te hong suah khia ka hihi. 

6. Tua laitak in na gal te in that ding in hong pai a hi zong in maizum na leh haksat na te khempeuh suah khia in ka min nong phat ding uhhi. 7. Na sung ah vantung ka khasiangtho tawh hong ompih in leitung aa na gal te khempeuh kong zawhpih hi. 

8. Tua ni in misiangtho te gal hiam vantung khasiangtho thahat na tawh kop in zawh ni a hihi. 

9. A tawntung in na masuan ah kong ompih na te na phawk tawntung ding uhhi. 

10.Na thuak na puak gimna leh haksat na te khempeuh lel in na pai laitak kong suah khiat sak aa, tua vangik te a zozo ih hihi. 

11.Tua bang mah in haksat na a thuak te tung ah a vangik puak te uh tha khat thu in suah khiat sak kei un, a mau te lungdam thei tuanlo ding uhhi. 

12.Keimaa maipha mu in it tawntung na lungtang, lungsim tawngnung pen hong piak khiat ma dong na suah pih kei ding uhhi. 

13.Lungsim ki tamzan in lungdam na, na muh mateng uh tawl damna na pia kei un. a mau te in hong it tawntung ding thupi zaw hi. 14.Keimaa thu siangtho tawh ki tuaklo, deih bawl in deihsak na tawh na gen pih kei ding uh aa, vantung thusiangtho thumaan taktak hong muh ciang in ih suah khia pan ding hi. tua hi leh lungdamna pai suak hong nei ding hi.

NUNTAAKNA THU SIANGTHO (150) 

Lampi nuam 

1. Khasiangtho thumaan na a nei innkuan upna u nau in na om laitak leitung ci leh sa leitung ngeina a deih vantung thu a nial mi pawl khat in hong simmawh hong nial in hong ko ding uhhi. 

2. Vantung siangsawn innkuan leh unau te sungah hazat na leh bawl siat na, ko na khemna leitung mihing pawl khat in hong nei ding uhhi. 

3. Tua ni ciang in vantung siangsawn khasiangtho tawh innkuan te tungah lam hong hilh in lampi nuam hong zuisak hong tawn sak ding hi. 

4. A ki khak tan zolo upna a siangtho hong nei mi te tung ah a nuntaakna uh khuavaak in a nuamsa ding uhhi. 

5. Nuntaakna thusiangtho a lang khat ah tawntung gimna om hi. 

6. Dawi mangpa deihna duhhop huaihamna, nenniamna deidanna, ki liatsak na lungsim a nei te in a puak vangik pua cip in ki totcilna kulhpi sungah a om hi. 

7. Vantung nuntaakna thusiangtho gal khat ah dawi manpa in vantung thusiangtho tawh ki pelh tawntung na ding in misingtho te lam khak tawntung uhhi. 

8. Misiangtho pawlpi te aw, dawi mangpa phung leh nam ki deidan na kulhpi sung ah kua mah na pai kei ta un. 

NUNTAAKNA THU SIANGTHO (151) 

Tawldam na 

1. Ka tapa kamsang lian pa Pau Cin Hau nuntaakna in khuamial khempeuh khuavaak sak in nuntaak haksat gimna a thuak mi khempeuh tawldam na hong pia hi. 

2. Nuntaakna khuamial te a ding in nuntaak tawntung na khuavaak a hihi.

3. Leitung mihing te in dawi mangpa hong zol na leh hong khem na sungah nasep khiat a piang te khempeuh dawimangpa biakpiak na in a bei hi. 

4. Dawi gilo te in nisim in mihing te lungsim ki itna leh hehpih na te bei sak hi. 

5. A mau te kiang ah pai theih na ding ganhing sisan a deih uhhi. 

6. Dawi te in a mau sang in lian zaw aa thupi zawk na ding hong deihlo a hih manin khat leh khat tung ah ki thu neih sak na hong guan hi. 

7. Kei mah in ka tapa note kiang ah khuamial nuntaakna te a bei sak ding in hotkhiat na thu kong pai sak hi. ka tapa in tawntung nuntaakna thu hong pia khin hi. 

8. Leitung mihing te in ka thu siangtho pha takpi in zui theilo na hih man un na theihloh te khempeuh uh a hilh ding in hilhkik zatmi kong pai sak hi. 

9. Kong hilhkik na thu siangtho in nungta tawntung in sih nawnloh na gam vantung siangsawn ah hong paipih hi. 

10.Kei lam ah hong ciah te in leitung ki do na, gal bang in ki muh na te khempeuh niliap bang in hong tum ding hi. 

11.Note ansal in kei mah ka hi aa, nisim an na kham ding ka koih tawntung hi. 

12.Kei hong it aa ka bawlsa na khempeuh tung ah kei hong phawk tawntung te in nisim in na nek ding ansaal ah an dim tawntung dinghi. 13.Lungkham na leh dahna om nawnlo gamnuam kicin na mun ah manphat na nam khempeuh tawh ih om khawm dinghi.

NUNTAAKNA THU SIANGTHO (152) 

Hun kikhek ding 

1. Mittaw, khelbai, bengngong, khuazalo te na nuntaakna uh haksa a hih hang in kei hong it aa hong taisan lo te tung ah maa ka pang dinghi. 

2. A taang tawntung lungdam na kong pia ding aa, a vulsa nuntaakna te hong nosuak in dawn hong suang kik dinghi. 

3. Na nuntaakna uh paakpalh tawh ki bangin meel hoihna nam khempeuh tawh ka zeem ding hi. 

4. Na tu khang na ta khang dong ah nopsak na hong lian semsem dinghi. 

5. Nuntaak haksat na a thuak khelbaai bang in a om mi te kiangah hun ka khek dinghi. 

6. Meeipi tuamcip bang siat na te la khia in na nuntaakna tung ah ka thupha guah bang in hong zu dinghi. 

7. Tua ni hun ciang in na thuak khitui te nuamna khitui in hong luang dinghi. 

8. Mi khempeuh tung ah na nuam na leh na lungdam na khaici na vawh ding uhhi. 

9. Vantung lungdam na thu in khat sang in a tamzaw lungdam na ka deih hi. 

10.A kiplo itna leh upna neilo te tungah vantung lungdam na thu na mu sak ding uhhi. 

11.Tua ni hun ciangin na ten na ding kham khuapi ah hong paipih in nitum ngeilo tawntung nuntaakna huanpi sung ah eite nungta in nopna gam zuan in ih pai dinghi. 

NUNTAAKNA THU SIANGTHO (153) 

Lungdam khawm ding 

1. Misiangtho te aw leitung minam khempeuh te tungah vantung lungdamna khaici vawh ta un. 

2. Lungdam na thu a hong um taktak mite tung ah ka nungta ding hi. 

3. Tua ni ciangin leitung minam khempeuh tawh ih lungdam khawm dinghi. leitung minam ngeina ciat tawh minphat na ka deih hi. 

4. Kei in leitung gualnop na tawh note ka hong zong kei hi. upna thumaan gamtatna tawh kong zong masa hi. 

5. Thumaan lo gamtatna a nei te tung ah vantung ka tapa thaman nopsak na pia leng misi tampi tak om dinghi. 

6. Thumaan lo gamtatna anei upna si, kei hong taisan te ka thupha pia hi leng, ki manna omlo in sihna piang dinghi. tawntung nuntaakna zong a ngah zo kei ding uhhi. 

7. Keimaa teel minam te tungah lei leh van nopsak na kip tawntung dinghi. 

8. Teek in a om hun ciangin zong a ciangkhut na ngawn khasiangtho thahat na hong piang ding aa, nuntaak tawntung na khuapi sung ah ka ompih dinghi. 

9. Ciangkhut khun in a teek te zong a ciangkhut tawh a kawk na tantan kam ka ciam dinghi. 

10.Na teek ciangin a kiam hilo aa, khasiangtho hatna in a khauh semsem dinghi. 

NUNTAAKNA THU SIANGTHO (154) 

Pasian lamkhak te 

1. Vantung, leitung, ni, kha, aksi te ka bawl hi. ka bawlsa na khempeuh tung ah zat theih ding in kong itna zah tawh ka hong pia hi. 

2. Kong itna in no te a ding in piakkhong thupha a hihi. kong piaksa te tung ah nuamsa in na om laitak un nong mangngilh uhhi. 

3. kei leh ka zatmi ka nasem te tung ah ka thu nial in nong simmawh uhhi. ka thu hong simmawh ka lam hong khak te in itna leh hehpih na a ngah zo kei ding uhhi. 

4. Leitung buaina ki liatsak na lungsim te a bei ciang in no lam ah ni bang in kong suak dinghi. 

5. Ka thunial, ka thu langpang, ka nasepna lamkhak, nuntaakna khuamial sung ah a om te in, itna a thalawh na zah uh ki sikkik na a lian pen tawh hong sap uh ciang in ni bang in a suak ding ka hihi. 

6. Khua hong mu ding uh aa, nopsak na te a mau tung ah zekai mahmah ding hi. tua a hih man in na tuk laitak na thawh ding zekai kei in. 

7. Ka thu hong nial teitei te ka aang pan a pai khia ding uhhi. kei hong umlo a ki neih khem te ka mu kei ding aa ka huh kei ding hi. 

8. Kei a hong um taktak te in keimaa nuntaakna sungah a om hi. kei itna taktak tawh hong um te in nisim in na gal te khut sung pan kong honkhia tawntung ding hi. 

9. Linna leh launa, dahna tawh na ki pelh ding uh aa, keimaa nuntaakna sungah ka keem ding hi. lau kei un kei nong up laitak un na gal te in that ding in hong pai a hi zong in kei mah in ka zo ding hi.

NUNTAAKNA THU SIANGTHO (155) 

Vantung hoihna mualsuang 

1. kei hong um taktak itna tawh hong nusia lo, hong taisan lo te kei tawh nungta khawm in siangsawn ta ka tang sak zohi. 

2. Note in keimaa zawhna te pua in ka minthan na leh ka vangliat na sung ah innkuan khat ih hi aa, ei misiangtho te tawh tawntung nuntaakna sungah ih om khawm ding hi. 

3. Ka min hong phat in phatna late sa un. nuamna thu a za nailo khempeuh te tung ah na gen ding uhhi. 

4. Vantung suan leh khak, vangtung siangsawn nuntaakna sung ah na om uh ciang leitung buaina leh haksat na te bei ding aa, vantung hoihna mualsuang hong ki phut dinghi. 

5. Tua nopna gam in bang zah ta in ngaklah huai ding hiam? hong lamen un note tawh ka ki nai semsem dinghi. 

6. Siangsawn nuntaakna sung ah a om mite in innpha a nuam bel ah nong tun ni ciang un keimah tawh taang tawntung nopsak na sungah ih om dinghi. 

7. Nisim in kei hong um in hong lamen tawntung te ka neihsa ka thupha khempeuh tawh a nungta ding uhhi. 

8. Siangsawn sungah na om ciang taanna lamdang te tawh taang in a mial theilo nopna sungah na lung uh kim mahmah ding hi. 

9. Siangsawn ta kong tangsak zo hi. vantung suan leh khak, vantung minam te in leitung ah nuamsa in thupha piak innkuan ih hi ding aa, leitung in khua khat tawh hong ki bang ding hi.

NUNTAAKNA THU SIANGTHO (156) 

Ni suahna lam pan 

1. Note in ka bawlsa ni sang in genteh theih ding a omlo, taanna lamdang te tawh nong up tawntung na ding un ni suah na lam nga in ka min kong phat sak hi. 

2. Nisuah na lam pan khuavaak hong ki pat mah bang in misiangtho te ten na gam in a hing silsial gahlun tampi omna khuapi khat tawh ki bang hi. 

3. Kong thupha piak a hong um mite tung ah dam tawntung na leh hoih tawntung na, taanna lamdang nei a pua bang in hong ki mu ding hi. 4. Misiangtho te a tee zaizai nopna tawh a ki lawm manphat na sungah ih om hi. 

5. A dang mi pawl te in hong zuan ding uh aa, a mau te tawh zong ih ki lawm ding hi. 

6. Tua laitak in ka tapa no lam ah om in hong nai semsem aa, mualmong khuamui kai a zing te khempeuh khua hong vaak sak hi. 

7. Hoih na gam ah hong paipih in nuntaak nopsak na kham khuapi ah hong tun pih hi. 

8. No lamah ka tapa ni bang in hong suak hi. khuavaak nailoh na mun khempeuh mualmong ki sem in taan na gam hoihna gam ah hong paipih hi. 

9. Leitung ah minam khat leh minam khat, gam khat leh gam khat nopna gam khuapi khat hong suak ding hi. 

10.Hih hong pian na ding in kei tawh ki lehbulh up khialhna thu maanlo leh hauh na maanlo gamtatna, ki itna khemkham te lei ah ka khia ding hi.

NUNTAAKNA THU SIANGTHO (157) 

Kei in a masa 

1. Leitung u leh nau in a masa hilo hi. kei in a masa ka hihi. 

2. Leitung u leh nau leitung ngeina tawh a buai, khasiangtho itna a neilo te kei tawh ki gamla in, hong kem hong huh ding vantung nuntaakna hong pia kua mah a om kei hi. 

3. Keimaa kong itna simloh ngal itna a siangtho nei kua mah a om kei hi. kei simloh na tung ah itna hong nei tawntung kuamah na mu kei ding uhhi. 

4. Leitung ah itna dang a zong te in vangik lel bang in huhpa honpa neilo leitung minam te kiangah suahtaak na leh lungnop na, na ngah zo kei uhhi. 

5. Na leitung lungsim khempeuh na suahkhiat uh ciang keimaa kiang ah zuan in nong pai thei bek ding uhhi. 

6. Keimaa kiang hong zuan mite in vantung siangsawn nuntaakna a siangtho tawh nong zuan ding uh aa, kei in a siangtho nuntaakna tawh kong dawn dinghi. 

7. Vantung thusiangtho simloh a dang lungsim a nei leitung ngeina tawh a om mite in, a van puak uh gik semsem lel semsem in a vanpuak in nencip dinghi. 

8. Tu in Pasian tawh gimnam ki bang in a nuntaakna sungah lut ning ci-in a ki telcian mite tung ah huhna ka pia bek dinghi. 

9. A ki nusia theilo lungdam na thu te khempeuh in nang hong maitai sak hi. na omna khempeuh ah na lungkim in leitung ah hinsawt khansau na tawh na ki dim ding hi. 

10.Na muh nailoh lungdam na te zong na ngah ding aa, nangmaa suan leh khak minam te zong hongtam dinghi. 

11.Hih nuntaakna sungah hong kip ding aa, vantung minam lian ih suak ding hi. 

NUNTAAKNA THU SIANGTHO (158) 

A siangtho ngaihsut na 

1. Keimah Pasian in a hoih a thupi, a mannei bekbek ka bawl aa, dawi mangpa in siat na bekbek a bawl hi. 

2. Dawi gilo kha nin te in mihing te kisiat na ding a bawl uh aa, tua in a mau nasep a hihi. 

3. Vantungmi in hoih na bekbek bawl aa, tawntung nuntaakna a nei hi. 

4. Dawi gilo kha nin te in mihing te tawntung lunggim na, hehna leh lungkim ngeiloh na tawh nungta sak in a uk hi. 

5. Kei in nisim in leitung mihing te tung ah a nin leh a siang thu ngaihsut na kong khen tawntung hi. 

6. A siangtho ngaihsut na in keimaa aa hi aa, khanin ngaihsut na in dawimangpa aa a hihi. 

7. A siangtho khaici vawh na in hong gah ciang in nuntaakna a nei khempeuh te a ding cidam khansau na hi aa, a nin khaici vawh na in khantom na a piang sak khaici a hihi. 

8. Khasiangtho tawh na nuntaak ciang in leitung ki liaksak na lungsim khaici vawh te na tung pan kia ding aa, nang tawh a ki gamlat na mun ah na hawl khia ding hi. 

9. Siangsawn nuntaakna sung ah a nungta kei hong um hong muang te in leitung ah a lung uh kim tawntung ding hi. 

10.Nuntaakna siangtho a nei khempeuh te a ding in a thak nuntaakna hun piang tawntung ding hi. 

NUNTAAKNA THU SIANGTHO (159) 

Misiangtho gam 

1. Vansang bel van khuapi, vantung gamnuam pan in vantungmi ngeina tawh leitung ah kong paisak hi. 

2. Van khuapi ka gamnuam pan a pai te in nopsak na huanpi sungah na om khawm ding uhhi. tua thu in keimah vantung kumpipa vaihawm na a hihi. 

3. Lungsim ngaihsut na tawh ki len aa, keimaa sung ah ki-itna unau innkuan nasem te tawh leitung leh vantung ka uk hi. 

4. Misiangtho uk na gam in siatna omlo, gamdai in a nop mahmah na gamnuam a hihi. 

5. Vantung thusiangtho a zui te in leitung mihing te tel zawhloh itna tawh leitung minam khempeuh lakah ka teel minam kong suak sak hi. 

6. Ka teel minam, te ka aanglaizang ah ka pom tawntung aa, ka nuntaakna tui tawh hin na ka pia hi. 

7. Misiangtho te omna in taanna lamdang hoihna khempeuh tawh ka piansak vantung khutma a hihi. 

8. Leitung mipil te bat zawhloh hoihna te nuntaak pih in tua gam pan leitangh khut phamkhat la in a gam ah ciahpih leh nuntaak nopsak na ngah zo lai dinghi. 

9. Tua bang mah in lungsim hoih mipil te tung ah vantung thupha misiangtho thaman kip in nuntaak nopsak na piang dinghi. 

10.Leitung ah keimaa thupha lo tawh a kip bang mah a om kei hi. 

NUNTAAKNA THU SIANGTHO (160) 

Ken note kong tel zo 

1. Lungsim hoih mipha midik te nungta dinghi. keimaa maipha mu in upna innkuan misiangtho te tawh ka nungta ding hi. 

2. Lungsim hoih gamtatna a nei te leh misiangtho te ka khen ngei kei ding hi. 

3. Hong en un nong mu ding uhhi. ken note kong mu tel zo hi. 

4. Tua gamnuam khuapi zuan te lungnop na leh thahatna tawh zuan in hong paipih un. 

5. Lungsim hoih mipha te in leitung ah a ciam khempeuh gah in po dinghi. 

6. Kung lianpi gah leh liim nei in nuntaakna nuamsa mahmah ding uhhi. 

7. Kei hong nial te thadah mahmah uh aa, huihpi tuihual nawk bang in a ki dal zolo nisim buai na phul den hi. 

8. A lungsim ngaihsut na meikuang bang in sa in kisia aa, lunggim na thuak tawntung dinghi. 

9. Midik thupha ngah mite in phatna la te sasa uh aa, a mau te om na gam in gamnuam a suak hi. 

10.Zu leh va te in munnuam gamnuam zuan in a belh mah bang un midik thupha sang mi te kiang ah phatna la te sa in vantungmi te in vantung peengkuul mut in phatna a bawl uhhi.

NUNTAAKNA THU SIANGTHO (161) 

Huih dam te nung hiauhiau 

1. Leitung thahatna masuan in lamkhial mite kei tawh ki gamla in a nuntaakna lampi ah a mau kia a pai tawh ki bang hi. 

2. A mau te teenna inn sung leh a om na khempeuh ah a neihsa te uh hong bei siang dinghi. 

3. A masuan nuntaakna ah a mau kia a pai a hih lam a ki phawk kik ding uhhi. 

4. Thupha ngah mite in keimah tawh kizop na lampi ah lungsim hoihlo te khemna, dawi gilo kha nin te in lamkhak aa, ze-et bawlsiat na haksatna kuampi thuk sung kantan in a pai suak uhhi. 

5. A mau te om na mualsang dawn pan tua khuapi a et suk ciang in huihdam te hong nung hiauhiau, singkung te huang ngelngel in paak te namtui in nuntaakna tui kang ngeilo in a luang hi. 

6. Thatang hatna leh pilna suang in vangik pua aa lungkham lamkhial mi te in tua khuapi a gal et ciang in ka nuntaakna aang sungah a om mi te thupi mahmah in a it huai na a muh bek na ngawn in zong a puak vangik suah khia bang in a za’ang tuam dinghi. 

7. Tua khuapi nuntaakna thu siangtho gal khat ah leitung lungsim masuan in a pai mite,maizum na leh dahna huihpi tuihual nawk bang in vantung lungdam na thu nuntaakna thu siangtho a za kei uh aa, mong neilo in a paipai uhhi. 

8. Vantung thu siangtho thahatna sa’ng a mau thahatna a muang zaw bengngong bang aa om te huh in ka panpih kei hi. 

9. Lungdam na thu a zalo te in a ki suah khialo vangik te tawh paipai uh aa, a gil uh kial hi. 

10.A gilkial te in sepna thaman hotkhiat na leh lungdam na a ngahlo te a hihi. 

11.A mau te in nuntaakna a siangtho khuapi luipi gal khat ah a om te a hihi.

NUNTAAKNA THU SIANGTHO (162) 

Nang tawh ka om khawm ciang 

1. Hong zui ning, kei nang tawh ka nungta hi.tua misiangtho khuapi sungah ka hong zui dinghi.

2. Pa aw ze-et bawl siatna bangbang ka thuak zong in nang tawh a thuak hi peuh leng, itna te nusia lo in ka siasak ngei kei ding aa,hong len tawntung ning a ci te len in kong paipih dinghi. 

3. Haksat na te paltan in damna nopna innpi sung ah ih pai dinghi. 

4. Belh ding dang omlo nang mah ka belh ding innpi khasiangtho teen na innpi ka Pasian, nisim ken nang hong mu ingh, hong lungngai ingh, hong ci te tung ah makaih in leitung khuapi pan vantung siangsawn tawntung nuntaakna dong ah ka ompih dinghi. 

5. Nungta ingh nang tawh ka om ciang nungta ingh, suakta in tawldam na ngah ingh, na aang sung ah ka om den dinghi.ci-in thumaan gamtatna tawh upna leh zuihna a siangtho nisim in a hong pia te tawh lei leh van uk in vantung pan leitung mihing te tung ah vantung minphat na tawh thupha piakna ka zawh pih den ding hi. 

6. Misiangtho te thupha piakna zahzah nopna gam lian semsem ding hi. 

NUNTAAKNA THU SIANGTHO (163) 

Lung gimna te hong veng sak 

1. Leitung nuntaak haksatna khempeuh pua in zatmi khuapi sung ah zuan in ka pai laitak zatmi te maitang ka muh ciang ka lungnuam in ka tawl hong dam sak hi. 

2. Pasian maipha mu ingh ci aa hong it mite, a mau te zuatna misiangtho te taksa luahna gam tua khuapi sung pan ka hong ngak tawntung hi. 

3. Kei in siangsawn mun thak, gam thak, khua thak, misiangtho khua, misiangtho gam uk in ka piangsak hi. 

4. Ka tapa nuntaakna sung ah a om khempeuh te in a mau nuntaakna keimaa sung ah om aa, kei sung ah a om mi te ka keem tawntung hi. 

5. Ka tapa sungah a om mite in a lung gimna te uh bei in a taang tawntung nopsak na, a teek theilo, a kiam theilo ngun leh kham sa’ng manpha zaw vantung hoihna nam khempeuh silh in a ki lawm mahmah uhhi. 

6. Zatmi mai ah ding in ka om ciang ka lungnuam in nisuak bang in ka om aa, a mah tawh ton khawm in tua hoihna in hong ki lawm sak hi. hong ci te tung ah a ki nusia theilo a mau minam te phung cing sak in khangtampi tua hoihna sungah ka koih dinghi. 

NUNTAAKNA THU SIANGTHO (164) 

Lungdam na innpi 

1. Inn pha bel a nuam ah ih pai dinghi. tua inn pha in ki sapna om nawnlo ngun leh kham tawh a ki zeem sa’ng thupi zaw ka minam pih te tawh ka ki lawm hi. 

2. Phatna la sasa ning, gengen ning, lungdam na innpi ka tun ciang nuam in ka ki pak mahmah hi. 

3. Ka ki lawm na te kua in gen zo ding hiam? tehpih ding om kei Pasian tapa hong pai in a mah tawh kei kilawm ingh. 

4. Khuapi khat nuntaakna sang in a lian zaw ka belh ding innpi Pasian tapa a hihi. 

5. Vantung siangsawn khamkhuapi pan taan na lamdang te pua in hong pai Pasian tapa kei a ding in a pha bel nopna hi. 6. Nopna thupha a ngah te in khuapi khat sa’ng a lian zaw a thupi nuntaakna a hihi. khamtung gam ah no na thupha ka vawh zo hi. 

7. Ka min hong phat te in nopna ngah in ka min hong phat nuamlo te in singkung gah theilo tawh ki bang in a mah kia kung ding tawh ki bang hi.

NUNTAAKNA THU SIANGTHLO (165) 

Ka nuntaakna tui manphat na 

1. Leitung aa tui om khempeuh sa’ng in ka nuntaakna tui mal khat in nuntaak thak na thupha piang sak zaw hi. 

2. Leitung aa tui om khempeuh in nuntaakna a nei khempeuh te a ding hi aa, vantung nuntaakna gam luah na ding tui hilo hi. 

3. Ka nuntaakna tui mal khat taak khat in pian leh khan ki khek sak in mawhna te maisak aa, vantung gam luah na ding nuntaakna tui a hihi. 

4. Ka nuntaakna tui mal khat in leitung a tui om khempeuh uk zo hi. 

5. Upna taktak tawh a dawn mite in leitung pan in vantung ah vantungmi suahkik na ding nuntaakna tui a hihi. 

6. Pian leh khan ki khek sak in suahkik hotkhiat na ka nuntaakna tui a hihi. 

7. Leitung buaina te khempeuh uk zawhna ding in ka nuntaakna tui tawh pian leh khan ki khek sak in lei leh van ka uk hi. 

8. Kei upna taktak hong nei te in na sem thei ding uhhi. 

9. Khasiangtho vangtaang lamdang te zong ka nuntaakna tui a tawi a um te in lakkhia in a zangh thei ding uhhi. 10.Leitung aa om tuipi te in mun khempeuh ah ki dim mah bang in khasiangtho vangtaang lamdang te in mun khempeuh tuam in a mel hoih mahmah namkim mit aa muh hong piang khia dinghi. 

11.Mi tampi sihna tui luang bang in a pai te nuntaak thak na sung ah ih pai pih ding aa, a nuntaakna uh a namtui paak hoih te tawh ki bang in hong po in a hing ding hi. 

NUNTAAKNA THU SIANGTHO (166) 

Ka tapa a taisan lo 

1. Leitung ah haksatna tawh nungta in buaina in meeipi bang in hong tuam cip laitak lungkia in a puk te in tapa khutkuak muanhuai sungah a om kei hi. 

2. Haksatna tampi tawh lungkia lo in hong zuan, kei leh ka tapa hong um taktak te in ka tapa khutkuak muanhuai sungah a om zo hi. 

3. Ka tapa a um taktak mite pai na lampi a mah in tonpih aa, ka tapa nuntaakna si leh sa sungah lian semsem in khaa leh taksa tawldam na a ngah pih hi. 

4. Ka tapa a taisan lo te in cik mah hun in a mangthang ngei kei ding aa, tawntung nopsak na a ngah ding uhhi. 

5. Tua hun ciang in a mau te geel na a hun neih khempeuh kei mah in ka zangh ding aa, mi tampi te in a theihloh kaal in a lamdang mahmah in hong mu ding hi. tua ni ciang in note Pasian in hong it phadeuh hi hong ci ding uhhi. kei in kua mah itna ka dendan kei hi. 

6. Haksatna tampi tak thuak in lungsim ki tamzan in na om laitak un, kei hong nusia lo, hong taisan lo, hong beel hong zuan te a huh ka hihi. 

7. Leitung mihing te hauhna leh pilna tawh hong zong masa ka hi kei aa, ki itna midik gamtat na tawh hong zong masa ka hihi. 

8. Lungsim hoih aa midik te a huh ka hi zaw hi.