Siangsawn pawlpi pen pawlkhat te in a tuu tawm aa hongpiang zong sakhathei ding hi. Ahi zong in tua hilo in 1938 kum in Lailui khua ah Pasian kamsang pipa Pasian Tapa Pau Cin Hau leh a nungzui te inn 8 in Siangsawn pawlpi na phut khin zo uhhi. 

A hih hang in hih Siangsawn Pasian thu siangtho zuihna pen tua hunlai aa ding in siangtho lua mahmah ahih man in, khuasung u leh nau beh leh phung a kua ma ciat in kisang zolo in u leh nau kisiat nadong ah hongpia hi. Tua bang haksat na tuamtuam te hang in 1940 kum in hih Siangsawn pawlpi pen hongbei kik suak hi. A hihhang in Pasian in a maa mintawh a phuhsa pawlpi pen tuabang aa bei mangsiang suak ding deih hetlo a hihman ih Siangsawn thuzuih na siangtho hong nuntaak kik theih nading leh a kitel zolo Pasian kammal tampi te hong hilh cian kik dingin Pasian in a kamsang thak leh azatmi Pa, Kam Suan Mang 1995 hong paisak kikhi. Tua ciangin hih Pasian zatmi kamsang pa tungtawn in, 2004 kum ciangin Teeklui khua ah hih Pau Cin Hau Pasian Siangsawn upna hong nungta kik ahihi. 

Siangsawn Pawlpi Kiphuh zia:

Siangsawn pawlpi leh Laipian pawlpi a piankhiat ma in Pasian Tapa Pau Cin Hau thu zui pawlte pen Pau Cin Hau pawlpi a hih kei leh Pau Hau pawl mah na kici pah uhhi. A sawtna ciang in Tonzang pawlpi te in Pau Cin Hau pawl ih ki cih liang sangin Siansiang Pawlpi beek ki ci-ni ci in kithu kim in Siansiang Pawlpi na kici uhhi. Tua thu Lailui pawlpi te in a zak tak uh ciang in Tonzang pawlpi mite in zong Siansiang pawlpi ki ci buang uh ahih ciang eizong minkhat phuak leng hoihlo ding hiam cin thu hong kikum uh hi. Tua hun laitak in Tapa Pau Cin Hau pen Lailui khua ah teng nawnlo in Mualbem khua ah innluah ding in 1922 kum in na pai khinzo hi. Tua ciang in Pu, Vum Khaw Thang Mualbem khua ah Tapa Pau Cin Hau samding in va paihi. Lailui khua hongtun uh ciang in, ih pawlpi minding bang ci leng hoih dinghiam cih dong nuam aa hongsam hi ung a cih ciang in, Tapa in hong dongh na hih uh ciang Pasian deihna tak2 cileng bel Siangsawn pawlpi hi ci in na dawng kik hi. Tua ciang in Lailui pawlpi mite zong Pasian thuzui ih hihmanin Pasian deih a hi Siangsawn Pawlpi mah ki ci pah leng hilo dinghiam ci-in ki thukim taak in na kip sak uhhi. Tua aa kipan Pasian deihna tak2 a zui nuam inn 8 pha in tua inn 8 teng tawh Siangsawn pawlpi pen 1938 kum in Lailui khua ah naphut uhhi.

Siangsawn Pawlpi phut masa inn 8 teng:

1. Pu, Vum Khaw Thang

2. Pu, Lian Khaw Zam

3. Pu, Lian Khaw Vungh

4. Pu, Tun Nang

5. Pu, Ngam Za Cin

6. Pu, Tun Za Thang

7.  Pu, Khup Khua Cin

8.  Pu, Ngam Kai 

Siangsawn Pawlpi hongbei kikzia;

1948 kum Siangsawn pawlpi kiphut khit ciang in Pasian deih na bang hong zui takpi uh aa dawi mangpa deih natawh kituak ih Zo ngeina hoihlo te hong zang nawnlo pah uhhi. Tua ngeina hoihlo ih cih lakah; nopna dahna ah zu leh sa zatna,(kuasah sa, phamawh sa etc.)  cih te aizong a tuamtuam tampi takte hong phiat pah uhhi. Nopna dahna te ah zu leh sa hong zang nawnlo uh a hih man in tua te taang dingin cikhum leh thangkhuai cihte hong zang ta uhhi. Tua ciang in khua sungmi te bek hilo in sanggam u leh nau te naleng in zu leh sa mah ki duh a hihmanin hih thu pen hong sang zolo pah uhhi. 

Tua ciang in mi tampi te-in hih Siangsawn pawlpi te ngeina phiat te ci-in hong gensia bek hilo a bei kik theihna ding in lampi tuamtuam hong sem uhhi. Bang zahtak in hih Siangsawn Pasian thuzuihna hong langpan aa hong bawlsia uh hima cih leh, Pasian ni kikhop na sang innpi ah Pasian minphat laitak in minphat na sangin pen suang khawng tawh hongdeng uh in hong simh(do) uhhi. Tua bang-in khua sung mite in hong simh uh tak ciang in pi Zam Cing zong in, "Ei Siangsawn bek hilo a Siangsawn sawn ding a ut te hive hang", ci-in na sa lua in kikhop na sang innpi mai ah kap damdam ci hi. Tua bang in hong om to2 uh in a sawtna ciang in u leh nau kisiat na dongh ah hong piang tahi. Hih bang in kum 2 sung hong om khit uh ciang in hih Siangsawn thuzuihna pen hamsa lua a hih man in 1940 kumtak ciang in Pu, Deng Hau(Leo) ii a pu in Tonzang khuapan RC biakna va la hi. Tuapan in a tamzaw RC pawlpi suakmang uh aa Siangsawn Pawlpi pen hong bei kik suak hi.

Pau Cin Hau Pasian Siangsawn Pawlpi hong nuntaak kik zia;

1995 kum in Lailui khuapan in hilhkikna ci-in Pasian kamsang thak khat hong piang khiahi. Tua kamsang pa in a neu tung aa kipan Pasian hopih na leh thupiak na te ahun ahun in zaden hi. Hih hilh kikna hongpai ding pen Pasian Kamsang pipa Tapa Pau Cin Hau in asih ma a thu vaikhah na ah na gen khol khin zohi. Tapa Pau Cin Hau a sih ding ciang in zong pau ngawh zo nawnlo in a khut me 2 lak thapai hi cihi. Tua ciang in a gei aa a kem a khoi te in bang gen nuam na hiam ci-in a kam gei ah a bil neh sak in a ngaih takciang in, "Kei leh Vum Khua Thang suan leh khaak sungpan in Pasian nasem 2 hongpiang dinghi" ci-in thu na vaikhak hi. Tua mah bang in 1995 kum ciang in Pu, Vum Khua Thang suan leh khak sungpan apiang Pasian kamsang thak Pa, Kam Suan Mang hong piang khia takpi hi. Tua bang in Pasian zatmi kamsang Pa, Kam Suan Mang in Pasian deihna bang in na hong sem toto aa, 2001 kum tak ciang-in Pasian thupiak na bang in Pasian kamsang pipa Tapa Pau Cin Hau suan leh khaak sungpan apiang ahi a zatmi Nu, Dim Hau Cing tawh hong kiteng uh in Pasian na hong semkhawm takpi uhhi. 

Tua bang in Pasian na hongsem khawm toto uh aa, Pasian in a ma mintawh a phuh sa Siangsawn pawlpi pen a bei mangsuak ding deih hetlo a hih man in 2004 kum in Teeklui khua ah a zatmi Kam Suan Mang tungtawn in hih Pau Cin Hau Pasian Pawlpi hong nungta sakkik a hihi.